Pagdala sing Espirituwal nga Kahilwayan sa mga Yara sa Bilangguan

“MADUGAY na namon kamo ginahulat.” “Sining nagligad nga mga gab-i, gindamgo ko ang nahanungod sa inyo pagkari.” “Salamat sa pagtangdo nga may magaduaw sa amon sing tayuyon.” “Luyag namon ipabutyag ang amon pasalamat sa tanan nga pagpakamaayo nga nabaton namon sing dibagay kay Jehova kag sa iya organisasyon bangod sa espirituwal nga pagkaon nga ginahatag sa nagakaigo nga tion.”

Ano ang rason para sa sining mga pagpabutyag sing pasalamat? Pila lamang ini sa mga ginpabutyag sang mga bilanggo sa lainlain nga mga bilangguan sa Mexico. Ginapasalamatan nila ang igtalupangod nga nabaton nila gikan sa mga Saksi ni Jehova, nga nagdala sa ila sing espirituwal nga kahilwayan bisan nga nabilanggo pa. Sa Mexico may yara 42 ka bilangguan diin ang mga Saksi ni Jehova tayuyon nga nagaalagad sa espirituwal nga mga kinahanglanon sang mga bilanggo. Ining mga lugar ginatawag nga Centro Readaptación Social (Social Rehabilitation Center). Sa pila sining mga bilangguan, tayuyon pa gani nga ginahiwat ang Cristianong mga miting nga may maayo gid nga mga resulta. Halimbawa, sa ulihi nga pag-isip, mga 380 ka tawo ang nagatambong sa mga miting sa sining mga lugar. Sadto nga tion ginahiwat ang promedyo nga 350 ka pagtuon sa Biblia. Katluan kag pito ang nangin kalipikado nga magbantala, kag 32 ang nagdedikar sang ila kabuhi kay Jehova, nagasimbulo sini paagi sa pagpabawtismo sa tubig.

Kon Paano Ginahimo ang Hilikuton

Paano ginahimo sang mga Saksi ni Jehova ang ila pagbantala nga hilikuton sa sining mga lugar? Una nagakadto sila sa mga opisyales nga nagadumala agod mangayo sing nasulat nga awtorisasyon nga makasulod sa bilangguan, nagapaathag sang katuyuan sang mga pagduaw​—⁠ang pagtudlo sa mga bilanggo kon paano pauswagon ang ila kalidad sang kabuhi kag ang pag-alagad sa Dios sa paagi nga kalahamut-an sa iya.

Sa tagsa ka hitabo ang mga awtoridad nagpasugot. Ginapabilihan sining mga opisyales ang panudlo sa Biblia nga ginahatag sa mga bilanggo. Nakita sang mga awtoridad sang bilangguan nga ginasunod sang mga Saksi ni Jehova ang mga regulasyon sa seguridad nga ginapatuman para sa sining mga lugar. Gintugutan nila ining nagaduaw nga mga ministro nga gamiton ang mga opisina, mga hulot-kalan-an, kag mga shop sa paghiwat sang ila mga miting. Sa isa ka lugar ang mga Saksi gintugutan pa gani sa pagpatindog sing isa ka diutay nga Kingdom Hall, subong sang ginapakita sang masunod nga eksperiensia nga ginsaysay sang isa ka nagalakbay nga manugtatap sa nabagatnan-nasidlangan nga Mexico.

“Sadtong maaga nga bahin sang 1991 ginsugdan namon nga duawon ang bilangguan sa Tehuantepec, Oaxaca, diin nasapwan namon ang daku nga pagkagutom sa espirituwal. Nakasugod kami sa gilayon sing 27 ka pagtuon sa Biblia. Bangod sang interes sang mga bilanggo, gin-iskedyul ang lima ka miting sang kongregasyon. Ang isa sa mga bilanggo, nga nagpakita sing daku nga gugma kay Jehova, namat-od sa pagpatindog sing isa ka diutay nga Kingdom Hall sa sulod sang bilangguan agod may lugar nga pagahiwatan sing mga miting. Nagkadto sia sa direktor sang bilangguan kag nangayo sing pahanugot, kag ang mga awtoridad tuman ka mabinuligon. Sang pamuno sang Disiembre 1992, anom ka bilanggo ang nangin kalipikado subong mga manugbantala sang maayong balita. Bangod sang pag-uswag nga ginpakita, ginhimo ang mga kahimusan nga hiwaton ang Memoryal sa sulod sang bilangguan. Naglisensia kami sa direktor sang bilangguan nga magadala kami sing mga emblema​—⁠ang tinapay kag alak​—⁠kag pagkatapos sang apat ka oras nga paghambalanay, gintugutan kami.

