Pagbatas​—⁠Kinahanglanon Para sa mga Cristiano

“Idugang sa inyo pagtuo . . . ang pagbatas.”​—⁠2 PEDRO 1:​5, 6.

1, 2. Ngaa dapat kita tanan magbatas tubtob sa katapusan?

GINDUAW sang nagalakbay nga manugtatap kag sang iya asawa ang nobentahon sing edad nga masigka-Cristiano. Naghinguyang sia sing madamong tinuig sa bug-os tion nga pagministeryo. Sa ila paghambalanay, ginsugid sang tigulang nga utod ang pila ka pribilehiyo nga naagom niya sa sulod sang mga tinuig. “Apang,” panalabiton niya samtang nagailig ang mga luha sa iya nawong, “karon wala na ako sing madamo nga mahimo.” Ginbuksan sang nagalakbay nga manugtatap ang iya Biblia kag ginbasa ang Mateo 24:13 diin si Jesucristo ginbalikwat nga nagasiling: “Ang nagabatas tubtob sa katapusan maluwas.” Nian gintulok sang manugtatap ang pinalangga nga utod kag nagsiling: “Ang katapusan nga hilimuon naton tanan, bisan kon daw ano ka daku ukon kon daw ano ka diutay ang mahimo naton, amo ang magbatas tubtob sa katapusan.”

² Huo, subong mga Cristiano kita tanan dapat magbatas tubtob sa katapusan sining sistema sang mga butang ukon tubtob sa katapusan sang aton kabuhi. Wala na sing iban pa nga paagi nga mabaton ang kahamuot ni Jehova para sa kaluwasan. Yara kita sa palumba sang kabuhi, kag dapat kita “magdalagan nga may pagbatas” tubtob makatabok kita sa inangan. (Hebreo 12:⁠1) Ginpadaku ni apostol Pedro ang pagkaimportante sining kinaiya sang ginlaygayan niya ang mga masigka-Cristiano: “Idugang sa inyo pagtuo . . . ang pagbatas.” (2 Pedro 1:​5, 6) Apang ano gid bala ang pagbatas?

Pagbatas​—⁠Kon Ano ang Kahulugan Sini

3, 4. Ano ang kahulugan sang pagbatas?

³ Ano ang kahulugan sang pagbatas? Ang Griegong tinaga para sa “pagbatas” (hy·po·meʹno) literal nga nagakahulugan sing “pagpabilin ukon pagpadayon.” Mabasa ini sing 17 ka beses sa Biblia. Suno sa mga leksikograpo nga sanday W. Bauer, F. W. Gingrich, kag F. Danker, nagakahulugan ini sing “pagpabilin sa baylo sang pagpalagyo . . . , pagtindog nga malig-on, pagpadayon.” Ang Griegong nombre para sa “pagbatas” (hy·po·mo·neʹ) mabasa sing kapin sa 30 ka beses. Nahanungod sini, ang A New Testament Wordbook, ni Wil­liam Barclay, nagasiling: “Ini amo ang espiritu sang pag-antos sa mga butang, indi lamang nga may pag-ampo, kundi nga may mainit nga paglaum . . . Ini amo ang kinaiya nga nagahupot sa isa ka tawo nga makatindog kag nagaatubang sa hangin. Ini amo ang kinaiya nga nagahimo sang pinakamabudlay nga pagtilaw nga himaya bangod sa likod sang kasakit nakita sini ang lalab-uton.”

⁴ Ang pagbatas, kon amo, nagabulig sa aton nga magpabilin nga malig-on kag indi madulaan sing paglaum sa atubangan sang mga kasablagan ukon mga kabudlayan. (Roma 5:​3-5) Nagatan-aw ini lampas sa karon nga kasakit padulong sa lalab-uton​—⁠ang padya, ukon dulot, nga kabuhi nga dayon, sa langit ukon sa duta man.​—⁠Santiago 1:⁠12.

Pagbatas​—⁠Ngaa?

5. (a) Ngaa ang tanan nga mga Cristiano “nagakinahanglan sing pagbatas”? (b) Sa anong duha ka kategoriya mahimo matunga ang aton mga pagtilaw?

⁵ Subong mga Cristiano, kita tanan “nagakinahanglan sing pagbatas.” (Hebreo 10:36) Ngaa? Una bangod “nagaatubang [kita] sing lainlain nga mga pagtilaw.” Ang Griegong teksto diri sa Santiago 1:2 nagapanugda sing wala ginapaabot ukon wala ginaabiabi nga engkwentro, subong kon ang isa ka tawo makaengkwentro sing makawat. (Ipaanggid ang Lucas 10:30.) Nagaatubang kita sing mga pagtilaw nga mahimo matunga sa duha ka kategoriya: yadtong kinaandan sa mga tawo subong resulta sang napanubli nga sala, kag yadtong nagatuhaw bangod sang aton diosnon nga debosyon. (1 Corinto 10:13; 2 Timoteo 3:12) Ano ang pila sining mga pagtilaw?

6. Paano nagbatas ang isa ka Saksi sang nag-atubang sing masakit nga balatian?

⁶ Malubha nga balatian. Kaangay ni Timoteo, ang iban nga mga Cristiano dapat mag-antos sing “masunson nga mga balatian.” (1 Timoteo 5:23) Ilabi na kon ginaatubang sing nagabalikbalik, ayhan tuman kasakit, nga balatian nga kinahanglan naton batason, agod magpabilin nga malig-on, sa bulig sang Dios kag indi magluya ang aton Cristianong paglaum. Binagbinaga ang halimbawa sang isa ka singkwentahon sing edad nga Saksi nga nakig-away sing madugay kag mabudlay batok sa madasig magtubo nga makamamatay nga tumor. Sa duha ka operasyon nagpabilin sia nga malig-on sa iya pamat-od nga indi magpatayhon sing dugo. (Binuhatan 15:​28, 29) Apang nagtubo liwat ang tumor sa iya tiyan kag padayon nga nagadaku malapit sa iya taludtod. Bangod sini, nag-antos sia sing dimahanduraw nga kasakit sa lawas nga wala sing bulong ang makasumpo. Apang, gintan-aw niya ang sa pihak sang karon nga kasakit nga amo ang padya nga kabuhi sa bag-ong kalibutan. Ginpadayon niya nga ipaambit ang iya mainit nga paglaum sa mga doktor, mga nars, kag mga bisita. Nagbatas sia tubtob sa katapusan​—⁠sa katapusan sang iya kabuhi. Ang imo problema sa lawas mahimo nga indi makatalagam sa kabuhi ukon subong kasakit sa gin-antos sadtong aton mahal nga utod, apang nagahatag gihapon ini sing daku nga pagtilaw sa pagbatas.

