Mga Bunga​—⁠Maayo kag Malain

“Ginpakita sa akon ni Jehova, kag, yari karon! duha ka alat sang mga higos . . . Tuhoy sa isa ka alat, ang mga higos maayo gid, kaangay sang mga higos nga una maluto; kag tuhoy sa isa pa ka alat, ang mga higos malain gid, nga indi makaon sa kalain.”​—⁠JEREMIAS 24:​1, 2.

1. Paano si Jehova nagpakita sing kaluoy sa iya katawhan, nga Israel, apang ano ang ila ginbalos?

ANG tuig 617 B.C.E. Napulo ka tuig lang yadto antes ang takus nga paghukom ni Jehova ginhikot batok sa Jerusalem kag sa iya katawhan. Si Jeremias 30 ka tuig na nga nagabantala sing makugi. Talupangda ang maathag nga paglaragway ni Esdras sa kahimtangan, subong masapwan sa 2 Cronica 36:15: “Si Jehova nga Dios sang ila mga ginikanan padayon nga nagpadala batok sa ila paagi sa iya mga mensahero, sa liwat kag liwat, bangod nga naluoy sia sa iya katawhan kag sa iya puluy-an.” Ano ang resulta sini tanan nga panikasog? Sing makapasubo, si Esdras nagapadayon sa pag-asoy sa bersikulo 16: “Apang padayon nga gin-uligyat nila ang mga mensahero sang matuod nga Dios kag gintamay ang iya mga pulong kag ginyubitan ang iya mga manalagna, tubtob nga nag-ibwal ang kasingkal ni Jehova batok sa iya katawhan, tubtob nga wala na sing tambal.”

2, 3. Ilaragway ang talalupangdon nga palanan-awon nga ginpakita ni Jehova kay Jeremias.

² Nagkahulugan bala ini nga ang pungsod sang Juda ginlaglag sing bug-os? Agod mahibaluan ang sabat, binagbinagon naton ang isa ka importante nga palanan-awon nga ginhatag karon kay Jeremias kag narekord sa kapitulo 24 sang tulun-an nga nagadala sang iya ngalan. Naggamit ang Dios sing duha ka alat sang mga higos sa sining palanan-awon bilang simbulo sang mga mahanabo sa tunga sang iya nakigkatipan nga katawhan. Ilaragway ini sang duha ka sahi sang mga bunga, maayo kag malain.

Maayong mga Higos sa Palanan-awon

³ Ang Jeremias kapitulo 24, bersikulo 1 kag 2, nagalaragway sang nakita sang manalagna sang Dios: “Ginpakita sa akon ni Jehova, kag, yari karon! duha ka alat sang mga higos nga nabutang sa atubangan sang templo ni Jehova, sa tapos nga si Nabocodonosor nga hari sang Babilonia nagbihag kay Jeconias nga lalaki nga anak ni Joaquim, hari sang Juda, kag sa mga prinsipe sang Juda, upod sa mga panday kag sa mga manugsalsal, gikan sa Jerusalem agod dalhon sila sa Babilonia. Tuhoy sa isa ka alat, ang mga higos maayo gid, kaangay sang mga higos nga una maluto; kag tuhoy sa isa naman ka alat, ang mga higos malain gid, nga indi makaon sa kalain.”

4. Anong makapaumpaw nga mensahe ang ginhatag sang palanan-awon tuhoy sa mga higos para sa matutom nga mga Israelinhon?

⁴ Sa tapos mapamangkot si Jeremias kon ano ang iya nakita, nagpadayon si Jehova sa pagpamulong sa bersikulo 5 tubtob 7: “Kaangay sining maayo nga mga higos, kabigon ko nga subong ang mga bihag gikan sa Juda, nga akon ipadala gikan sini nga duog pakadto sa duta sang mga Caldeanhon, sa maayong paagi. Kag ipahamtang ko ang akon mga mata sa ila sa maayong paagi, kag pabalikon ko gid sila sa sini nga duta. Patindugon ko sila, kag indi sila paggub-on; kag itanom ko sila, kag indi sila paggabuton. Hatagan ko sila sing tagipusuon sa pagkilala sa akon, nga ako si Jehova; kag dapat sila mangin akon katawhan, kag ako mismo mangin ila Dios, kay ma­gabalik sila sa akon sa bug-os nila nga tagipusuon.”

5, 6. (a) Paano ang iban nga mga Israelinhon “pinadala sa maayong paagi” sa Caldea? (b) Paano si Jehova ‘nagpahamtang sang iya mata sa maayong paagi’ sa matutom nga mga Israelinhon nga ginbihag?

⁵ Gani pasad sa ginsiling diri ni Jehova daw mas maayo nga mga tion ang yara sa palaabuton, nga ang pungsod sang Juda indi paglaglagon sing bug-os. Apang ano ang kahulugan sining alat sang maayo nga mga higos?

