“Kay sa Tagsa ka Butang May Gintalana nga Tion”

“Kay sa tagsa ka butang may gintalana nga tion, bisan tion sa tagsa ka hilikuton sa idalom sang langit.”—MANUGWALI 3:1.

1. Ano ang kabudlayan sang di-himpit nga mga tawo, kag sa ano ini nagdul-ong sa pila ka hitabo?

ANG mga tawo masunson nga nagasiling, “Kuntani ginhimo ko ini dayon.” Ukon ayhan pagkatapos matabo, “Kuntani naghulat anay ako.” Ginapakita sini nga mga reaksion ang kabudlayan sang di-himpit nga mga tawo sa pagpat-od sing husto nga tion agod himuon ang pila ka butang. Ini nga limitasyon nangin kabangdanan sang pagkaguba sang mga relasyon. Nagdul-ong ini sa kalugaw-an kag kapaslawan. Kag ang malain sa tanan, nagpaluya ini sang pagtuo sang pila ka tawo kay Jehova kag sa iya organisasyon.

2, 3. (a) Ngaa maalamon nga batunon ang pagpat-od ni Jehova sa gintalana nga tion? (b) Ano dapat ang aton timbang nga pagtamod may kaangtanan sa katumanan sang tagna sang Biblia?

² Bangod may kaalam kag paghantop nga wala sa mga tawo, si Jehova may ikasarang nga mahibaluan nga daan, kon luyag niya, ang resulta sang tanan nga ginahimo. Sarang niya mahibaluan ang “katapusan kutob sa ginsuguran.” (Isaias 46:10) Gani, di-masinalaypon nga mapili niya ang labing maayo nga tion sa paghimo sang bisan ano nga luyag niya himuon. Gani, sa baylo nga magsalig sa aton mismo masinalaypon nga paghangop sa panahon, maalamon nga batunon naton ang pagpat-od ni Jehova sa gintalana nga tion!

³ Halimbawa, ang hamtong nga mga Cristiano mainunungon nga nagahulat sang gintalana nga tion ni Jehova para matuman ang pila ka tagna sa Biblia. Nagapabilin sila nga masako sa pag-alagad sa iya, nga pirme ginadumdom sing maathag ang prinsipio sa Panalabiton 3:26: “Maayo kon ang isa maghulat, sing hipos, sang pagluwas ni Jehova.” (Ipaanggid ang Habacuc 3:16.) Sa amo man nga tion, kumbinsido sila nga ang ginpahibalo ni Jehova nga pagpatuman sang paghukom, “bisan pa magpalantang ini, . . . pat-od nga magaabot ini. Indi ini magpalantang.”—Habacuc 2:3.

4. Paano ang Amos 3:7 kag Mateo 24:​45 magabulig sa aton nga maghulat sing mapailubon kay Jehova?

⁴ Sa pihak nga bahin, kon indi naton mahangpan sing bug-os ang pila ka teksto sang Biblia ukon ang mga paathag nga ginahatag sang mga publikasyon sang Watch Tower, may rason bala kita nga mangin di-mapailubon? Ang paghulat sa gintalana nga tion ni Jehova sa pagpaathag sang mga butang amo ang dalanon sang kaalam. “Kay ang Soberanong Ginuo nga si Jehova indi maghimo sing isa ka butang kon indi niya anay mapahayag ang iya kompidensiyal nga butang sa iya mga alagad nga mga manalagna.” (Amos 3:7) Daw ano ka makalilipay nga saad! Apang dapat naton mahangpan nga ginapahayag ni Jehova ang iya kompidensiyal nga mga butang sa tion nga ginapakamaayo niya. Tungod sina ginhatagan niya sing awtoridad ang “matutom kag mainandamon nga ulipon” sa paghatag sa iya katawhan sang ‘ila [espirituwal nga] pagkaon sa nagakaigo nga tion.’ (Mateo 24:45) Busa, wala sing rason nga mabalaka kita sing sobra, ukon bisan magpalibog, nga ang pila ka butang wala mapaathag sing maayo. Sa baylo, makasalig kita nga kon mapailubon kita nga magahulat kay Jehova, magahatag sia, paagi sa matutom nga ulipon, kon ano gid ang kinahanglanon “sa nagakaigo nga tion.”