7. Anong sahi sang kasakit ang nadalahig sa pagbatas sang pila sang aton espirituwal nga mga kauturan nga lalaki kag babayi?

⁷ Emosyonal nga kasakit. Sa tion kag tion, ang pila ka katawhan ni Jehova nagaatubang sing “kasakit sa tagipusuon” nga nagaresulta sa “nasubuan nga espiritu.” (Hulubaton 15:13) Ang malubha nga kapung-aw kinaandan na sa sining “ital-ital nga tion nga mabudlay atubangon.” (2 Timoteo 3:⁠1) Ang Science News sang Disiembre 5, 1992, nagreport: “Ang kataason sang malubha, sa masami nagapaluya nga kapung-aw nagdugang sa tagsa ka sagunson nga kaliwatan nga natawo sugod sang 1915.” Lainlain ang kabangdanan sina nga kapung-aw, halin sa pisiolohiko nga mga problema tubtob sa masakit kag malaw-ay nga mga inagihan. Para sa iban nga mga Cristiano, ang pagbatas nagalakip sa adlaw-adlaw nga pagpanikasog nga magpabilin nga malig-on sa atubangan sang emosyonal nga kasakit. Apang, wala sila mag-untat. Nagpabilin sila nga matutom kay Jehova walay sapayan sang mga luha.​—⁠Ipaanggid ang Salmo 126:​5, 6.

8. Anong pagtilaw sa pinansial ang mahimo naton maatubang?

⁸ Ang lainlain nga mga pagtilaw nga aton masugata mahimo nga maglakip sang mapiot gid katama nga pangabuhi. Sang ang isa ka utod nga lalaki sa New Jersey, E.U.A., hinali nga nadulaan sing trabaho, halangpunon nga nabalaka sia kon paano pakaunon ang iya pamilya kag indi madula ang iya puluy-an. Apang, wala ini magpaluya sang iya paglaum sa Ginharian. Samtang nagapangita sia sing lain nga trabaho, ginhimuslan niya ang kahigayunan agod mag-aux­il­iary payunir. Sang ulihi, nakakita sia sing trabaho.​—⁠Mateo 6:​25-34.

9. (a) Paano ang pagkapatay sang isa ka hinigugma nagakinahanglan sing pagbatas? (b) Anong mga kasulatan ang nagapakita nga indi sayop ang magpatulo sing mga luha sang kasubo?

⁹ Kon nakaagi ka na nga mamatyan sing isa ka hinigugma, kinahanglan mo ang pagbatas nga magadugay tubtob ang mga nagalibot sa imo magbalik sa ila normal nga rutina. Ayhan masapwan mo pa nga ilabi na nga mabudlay para sa imo kada tuig ang tion nga ang imo hinigugma napatay. Ang pagbatas sina nga pagkawasi wala nagakahulugan nga sayop ang maghibi tungod sa kasubo. Natural nga lalawan ang kamatayon sang isa nga aton ginahigugma, kag wala ini nagapakita sing kakulang sing pagtuo sa paglaum nga pagkabanhaw. (Genesis 23:2; ipaanggid ang Hebreo 11:19.) Si Jesus “naghibi” sang napatay si Lazaro, bisan pa masinaligon Niya nga ginsingganan si Marta: “Ang imo utod mabanhaw.” Kag nabanhaw matuod si Lazaro!​—⁠Juan 11:​23, 32-35, 41-44.

10. Ngaa ang katawhan ni Jehova may pinasahi nga pagkinahanglan sing pagbatas?

¹⁰ Dugang sa pagbatas sing mga pagtilaw nga kinaandan sa tanan nga tawo, ang katawhan ni Jehova pinasahi nga nagakinahanglan sing pagbatas. “Dumtan kamo sang tanan nga kapungsuran bangod sa akon ngalan,” paandam ni Jesus. (Mateo 24:⁠9) Nagsiling man sia: “Kon ginhingabot nila ako, hingabuton man nila kamo.” (Juan 15:20) Ngaa may pagdumot kag paghingabot? Bangod bisan diin man kita nagapuyo sa sining duta subong mga alagad sang Dios, si Satanas nagatinguha nga bugtuon ang aton integridad kay Jehova. (1 Pedro 5:8; ipaanggid ang Bugna 12:17.) Bangod sini masami nga ginadabukan ni Satanas ang paghingabot, nga nagatilaw sing daku sang aton pagbatas.

11, 12. (a) Anong pagtilaw sang pagbatas ang gin-atubang sang mga Saksi ni Jehova kag sang ila kabataan sang katuigan 1930 kag sang maaga nga bahin sang katuigan 1940? (b) Ngaa ang mga Saksi ni Jehova wala nagasaludo sa pungsudnon nga emblema?

¹¹ Halimbawa, sugod sang dekada 30, ang mga Saksi ni Jehova kag ang ila mga anak sa Naaminhan nga Amerika nangin puntariya sang daku nga paghingabot bangod nagdumili sila sa pagsaludo sa bandera.⁠a Ang The Golden Age sang Enero 13, 1937, nagreport: “Bangod nagdumili sila [ang kabataan] sa pagduko sa bag-ong diosdios [ang bandera], ginhanot sila, ginkuga, ginyaguta, ginpahog, ginyaoyao” kag “ginpahalin sa publiko nga mga eskwelahan.” Tuman gid kadamo nga kabataan ang ginpahalin sa mga eskwelahan nga sang ulihi nga bahin sang dekada 30 kag sang maaga nga bahin sang dekada 40, nangin kinahanglanon para sa mga Saksi ni Jehova nga magpalakat sang ila kaugalingon nga mga eskwelahan (gintawag nga King­dom ­Schools). Subong grupo, ining linibo ka kabataan nagpabilin nga malig-on batok sa masingki nga guban kag subong man sa mga uligyat kag yaguta sang ila mga kabutho. Ang maisog nga pagbatas sining kabataan naghatag sing maayong halimbawa, ilabi na sa Cristianong mga pamatan-on karon nga nagaatubang sing mga uligyat kag yaoyao bangod sang pagpanikasog nila nga magkabuhi sa mga talaksan sang Biblia.​—⁠1 Pedro 4:⁠14.

