Ang Pagkamatarong Nagabayaw sa Isa ka Pungsod
PAGKATAPOS sang inadlaw nga pag-ulan, daw ano nga kalipay ang magbugtaw kag makita ang adlaw nga nagasubang sa wala sing gal-um nga kalangitan! Ang duta narepreskuhan, kag karon ang katamnan nagatubo sing dagaya. Gingamit anay ni Jehova nga Dios ina nga laragway sa pag-ilustrar sang mga pagpakamaayo sang matarong nga paggahom. Nagsiling sia kay Hari David: “Kon ang isa nga nagagahom sa mga tawo matarong, nga nagagahom sa kahadlok sa Dios, nian mangin subong ini sang kasanag sang kaagahon, kon ang adlaw nagasubang, sa kaagahon nga walay gal-um. Sa masanag nga pagsilak, sa tapos sang ulan, ang hilaw nga hilamon nagatubo sa duta.”—2 Samuel 23:3, 4.
Ang mga pulong sang Dios natuman sa matarong nga paggahom sang anak ni David, nga si Hari Solomon. Ang Biblia nagareport: “Ang Juda kag Israel nagpadayon sa pagpuyo sing malig-on, ang tagsa ka tawo sa idalom sang iya ubas kag sa idalom sang iya higuera, kutob sa Dan tubtob sa Beer-seba, sa tanan nga adlaw ni Solomon.”—1 Hari 4:25.
Ang dumaan nga Israel pinili nga pungsod sang Dios. Ginhatagan niya sila sing mga kasuguan kag ginsilingan sila nga kon tumanon nila ang iya tingog, pakataason niya sila “labaw sa tanan nga pungsod sang duta.” (Deuteronomio 28:1) Indi ang kaugalingon nga pagkamatarong sang Israel kundi ang pagkamatarong ni Jehova ang nagpakataas sa ila. Ang mga sugo nga ginhatag sang Dios sa ila mas labaw pa sa mga kasuguan sang mga pungsod sa palibot nila. Subong isa ka katawhan, dihimpit man sila kaangay sadtong tanan nga mga pungsod. Hanti, bangod sang mas mataas nga Kasuguan ni Jehova kag sang ila matutom nga pagsunod sa sini nga ginbayaw sila labaw sa mga pungsod. Sang gintuman nila ang mga kasuguan ni Jehova, nakaagom sila sang iya kahamuot kag pagpakamaayo. Naeksperiensiahan ini ni Hari Solomon sadtong nagagahom sia. Nakasiling sia: “Ang pagkamatarong nagapakataas sang pungsod, apang,” paandam niya, “ang sala kahuluy-an sa bisan anong pungsudnon nga grupo.”—Hulubaton 14:34.
Sing makahalanusbo, bangod sang masunson nga mga buhat sang pagkadimatinumanon, ang pungsod sang Israel ginpakanubo. Nag-agom sila sing pungsudnon nga kahuluy-an. Nagdul-ong ini sang ulihi sa permanente nga pagsikway sa ila tigaylo sang isa ka bag-ong espirituwal nga pungsod.—Mateo 21:43.
Espirituwal nga Israel
Sa isa ka sinapol sang Cristianong nagadumala nga hubon sa Jerusalem, si Santiago, nga natawo nga isa ka Judiyo, nagsiling sa idalom sang pagbugna nga ang Dios “nagliso sang iya igtalupangod sa mga pungsod sa pagkuha sa ila sing katawhan para sa iya ngalan.” (Binuhatan 15:14) Gintawag ni apostol Pablo ining bag-ong Cristianong pungsod nga “Israel sang Dios.” (Galacia 6:16) Nahanungod sa katuyuan sang pagtawag sa ila, si Pedro nagsulat: “Kamo ‘pinili nga kaliwatan, harianon nga pagkasaserdote, balaan nga pungsod, katawhan nga ginapanag-iyahan sing pinasahi, agod mapahayag ninyo sing lapnag ang mga pagkahalangdon’ sang isa nga nagtawag sa inyo gikan sa kadudulman pakadto sa iya kalatingalahan nga kapawa.” (1 Pedro 2:9) Subong pinili nga katawhan sang Dios, dapat sila magsiga subong mga sulu sa kalibutan. Ang pagkamatarong ni Jehova magapakataas sa ila.—Filipos 2:15.
