Nagakalipay kay Jehova Walay Sapayan sang mga Pagtilaw
PANUGIRON NI GEORGE SCIPIO
Sang Disiembre 1945, nagparumatay ako sa ospital, nga naparalisar ang bug-os nga lawas luwas lamang sa akon mga kamot kag tiil. Naghunahuna ako nga umalagi lamang ang akon kahimtangan, apang ang iban nagduhaduha kon bala makalakat pa ako liwat. Daw ano nga pagtilaw yadto para sa isa ka aktibo nga 17 anyos! Wala ko ginbaton yadto nga pagpakotpakot. Madamo gid ako sing plano, lakip ang pagbiyahe sa Inglaterra upod sa akon amo sa masunod nga tuig.
BIKTIMA ako sang epidemia sang polio nga nagduging sa amon ginapuy-an nga isla sang St. Helena. Nagpatay ini sang 11 ka tawo kag nagpainutil sang madamo. Samtang nagaparumatay sa katre, madamo ako sing tion sa pagpamalandong tuhoy sa akon malip-ot nga kabuhi kag sa akon palaabuton. Samtang ginahimo ko ini, narealisar ko nga, walay sapayan sang akon kalisdanan, may rason ako sa pagkalipay.
Isa ka Diutay nga Panugod
Sang 1933 sang singko anyos pa lamang ako, ang akon amay nga si Tom, isa ka pulis kag deakono sa Baptist nga Simbahan, nakatigayon sing pila ka libro halin sa duha sang mga Saksi ni Jehova. Mga bug-os tion nga ebanghelisador sila, ukon mga payunir, nga nagduaw sa isla sa sulod sang malip-ot nga tion.
Ang isa sang mga libro gintawag nga The Harp of God. Gingamit ini sang akon amay sa pagtuon sing Biblia sa amon pamilya kag upod sa pila ka interesado. Mabudlay ini hangpon nga libro, kag halos wala ako sing nahangpan sa sini. Apang madumduman ko nga ginabutangan ko sing tanda ang tagsa ka kasulatan nga amon ginbinagbinag sa akon kopya sang Biblia. Wala magdugay narealisar sang akon amay nga ang amon ginatun-an amo ang kamatuoran kag nga tuhay ini sa iya ginabantala sa Baptist nga Simbahan. Ginsugdan niya ang pagsugid sa iban tuhoy sini kag ginbantala niya gikan sa pulpito nga wala sing Trinidad, wala sing kalayuhon nga impierno, kag wala sing dimamalatyon nga kalag. Gintunaan ini sang pagbinais sa simbahan.
Sang ulihi, sa panikasog nga mahusay ang hulusayon, nagpatawag sing miting sa simbahan. Ginpautwas ang pamangkot, “Sin-o ang dampig sa mga Baptist?” Ang kalabanan naghimo sini. Ang masunod nga pamangkot amo, “Sin-o ang dampig kay Jehova?” Mga 10 ukon 12 ang naghimo sini. Ginpangabay sila nga magbiya sa simbahan.
Amo yadto ang diutay nga panugod sang isa ka bag-o nga relihion sa St. Helena. Ginpakig-angutan sang akon amay ang ulong-talatapan sang Watch Tower Society sa Estados Unidos kag nagpangabay sing transcription machine para sa pagpatokar sing narekord nga mga pamulongpulong sa Biblia sa publiko. Ginsilingan sia nga ang transcription machine daku kaayo gani indi mapadala sa St. Helena. Ginpadala ang mas gamay nga ponograpo, kag sang ulihi nagpangabay ang mga kauturan sing duha pa. Naglibot sila sa isla nga nagalakat kag nagasakay sa asno, nagadala sing mensahe sa mga tawo.