5. Ano ang mabulig sang pagbinagbinag sa Manugwali 3:​1-8?

⁵ Ang maalam nga si Hari Solomon naghambal tuhoy sa 28 ka nagakalainlain nga butang, ang tagsa sini may kaugalingon nga “gintalana nga tion.” (Manugwali 3:1-8) Ang paghangop sa kahulugan kag ginapahangop sang ginsiling ni Solomon magabulig sa aton nga mahibaluan ang husto nga tion kag di-husto nga tion para sa pila ka buhat, suno sa pagtamod sang Dios. (Hebreo 5:14) Ini naman magabulig sa aton sa pagdihon sang aton kabuhi sing nagakaigo.

“Tion sa Paghibi kag Tion sa Pagkadlaw”

6, 7. (a) Ano ang mga kabangdanan nga ‘nagapahibi’ karon sa nagakabalaka nga mga tawo? (b) Paano ginatinguhaan sang kalibutan nga batuan ang serioso nga mga kahimtangan sini?

⁶ Bisan pa may “tion sa paghibi kag tion sa pagkadlaw,” sin-o ang indi magapili sang naulihi sangsa nauna? (Manugwali 3:4) Masubo man ihambal, nagakabuhi kita sa kalibutan nga nagahatag gid sa aton sing mga rason sa paghibi. Ang makapulung-aw nga mga balita nagapangibabaw sa media. Ginakugmat kita kon mabatian naton ang tuhoy sa mga pamatan-on nga nagtiro sang mga masigkabumulutho sa eskwelahan, ang tuhoy sa mga ginikanan nga nagaabuso sang ila mga kabataan, ang tuhoy sa mga terorista nga nagapatay ukon nagakumpol sang inosente nga mga biktima, kag ang tuhoy sa ginatawag nga kinaugali nga mga kalamidad nga nagahapay sa mga kabuhi sang tawo kag propiedad. Ang ginagutom, nagapalangdalom-ang-mata nga mga kabataan kag ang nagapinalagyo nga mga refugee nagakuha sang aton igtalupangod sa telebisyon. Ang wala anay mahibalui nga mga tinaga subong sang ethnic cleansing (pagpapas sa isa ka etniko nga grupo), AIDS, germ warfare (inaway nga nagagamit sang makahalalit kag magagmay kaayo nga mga organismo kaangay sang bakterya subong mga hinganiban), kag El Niño nagatuga karon sing kabalaka sa aton mga hunahuna kag mga tagipusuon—ang tagsa sa iya kaugalingon nga paagi.

⁷ Wala sing duhaduha sa sini, ang kalibutan karon puno sing kasubo kag kasakit. Walay sapayan sina, agod pakanayon ang pagkaserioso sang kahimtangan, ang industriya sang kalingawan padayon nga nagaaman sing manabaw, mapigaw, sa masami imoral kag masingki nga mga butang, nga gindesinyo agod patalangon kita nga indi pagsapakon ang pag-antos sang iban. Apang ang di-mainulikdon nga espiritu sang binuang nga paglahog kag linangolango nga pagkadlaw nga ginahatag sang kalingawan indi dapat masal-an nga matuod nga kalipay. Ang kalipay nga isa ka bunga sang espiritu sang Dios isa ka butang nga indi gid mahatag sang kalibutan ni Satanas.—Galacia 5:22, 23; Efeso 5:3,4.

8. Dapat bala hatagan sing daku nga importansia sang mga Cristiano karon ang paghibi ukon ang pagkadlaw? Ipaathag.

⁸ Nakahibalo sang makahalanusbo nga kahimtangan sang kalibutan, mahangpan naton nga indi gid karon ang tion nga hatagan sing daku nga importansia ang pagkadlaw. Indi ini ang tion nga magkabuhi lamang para sa kalingawan kag paglipaylipay ukon unahon ang ‘pagpangalipay’ sangsa paghimud-os sa espirituwal nga mga butang. (Ipaanggid ang Manugwali 7:2-4.) “Ang mga nagagamit sa kalibutan” dapat mangin “subong sang mga wala nagagamit sini sing bug-os,” siling ni apostol Pablo. Ngaa? Bangod “ang danyag sining kalibutan nagabalhin.” (1 Corinto 7:31) Ang matuod nga mga Cristiano nagakabuhi kada adlaw nga nagakilala sing bug-os sang pagkaserioso sang mga tion nga sa sini kita nagakabuhi.—Filipos 4:8.