⁶ Si Jeconias, ukon Jehoiachin, tatlo ka bulan kag napulo ka adlaw pa lang nga naghari sa Juda antes niya gin-ampo sing kinabubut-on ang Jerusalem kay Hari Nabocodonosor. Lakip sa mga ginbihag upod sa iya amo si Daniel kag ang iya tatlo ka Hebreo nga mga kaupod nga sanday Hananias, Misael, kag Azaria, subong man si Ezequiel. Gintipigan sang hari sang Babilonia ang ila kabuhi, gani sarang masiling nga ginbantayan ni Jehova ini tanan nga bihag subong pinadala sa isa ka maayong paagi sa duta sang mga Caldeanhon. Natalupangdan bala ninyo nga nanaad man si Jehova nga ‘ipahamtang niya ang iya mga mata sa ila sa maayong paagi’? Paano ini natuman? Sang 537 B.C.E., 80 ka tuig sang ulihi, ginpahulag ni Jehova si Hari Ciro nga magpaguwa sing isa ka mando nga nagatugot sa nagkalabilin sang ila mga kaliwat nga magbalik sa duta sang Juda. Ginpatindog liwat sining matutom nga mga Judiyo ang siudad sang Jerusalem; nagtukod sila sing isa ka bag-o nga templo para sa pagsimba sa ila Dios, nga si Jehova; kag nagbalik sila sa iya sa bug-os nila nga tagipusuon. Gani sa sini tanan, para kay Jehova ining mga bihag kag ang ila mga kaliwat nangin ­subong sang maayo gid nga mga higos nga una naluto.

7. San-o kag paano ang mata ni Jehova sa modernong Jeremias nga klase sa “maayong paagi”?

⁷ Mahimo madumduman ninyo nga sa nagligad nga artikulo tuhoy sa matagnaon nga mga pulong ni Jeremias, natun-an naton nga may kahulugan sila sa aton ika-20 nga siglo. Kag ang kapitulo 24 indi eksepsion. Sa tion sang masubo nga mga tuig sang Inaway Kalibutanon I, madamo sang dedikado nga mga alagad ni Jehova ang naimpluwensiahan sang Babilonia nga Daku sa lainlain nga mga paagi. Apang ang mabinantayon nga mata ni Jehova ‘napahamtang sa ila sa maayong paagi.’ Gani natabo nga paagi sa Daku Pa nga Ciro, nga si Cristo Jesus, ginbungkag ni Jehova ang gahom sang Babilonia nga Daku sa ibabaw nila kag amat-amat sila nga gindala sa espirituwal nga paraiso. Ining espirituwal nga mga Israelinhon nagsunod kag nagbalik kay Jehova sa bug-os nila nga tagipusuon. Nian, sang 1931, nalipay sila sa pagbaton sa ngalan nga mga Saksi ni Jehova. Sa pagkamatuod, masiling na sa karon nga sila nangin kaangay sang isa ka alat sang maayo gid nga mga higos sa mga mata ni Jehova.

8. Sa anong paagi ginbantala sa luwas sang mga Saksi ni Jehova ang tulad-higos nga katam-is sang mensahe sang Ginharian?

⁸ Kag wala ginwasi sang mga Saksi ni Jehova ang katuyuan sang dibagay nga kaluoy sang Dios sa paghilway sa ila gikan sa Babilonia nga Daku. Wala nila pagtagua ang tulad-higos nga katam-is sang maayong balita nga mensahe sang Ginharian sa ila kaugalingon, kundi ginbantala nila ini sa luwas bilang pagsunod sa mga pulong ni Jesus sa Mateo 24:14: “Ibantala ining maayong balita sang Ginharian sa bug-os napuy-an nga duta subong panaksi sa tanan nga kapungsuran.” Ano ang resulta? Kapin sa 4,700,000 ka tulad karnero nga indi espirituwal nga mga Israelinhon ang nagguwa sa Babilonia nga Daku!

Ang Malain nga mga Higos sa Palanan-awon

9. Sin-o ang ginlaragway sang malain nga mga higos sa palanan-awon ni Jeremias, kag ano ang natabo sa ila?

⁹ Apang ano ang masiling sa alat sang malain nga mga higos sa palanan-awon ni Jeremias? Ginaliso karon ni Jeremias ang iya igtalupangod sa mga pulong ni Jehova nga masapwan sa Jeremias kapitulo 24, bersikulo 8 tubtob 10: “Kaangay sang malain nga mga higos nga indi makaon sa kalain, amo gid sini ang ginsiling ni Jehova: ‘Gani itugyan ko si Sedequias nga hari sang Juda kag ang iya mga prinsipe kag ang nagkalabilin sang Jerusalem nga nabilin pa sa sini nga duta kag ang mga nagapuyo sa duta sang Egipto​—⁠itugyan ko man sila para sa pagkurog, para sa kalamidad, sa tanan nga ginharian sang duta, para sa kahuluy-an kag para sa hulubaton, para sa pag-uligyat kag para sa pagpakamalaut, sa tanan nga duog nga laptahan ko sa ila. Kag ipadala ko batok sa ila ang espada, ang tiggulutom kag ang kamatay, tubtob nga maubos sila gikan sa duta nga ginhatag ko sa ila kag sa ila mga ginikanan.’ ”

