“Ang isa ka tawo may duha ka anak nga lalaki,” asoy ni Jesus. “Nagpalapit sia sa nahauna kag nagsiling, ‘Anak ko, kadto ka sa pagpangabudlay karon sa ulubasan.’ Kag nagsabat ining isa, ‘Makadto ako, ginuo,’ apang wala sia magkadto. Nagpalapit sia sa ikaduha, kag amo man ang iya ginsiling. Nagsabat ining isa, ‘Indi ako.’ Sang ulihi naghinulsol sia kag naglakat. Sin-o sa duha ang naghimo sang kabubut-on sang iya amay?” pamangkot ni Jesus.

Gani nagpaathag si Jesus: “Sa pagkamatuod nagasiling ako sa inyo nga ang mga manugsukot sing buhis kag ang makihilawason nga mga babayi nagasulod sing una sa inyo sa ginharian sang Dios.” Ang mga manugsukot sing buhis kag ang makihilawason nga mga babayi nagdumili sang primero sa pag-alagad sa Dios. Apang, kaangay sang ikaduha nga anak, naghinulsol sila kag nag-alagad sa iya. Sa pihak nga bahin, ang relihioso nga mga lider, kaangay sang nahauna nga anak, nagpangangkon sa pag-alagad sa Dios, apang subong ginsiling ni Jesus: “Nagkari si Juan [Bautista] sa inyo sa dalan sang pagkamatarong, apang wala kamo magtuo sa iya. Apang ang mga manugsukot sing buhis kag ang makihilawason nga mga babayi nagtuo sa iya, kag bisan nakita ninyo ini, wala gid kamo maghinulsol sang ulihi kag magtuo sa iya.”