Walay Sapayan nga Nagahibi, Tunay nga Malipayon!

9. Ano ang makapahanusbo nga kahimtangan sang mga adlaw antes sang Anaw, kag ano ang kahulugan sini para sa aton karon?

⁹ Ang mga tawo nga nagkabuhi sang panahon sang bug-os globo nga Anaw wala anay sing serioso nga pagtamod sa kabuhi. Ginhimo nila ang ila adlaw-adlaw nga hilikuton kag wala ginhibian ang “kalautan sang tawo [nga] bugana sa duta,” nagatan-aw sing di-masinapakon samtang “ang duta napun-an sing kasingki.” (Genesis 6:5,11) Ginpatalupangod ni Jesus yadtong makapahanusbo nga kahimtangan, kag gintagna niya ang kaanggid nga panimuot sa tunga sang mga tawo sa aton adlaw. Nagpaandam sia: “Kay subong nila sa sadtong mga adlaw sa wala pa ang anaw, nga nagakaon kag nagainom, ang mga lalaki nagapangasawa kag ang mga babayi ginahatag sa pag-asawahay, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nag-anod sa ila nga tanan, amo man ang presensia sang Anak sang tawo.”—Mateo 24:38, 39.

10. Paano ginpakita sang mga Israelinhon nga nagkabuhi sang panahon ni Hageo nga wala nila mahangpan ang gintalana nga tion ni Jehova?

¹⁰ Mga 1,850 ka tuig pagkatapos sang Anaw, sang panahon ni Hageo, madamong Israelinhon ang nagpakita sing kaanggid nga kakulang sing daku nga interes sa espirituwal nga mga butang. Bangod masako sa paghingamo sing personal nga mga intereses, wala nila mahantop nga ang ila tion nga ginakabuhian amo gali ang tion agod hatagan sing importansia ang mga intereses ni Jehova. Aton mabasa: “Kon tuhoy sa sining katawhan, nagasiling sila: ‘Ang tion wala pa mag-abot, ang tion sang balay ni Jehova, agod patindugon ini.’ Kag ang pulong ni Jehova padayon nga nag-abot paagi kay Hageo nga manalagna, nga nagasiling: ‘Ini bala ang tion agod magpuyo kamo sa nakisamihan nga mga balay, samtang ining balay guba? Kag karon amo ini ang ginasiling ni Jehova sang mga kasuldadusan, “Ipahamtang ninyo ang inyo tagipusuon sa inyo mga dalanon.”’”—Hageo 1:1-5.

11. Anong mga pamangkot ang nagakaigo nga ipamangkot naton sa aton kaugalingon?

¹¹ Subong mga Saksi ni Jehova karon, nga may mga responsabilidad kag mga pribilehiyo sa atubangan ni Jehova nga kaangay sang mga Israelinhon sang panahon ni Hageo, maayo man nga ipahamtang naton ang aton tagipusuon sa aton mga dalanon, nga ginahimo ini sing serioso gid. Kita bala “nagahibi” bangod sang mga kahimtangan sa kalibutan kag sang pasipala nga ginadala sini sa ngalan sang Dios? Nasakitan bala kita kon ginapanghiwala sang mga tawo ang pagluntad sang Dios ukon hayag nga wala nagasapak sang iya matarong nga mga prinsipio? Ang aton bala reaksion kaangay sang natandaan nga mga indibiduwal nga nakita ni Ezequiel sa isa ka palanan-awon sang nagligad nga 2,500 ka tuig? Tuhoy sa ila, aton mabasa: “Si Jehova nagsiling sa [lalaki nga may tintirohan sang sekretaryo]: ‘Latas ka sa tunga sang siudad, sa tunga sang Jerusalem, kag butangan mo sing tanda ang mga agtang sang mga tawo nga nagapanghayhay kag nagabakho sa tanan nga kalangil-aran nga ginahimo sa tunga sini.’”—Ezequiel 9: 4.