10. Ngaa ginkabig ni Jehova si Sedequias nga isa ka ‘malain nga higos’?

¹⁰ Gani si Sedequias nangin ‘malain nga higos’ sa mga mata ni Jehova. Wala lamang sia magrebelde batok kay Hari Nabocodonosor paagi sa indi pagtuman sa iya ginpanumpa nga katutom sa sadto nga hari sa ngalan ni Jehova kundi ginsikway man niya sing bug-os ang kaluoy ni Jehova nga ginpakita sa iya paagi kay Jeremias. Sa katunayan, nahimo pa niya nga ipabilanggo si Jeremias! Indi katingalahan nga ginsumaryo ni Esdras ang panimuot sang hari sing subong sini sa 2 Cronica 36:12: “Nagpadayon sia sa paghimo sing malain sa mga mata ni Jehova nga iya Dios. Wala sia magpaubos sang iya kaugalingon.” Sa mga mata ni Jehova si Sedequias kag ang mga nabilin sa Jerusalem kaangay sang isa ka alat sang malain, dunot nga mga higos!

Dunot nga Malaragwayon nga mga Higos sa Aton Adlaw

11, 12. Sin-o ang ginakilala subong malain nga mga higos karon, kag ano ang mahanabo sa ila?

¹¹ Maghulonghulong sa palibot sang kalibutan karon. Sa banta ninyo makakita ayhan kita sing isa ka malaragwayon nga alat sang malain nga mga higos? Binagbinagon naton ang mga katunayan paagi sa pagpaanggid sang aton adlaw sa adlaw ni Jeremias. Sa sining ika-20 nga siglo, ginagamit ni Jehova ang Jeremias nga klase, ang hinaplas nga nagkalabilin, sa pagpaandam sa mga punsod sing padayon tuhoy sa iya nagapakari nga kasingkal sa dakung kapipit-an. Ginpangabay niya ang pungsudnon nga mga grupo nga hatagan sia sing himaya nga nagakadapat sa iya ngalan, nga simbahon sia sa espiritu kag kamatuoran, kag kilalahon ang iya nagahari nga Anak, nga si Cristo Jesus, subong matarong nga Manuggahom sang duta. Ano ang reaksion? Pareho lang sang sa adlaw ni Jeremias. Ang mga pungsod padayon nga nagahimo sing malain sa mga mata ni Jehova.

¹² Sin-o ang mga nagasulsol sining rebelyuso nga panimuot? Sin-o ang padayon nga nagauligyat sa sining tulad-Jeremias nga mga mensahero sang Dios paagi sa pagduhaduha sa ila awtoridad sa paghikot subong mga ministro sang Dios? Sin-o ang padayon nga nagatamay sa Pulong sang Dios? Sin-o karon ang yara sa likod sang kalabanan nga paghingabot sa mga Saksi ni Jehova? Ang sabat maathag nga makita sang tanan​—⁠amo ang Cristiandad, ilabi na ang mga klero! Kag tan-awa lamang ang tanan nga dunot kag malain nga mga bunga sang Cristiandad nga ginhambalan sa nagligad nga artikulo. A, huo, may yara gid isa ka simbuliko nga alat sang malain nga mga higos sa duta karon. Sa katunayan, si Jehova nagasiling nga sila indi “makaon sa kalain.” Ang mga pulong ni Jehova paagi kay Jeremias nagalanog tubtob sa aton adlaw: ‘Magadangat sila sa ila katapusan’! Ang kasingkal ni Jehova batok sa Cristiandad indi makasapo sing pag-ayo.

Isa ka Nagapaandam nga Leksion Para sa Aton

13. Bangod sang mga pulong ni Pablo nga masapwan sa 1 Corinto 10:​11, paano naton dapat hangpon ang palanan-awon tuhoy sa duha ka alat sang mga higos?