Samtang nagalapnag ang mensahe, amo man ang pagpamatok. Sa akon eskwelahan, ang mga bata nagakanta: “Magpamati kamo, magpamati kamo, sa ponograpo nga banda ni Tommy Scipio!” Grabe yadto nga pagtilaw sa akon, isa ka nagaeskwela nga bata nga luyag kahamut-an sang iya mga katubotubo. Ano ang nakabulig sa akon nga makabatas?
Ang amon daku nga pamilya—nga may anom ka kabataan—may yara regular nga pagtinuon sang pamilya sa Biblia. Ginbasa man namon ang Biblia sing tingob kada aga antes mamahaw. Walay duhaduha nga nakabulig gid ini sa amon pamilya nga makapadayon nga matutom sa kamatuoran sa sulod sang tinuig. Personal nga nakapalambo ako sing gugma sa Biblia sang bata pa ako, kag sa sulod sang mga tuig, napadayon ko ang batasan sang regular nga pagbasa sing Biblia. (Salmo 1:1-3) Sang nag-untat na ako sa pag-eskwela sa edad nga 14, napasad ako sing malig-on sa kamatuoran, kag ang kahadlok kay Jehova yara sa akon tagipusuon. Nakabulig ini sa akon nga magkalipay kay Jehova walay sapayan sadtong mga pagtilaw.
Dugang nga mga Pagtilaw kag Kalipay
Samtang nagaparumatay ako sadto sa katre nga nagahunahuna sadtong una nga mga tuig kag sang akon mga paglaum sa palaabuton, nahibal-an ko gikan sa akon pagtuon sa Biblia nga ining balatian indi isa ka pagtilaw ukon silot gikan sa Dios. (Santiago 1:12, 13) Apang, ang polio isa ka masakit nga pagtilaw, kag ang epekto sini magapabilin sa akon sa bug-os ko nga kabuhi.
Samtang nagaayo ako, dapat ako magtuon sa paglakat liwat. Wala man nagapanghikot ang pila ka kaunuran sa akon mga butkon. Madamong beses nga nagakatumba ako kada adlaw. Apang, paagi sa hanuot nga pangamuyo kag padayon nga panikasog, sang 1947, nakalakat ako nga nagagamit sing sungkod.
Sadto nga tion naghigugma ako sa isa ka lamharon nga babayi, si Doris, nga may pareho nga relihion sa akon. Bataon pa kami para maghunahuna nga magpakasal, apang napahulag ako nga mag-uswag pa sa paglakat. Naghalin man ako sa akon trabaho bangod ang sweldo indi bastante nga makabuhi sing asawa, kag nagbukas ako sing kaugalingon nga laboratoryo subong dentista, nga ginpalakat sa sulod sang duha ka tuig. Nagpakasal kami sang 1950. Sadto nga tion nakasupot na ako sing bastante nga kuwarta agod makabakal sing gamay nga awto. Kag mapasakay ko na ang mga kauturan pakadto sa mga miting kag sa pag-alagad sa latagon.
Teokratiko nga Pag-uswag sa Isla
Sang 1951 nagpadala ang Sosiedad sang ila una nga tiglawas sa amon. Si Jacobus van Staden yadto, isa ka lamharon nga tawo halin sa Bagatnan nga Aprika. Bag-o lang kami nakasaylo sadto sa daku-daku nga balay, gani mapadayon sia namon sa bug-os nga tuig. Sanglit nagatrabaho ako nga wala sing amo, naghinguyang kami sing madamo nga tion nga magkaupod sa pagbantala nga hilikuton, kag nakabaton ako sing daku mapuslanon nga paghanas halin sa iya.