“Natabuan man nga sang Abril 3, 1993 (tatlo ka adlaw antes sang selebrasyon sang Memoryal), ang pila ka bilanggo ginpaguwa. Sang mabaton sang isa nga isa na ka manugbantala ang iya mga papeles sa pagguwa, nangabay sia nga makighambal sa direktor sang bilangguan agod mangayo sing pahanugot nga magtener didto tubtob matapos ang pagsaulog sing Memoryal. Nakibot gid sa sini ang direktor, kay indi gid ini kinaandan nga pangabay, apang bangod sang daku nga interes sang bilanggo nga makatambong sing Memoryal didto sa bilangguan, ginpasugtan sia. Ang Memoryal gintambungan sing 53 ka tawo, nga naghilibi sa kalipay pagkatapos sang programa. Naghiliugyon kami nga tawgon ining grupo nga ‘Freedom Cereso,’ bangod hilway na sila sa espirituwal nga kahulugan.”

Ang hilikuton sang mga Saksi ni Jehova ginapabilihan gid sing daku sa sining mga lugar. Sa isa sining mga bilangguan, ang nagadumala hayag nga nagarekomendar sang pagtambong sa mga miting sang mga Saksi ni Jehova subong “terapiya” para sa madasig nga rehabilitasyon sang mga bilanggo.

Isa ka Madinalag-on nga Programa sang Rehabilitasyon

Ang hilikuton sang mga Saksi ni Jehova nagresulta sa bug-os nga rehabilitasyon sang madamong bilanggo. Bisan pa matuod nga ang mga nabilanggo nagabalik liwat sa paghimo sing krimen sang makaguwa sila, ang mga tunay nga nagbaton sang mensahe sang Biblia nagbag-o sing bug-os. Ang ila pagbag-o nagapahanumdom sa aton sang mga pinamulong ni apostol Pablo: “Bisan ang mga makihilawason . . . , ukon mga makawat, ukon mga tawo nga mahamkunon, ukon mga palahubog, ukon mga mapasipalahon, ukon mga nagapangwarta indi makapanubli sang ginharian sang Dios. Apang amo sina anay ang pila sa inyo. Apang ginhugasan na kamo sing matinlo, apang ginpakabalaan na kamo, apang ginpahayag na kamo nga matarong sa ngalan sang aton Ginuong Jesucristo kag sa espiritu sang aton Dios.”​—⁠1 Corinto 6:​9-11.

Ang tumalagsahon nga pagbag-o sang ila personalidad makita sang ginpabutyag nila ang ila mga balatyagon. Si Miguel, nga didto sa bilangguan sang Campeche sa Campeche City, nagpabutyag sini sa sining paagi: “Masiling ko karon nga may kalipay nga ginakabig ko ang akon kaugalingon sa tunga sang iban nga mga karnero nga may paglaum nga narekord sa 2 Pedro 3:​13 kag Mateo 5:⁠5.” Si José, nga didto sa bilangguan sang Koben sa Campeche, nagkomento: “Bisan pa nga isa ako ka bilanggo kag ang akon sala mahimo nga tuman kabug-at, nahangpan ko nga si Jehova tuman ka maluluy-on kag nagapamati sa akon mga pangamuyo kag mga pangalaba. Mapatawad niya ang akon mga paglapas kag mahatagan ako sing kahigayunan nga ihinguyang ang nabilin nga bahin sang akon kabuhi sa pagpaambit sang maayong balita nahanungod sa Ginharian sang Dios. Nagapasalamat kami sa amon mga gulang tungod sang tion nga ginahinguyang nila sa pagduaw sa amon sa bilangguan agod makapanginpulos kami sa mga saad sang Ginharian sang Dios. Daw ano ka makalilipay nga mga pagpakamaayo! Masiling ko bala nga isa ako ka bilanggo? Indi, ginhatagan ako ni Jehova sing espirituwal nga kahilwayan nga ginakinahanglan ko.”

Ano ang nagpabag-o sa mga manugpatay, mga manuglugos, mga arsonista, kag makawat, kag sa iban pa nga mangin nagakabuhi sing matarong nga mga Cristiano? Suno sa sini man nga mga tawo, ini amo ang nagapabalhin nga gahom sang Pulong sang Dios kag ang maayong pagpakig-upod sa debotado gid nga katawhan. Ang halimbawa ni Tiburcio nga nabilanggo sa Mazatlán, Sinaloa, nagailustrar sang kadalag-an sining programa sang rehabilitasyon. Nabilanggo na sia anay sa Concordia, Sinaloa, diin may problema sia bangod sang iya masingki nga kainiton sang ulo. Ang iya asawa isa sang mga Saksi ni Jehova kag ginasakit niya anay sia, bisan pa kon magduaw sia sa iya sa bilangguan. Mapailubon ang iya asawa kag padayon nga nagduaw sa iya, gani ginpangabay niya ang iya asawa nga dalhan sia sang libro nga Mahimu Ka Mabuhi sing Dayon sa Paraiso sa Duta, diin gintun-an niya ini sing kinaugalingon.⁠a Nian nangabay sia nga may magakari sa bilangguan sa pagtuon upod sa iya. Nag-uswag sia sa espirituwal, kag ang iya kaangtanan sa iban nag-ayo. Ginsaylo sia sa bilangguan sa Mazatlán diin may isa ka grupo nga nagatuon sing Biblia, kag karon isa na sia ka manugbantala. Sia nagakomento: “Karon, upod sang akon asawa kag kabataan kag sang akon mga kaupdanan nga bilanggo, nagapasalamat gid ako nga makabati sing mga kamatuoran sang Biblia sa sining lugar, nagalaum nga sa ulihi, makaguwa ako kag makatambong sa tanan nga asambleya kag mga miting sa kongregasyon.”

