Ang may mga salabton ang manabat kon indi nila pagtagudilian ang sala. Ginhulog sang Dios ang Jerusalem “gikan sa langit pa duta,” nagatugot sang kalaglagan niya kag sang iya “palatungan,” ang templo. (Salmo 132:⁠7) Busa “ginpasipalahan [niya] ang ginharian” sang Juda. Subong isa lamang ka layanglayang, ang templo ginlaglag sang mga kaaway nga ang singgit sang kadalag-an kaangay sang singgit sa kapiestahan. Ang nagatagumatayon nga kabataan nagapakiluoy sa ila mga iloy sing kalan-on. Apang sin-o gid ang balasulon? Ang dimatuod nga mga manalagna nga naghimo sing nagapatalang nga pagpahayag sa baylo sang pagtagudili sa sala sang Jerusalem. (Jeremias 14:13) Ang pangamuyo nagakaigo, kay tuman kadamo ang napatay sa sining ‘adlaw sang kasingkal ni Jehova’!​—⁠2:​1-22.

◻ 2:​6​—⁠Ang “layanglayang” sang Dios amo ang templo sang Jerusalem. Sang ginlaglag ina nga santuario sang mga Babilonianhon, gintugutan niya ini nga ‘malaglag,’ subong sang payagpayag sa katamnan. Inang temporaryo nga pasilungan gikan sa nagatagiti nga adlaw ginguba.