¹² Halimbawa, sang katuigan 1930 kag sang maaga nga bahin sang katuigan 1940, ang mga Saksi ni Jehova kag ang ila kabataan sa Estados Unidos kag Canada nangin sentro sang paghingabot bangod wala sila magsaludo sa pungsudnon nga emblema bangod sang konsiensia. Ginatahod sang mga Saksi ang emblema sang pungsod nga ginapuy-an nila, apang ginatuman nila ang prinsipio nga ginhatag sa Kasuguan sang Dios sa Exodo 20:​4, 5: “Dili ka maghimo nga sa imo sing larawan nga tinigban ukon bisan ano nga kaangay sang bisan anong butang nga yara sa langit sa ibabaw ukon yara sa duta sa idalom ukon yara sa tubig sa idalom sang duta. Dili ka magyaub sa ila ukon mag-alagad sa ila, kay ako si Jehova nga imo Dios nagapatuman sing eksklusibo nga debosyon.” Sang ginpaguwa ang pila ka Saksi nga kabataan nga nagaeskwela bangod luyag nila ipatuhoy ang ila pagsimba kay Jehova nga Dios lamang, ang mga Saksi nagtukod sing mga Kingdom School agod tudluan sila. Ining mga estudyante nagbalik sa publiko nga mga eskwelahan sang ginkilala sang Korte Suprema sang Estados Unidos ang ila relihioso nga tindog, subong sang ginahimo karon sang nasanagan na nga mga pungsod. Apang, ang maisog nga pagbatas sining kabataan naghatag sing maayo nga halimbawa ilabi na sa Cristianong mga pamatan-on nga ayhan nagaatubang karon sing mga pagyaoyao bangod sang pagpanikasog nila nga magkabuhi suno sa mga talaksan sang Biblia.​—⁠1 Juan 5:⁠21. Ang lainlain nga mga pagtilaw nga ginaatubang naton​—⁠ang mga kinaandan sa mga tawo kag ang mga ginaatubang naton bangod sang aton Cristianong pagtuo​—⁠nagapakita kon ngaa kinahanglan naton ang pagbatas. Apang paano kita makabatas?

Pagbatas Tubtob sa Katapusan​—⁠Paano?

13. Paano nagahatag sing pagbatas si Jehova?

¹³ Ang katawhan sang Dios may pat-od nga bentaha sangsa wala nagasimba kay Jehova. Para sa bulig, makapangabay kita sa “Dios nga nagahatag sing pagbatas.” (Roma 15:⁠5) Apang, paano si Jehova nagahatag sing pagbatas? Ang isa amo ang paagi sa mga halimbawa sang pagbatas nga narekord sa iya Pulong, ang Biblia. (Roma 15:⁠4) Samtang ginapamalandungan naton ini, indi lamang nga ginapalig-on kita nga magbatas kundi daku man ang aton matun-an kon paano magbatas. Binagbinaga ang duha ka talalupangdon nga mga halimbawa​—⁠ang maisugon nga pagbatas ni Job kag ang himpit nga pagbatas ni Jesucristo.​—⁠Hebreo 12:​1-3; Santiago 5:⁠11.

14, 15. (a) Anong mga pagtilaw ang ginbatas ni Job? (b) Paano nabatas ni Job ang mga pagtilaw nga gin-atubang niya?

¹⁴ Anong mga sitwasyon ang nagtilaw sang pagbatas ni Job? Namigado sia katama sang nadula niya ang kalabanan sang iya mga pagkabutang. (Job 1:​14-17; ipaanggid ang Job 1:⁠3.) Nabatyagan ni Job ang kasakit sang hinali nga mapatay ang iya tanan napulo ka anak bangod sang mabaskog nga hangin. (Job 1:​18-21) Nag-antos sia sing malubha kag masakit katama nga balatian. (Job 2:​7, 8; 7:​4, 5) Ang iya mismo asawa nag-ipit sa iya nga talikdan niya ang Dios. (Job 2:⁠9) Ang iya suod nga mga abyan nagpamulong sing masakit, dimalulo, kag dimatinuuron. (Ipaanggid ang Job 16:​1-3 kag Job 42:⁠7.) Apang, walay sapayan sining tanan, si Job nagtindog nga malig-on, naghupot sang integridad. (Job 27:⁠5) Ang mga butang nga ginbatas niya nagaanggid sa mga pagtilaw nga ginaatubang sang katawhan ni Jehova karon.

¹⁵ Paano nabatas ni Job yadtong tanan nga pagtilaw? Ang isa ka butang nga nagsakdag kay Job ilabi na amo ang paglaum. “Kay sa kahoy may paglaum,” siling niya. “Kon pudlon ini, magapanalingsing sia, kag ang iya lumbay indi mag-untat.” (Job 14:⁠7) Ano ang paglaum ni Job? Subong sang mabasa sa naulihing pila ka bersikulo, sia nagsiling: “Kon ang tawo mapatay mabuhi pa bala sia? . . . Magapanawag ka, kag ako magasabat sa imo. Kay magahandum [ukon, mahidlaw] ka sa binuhatan sang imo mga kamot.” (Job 14:​14, 15) Huo, nakita ni Job ang lampas pa sa iya karon nga kasakit. Nahibaluan niya nga ang mga pagtilaw sa iya indi magapabilin sing dayon. Dapat sia magbatas tubtob sa kamatayon. Ang iya malaumon nga pagpaabot amo nga si Jehova, nga mahigugmaon nga nagahandum nga banhawon ang patay, magabanhaw sa iya.​—⁠Binuhatan 24:⁠15.

16. (a) Ano ang matun-an naton tuhoy sa pagbatas gikan sa halimbawa ni Job? (b) Daw ano dapat ka matuod sa aton ang paglaum sa Ginharian, kag ngaa?