Ang pagpili sa sining espirituwal nga mga Israelinhon mahimo mapaanggid sa pagmina sing brilyante. Kon ang may brilyante nga ore makuha, 1 ka karat lamang kada 3 ka tonelada sang duta ang ginapatubas sini. Ang ginagamit anay nga paagi sa pagpain sang mga brilyante nagadalahig sang pagsamo sang ore sa tubig kag sang pagpaagay sang sinamo sa mga lamesa nga may grasa. Ang mga brilyante wala nagasamo sa tubig, kag nagapilit ini sa grasa samtang ang dikinahanglanon nga materyal ginaanod. Sa sini nga tion, ang mga brilyante mabahol. Apang, kon mautod kag mapahining, ginapabanaag sini ang kasanag sa tanan nga direksion.
Kaangay sang wala nagasamo sa tubig nga mga brilyante nga indi bahin sang mga butang sa palibot nila, ang katawhan ni Jehova ginpain gikan sa kalibutan. (Juan 17:16) Sang una nga gindala sa kapawa, mahimo nga wala sila nagainggat. Apang ang Pulong kag espiritu ni Jehova nagpatubas sa sulod nila sang isa ka bag-ong personalidad, kag nagasiga sila subong sang mga sulu sa sining kalibutan. Bangod sang pagkamatarong ni Jehova nga ginpakataas sila kag nagapabanaag sang mahimayaon nga kapawa sang kamatuoran sang Ginharian sa tanan nga direksion, indi bangod sang ila kaugalingon nga pagkamatarong.
Apang, kutob sa naulihi nga bahin sang nahaunang siglo C.E., ang apostasya nagsulod sa mga kongregasyon kag nag-apektar sa madamo. Ang ginatawag nga mga Cristiano nakigsimpon sa mga pungsod sang kalibutan kag indi makilal-an gikan sa kalibutan sa palibot nila.
Karon ang matutom nga nagkalabilin sang espirituwal nga mga Israelinhon ginpasag-uli sa kahamuot ni Jehova. Ginhamulag nila ang ila kaugalingon gikan sa kalibutan kag gintinluan ang ila kaugalingon sang “tanan nga kahigkuan sang unod kag espiritu.” (2 Corinto 7:1) Bangod matinlo kag matadlong sa atubangan ni Jehova, ginasakdag nila ang iya pagkamatarong. Nagbayaw ini sa ila sa isa ka mataas nga posisyon sang kahamuot labaw sa mga pungsod sang kalibutan. Paagi sa ila makugi nga pagbantala sang maayong balita sang Ginharian, ang dakung internasyonal nga kadam-an ginpasuod kay Jehova kag nangin bahin sang iya katawhan.—Bugna 7:9, 10.
Makita sang Kalibutan ang Kinatuhayan
Kon kaisa ginadayaw sang kalibutanon nga mga awtoridad ang paggawi sang mga alagad sang Dios. Sang pila ka tion nga nagligad, ang hepe nga opisyal sang seguridad sang Pretoria Show Grounds, South Africa, nagkomento tuhoy sa pagginawi sang mga Saksi ni Jehova, gikan sa tanan nga rasa, nga nagagamit sadto nga mga pasilidad para sa ila tuigan nga mga kombension. Lakip sa iban pa nga mga butang, sia nagsulat: “Ang tanan matinahuron, ang mga tawo nga nagasugilanunay sing mainabyanon, ang panimuot nga ginpakita sang nagligad nga pila ka adlaw—ini tanan nagapamatuod sa mataas nga talaksan sang mga katapo sang inyo katilingban, kag nga ang tanan nagakabuhi sing tingob kaangay sang isa ka malipayon nga pamilya.”
Ang katawhan ni Jehova mahimo makaamot sa pagkamatarong sang iya pungsod indi lamang sa subong sinang dalagkung mga pagtilipon kundi sa ila man pribado nga pagkabuhi. Halimbawa, ang sanga sang Watch Tower Society sa South Africa nakabaton sing sulat gikan sa isa ka babayi sa Johannesburg, nga nagasiling: “Sang nagligad nga semana nagmaneho ako nga ang akon kahita yara sa ibabaw sang akon salakyan. Nahulog ini sa Jan Smuts Avenue kag napudyutan lakip ang tanan nga unod sini sang isa ka katapo sang inyo kongregasyon, si G. R—, nga nagtelepono kag gin-uli ini sa akon. . . . Ginapasalamatan ko sing daku ini nga pagkabunayag nga nangin talagsahon nga kinaiya sa karon nga mga tion kag ginadayaw ko ang inyo kongregasyon tungod sang pagpasad sang mga prinsipio nga ginasunod sang inyo mga katapo.”