Subong man, yara si Conrado, nga nagapasalamat gid sa mga pagbag-o nga ginhimo niya sa iya kabuhi. Mabug-at gid ang iya problema sa pag-asawahay amo kon ngaa ginbayaan sia sang iya asawa. Gani nagdangop sia sa droga. Sang ulihi nangin manugbaligya sia sang droga. Nadakpan sia kag ginpamatbatan sing pagkabilanggo bangod sang paghakot sing isa ka kargamento sang marijuana kag cocaine. Sa bilangguan may isa ka grupo nga nagatuon sing Biblia upod sa mga Saksi ni Jehova, kag gin-agda sia sa pagtuon upod sa ila. Ginpabutyag niya ang iya mga balatyagon sa sining paagi: “Nagdayaw ako sa mahim-ong nga pagdumala sing mga miting, sa programa sang pag-usisa paagi sa mga publikasyon, kag sa katunayan nga ang tanan napasad sa Biblia. Gilayon ako nga nangabay sing pagtuon sa Biblia kag nagtambong sa mga miting.” Enero 1993 sadto. Karon si Conrado nakaguwa na sa bilangguan kag padayon nga nagauswag sa Cristianong kongregasyon.

Ang Islas Marías

Sa Mexico may isa ka kalahadlukan nga bilangguan nga ginahuman sang apat ka isla nga ginatawag nga Islas Marías. Ang mga bilanggo sarang makalagaw sa mga isla nga ginbilangguan sa ila. Ang iban nagapuyo didto kaupod sang ila mga asawa kag mga anak.

Isa ka diutay nga kongregasyon ang gintukod. Tatlo ka utod nga lalaki halin sa Mazatlán ang nagakadto didto makaisa sa isa ka bulan, nagabulig sa pagdumala sing mga miting, nagadala sing literatura, kag nagahatag sing pagpalig-on. Kon kaisa ang manugtatap sang sirkito nagaduaw sa ila. Ang promedyo nga tumalambong yara sa ulot sang 20 kag 25. May yara apat ka bawtismado kag duha ka dibawtismado nga manugbantala. Ang manugtatap sang sirkito nagreport nga “ang iban nagalakat sing 17 kilometros sa pagtambong sa mga miting kon Domingo kag nagadalidali sa pagpauli agod makabalik sa ila selda para sa paglawag sa ila. Nagalakat sing madasig, nagakinahanglan ini sing kapin sa duha ka oras agod makabalik.” Ang isa sang mga utod nga lalaki, nga nakatuon sang kamatuoran sa sinang bilangguan, nagsiling sining karon lang: “Interesado ako anay nga makaguwa dayon sa bilangguan, apang karon mahimo nga kon san-o na lang suno sa kabubut-on ni Jehova, kay bisan ano man ang matabo madamo ako sing dapat himuon diri sa sulod.”

Nalipay kami nga makita nga ang kamatuoran may gahom sa paghilway sa mga sinsero nga nagapangita sing paagi nga pahamut-an si Jehova. Kapin sa isa ka dosena sa ila, nga nakatuon sang kamatuoran sa bilangguan, ang ginpaguwa na, nabawtismuhan, kag nagakabuhi na karon sing dungganon subong mga alagad sang Dios, ang iban nangin mga gulang pa gani sa kongregasyon. Ang gahom sang Biblia nga makapaayo sang mga tagipusuon kag makapabag-o sa mga tawo ginpakita sing dramatiko. Sa tion nga ining mga lalaki nga ginbilanggo anay bangod sang paghimo sing kalapasan makasulod sa banas sang kapawa sang Pulong sang Dios, naeksperiensiahan nila ang matuod nga kahilwayan nga ginsaad ni Jesus sang nagsiling sia: “Mahibaluan ninyo ang kamatuoran, kag ang kamatuoran magahilway sa inyo.”​—⁠Juan 8:32; Salmo 119:​105.

[Footnote]

[Kapsion sa pahina 23]

Madamo ang nabuligan sang Cristianong mga kamatuoran nga natun-an nila sa bilangguan