¹⁶ Ano ang matun-an naton gikan sa pagbatas ni Job? Agod makabatas tubtob sa katapusan, indi gid naton dapat pagkalimtan ang aton paglaum. Dumduma man nga ang kapat-uran sang paglaum sa Ginharian nagakahulugan nga ang bisan anong pag-antos nga ginaatubang naton “umalagi lamang.” (2 Corinto 4:​16-18) Ang aton bilidhon nga paglaum malig-on nga napasad sa saad ni Jehova tuhoy sa isa ka tion sa malapit nga palaabuton nga “pahiran niya ang tagsa ka luha sa [aton] mga mata, kag ang kamatayon wala na, ukon ang kalisod ukon paghibi ukon kasakit pa.” (Bugna 21:​3, 4) Ina nga paglaum, nga “wala nagadul-ong sa kapaslawan,” magaamlig sang aton panghunahuna. (Roma 5:​4, 5; 1 Tesalonica 5:⁠8) Dapat ini mangin matuod sa aton​—⁠matuod gid nga paagi sa mata sang pagtuo, malaragway naton ang aton kaugalingon nga yara sa bag-ong kalibutan​—⁠wala na nagapakig-away sa balatian kag kapung-aw kundi nagabugtaw kada adlaw nga may maayong panglawas kag matin-aw nga hunahuna; wala na nagapalibog nahanungod sa mga pag-ipit sa pangabuhi kundi nagapangabuhi nga may kalig-unan; wala na nagalalaw sa pagkapatay sang mga hinigugma kundi nagakalipay nga makita sila nga ginbanhaw. (Hebreo 11:⁠1) Kon wala ina nga paglaum madaug gid kita karon sang mga pagtilaw sa aton sa bagay nga magauntat kita. Upod sa aton paglaum, daw ano ka daku ang aton pangpapagsik nga padayon nga makig-away, padayon nga magbatas tubtob sa katapusan!

17. (a) Anong mga pagtilaw ang ginbatas ni Jesus? (b) Ang daku nga pag-antos nga ginbatas ni Jesus mahimo makita gikan sa anong katunayan? (Tan-awa ang footnote.)

¹⁷ Ang Biblia nagalaygay sa aton nga “magtulok sing hanuot” kay Jesus kag ‘talupangdon sia sing maayo.’ Anong mga pagtilaw ang ginbatas niya? Ang pila sini amo ang resulta sang sala kag pagkadihimpit sang iban. Indi lamang ang ‘nagasumpong nga hambalanon sang mga makasasala’ ang ginbatas ni Jesus kundi ang mga problema man nga nag-utwas sa tunga sang iya mga disipulo, lakip ang ila sulitsulit nga pagbinaisay kon sin-o ang pinakadaku. Labi pa sa sina, nasumalang niya ang dimapaanggiran nga pagtilaw sang pagtuo. Sia “nagbatas sing usok sang pag-antos.” (Hebreo 12:​1-3; Lucas 9:46; 22:24) Mabudlay gani handurawon ang mental kag pisikal nga pag-antos nga nalakip sa kasakit sang paglansang kag ang kahuluy-an nga patyon subong manugpasipala.⁠b

18. Suno kay apostol Pablo, anong duha ka butang ang nagsakdag kay Jesus?

¹⁸ Ano ang nagbulig kay Jesus nga makabatas tubtob sa katapusan? Ginsambit ni apostol Pablo ang duha ka butang nga nagsakdag kay Jesus: ‘mga pangamuyo kag mga pag-ampo’ kag subong man “ang kalipay nga ginbutang sa atubangan niya.” Si Jesus, ang himpit nga Anak sang Dios, wala mahuya mangayo sing bulig. Nangamuyo sia nga “may mabaskog nga pagsinggit kag mga luha.” (Hebreo 5:7; 12:⁠2) Ilabi na sang nagahinampot ang dakung pagtilaw sa iya nga nasapwan niya nga kinahanglanon ang mangamuyo sing kusog sing sulitsulit kag sing hanuot. (Lucas 22:​39-44) Bilang sabat sa mga pangabay ni Jesus, wala pagkuhaa ni Jehova ang pagtilaw, kundi ginpabakod niya si Jesus nga mabatas ini. Nagbatas man si Jesus bangod gintan-aw niya ang iya padya lampas pa sa usok sang pag-antos​—⁠ang kalipay nga nakaamot sia sa pagpakabalaan sa ngalan ni Jehova kag sa paggawad sa tawhanon nga panimalay gikan sa kamatayon.​—⁠Mateo 6:9; 20:⁠28.

19, 20. Paano ang halimbawa ni Jesus nagabulig sa aton sa pagtigayon sing realistiko nga pagtamod sa kon ano ang nadalahig sa pagtilaw?

¹⁹ Gikan sa halimbawa ni Jesus, madamo kita sing natun-an nga nagabulig sa aton sa pagtigayon sing realistiko nga pagtamod kon ano ang nadalahig sa pagbatas. Ang dalanon sang pagbatas indi mahapos. Kon nabudlayan kita sa pagbatas sing isa ka partikular nga pagtilaw, makalulugpay mahibaluan nga matuod man ini bisan kay Jesus. Agod makabatas tubtob sa katapusan, dapat kita pirme mangamuyo sing kusog. Kon napaidalom sa pagtilaw kon kaisa magabatyag kita nga ditakus mangamuyo. Apang ginaagda kita ni Jehova nga ibubo ang aton tagipusuon sa iya ‘bangod nagaulikid sia sa aton.’ (1 Pedro 5:⁠7) Kag bangod sang ginsaad ni Jehova sa iya Pulong, gin-obligar niya ang iya kaugalingon sa pag-aman sing “gahom nga labaw sa kinaandan” sa mga nagapanawag sa iya sa pagtuo.​—⁠2 Corinto 4:​7-9.

²⁰ Kon kaisa dapat kita magbatas nga may mga luha. Para kay Jesus ang kasakit sang usok sang pag-antos indi mismo rason para sa pagkasadya. Sa baylo, ang kalipay amo ang padya nga ginpahamtang sa atubangan niya. Sa aton bahin indi realistiko ang magpaabot nga pirme kita magbatyag nga malipayon kag masinadyahon kon napaidalom kita sa pagtilaw. (Ipaanggid ang Hebreo 12:11.) Apang, paagi sa pagtan-aw sang padya sa unahan, mahimo naton “makabig ini nga kalipay” bisan pa kon nagaatubang kita sing labing mabudlay nga mga sitwasyon. (Santiago 1:​2-4; Binuhatan 5:41) Ang importante nga butang amo nga magpabilin kita nga dimationg​—⁠bisan pa nga may mga luha. Ti, si Jesus wala magsiling, ‘Sia nga nagpatulo sing pinakadiutay nga luha maluwas’ kundi, “Ang nagbatas tubtob sa katapusan maluwas.”​—⁠Mateo 24:⁠13.

21. (a) Sa 2 Pedro 1:​5, 6, ginalaygayan kita nga idugang ang ano sa aton pagbatas? (b) Anong mga pamangkot ang pagabinagbinagon sa masunod nga artikulo?