12. Ano ang kahulugan sang Ezequiel 9:​5, 6 para sa mga tawo sa karon?

¹² Ang kahulugan sini nga rekord para sa aton karon nagaathag kon mabasa naton ang mga instruksion sa anom ka lalaki nga may mga hinganiban sa paglaglag: “Latas kamo sa siudad sa ulihi niya kag magpanglabo. Indi magkaluoy ang inyo mata, kag indi kamo magkaawa. Ang tigulang nga lalaki, ang pamatan-on nga lalaki kag ang ulay kag ang magamay nga bata kag ang mga babayi patyon ninyo—tubtob malaglag. Apang kay bisan sin-o nga tawo nga may tanda indi kamo magpalapit, kag sa akon santuaryo kamo magsugod.” (Ezequiel 9:5,6) Ang aton paglampuwas sa sinang nagahilapit sing madasig nga dakung kapipit-an nagadepende sa aton pagkilala nga karon gid ang tion sa paghibi.

13, 14. (a) Ano nga sahi sang mga tawo ang ginsiling ni Jesus nga malipayon? (b) Ipaathag kon ngaa sa banta mo ini nga paglaragway nagakaigo gid sa mga Saksi ni Jehova.

¹³ Sa pagkamatuod, ang katunayan nga ang mga alagad ni Jehova ‘nagahibi’ bangod sang makahalanusbo nga kahimtangan sang kalibutan wala nagapugong sa ila pagkalipay. Sa kabaliskaran! Sila gid ang pinakamalipayon nga grupo sang mga tawo sa duta. Si Jesus naghatag sing talaksan para sa kalipay sang nagsiling sia: “Malipayon ang mga mahunahunaon sang ila espirituwal nga kinahanglanon, . . . ang mga nagalalaw, . . . ang mga malulo, . . . ang mga ginagutom kag ginauhaw sa pagkamatarong, . . . ang mga maluluy-on, . . . ang mga putli sing tagipusuon, . . . ang mga mahidaiton, . . . ang mga ginahingabot tungod sa pagkamatarong.” (Mateo 5:3-10) Madamo nga ebidensia ang nagapakita nga ini nga paglaragway nagakaigo sa mga Saksi ni Jehova, sa kabilugan, sangsa bisan ano iban pa nga relihiosong organisasyon.

¹⁴ Ilabi na sugod sang pagpasag-uli sa matuod nga pagsimba sang 1919 nga ang malipayon nga katawhan ni Jehova may rason sa “pagkadlaw.” Sa espirituwal, nabatyagan nila ang makalilipay nga eksperiensia sadtong nagpauli halin sa Babilonia sang ikan-om nga siglo B.C.E.: “Sang gintipon liwat ni Jehova ang mga nabihag sa Sion, nangin kaangay kita sang mga nagadamgo. Sadto nga tion ang aton baba napuno sang kinadlaw, kag ang aton dila sang singgit sang kasadya. . . . Si Jehova nakahimo sing daku nga butang sa ginhimo niya sa aton. Nasadyahan kita.” (Salmo 126:1-3) Apang, bisan sa tunga sang espirituwal nga kinadlaw, ang mga Saksi ni Jehova maalamon nga nagadumdom sang pagkaserioso sang mga tion. Sa tion nga ang bag-ong kalibutan mangin katunayan kag ang mga pumuluyo sang duta ‘nakapanguyapot sing hugot sa matuod nga kabuhi,’ nian magaabot ang tion nga buslan sing dayon ang paghibi sing kinadlaw.—1 Timoteo 6:19; Bugna 21:3,4.