Gin-organisar ni Jacobus, ukon ni Koos nga amo ang ginhayo namon sa iya, ang regular nga mga miting sang kongregasyon, nga malipayon nga gintambungan namon tanan. May problema kami sa salakyan bangod sa tanan nga interesado may duha lamang ka awto. Ang alagyan mabudlay kag takladon, kag pila lamang ang maayo nga dalan sadto. Gani, daku gid nga panikasog ang pagpatambong sa tanan sa mga miting. Ang iban nagalakat na sa kaagahon pa lang. Ginapasakay ko ang tatlo sa akon gamay nga awto kag ginapapanaug sila sa dalan sa malayo-layo nga distansia. Nagapanaug sila kag padayon nga nagalakat. Nagabalik ako, nagapasakay sing tatlo pa sa pila ka distansia, ginapapanaug sila, kag magbalik naman. Sa ulihi, ang tanan nakalab-ot sa miting sa sining paagi. Pagkatapos sang miting, amo man sini ang amon ginahimo agod makapauli ang tanan.
Gintudluan man kami ni Koos kon paano maghatag sing epektibo nga mga presentasyon sa mga ganhaan. Madamo kami sing maayo nga mga eksperiensia kag ang iban indi tanto kaayo. Apang ang kalipay nga natigayon namon sa ministeryo naglabaw sa tanan nga kabudlayan nga gintuga sang mga nagapamatok sa amon pagbantala nga hilikuton. Isa ka aga nagpanghikot ako kaupod ni Koos. Sang magsampot kami sa ganhaan, nakabati kami sing tingog sa sulod. Matunog nga ginabasa sang isa ka tawo ang Biblia. Nabatian namon sing maathag ang pamilyar nga mga pinamulong sang Isaias kapitulo 2. Sang nakalab-ot sia sa bersikulo 4 nanuktok kami. Ginpadayon kami sang isa ka mainabyanon tigulang nga lalaki, kag gingamit namon ang Isaias 2:4 agod ipaathag sa iya ang maayong balita tuhoy sa Ginharian sang Dios. Nasugdan ang isa ka pagtuon sa Biblia sa iya bisan pa nagapuyo sia sa mabudlay kaayo kadtuan nga lugar. Dapat kami magdulhog sa isa ka pukatod, magtabok sa isa ka sapa nga nagaagi sa kabatuhan, magtaklad sa isa pa ka pukatod, kag dayon magdulhog padulong sa iya balay. Apang takus gid yadto. Ining mahagop tigulang nga tawo nagbaton sa kamatuoran kag nagpabawtismo. Agod makatambong sa mga miting, nagalakat sia nga may duha ka sungkod pakadto sa duog nga mahimo ko sia mapasakay sa awto kag madul-ong pakadto sa miting. Sang ulihi napatay sia nga isa ka matutom nga Saksi.
Ang komisyonado sang pulisiya nagpamatok sa amon hilikuton kag sulit-sulit nga namahog nga pahalinon niya si Koos sa St. Helena. Ginapatawag niya si Koos kis-a sa isa ka bulan agod usisaon. Bangod pirme sia ginasabat ni Koos sing talangkod halin sa Biblia, nagdugang pa gid ang iya kaakig. Sa tagsa ka higayon ginpaandaman niya si Koos nga mag-untat sa pagbantala, apang sa tagsa sining tion nakabaton sia sing panaksi. Padayon nga ginpamatukan niya ang hilikuton bisan naghalin na si Koos sa St. Helena. Nian ang komisyonado, nga isa ka daku, mabukod nga tawo, hinali lang nga nagmasakit kag nagniwang kaayo. Indi mahibaluan sang mga doktor kon ano ang iya balatian. Subong resulta, nagbiya sia sa isla.
Bawtismo kag Padayon nga Pagtubo
Sang tatlo na ka bulan si Koos sa isla, nabatyagan niya nga nagakaigo nga maghiwat sing serbisyo sa bawtismo. Nangin problema ang pagpangita sing nagakaigo nga tulugmawan. Namat-od kami nga magkutkot sing isa ka daku nga buho, sementuhon ini, kag sag-uban sing tubig agod mapuno. Sang gab-i antes sang bawtismo, nag-ulan, kag pagkaaga nalipay kami nga makita ang buho nga puno sing tubig.