²¹ Busa ang pagbatas kinahanglanon para sa kaluwasan. Apang, sa 2 Pedro 1:​5, 6, ginalaygayan kita nga idugang ang diosnon nga debosyon sa aton pagbatas. Ano ang diosnon nga debosyon? Ano ang kaangtanan sini sa pagbatas, kag paano mo ini matigayon? Ining mga pamangkot pagabinagbinagon sa masunod nga artikulo.

[Mga footnote]

Idugang sa Inyo Pagbatas ang Diosnon nga Debosyon

“Idugang sa inyo pagtuo ang . . . pagbatas, sa inyo pagbatas ang diosnon nga debosyon.”​—⁠2 PEDRO 1:​5, 6.

1, 2. (a) Sugod sang dekada 30, ano ang natabo sa mga Saksi ni Jehova sa mga kadutaan sa idalom sang pagkontrol sang mga Nazi, kag ngaa? (b) Paano nabatas sang katawhan ni Jehova ining mapintas nga pagtratar?

ISA yadto ka madulom nga panag-on sang ika-20 nga siglo. Sugod sang dekada 30, linibo ka Saksi ni Jehova sa mga kadutaan nga kontrolado sang mga Nazi ang dimakatarunganon nga ginpangdakop kag ginpanglupot sa mga kampo konsentrasyon. Ngaa? Bangod maisog sila nga nagpabilin nga neutral kag nagdumili sa pagyaub kay Hitler. Paano sila gintratar? “Wala na sing iban nga grupo sang mga bilanggo . . . ang napaidalom sa sadismo sang SS nga mga soldado sa paagi nga subong sa mga Estudyante sang Biblia [mga Saksi ni Jehova]. Isa yadto ka sadismo nga gintandaan sang walay katapusan nga kadena sang pisikal kag mental nga pagpaantos, ang mga kaangay sini indi malaragway sang lengwahe sang kalibutan.”​—⁠Karl Wittig, opisyal anay sang gobierno sang Alemanya.

² Paano ini nabatas sang mga Saksi ni Jehova? Sa iya libro nga The Nazi State and the New Religions: Five Case Studies in Non-Conformity, si Dr. Christine E. King nagsulat: “Batok lamang sa mga Saksi [kabaliskaran sa iban nga relihioso nga mga grupo] nga ang gobierno dimadinalag-on.” Huo, ang mga Saksi ni Jehova sa kabilugan nagtindog nga malig-on, bisan pa nga para sa ginatos sa ila, nagkahulugan ini sang pagbatas tubtob sa kamatayon.

3. Ano ang nagbulig sa mga Saksi ni Jehova nga mabatas ang daku nga mga pagtilaw?

³ Ano ang nagbulig sa mga Saksi ni Jehova nga mabatas ina nga mga pagtilaw indi lamang sa Nazi nga Alemanya kundi sa bug-os nga kalibutan? Ang ila langitnon nga Amay nagbulig sa ila sa pagbatas bangod sang ila diosnon nga debosyon. “Si Jehova makahibalo magluwas sang mga tawo nga may diosnon nga debosyon sa mga pagsulay,” paathag ni apostol Pedro. (2 Pedro 2:⁠9) Sa una nga bahin sina man nga sulat, si Pedro naglaygay sa mga Cristiano: “Idugang sa inyo pagtuo ang . . . pagbatas, sa inyo pagbatas ang diosnon nga debosyon.” (2 Pedro 1:​5, 6) Gani ang pagbatas suod nga naangot sa diosnon nga debosyon. Sa katunayan, agod makabatas tubtob sa katapusan, dapat naton ‘tinguhaan ang diosnon nga debosyon’ kag ipadayag ini. (1 Timoteo 6:11) Apang ano gid bala ang diosnon nga debosyon?

Kon Ano ang Diosnon nga Debosyon

4, 5. Ano ang diosnon nga debosyon?

⁴ Ang Griegong nombre para sa “diosnon nga debosyon” (eu·seʹbei·a) mahimo mabadbad sing literal subong “nagakaigo nga pagyaub.”⁠a (2 Pedro 1:​6, Kingdom Interlinear) Nagakahulugan ini sing mainit kag tinagipusuon nga balatyagon sa Dios. Suno kay W. E. Vine, ang adhetibo nga eu·se·besʹ, literal nga nagakahulugan sing “nagakaigo yauban,” nagapakita sang “kusog nga, ginatuytuyan sang balaan nga pagkahadlok sa Dios, makita sa debotado nga pagpanghikot.”​—⁠2 Pedro 2:​9, Int.

⁵ Busa ang ekspresyon nga “diosnon nga debosyon” nagapatuhoy sa pagsimba ukon debosyon kay Jehova nga nagapahulag sa aton nga himuon kon ano ang kalahamut-an sa iya. Ginahimo ini bisan sa atubangan sang mabudlay nga mga pagtilaw bangod ginahigugma naton ang Dios gikan sa tagipusuon. Isa ini ka matutom kag personal nga pagkasuod kay Jehova nga makita sa kon paano kita nagakabuhi. Ang matuod nga mga Cristiano ginalaygayan sa pagpangamuyo nga kabay nga “magkabuhi [sila] sing malinong kag mahidaiton nga may bug-os nga diosnon nga debosyon.” (1 Timoteo 2:​1, 2) Suno sa mga leksikograpo nga sanday J. P. Louw kag E. A. Nida, “sa pila ka hambal ang [eu·seʹbei·a] sa 1 Tm 2.2 mahimo mabadbad sing nagakaigo subong ‘magkabuhi subong sang luyag sang Dios nga kita magkabuhi’ ukon ‘magkabuhi subong sang ginsugo sang Dios sa aton nga dapat kita magkabuhi.’ ”

6. Ano ang kaangtanan sang pagbatas kag diosnon nga debosyon?

⁶ Maapresyar naton karon sing maayo pa ang kaangtanan sang pagbatas kag diosnon nga debosyon. Bangod nagakabuhi kita subong sang luyag sang Dios nga magkabuhi kita​—⁠nga may diosnon nga debosyon⁠—​natigayon naton ang kaakig sang kalibutan, nga pirme nagadala sing mga pagtilaw sa pagtuo. (2 Timoteo 3:12) Apang wala sing paagi nga mapahulag kita nga batason ina nga mga pagtilaw kon indi bangod sa aton personal nga pagkasuod sa aton langitnon nga Amay. Dugang pa, si Jehova nagahulag sa sinang tinagipusuon nga debosyon. Handurawa lamang kon daw ano ang ginabatyag niya sa pagduko gikan sa langit kag tan-awon yadtong, bangod sang ila debosyon sa iya, nagapanikasog nga pahamut-an sia walay sapayan sang tanan nga paagi sang paghingabot. Indi katingalahan nga nahuyog sia sa “pagluwas sa mga tawo nga may diosnon nga debosyon sa mga pagsulay”!

