LEKSION 29
Ano ang Nagakatabo Kon Mapatay Kita?
May pinalangga ka bala nga napatay? Sa sining masubo nga tion, mahimo nagapamangkot ka: ‘Ano ang nagakatabo kon mapatay kita? May paglaum pa bala nga makita liwat ang aton mga pinalangga?’ Sa sini nga leksion kag sa masunod, binagbinaga ang makapaumpaw nga sabat sang Biblia.
1. Ano ang nagakatabo kon mapatay kita?
Ginkumparar ni Jesus ang kamatayon sa mahamuok nga tulog. Kon mahamuok ang tulog sang isa, wala na sia kahibalo kon ano ang nagakatabo sa iya palibot. Ngaa ang kamatayon pareho sa pagtulog? Kon mapatay ang isa, indi na sia makabatyag sing kasakit. Wala naman sia nasubuan, bisan pa palangga niya ang iya mga abyan kag pamilya. “Ang mga patay wala gid sing nahibaluan,” siling sang Biblia.—Basaha ang Manugwali 9:5.
2. Ano ang aton mabenepisyo kon mahibaluan naton ang kamatuoran parte sa kamatayon?
Madamo nga tawo ang nahadlok mapatay, kag sa mga patay! Pero makapaumpaw gid ang ginasiling sang Biblia parte sa kamatayon. Si Jesus nagsiling: “Ang kamatuoran magahilway sa inyo.” (Juan 8:32) Ginatudlo sang iban nga relihion nga ang tawo may kalag nga padayon nga nagakabuhi kon mapatay sia, pero indi amo sini ang ginatudlo sang Biblia. Gani kon mapatay ang isa, wala na sia nagaantos. Isa pa, bangod ang mga patay wala na sing nahibaluan, indi na sila makahalit sa aton. Gani indi dapat paghalaran, pagsimbahon, ukon pangadian ang mga patay.
Hambal sang iban maistorya nila ang mga patay. Pero imposible ini. Base sa natun-an naton, ang mga patay “wala gid sing nahibaluan.” Ang mga nagasiling nga naistorya nila ang napatay nila nga mga pinalangga, posible nga nagapakig-istorya na sa mga demonyo nga nagapakunokuno nga sila ang napatay nila nga pinalangga. Gani kon nahibaluan naton ang kamatuoran parte sa kamatayon, maproteksionan kita sa mga demonyo. Ginpaandaman kita ni Jehova nga indi makig-istorya sa mga patay, kay nakahibalo sia nga ang pagpakig-istorya sa mga demonyo makahalit sa aton.—Basaha ang Deuteronomio 18:10-12.
USISAA PA GID
Usisaon naton kon ano ang ginatudlo sang Biblia parte sa kamatayon, kag kon paano mo mapabakod ang imo pagtuo sa mahigugmaon nga Dios nga wala nagapaantos sa mga patay.
3. Hibalua ang matuod nga kahimtangan sang mga patay
Sa bilog nga kalibutan, lainlain ang pagpati sang mga tawo sa kahimtangan sang patay. Siempre, indi puede nga tanan sila insakto.
Ano ang pagpati sang mga tawo sa inyo lugar parte sa kahimtangan sang patay?
Para mahibaluan mo ang ginatudlo sang Biblia, tan-awa ang VIDEO.
Basaha ang Manugwali 3:20, dayon binagbinaga ini nga mga pamangkot:
Base sa sini nga bersikulo, ano ang nagakatabo kon mapatay ang isa ka tawo?
May bahin bala sang lawas sang tawo nga indi mapatay?
Ginasugiran kita sang Biblia parte sa kamatayon sang abyan ni Jesus nga si Lazaro. Basaha ang Juan 11:11-14, kag talupangda kon ano ang ginsiling ni Jesus sang napatay si Lazaro. Dayon binagbinaga ini nga mga pamangkot:
Sa ano ginkumparar ni Jesus ang kamatayon?
Ano ang ginapakita sini parte sa kahimtangan sang patay?
Sa banta mo, husto bala ang ginasiling sang Biblia parte sa kamatayon?
4. Makabenepisyo kita sa kamatuoran parte sa kamatayon
Kon nahibaluan naton ang kamatuoran parte sa kamatayon, indi na kita mahadlok sa mga patay. Basaha ang Manugwali 9:10, dayon binagbinaga ini nga pamangkot:
Mahalitan bala kita sang mga patay?
Kon nahibaluan naton ang kamatuoran sa Biblia, indi kita magpati sa kabutigan nga dapat maghalad kita ukon magsimba sa mga patay. Basaha ang Isaias 8:19 kag Bugna 4:11, dayon binagbinaga ini nga pamangkot:
Ano sa banta mo ang ginabatyag ni Jehova kon ang isa nagasimba ukon nagapangayo sing bulig sa mga patay?
Kon mahibaluan naton ang kamatuoran parte sa kamatayon, indi na kita maghimo sing mga kustombre nga nagapaakig kay Jehova
5. Makapaumpaw sa aton ang kamatuoran parte sa kamatayon
Madamo nga tawo ang nagapati nga kon mapatay sila, silutan sila sa ila nahimo nga mga sala. Pero makapaumpaw mahibaluan nga wala nagaantos ang isa kon mapatay sia—bisan pa malain gid ang iya nahimo. Basaha ang Roma 6:7, dayon binagbinaga ini nga pamangkot:
Siling sa ginbasa naton sa Biblia, kon mapatay ang isa nahilway na sia ukon napatawad sa iya sala. Sa banta mo, maantos pa bala ang patay bangod sa nahimo niya nga sala sang buhi pa sia?
Kon makilala pa gid naton si Jehova, mapati gid kita nga indi niya pagpaantuson ang mga patay. Basaha ang Deuteronomio 32:4 kag 1 Juan 4:8, dayon binagbinaga ini nga mga pamangkot:
Ang Dios bala nga may amo sini nga mga kinaiya magapasugot nga paantuson ang mga patay?
Nakahatag bala sa imo sing paumpaw ang kamatuoran parte sa kamatayon? Ngaa?
KON MAGSILING ANG IBAN: “Nakulbaan ’ko kon ano ang matabo sa akon kon mapatay ’ko.”
Ano nga mga bersikulo sa Biblia ang ipabasa mo sa iya?
SUMARYO
Kon mapatay ang isa ka tawo, wala na sia nagakabuhi. Ang mga patay wala nagaantos, kag indi man nila mahalitan ang mga buhi.
Rebyu
Ano ang nagakatabo kon mapatay kita?
Paano kita makabenepisyo sa kamatuoran parte sa kamatayon?
Paano ang kamatuoran parte sa kamatayon nagapaumpaw sa aton?
DUGANG NGA IMPORMASYON
Basaha kon ano ang buot silingon sang “kalag” suno sa Biblia.
Hibalua kon ginasilutan gid man sang Dios ang mga malain sa impierno.
Ang Impierno Bala Isa ka Lugar Diin Ginapaantos ang mga Tawo? (3:07)
Dapat bala kita mahadlok sa mga patay?
Basaha kon paano nakapaumpaw sa isa ka tawo ang kamatuoran parte sa kahimtangan sang patay.