Sadtong Domingo sang aga ginhatag ni Koos ang pamulongpulong para sa bawtismo. Sang ginpangabay niya ang mga kandidato sa bawtismo nga magtindog, nagtindog kami nga 26 agod sabton ang kinaandan nga mga pamangkot. Pribilehiyo namon nga nangin una nga mga Saksi nga nabawtismuhan sa isla. Amo yadto ang pinakamalipayon nga adlaw sa akon kabuhi bangod pirme ako nabalaka nga basi mag-abot ang Armagedon nga wala pa ako mabawtismuhan.
Duha ka kongregasyon ang natukod sang ulihi, isa sa Levelwood kag isa sa Jamestown. Kada semana tatlo ukon apat sa amon ang nagabiyahe sing 13 kilometros pakadto sa isa ka kongregasyon agod magdumala sing Teokratikong Eskwelahan sa Pagministro kag Miting sa Serbisyo sa Sabado sang gab-i. Pagkatapos sang pag-alagad sa latagon sa Domingo sang aga, nagapauli kami kag magtambong sa amo man nga mga miting, subong man sa Pagtinuon sa Lalantawan, sa amon kongregasyon sa hapon kag gab-i. Gani sa talipuspusan sang semana puno kami sing makalilipay nga teokratikong mga hilikuton. Handum ko nga magbantala sing bug-os tion, apang may pamilya ako nga dapat saguron. Gani sang 1952, nag-obra ako liwat sa gobierno subong isa ka bug-os tion nga dentista.
Sang 1955 ang nagalakbay nga mga tiglawas sang Sosiedad, nga mga manugtatap sang sirkito, nagsugod sa pagduaw sa isla kada tuig, kag nagdayon sila sa akon balay sa tion sang ila pagduaw. Positibo sila nga mga impluwensia sa amon pamilya. Sa amo man nga tion, pribilehiyo ko man nga makigbahin sa pagpasalida sing tatlo ka pelikula sang Sosiedad sa palibot sang isla.
Ang Makakulunyag nga Kabubut-on sang Dios nga Asambleya
Sang 1958, agod makatambong sa Kabubut-on Sang Dios Internasyonal nga Asambleya sa New York, naghalin ako liwat sa serbisyo sa gobierno. Yadto nga asambleya isa ka importante nga hitabo sa akon kabuhi—isa ka kahigayunan nga naghatag sa akon sing daku nga rason sa pagkalipay kay Jehova. Bangod kulang sing regular nga salakyan pakadto sa isla, wala kami makabalik sa isla sa sulod sang lima ka bulan kag tunga. Ang asambleya naglawig sing walo ka adlaw, kag ang mga sesyon halin sa alas nuebe sa aga tubtob alas nuebe sa gab-i. Apang wala gid ako ginlapyo, kag ginpaabot ko ini kada adlaw. Pribilehiyo ko nga itiglawas ang St. Helena sa sulod sang duha ka minutos sa programa. Ang pagpamulongpulong sa daku nga kadam-an sa Yankee Stadium kag Polo Grounds makakululba nga eksperiensia.
Ang asambleya nagpalig-on sang akon pamat-od nga magpayunir. Ang pamulongpulong publiko nga, “Ang Ginharian Sang Dios Nagagahom—Malapit Na Bala ang Katapusan Sang Kalibutan?,” makapalig-on gid. Pagkatapos sang asambleya, nagduaw kami sa ulong-talatapan sang Sosiedad sa Brooklyn kag naglibot sa pabrika. Nakighambal ako kay Brother Knorr, presidente sadto sang Watch Tower Society, tuhoy sa pag-uswag sang hilikuton sa St. Helena. Nagsiling sia nga luyag niya duawon ang isla sa pila ka adlaw. Nagdala kami pauli sing tanan nga narekord nga pamulongpulong subong man sing madamo nga salida sang asambleya agod ipaambit sa pamilya kag sa mga abyan.