7. Ngaa dapat palambuon ang diosnon nga debosyon?

⁷ Walay sapayan, wala kita ginbun-ag nga may diosnon nga debosyon, ukon natigayon naton ini sing awtomatiko gikan sa diosnon nga mga ginikanan. (Genesis 8:21) Sa baylo, dapat ini palambuon. (1 Timoteo 4:​7, 10) Dapat kita manikasog nga idugang ang diosnon nga debosyon sa aton pagbatas kag sa aton pagtuo. Ini, siling ni Pedro, nagakinahanglan sing “hanuot nga panikasog.” (2 Pedro 1:⁠5) Paano, nian, naton matigayon ang diosnon nga debosyon?

Paano Naton Matigayon ang Diosnon nga Debosyon?

8. Suno kay apostol Pedro, ano ang yabi sa pagtigayon sing diosnon nga debosyon?

⁸ Ginpaathag ni apostol Pedro ang yabi sa pagtigayon sing diosnon nga debosyon. Sia nagsiling: “Kabay nga ang dibagay nga kaluoy kag paghidait pagpaukaron ninyo paagi sa sibu nga ihibalo sa Dios kag kay Jesus nga aton Ginuo, kay subong nga ang iya balaan nga gahom naghatag sa aton sing hilway sang tanan nga mga butang nga nagahilabot sa kabuhi kag sa diosnon nga debosyon, paagi sa sibu nga ihibalo sa isa nga nagtawag sa aton paagi sa himaya kag pagkahalangdon.” (2 Pedro 1:​2, 3) Gani agod madugang ang diosnon nga debosyon sa aton pagtuo kag pagbatas, dapat kita magtubo sa sibu, nga amo, sa bug-os, ukon kompleto, nga ihibalo kay Jehova nga Dios kag kay Jesucristo.

9. Paano mailustrar nga ang pagtigayon sing sibu nga ihibalo sa Dios kag kay Cristo nagadalahig sing kapin pa sa paghibalo kon sin-o sila?

⁹ Ano ang buot silingon sang pagtigayon sing sibu nga ihibalo sa Dios kag kay Cristo? Sing maathag, nagadalahig ini sing labi pa sa paghibalo kon sin-o kita. Sa pag-ilustrar: Ayhan kilala mo ang imo kaingod sa pihak nga ganhaan kag ayhan ginatamyaw pa gani sia sa ngalan. Apang pahulamon mo bala sia sing daku nga kantidad sang kuwarta? Indi, lamang kon kilala mo gid kon ano nga sahi sang tawo sia. (Ipaanggid ang Hulubaton 11:15.) Sa kaanggid, ang pagkilala kay Jehova kag kay Jesus sing sibu, ukon sing bug-os, nagakahulugan sing labaw pa sa pagtuo lamang nga nagaluntad sila kag sang pagkahibalo sang ila ngalan. Agod mangin handa sa pagbatas sang mga pagtilaw tungod sa ila bisan tubtob sa kamatayon, dapat naton sila makilala sing suod. (Juan 17:⁠3) Ano ang nadalahig sini?

10. Ang pagtigayon sing sibu nga ihibalo kay Jehova kag kay Jesus nagadalahig sang anong duha ka butang, kag ngaa?

¹⁰ Ang pagpanag-iya sing sibu, ukon bug-os, nga ihibalo kay Jehova kag kay Jesus nagadalahig sang duha ka butang: (1) pagkilala sa ila subong mga persona​—⁠ang ila mga kinaiya, mga balatyagon, kag mga dalanon​—⁠kag (2) pag-ilog sang ila halimbawa. Ang diosnon nga debosyon nagadalahig sing tinagipusuon, personal nga pagkasuod kay Jehova kag ginapamatud-an paagi sa kon paano kita nagakabuhi. Busa, agod matigayon naton ini dapat naton kilalahon sing personal si Jehova kag hibaluon sing maayo ang iya kabubut-on kag mga dalanon tubtob sa masarangan sang tawo. Agod makilala gid si Jehova, nga sa larawan niya kita gintuga, dapat naton gamiton ina nga ihibalo kag panikasugan nga mangin kaangay niya. (Genesis 1:​26-28; Colosas 3:10) Kag sanglit gin-ilog sing himpit ni Jesus si Jehova sa ginsiling kag ginhimo niya, ang suod nga pagkilala kay Jesus isa ka hamili nga bulig sa pagpalambo sing diosnon nga debosyon.​—⁠Hebreo 1:⁠3.

11. (a) Paano naton matigayon ang sibu nga ihibalo sa Dios kag kay Cristo? (b) Ngaa importante pamalandungan kon ano ang aton nabasa?

¹¹ Apang, paano naton matigayon inang sibu nga ihibalo sa Dios kag kay Cristo? Paagi sa makugi nga pagtuon sa Biblia kag sa pasad sa Biblia nga mga publikasyon.⁠b Apang, agod ang aton personal nga pagtuon sa Biblia magaresulta sa pagtigayon naton sing diosnon nga debosyon, kinahanglan nga maghinguyang kita sing tion sa pagpamalandong, kon sayuron, sa paghunahuna, ukon pagbinagbinag, kon ano ang aton nabasa. (Ipaanggid ang Josue 1:⁠8.) Ngaa importante ini? Dumduma nga ang diosnon nga debosyon isa ka mainit kag tinagipusuon nga balatyagon sa Dios. Sa Kasulatan, ang pamalandong liwat kag liwat nga ginbuylog sa malaragwayon nga tagipusuon​—⁠ang nasulod nga pagkatawo. (Salmo 19:14; 49:3; Hulubaton 15:28) Kon binagbinagon naton sing mainapresyahon ang aton nabasa, nagalusot ini tubtob sa nasulod nga pagkatawo, busa nagapukaw sang aton mga balatyagon, nagatandog sang aton mga emosyon, kag nagaimpluwensia sang aton panghunahuna. Dira lamang nga ang pagtuon makapabakod sang aton personal nga pagkasuod kay Jehova kag magapahulag sa aton sa pagkabuhi sa dalanon nga nagapahamuot sa Dios bisan sa atubangan sang makahalangkat nga mga sirkunstansia ukon mabudlay nga mga pagtilaw.

