Ang Kabuhi kag Ministeryo ni Jesus

Si Jesus Nagapanudlo sa Jerico

SANG ulihi si Jesus kag ang kadam-an nga nagalakbay kaupod niya nag-abot sa Jerico, isa ka siudad nga mga isa ka adlaw lakbayon gikan sa Jerusalem. Ang Jericho mahimo nga isa ka doble nga siudad, ang daan nga Judiyong siudad mga isa ka kilometro kag tunga gikan sa bag-ong Romanong siudad. Samtang ang kadam-an manugguwa sa daan nga siudad kag nagahinampot sa bag-o, duha ka bulag nga manugpakilimos ang nakabati sang kinagula. Ang isa sa ila nagahingalan kay Bartimeo.

Sang nakabati sila nga si Jesus nagaligad, si Bartimeo kag ang iya kaupod nagsugod sa pagsinggit: “Ginuo, kaluoyi kami, Anak ni David!” Sang ang kadam-an nagsabdong sa pagpahipos sa ila, nagsinggit sila sing dugang kag sa mabaskog nga tingog: “Ginuo, kaluoyi kami, Anak ni David!”

Sang mabatian ang kinagula, si Jesus nagdulog. Ginsugo niya sa mga kaupod niya nga dalhon ang mga nagasinggit. Nagkadto sila sa bulag nga mga manugpakilimos kag nagsiling sa isa sa ila: “Magkalipay ka, tindog, nagatawag sia sa imo.” Upod ang daku nga kalangkag, ang bulag nagpilak sang iya kunup, nagtumbo, kag nagpalapit kay Jesus.

“Ano bala ang buot mo nga himuon ko sa imo?” siling ni Jesus sa duha ka tawo.

“Ginuo, nga makabaton ako sang akon itololok,” pakiluoy nila.

Naluoy, gintandog ni Jesus ang ila mga mata. Suno sa kasaysayan ni Marcos, si Jesus nagsiling sa isa sa ila: “Lakat ka, ang imo pagtuo nag-ayo sa imo.” Sa gilayon ang bulag nga mga manugpakilimos nakabaton sing itololok, kag walay duhaduha nga duha sila nagsugod sa paghimaya sa Dios. Sang nakita sang tanan ang natabo, nagdayaw man sila sa Dios. Sa walay pagpalantang, si Bartimeo kag ang iya kaupod nagsugod sa pagsunod kay Jesus.

Samtang nagalatas si Jesus sa Jerico, daku ang kadam-an. Luyag sang tanan makita ang isa nga nag-ayo sa mga tawo nga bulag. Ang mga tawo nagdugok kay Jesus halin sa tanan nga direksion, kag bangod sina, ang iban indi gani makakita sa iya. Ang isa sa ila amo si Zaqueo, ang pangulo sang mga manugsukot sang buhis sa sulod kag sa guwa sang Jerico. Indi niya makita ang nagakatabo bangod putut sia.

Gani si Zaqueo nagdalagan sa unhan kag nagsaka sa sicomoro nga agihan ni Jesus. Gikan sa sining mataas nga lugar, makita niya sing maayo ang tanan. Samtang nagahinampot ang kadam-an, si Jesus nag­tangla kag nagsiling sa iya: “Zaqueo, dalidali kag magpanaug, kay karon nga ­adlaw kinahanglan ako magdayon sa imo ba­lay.”

Si Zaqueo nagpanaug nga malipayon kag nagdalidali sa pagpauli agod makahanda para sa iya halangdon nga bisita. Apang sang nakita sang mga tawo ang natabo, nagkumod sila. Ginkabig nila nga dinagakaigo para kay Jesus nga mangin bisita sina nga klase sang tawo. Ti, si Zaqueo nagmanggaranon bangod sang dibunayag nga paglimbong sing kuwarta sa iya nagasukot sing buhis nga negosyo.

Madamo ang nagsunod, kag sang nagsulod si Jesus sa balay ni Zaqueo, nagyamo sila: “Nagsulod sia sa pagdayon sa tawong makasasala.” Apang nakita ni Jesus kay Zaqueo ang posibilidad nga maghinulsul. Kag wala mapaslawi si Jesus, kay si Zaqueo nagtindog kag nagpahibalo: “Yari karon! Ang katunga sang akon pagkabutang, Ginuo, ginahatag ko sa mga imol, kag kon may nalimbong ako bisan kay sin-o nga tawo, ginauli ko sing apat ka pilo.”

Ginpamatud-an ni Zaqueo nga ang iya paghinulsul matuod gid paagi sa paghatag sang katunga sang iya mga pagkabutang sa mga imol kag paagi sa paggamit sang katunga pa sa pagbayad sa ginlimbongan niya. Mahimo niya mabanabana gikan sa iya rekord sa buhis kon pila ang utang niya sa sining mga tawo. Gani nagsaad sia sa paghimo sing apat ka pilo nga pag-uli, nahisanto sa kasuguan sang Dios nga nagasiling: ‘Kon ang tawo magkawat sing karnero, magabayad sia sing apat ukon lima ka karnero.’

Nalipay si Jesus sa ginsaad ni Zaqueo nga paghatag sang iya mga pagkabutang, kay Sia nagsiling: “Karon nag-abot ang kaluwasan sa sining panimalay, sanglit kay sia man anak ni Abraham. Kay ang Anak sang tawo nagkari sa pagpangita kag sa pagluwas sang na­dula.”

Wala lang dugay, gin-ilustrar ni Jesus ang kahimtangan sang ‘nadula’ paagi sa iya sugilanon nahanungod sa buhaha nga anak. Karon may yara kita matuodtuod gid nga halimbawa nahanungod sa isa nga nakita. Bisan pa ang relihiosong mga lider kag ang mga nagasunod sa ila nagkumud kag nagyamo nahanungod sa pagtalupangod ni Jesus sa mga tawo kaangay ni Zaqueo, si Jesus padayon nga nagapangita kag nagapasag-uli sining nadula nga mga anak ni Abraham. Mateo 20:​29-34; Marcos 10:​46-52; Lucas 18:​35⁠–​19:​10; Exodo 22:⁠1.

◆ Diin mahimo nga nakita ni Jesus ang bulag nga mga manugpakilimos, kag ano ang ginhimo niya para sa ila?

◆ Sin-o si Zaqueo, kag ngaa nagsaka sia sa kahoy?

◆ Paano ginpamatud-an ni Zaqueo ang iya paghinulsul?

◆ Anong leksion ang maton-an naton gikan sa trato ni Jesus kay Zaqueo?