Ang Bug-os Tion nga Pag-alagad nga Tulumuron Natuman
Sang pagpauli ko, gintanyag sa akon liwat ang trabaho ko anay, bangod wala sing dentista sa isla. Apang, ginpaathag ko nga luyag ko magsulod sa bug-os tion nga ministeryo. Sa tapos sang madamo nga negosasyon nahisugtan nga mahimo ako magtrabaho sing tatlo ka adlaw sa isa ka semana, apang mas mataas ang sweldo sangsa nagatrabaho ako anay sing anom ka adlaw. Napamatud-an nga matuod ang mga pulong ni Jesus: “Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang idugang sa inyo.” (Mateo 6:33) Ang paglakbay sa bulubakulod nga alagyan sa isla nga may mahuyang nga mga batiis indi pirme mahapos sa akon. Apang bisan amo sini, nagpayunir ako sa sulod sang 14 ka tuig kag nakabulig sa madamo nga taga-isla nga makatuon sing kamatuoran—isa gid ka rason sa pagkalipay sing daku.
Sang 1961 luyag sang gobierno nga ipadala ako sa Fiji Islands para sa duha-ka-tuig nga paghanas nga kurso nga wala sing bayad agod mangin bug-os ako nga kalipikado nga dentista. Nagtanyag pa gani sila nga paupdon ang akon pamilya sa akon. Makasululay gid yadto nga tanyag, apang sa tapos sang maayo nga pagbinagbinag wala ko ini ginbaton. Indi ko luyag bayaan ang mga kauturan sa amo kalawig nga tion kag dulaon ang akon pribilehiyo sa pag-alagad kaupod nila. Naglain gid ang buot sang senyor nga opisyal sa medisina nga amo ang nag-organisar sadto nga pagbiyahe. Nagsiling sia: “Kon ginadumdom mo nga malapit na gid ang katapusan, magamit mo gihapon ang kuwarta nga imo makita samtang wala pa ini.” Apang nagpabilin ako nga malig-on sa akon desisyon.
Sang masunod nga tuig gin-agda ako sa Bagatnan nga Aprika agod mag-eskwela sa Kingdom Ministry School, isa ka bulan nga paghanas nga kurso para sa mga manugtatap sang kongregasyon. Ginhatagan kami sing mapuslanon nga mga instruksion nga nagbulig sa amon nga maatipan sing epektibo ang amon mga katungdanan sa kongregasyon. Pagkatapos sang pag-eskwela, nakabaton ako sing dugang nga paghanas paagi sa pagpanghikot upod sa nagalakbay nga manugtatap. Nian nag-alagad ako sa duha ka kongregasyon sa St. Helena sa sulod sang kapin sa napulo ka tuig subong tal-us nga manugtatap sa sirkito. Sang ulihi, nangin kalipikado man ang iban nga mga kauturan, kag gingamit ang nagabuslanay nga sistema.
Samtang, nagsaylo kami halin sa Jamestown pakadto sa Levelwood, diin may daku nga pagkinahanglan, kag nagtener kami didto sa sulod sang napulo ka tuig. Sadto nga tion, nagpangabudlay ako sing lakas nga halos wala sing pahuway—nagapayunir, nagatrabaho sing tatlo ka adlaw sa isa ka semana sa gobierno, kag nagapalakat sing isa ka gamay nga balaligyaan. Dugang pa, gintatap ko ang mga butang sa kongregasyon, kag kami sang akon asawa nag-atipan sa pamilya nga may apat ka nagadaku nga kabataan. Agod masarangan ini, ginbayaan ko ang akon tatlo ka adlaw nga obra, ginbaligya ang balaligyaan, kag gindala ang bug-os nga pamilya sa Cape Town, Bagatnan nga Aprika, para magbakasyon sing tatlo ka bulan. Dayon nagsaylo kami sa Ascension Island kag nagtener didto sing isa ka tuig. Sadto nga tion, nabuligan namon ang madamo nga makatigayon sing sibu nga ihibalo tuhoy sa kamatuoran sa Biblia.