Pag-aplikar sang Diosnon nga Debosyon sa Puluy-an

12. (a) Suno kay Pablo, paano maaplikar sang Cristiano ang diosnon nga debosyon sa puluy-an? (b) Ngaa ginaatipan sang matuod nga mga Cristiano ang tigulang nga mga ginikanan?

¹² Ang diosnon nga debosyon dapat iaplikar una sa puluy-an. Siling ni apostol Pablo: “Kon ang balong babayi may mga kabataan ukon mga apo, patun-a sila sing una sa pag-aplikar sang diosnon nga debosyon ayon sa ila kaugalingon nga panimalay kag sa pagbalos sa ila mga ginikanan kag mga katigulangan, kay ini kalahamut-an sa itululok sang Dios.” (1 Timoteo 5:⁠4) Ang pag-atipan sa nagatigulang nga mga ginikanan, subong sang ginsulat ni Pablo, pagpakita sing diosnon nga debosyon. Ang matuod nga mga Cristiano nag-aman sina nga pag-atipan indi lamang bangod sang pagbatyag sing katungdanan kundi bangod sang paghigugma sa ila mga ginikanan. Apang, labi pa sa sina, ginakilala nila ang importansia nga ginabutang ni Jehova sa pag-atipan sa panimalay sang isa. Nakahibalo gid sila nga ang pagtalikod sa ila mga ginikanan sa panahon sang pagkinahanglan katumbas sa ‘pagsikway sa Cristianong pagtuo.’​—⁠1 Timoteo 5:⁠8.

13. Ngaa ang paghimo sing diosnon nga debosyon sa puluy-an isa gid ka hangkat, apang anong kaayawan ang nagaresulta gikan sa pag-atipan sa mga ginikanan?

¹³ Matuod, indi pirme mahapos iaplikar ang diosnon nga debosyon sa puluy-an. Ang mga katapo sang panimalay mahimo nga nahamulag sang daku nga kalayuon. Ang nagdalagku nga kabataan mahimo nagasagod sang ila kaugalingon nga mga panimalay kag mahimo nga nagahimakas sa pangabuhi. Ang kinaugali ukon kasangkaron sang pag-atipan nga ginakinahanglan sang ginikanan nagapabug-at sa pisikal, mental, kag emosyonal nga panglawas sang mga nagaaman sing pag-atipan. Walay sapayan, may matuod nga kaayawan sa paghibalo nga ang pag-atipan sa mga ginikanan indi lamang katumbas sa “nagakaigo nga balos” kundi nagapahamuot man sa Isa nga “sa iya nautang sang tagsa ka panimalay sa langit kag sa duta ang iya ngalan.”​—⁠Efeso 3:​14, 15.

14, 15. Isugid ang halimbawa sang diosnon nga pag-atipan sang kabataan sa isa ka ginikanan.

¹⁴ Binagbinaga ang isa ka makatalandog gid nga halimbawa. Si Ellis kag ang iya lima ka utod nga lalaki kag babayi nagaatubang sing mabudlay nga hilikuton sa pag-atipan sa ila amay sa puluy-an. “Sang 1986 ang akon amay na­stroke, kag bug-os sia nga naparalisado,” paathag ni Ellis. Ang anom ka anak nagbuligay sa pag-atipan sa mga kinahanglanon sang ila amay, halin sa pagpaligo sa iya tubtob sa pagbulubag-o pirme sang iya posisyon sa higdaan agod indi mapilas ang iya likod bangod sang dalayon nga paghigda. “Ginabasahan namon sia, ginasugilanon sia, ginapatokaran sia sing musika. Wala kami makapat-od kon nakahibalo gid sia sa nagakatabo sa palibot niya, apang gintratar namon sia subong nga nakahibalo gid sia sang tanan.”

¹⁵ Ngaa ginaatipan sang kabataan ang ila amay subong sang ginahimo nila? Si Ellis nagapadayon: “Sang mapatay ang amon iloy sang 1964, ginpadaku kami ni Dad sing isahanon. Sadto anay, nagaedad kami sing halin sa 5 tubtob 14. Didto sia sadto tungod sa amon; yari kami diri karon tungod sa iya.” Sing maathag, indi mahapos iaman ina nga pag-atipan, kag ang kabataan ginaluyahan sing buot kon kaisa. “Apang narealisar namon nga ang kahimtangan sang amon amay umalagi nga problema lamang,” siling ni Ellis. “Ginahulat namon ang tion kon san-o ang amon amay mapasag-uli sa maayong panglawas kag mahiusa liwat kami sa amon iloy.” (Isaias 33:24; Juan 5:​28, 29) Sa pagkamatuod, inang debotado nga pag-atipan sa ginikanan nagapahalipay gid sa tagipusuon sang Isa nga nagasugo sa kabataan nga tahuron ang ila mga ginikanan!⁠c​—⁠Efeso 6:​1, 2.

Ang Diosnon nga Debosyon kag ang Ministeryo

16. Ano dapat ang pangunang rason sang aton ginahimo sa ministeryo?

¹⁶ Sang ginbaton naton ang pangagda ni Jesus nga ‘sundon sia pirme,’ napaidalom kita sa balaan nga sugo nga ibantala ang maayong balita sang Ginharian kag maghimo sing disipulo. (Mateo 16:24; 24:14; 28:​19, 20) Sing maathag, ang pagpakigbahin sa ministeryo isa ka Cristianong obligasyon sa sining “katapusan nga mga adlaw.” (2 Timoteo 3:⁠1) Apang, ang aton motibo sa pagbantala kag sa pagpanudlo dapat nga magalabaw pa sa pagbatyag lamang sing katungdanan ukon obligasyon. Ang tudok nga gugma kay Jehova dapat amo ang mangin pangunang rason sa kon ano ang aton ginahimo kag kon daw ano kadaku ang aton ginahimo sa ministeryo. “Sa kabuganaan sang tagipusuon nagapamulong ang baba,” siling ni Jesus. (Mateo 12:34) Huo, kon ang aton tagipusuon nagaawas sa gugma para kay Jehova, nagabatyag kita nga ginapahulag sa pagpanaksi tuhoy sa iya sa iban. Kon ang gugma sa Dios amo ang aton motibo, ang aton ministeryo isa ka makahulugan nga pagpakita sang aton diosnon nga debosyon.