¹³ Samtang ginausisa naton ang mga kahulugan sang inspirado nga nagapaandam nga mensahe ni Jeremias, ang mga pulong ni apostol Pablo sa 1 Corinto 10:11 nagalanog sa aton mga dulunggan: “Karon ining mga butang nahanabo sa ila subong nga paandam, kag ginsulat sila sa pagpaandam sa aton nga naabutan sang katapusan sang sistema sang mga butang.” Personal bala nga ginpasalop naton sa aton tagipusuon ang paandam nga ginpaalinton sa aton sining palanan-awon tuhoy sa duha ka alat sang mga higos? Ang aton ginahambalan isa ka kinahanglanon nga bahin sang mga butang nga natabo sa Israel subong nagapaandam nga halimbawa para sa aton.

14. Paano nagbalos ang Israel sa mahigugmaon nga pag-atipan ni Jehova?

¹⁴ Bilang katapusan, dumdumon naton ang mga pulong ni Jehova kay Hari David tuhoy sa Israel, nga masapwan sa 2 Samuel 7:10: “Magatangdo gid ako sing isa ka duog para sa akon katawhan nga Israel kag itanom sila.” Mahigugmaon nga gin-atipan ni Jehova ang iya katawhan, nga Israel, sa tanan nga paagi. May rason gid ang mga Israelinhon sa pagpatubas sing maayong mga bunga sa ila kabuhi. Dapat lamang sila mamati sa balaan nga panudlo ni Jehova kag tumanon ang iya mga sugo. Apang, pila lamang sa ila ang naghimo sina. Ang kalabanan sa ila batinggilan kag balingag kay nagpatubas sila sing malain, dunot nga mga bunga.

15. Paano ang espirituwal nga Israel karon kag ang ila tulad-karnero nga mga kaupod nagbalos sa kaluoy ni Jehova?

¹⁵ Ti, ano naman ang masiling sa aton adlaw? Nagpakita si Jehova sing daku nga kaluoy sa iya nagkalabilin sang espirituwal nga Israel kag sa ila tulad-karnero nga mga kaupod. Ang iya mata pirme nga nagabantay sa ila sugod sang ila espirituwal nga kahilwayan sang 1919. Subong sang gintagna niya paagi kay Isaias, nagabaton sila sa adlaw-adlaw sing balaan nga instruksion gikan sa labing daku nga Manunudlo sa uniberso, si Jehova nga Dios. (Isaias 54:13) Ining balaan nga panudlo, nga ginahatag paagi sa iya mahal nga Anak, nga si Jesucristo, nagresulta sa bugana nga paghidait sa tunga nila kag dalayon nga nagdala sa ila sa isa ka suod pa nga kaangtanan kay Jehova. Daw ano ka dalayawon nga espirituwal nga palibot ang ginahatag sini para sa aton tanan nga makilala si Jehova, mamati sa iya, kag padayon nga magpatubas sing maayong mga bunga sa aton kabuhi​—⁠mga bunga nga magadala sing kadayawan kay Jehova! Nagakahulugan ini sing aton gid kabuhi!

16. Anong personal nga pag-aplikar ang sarang mahimo sang tagsatagsa sa aton sa palanan-awon tuhoy sa duha ka alat sang mga higos?

¹⁶ Apang walay sapayan sang tanan nga dibagay nga kaluoy sang Dios, may pila gihapon nga nangin rebelyuso kag batinggilan, subong sang madamo sa Juda anay, kag nagapatubas sing malain, dunot nga mga bunga sa ila kabuhi. Daw ano kasubo ini! Kabay nga wala sing isa sa aton ang malipat sa nagapaandam nga leksion nga ginpadaku sa aton sining duha ka alat sang mga higos upod sa ila mga bunga​—⁠maayo kag malain. Samtang madasig nga nagahilapit ang nagakaigo nga paghukom ni Jehova batok sa apostata nga Cristiandad, kabay nga ipasalop naton sa aton tagipusuon ang laygay ni apostol Pablo: “Maggawi sing takus kay Jehova sa katuyuan nga pahamut-an sia sing bug-os samtang padayon kamo nga nagapamunga sa tagsa ka maayong buhat.”​—⁠Colosas 1:⁠10.

Repaso “Mga Bunga—Maayo kag Malain” kag parapo 1-4 sang “Ang Pagpakigsuay ni Jehova Batok sa mga Pungsod”

◻ Ano ang ginalaragway sang alat sang maayo nga mga higos?

◻ Paano nahangpan ang alat sang malain nga mga higos sa palanan-awon?

◻ Anong nagapaandam nga leksion ang ginahatag sa aton sang mensahe ni Jeremias?

◻ Ano ang talalupangdon sa tuig 607 B.C.E.? kag 1914 C.E.?

[Piktyur sa pahina 15]

Kaangay sang maayong mga higos, ang katawhan sang Dios nagpamunga sing matam-is nga bunga sang Ginharian

[Piktyur sa pahina 15]

Ang Cristiandad nangin kaangay sang isa ka alat sang malain nga mga higos