“Tion sa Paghakos kag Tion sa Paglikaw sa Paghakos”

15. Ngaa ang mga Cristiano mapilion sa mga abyan?

¹⁵ Ang mga Cristiano mapilion kon kay sin-o sila makig-abyan. Ginadumdom nila ang paandam ni Pablo: “Indi kamo magtalang. Ang malain nga kaupdanan nagadunot sang mapuslanon nga mga batasan.” (1 Corinto 15:33) Kag ang maalam nga si Hari Solomon nagsiling: “Sia nga nagalakat upod sa maalam nga mga tawo magaalam, apang sia nga nagapakig-angot sa mga buangbuang magaantos.”—Hulubaton 13:20.

16, 17. Paano ginatamod sang mga Saksi ni Jehova ang pagpakig-abyan, pag-date, kag pagminyo, kag ngaa?

¹⁶ Ginapili nga mga abyan sang mga Saksi ni Jehova ang mga indibiduwal nga nagahigugma kay Jehova kag sa iya pagkamatarong kaangay nila. Bisan pa nga ginaapresyar kag nagakalipay sila sa pagpakig-upod sang ila mga abyan, maalamon nila nga ginalikawan ang sobra ka matinuguton nga pagtamod tuhoy sa pag-date nga lapnag sa pila ka pungsod sa karon. Sa baylo nga magpatuyang sa sini subong di-makahalalit nga pagpangalipay, ginatamod nila ang pag-date subong isa ka serioso nga tikang padulong sa pag-asawahay nga dapat lamang himuon kon ang isa handa na sa pisikal, mental, kag espirituwal—subong man hilway sing Makasulatanhon—sa pagsulod sa isa ka permanente nga relasyon.—1 Corinto 7:36.

¹⁷ Ang iban mahimo magabatyag nga kinaraan na ini nga pagtamod tuhoy sa pag-date kag pagminyo. Apang ang mga Saksi ni Jehova wala nagapaimpluwensia sa pag-ipit sang mga katubotubo sa ila pagpili sing mga abyan ukon sa ila mga desisyon may kaangtanan sa pag-date kag pagminyo. Nahibaluan nila nga “ang kaalam ginapamatud-an nga matarong paagi sa mga buhat sini.” (Mateo 11:19) Pirme nahibaluan ni Jehova ang pinakamaayo, gani ginatuman nila sing serioso ang iya laygay nga magminyo “lamang sa Ginuo.” (1 Corinto 7:39; 2 Corinto 6:14) Ginalikawan nila ang padasudaso nga pagminyo upod ang sayop nga panghunahuna nga ang diborsio ukon pagbulagay kalahamut-an nga mga mapilian kon ang pag-asawahay magahuyang. Nagahinguyang sila sang ila tion sa pagpangita sing nagakaigo nga tiayon, nakahibalo nga sa tion nga makasumpaanay na sa pag-asawahay, ang kasuguan ni Jehova naaplikar: “Gani indi na sila duha, kundi isa ka unod. Busa, ang gintingob sang Dios dili pagbulagon sang tawo.”—Mateo 19:6; Marcos 10:9.

18. Ano ang panugod para sa isa ka malipayon nga pag-asawahay?

¹⁸ Ang pag-asawahay isa ka bug-os kabuhi nga kasugtanan nga nagakabagay sing mahalungon nga pagplano. Ang lalaki makatarunganon nga magapamangkot sang iya kaugalingon, ‘Sia gid bala ang nagakaigo nga asawa para sa akon?’ Apang sing importante man, dapat sia mamangkot, ‘Ako gid bala ang nagakaigo nga bana para sa iya? Isa bala ako ka hamtong nga Cristiano nga makaatipan sa iya espirituwal nga mga kinahanglanon?’ Obligasyon sang duha ka manugminyo sa atubangan ni Jehova nga mangin mabakod sa espirituwal, nga makasarang sa pagtigayon sing malig-on nga pag-asawahay nga kalahamut-an sa Dios. Linibo ka Cristianong mag-asawa ang makapamatuod nga bangod sang pagpadaku sini sa paghatag sa baylo sang pagbaton, ang bug-os tion nga ministeryo amo ang labing maayo nga panugod para sa isa ka malipayon nga pag-asawahay.