17. Paano naton mapalambo ang husto nga motibo sa ministeryo?

¹⁷ Paano naton mapalambo ang husto nga motibo para sa ministeryo? Binagbinaga sing mainapresyahon ang tatlo ka rason nga ginhatag ni Jehova sa aton agod higugmaon naton sia. (1) Ginahigugma naton si Jehova bangod sang nahimo na niya sa aton. Wala sing daku pa nga gugma ang mahimo niya ipakita sangsa pag-aman sing gawad. (Mateo 20:28; Juan 15:13) (2) Ginahigugma naton si Jehova bangod sang ginahimo niya karon para sa aton. May kahilwayan kita sa paghambal kay Jehova, nga nagasabat sang aton mga pangamuyo. (Salmo 65:2; Hebreo 4:​14-16) Samtang ginauna naton ang mga interes sang Ginharian, natigayon naton ang mga kinahanglanon sa kabuhi. (Mateo 6:​25-33) Nagabaton kita sing dalayon nga suplay sang espirituwal nga pagkaon nga nagabulig sa aton sa paglandas sa mga problema nga ginaatubang naton. (Mateo 24:45) Kag ginapakamaayo kita nga mangin bahin sang bug-os kalibutan nga Cristianong paghiliutod nga tunay nga nagahamulag sa aton gikan sa iban pa nga bahin sang kalibutan. (1 Pedro 2:17) (3) Ginahigugma man naton si Jehova bangod sang himuon pa niya para sa aton. Bangod sang iya gugma, may yara kita “malig-on nga pagpanguyapot sa matuod nga kabuhi”​—⁠ang kabuhi nga walay katapusan sa palaabuton. (1 Timoteo 6:​12, 19) Kon binagbinagon naton ang gugma ni Jehova tungod sa aton, pat-od gid nga ang aton tagipusuon magapahulag sa aton nga makigbahin sing debotado sa pagsugid sa iban nahanungod sa iya kag sa iya bilidhon nga mga katuyuan! Indi na kinahanglan nga silingan pa kita sang iban kon ano ang himuon ukon kon daw ano ka daku ang himuon sa ministeryo. Ang aton tagipusuon magapahulag sa aton nga himuon ang aton masarangan.

18, 19. Anong sablag ang nalandas sang isa ka utod nga babayi agod makapakigbahin sa ministeryo?

¹⁸ Bisan sa atubangan sang mabudlay nga mga kahimtangan, ang tagipusuon nga ginapahulag sang diosnon nga debosyon matiklod sa paghambal. (Ipaanggid ang Jeremias 20:⁠9.) Ginpakita ini sa halimbawa ni Stella, isa ka mahuluy-on gid katama nga Cristianong babayi. Sang nagsugod sia primero sa pagtuon sang Biblia, naghunahuna sia, ‘Indi gid ako mahimo makapamalaybalay!’ Nagapaathag sia: “Hipuson gid ako halin sang una. Indi gid ako makapalapit sa iban agod makigsugilanon.” Samtang padayon sia nga nagatuon, ang iya gugma kay Jehova nagtubo, kag napalambo niya ang nagadabdab nga handum nga isugid sa iban ang nahanungod sa iya. “Nadumduman ko nga ginsilingan ko ang nagatudlo sa akon sa Biblia, ‘Luyag ko gid maghambal, apang indi ko ini masarangan, kag nagatublag gid ina sa akon.’ Indi ko gid malipatan ang ginsiling niya sa akon: ‘Stella, magpasalamat ka nga luyag mo maghambal.’ ”

¹⁹ Wala magdugay, nasapwan ni Stella ang iya kaugalingon nga nagapanaksi sa iya kaingod sa pihak nga ganhaan. Nian ginhimo niya ang para sa iya daku gid nga tikang​—⁠nakigbahin sia sa pamalaybalay nga ministeryo sa nahaunang tion. (Binuhatan 20:​20, 21) Sia nagaasoy: “Ginsulat ko ang akon presentasyon. Apang ginhadlukan gid ako nga bisan yari ini sa atubangan ko, ginakulbaan gid ako sa pagtan-aw sa akon nota!” Karon, kapin sa 35 ka tuig sang ulihi, si Stella tuman ka mahuluy-on gihapon sing kinaugali. Apang, naluyagan niya ang ministeryo sa latagon kag padayon nga may makahulugan nga bahin sa sini.

20. Anong halimbawa ang nagapakita nga bisan ang paghingabot ukon pagkabilanggo indi makapakiom sa baba sang debotado nga mga Saksi ni Jehova?

²⁰ Bisan ang paghingabot ukon pagkabilanggo indi makapakiom sa mga bibig sang debotado nga mga Saksi ni Jehova. Binagbinaga ang halimbawa ni Ernst kag ni Hildegard Seliger sang Alemanya. Bangod sang ila pagtuo, nakahinguyang sila sing tingob nga kapin sa 40 ka tuig sa Nazi nga mga kampo konsentrasyon kag Komunista nga mga bilangguan. Bisan sa bilangguan, padayon sila nga nagpanaksi sa iban nga mga bilanggo. Si Hildegard nanugiron: “Ginklase ako sang mga opisyales sang bilangguan subong makatalagam gid, bangod, subong sang ginsiling sang isa ka babayi nga guwardiya, nagapamulong ako nahanungod sa Biblia sa bug-os nga adlaw. Gani ginbutang ako sa selda sa idalom.” Sang ginhatagan sila sang ulihi sang ila kahilwayan, ginhinguyang nanday Brother kag Sister Seliger ang ila bug-os nga tion sa Cristianong ministeryo. Matutom sila nga nag-alagad tubtob sa ila kamatayon, si Brother Seliger sang 1985 kag ang iya asawa sang 1992.

21. Ano ang dapat naton himuon agod idugang ang diosnon nga debosyon sa aton pagbatas?

²¹ Paagi sa makugi nga pagtuon sang Pulong sang Dios kag paghinguyang sing tion nga pamalandungan sing mainapresyahon ang aton natun-an, magatubo kita sa sibu nga ihibalo kay Jehova nga Dios kag kay Jesucristo. Ini, man, magaresulta sa pagtigayon naton sing labi pa sinang hamili nga kinaiya​—⁠diosnon nga debosyon. Kon wala ang diosnon nga debosyon wala sing paagi nga mabatas ang lainlain nga mga pagtilaw nga nagaabot sa aton subong mga Cristiano. Gani sundon naton ang laygay ni apostol Pedro, padayon nga ‘idugang sa aton pagtuo ang pagbatas kag sa aton pagbatas ang diosnon nga debosyon.’​—⁠2 Pedro 1:​5, 6.