Ginlamon Bala sini si Jonas?

ANG Biblia nagasugid sa aton nga si Jonas, nga manalagna ni Jehova sang ikasiam nga siglo B.C.E., sang nalagyo sa iya asaynment, nagsakay sa barko. Sa maunos nga paglakbay sa Mediteraneo, gintagbong sia sang mga sakayanon sa dagat. “Si Jehova nag-aman sing daku nga isda sa paglamon kay Jonas, kag si Jonas didto sa tiyan sang isda sing tatlo ka adlaw kag tatlo ka gab-i.”​—⁠Jonas 1:​3-17.

Ang iban nagasiling, ‘Imposible! Wala sing sapat sa dagat ang makalamon sa tawo.’ Apang mahimo ini sang ­sperm ­whale ukon sang dakung puti nga bagis. Ang National Geographic (Disiembre 1992) naghatag sing isa pa ka posibilidad​—⁠ang balyena nga bagis. Kilala nga pinakadaku nga bagis, nagadaku ini sing tubtob sa 20 metros kalaba kag nagabug-at sing 70 toneladas.

“Ang dikinaandan nga anatomiya sang panunaw sang balyena nga bagis nagasakdag sang mga sugilanon ni Jonas. Mahapos mahanduraw ang imo kaugalingon nga dihungod nga nasuyop sang baba sang balyena nga bagis, nga daku kaayo . . . Ang daw yungib nga baba bisan sang magamay nga adulto nga balyena nga bagis madali makapaigo sa duha ka Jonas.”

Ang balyena nga bagis nagakaon sing magagmay nga plank­ton kag krill, nga “nagadalhay sa tutunlan pakadto sa daku kag maunat nga kalan-an nga amo ang car­diac stom­ach.” Apang, paano ang isa makaguwa? Ang National Geographic nagasiling: “Ang mga bagis may yara dimasingki nga paagi sa pagluad sang nalamon nila nga dalagku nga mga butang nga mabudlay tunawon . . . Amat-amat nga matinluan sang bagis ang iya car­diac stom­ach paagi sa pagbaliskad kag pagtulod sini paguwa sa baba. . . . Gani, makaguwa ka nga nagadalhay sa natabonan sing danlakdanlak nga alpombra, mas maniwang apang ayhan may natun-an bangod sang inagihan.”

Karon ang mga balyena nga bagis indi makita sa Mediteraneo, bisan pa nga nakita sila sa aminhan nayon sa Siudad sang New York. Didto bala sila anay sa Mediteraneo sang panahon ni Jonas? Sin-o gid ang nakasiguro? Wala ginahatag sing espesipiko sang Biblia kon ano nga sahi sang sapat sa dagat ang gingamit ni Jehova, apang ginpalig-on mismo ni Jesus nga ang kasaysayan ni Jonas matuod.​—⁠Mateo 12:​39, 40.

[Picture Credit Line sa pahina 32]

Norbert Wu/Peter Arnold Inc.