Sang pagbalik namon sa St. Helena, nagsaylo kami balik sa Jamestown. Ginpakay-o namon ang balay nga nagaangot sa Kingdom Hall. Agod makaaman sing materyal, ginhimo namon sang akon anak nga si John ang isa ka Ford nga salakyan nga van para sa sorbete, kag nagbaligya kami sing sorbete sa masunod nga lima ka tuig. Wala pa lang madugay nga nasugdan ang negosyo, naaksidente ako sa van. Nagbaliskad ini kag naipit ang akon mga batiis. Subong resulta, nahalitan ang mga nerve sa ubos sang akon mga tuhod, kag naglawig sing tatlo ka bulan antes ako nag-ayo.
Madamo nga Pagpakamaayo sang Nagligad kag sa Palaabuton
Sa sulod sang mga tuig, madamo kami sing pagpakamaayo—dugang nga mga rason sa pagkalipay. Isa sini amo ang amon pagkadto sa Bagatnan nga Aprika agod magtambong sa isa ka nasyonal nga kombension sang 1985 kag agod magduaw sa bag-o nga puluy-an Bethel, nga ginatukod pa sadto. Ang isa pa amo ang pagpakigbahin sing diutay, upod sa akon anak nga si John, sa pagpatindog sing isa ka matahom nga Assembly Hall malapit sa Jamestown. Nalipay man kami nga ang tatlo sang amon mga anak nagaalagad subong mga gulang, kag ang isa ka apo nga lalaki nagaalagad sa Bethel sa Bagatnan nga Aprika. Kag nakaani gid kami sing daku nga kalipay kag kaayawan sa pagbulig sa madamo nga makatigayon sing sibu nga ihibalo tuhoy sa Biblia.
Ang latagon sang amon ministeryo limitado, nga may mga 5,000 lamang ka tawo. Apang, ang pagpanghikot sa amo gihapon nga teritoryo sing sulit-sulit nakapatubas sing maayo nga mga resulta. Diutay lang gid nga mga tawo ang di-mainabyanon sa amon. Ang St. Helena kilala sa pagkamainabyanon sini, kag may magatamyaw sa imo bisan diin ka makadto—nagalakat sa dalan ukon nagamaneho sing awto. Naeksperiensiahan ko nga kon mas kilala mo ang mga tawo, mas mahapos ang pagpanaksi sa ila. May yara na 150 ka manugbantala kami karon, bisan pa madamo ang nagsaylo sa iban nga pungsod.
Bangod nagdalagku na ang amon kabataan kag nagsalaylo, kami na lang nga duha liwat sang akon asawa, pagkatapos sang 47 ka tuig sang pag-asawahay. Ang iya mainunungon nga gugma kag pagsakdag sa sulod sang mga tuig nakabulig sa akon nga magpadayon sa pag-alagad kay Jehova sing malipayon walay sapayan sang mga pagtilaw. Ang amon pisikal nga kusog nagaluya, apang ang amon espirituwal nga kusog nagabag-o kada adlaw. (2 Corinto 4:16) Ako, upod sa akon pamilya kag mga abyan, nagapaabot sing isa ka makalilipay nga palaabuton nga ipasag-uli ako liwat sa pisikal nga mas maayo pa sangsa kon ano ako anay sang nagaedad sing 17 anyos. Ang handum ko gid amo nga matigayon ang kahimpitan sa bug-os nga kahulugan kag, labaw sa tanan, alagaron ang aton mahigugmaon kag mainulikdon nga Dios, si Jehova, kag ang iya nagagahom nga Hari, si Jesucristo, sing dayon.—Nehemias 8:10.
[Retrato sa pahina 26]
Si George Scipio kag ang tatlo sang iya mga anak, nga nagaalagad subong mga gulang
[Retrato sa pahina 29]
Si George Scipio upod sa iya asawa, si Doris