19. Ngaa ang iban nga mga Cristiano nagapabilin nga di-minyo?

¹⁹ Ang pila ka Cristiano ‘nagalikaw sa paghakos’ paagi sa pagdesisyon nga magpabilin nga di-minyo tungod sa maayong balita. (Manugwali 3:5) Ang iban nagapaisol sang pagminyo tubtob nga sa banta nila sangkol na sila sa espirituwal nga makaganyat sing isa ka nagakaigo nga tiayon. Apang dumdumon man naton ang di-minyo nga mga Cristiano nga nagahandum sang kahirop kag kaayuhan sang pag-asawahay apang wala makakita sing tiayon. Makapat-od kita nga si Jehova nagakalipay bangod wala nila ginkompromiso ang mga prinsipio sang Dios sa paghimud-os nila nga magminyo. Maayo man nga apresyahon naton ang ila pagkamainunungon kag hatagan sila sing nagakaigo nga pagpalig-on nga nagakabagay sa ila.

20. Ngaa bisan ang mga mag-asawa kon kaisa ‘nagalikaw sa paghakos’?

²⁰ Bisan bala ang mga mag-asawa dapat kon kaisa ‘maglikaw sa paghakos’? Ayhan dapat man, kay si Pablo nagsiling: “Ginasiling ko ini, mga kauturan, ang tion nga nabilin ginpalip-ot. Kutob karon ang mga may asawa mangin daw subong nga wala.” (1 Corinto 7:29) Sing nahisuno, ang mga kalipay kag mga pagpakamaayo sang pag-asawahay dapat kon kaisa mangin segundaryo lamang sa teokratikong mga responsabilidad. Ang timbang nga pagtamod sa sini nga butang indi magapaluya sang pag-asawahay kundi magapabakod sini bangod nagabulig ini sa pagpahanumdom sa magtiayon nga si Jehova dapat pirme ang panguna nagapabakod nga persona sa ila kaangtanan.—Manugwali 4:12.

21. Ngaa indi naton dapat hukman ang mga mag-asawa may kaangtanan sa pagkaginikanan?

²¹ Dugang pa, ang pila ka mag-asawa wala mag-anak agod mangin mas hilway sa ila pag-alagad sa Dios. Nagkahulugan ini sing sakripisyo sa ila bahin, kag si Jehova magapadya sa ila sing nagakaigo. Apang, samtang ang Biblia nagapalig-on sang pagkadi-minyo tungod sa maayong balita, wala ini nagakomento sing direkta tuhoy sa pagpabilin nga wala sing anak tungod sini man nga rason. (Mateo 19:10-12; 1 Corinto 7:38; ipaanggid ang Mateo 24:19 kag Lucas 23:28-30.) Sa amo, ang mga mag-asawa dapat magdesisyon pasad sa personal nga mga kahimtangan kag sa ila gid mga balatyagon. Ano man ina nga desisyon, ang mga mag-asawa indi dapat pagmulayon.

22. Ano ang importante nga hibaluon naton?

²² Huo, “sa tagsa ka butang may gintalana nga tion, bisan tion sa tagsa ka hilikuton sa idalom sang langit.” May yara pa gani “tion para sa inaway kag tion para sa paghidait.” (Manugwali 3:1,8) Ipaathag sang masunod nga artikulo kon ngaa importante para sa aton nga hibaluon kon diin sa duha ang tion sa karon.

Mapaathag Mo Bala?

◻ Ngaa importante para sa aton nga mahibaluan nga “sa tagsa ka butang may gintalana nga tion”?

◻ Ngaa karon gid ang “tion sa paghibi”?

◻ Ngaa ang mga Cristiano, bisan ‘nagahibi,’ tunay nga malipayon?

◻ Paano ginapakita sang pila ka Cristiano nga ginatamod nila ang karon nga tion subong “tion sa paglikaw sa paghakos”?

[Mga laragway sa pahina 6, 7]

Bisan ang mga Cristiano ‘nagahibi’ bangod sang mga kahimtangan sa kalibutan . . .

. . . sila gid ang pinakamalipayon nga mga tawo sa kalibutan

[Laragway sa pahina 8]

Ang bug-os tion nga ministeryo amo ang pinakamaayo nga sadsaran para sa malipayon nga pag-asawahay