Huo, paagi sa pagsunod sa matarong nga mga prinsipio ni Jehova, ang iya katawhan nangin tuhay gikan sa kalibutan. Bangod ginapakita nila ang pagkamatarong ni Jehova, ang mga bunayag sing tagipusuon nagakaganyat sa Cristianong kongregasyon. Kinaugali lamang nga maganyat sa butang nga matinlo kag putli. Halimbawa, isa ka estranghero ang nagtambong kis-a sa miting sang mga Saksi ni Jehova sa Zurich, Switzerland, kag nagsiling nga luyag niya mangin katapo sang kongregasyon. Ginpaathag niya nga ang iya utod nga babayi ginsikway (disfellowship) tungod sang imoralidad kag nagdugang nga luyag niya magbuylog sa isa ka organisasyon nga “wala nagapahanugot sang malain nga paggawi.” Bisan ang New Catholic Encyclopedia nagakilala nga ang mga Saksi ni Jehova nakilal-an subong “isa sang pinakamabuot nga grupo sa kalibutan.”
Samtang ang pagkamatarong nagapahalipay, ang sala mahimo nga magapakahuya sa maayong ngalan sang isa, ilabi na kon ang daku nga sala nabalahuba sa komunidad. Kon kaisa ang Cristianong kongregasyon dapat mag-abaga sang kahuluy-an nga ginahatag sa sini kon ang indibiduwal nga mga katapo makahimo sing daku nga sala. Sing halangpunon, sarang mapangapinan sang matutom nga mga katapo sang kongregasyon ang maayong ngalan sang kongregasyon paagi sa pagpakita nga ang nakasala gindisiplina sa maluluy-on nga paagi, kon sayuron, nga nagahisanto sa Makasulatanhon nga mga prinsipio. Kon ang isa nagabuhat sing sala kag wala nagahinulsol, pagapaguwaon sia gikan sa kongregasyon—pagasikwayon.—1 Corinto 5:9-13.
Kon Ngaa ang Iban Ginasikway
Walay sapayan nga linibo ang ginasikway gikan sa Cristianong kongregasyon kada tuig, diutay nga porsiento lamang ini sang halos lima ka milyon ka mga Saksi sa kalibutan. Ngaa inang masakit nga tikang dapat himuon batok kay bisan sin-o sa Cristianong kongregasyon? Ang kinaugali sang sala amo ang isa sang nagapat-od nga mga butang. Apang ang mas importante nga butang amo kon bala tunay nga ginahinulsulan sang nakasala ang ginhimo nga daku nga sala. Kon tunay gid sia nga nagahinulsol, nagliso kay Jehova sa tinagipusuon nga pangamuyo, nangayo sing kapatawaran tungod sa sala nga ginhimo batok sa Iya, kag nangayo sing bulig sa masaligan nga mga lalaki sa kongregasyon, mabuligan sia nga matigayon liwat ang kahamuot sang Dios kag magpabilin nga bahin sang kongregasyon.—Hulubaton 28:13; Santiago 5:14, 15.
Kon ang isa ka bata nga may maayo kag mapagros nga kaangtanan sa iya amay makahimo sing butang nga nagapahanusbo sa iya amay, ang duha dapat mangin maabtik sa pagpasag-uli sinang hamili nga kaangtanan. Sa kaanggid, sang gindedikar naton ang aton kabuhi kay Jehova, nagsulod kita sa labing hamili nga kaangtanan sa iya. Hanti, kon makahimo kita sing butang nga nagapahanusbo sa iya, dapat kita maghulag sing maabtik sa pagtinguha nga mapasag-uli ina nga kaangtanan upod sa aton Langitnon nga Amay.
Sing makalilipay, ang iban nga ginsikway naghinumdom sang ilustrasyon sang buhaha nga anak. Si Jehova ginpaanggid didto sa isa ka mahigugmaon nga Amay nga handa sa pagbaton liwat sang isa ka mahinulsulon nga makasasala kon manumbalik sia kag magapangayo sang kapatawaran sang Dios. (Lucas 15:11-24) Ang tunay, tinagipusuon nga paghinulsol kag pagtalikod sa kon ano ang malain nangin ang paagi nga makabalik sa kahamuot ni Jehova kag sang Cristianong kongregasyon. Ang pila ka mahinulsulon nga makasasala nga nagbatyag nga nadugmok bangod sang kabug-aton sang ila sala ginpahulag sa paghinulsol kag sa paghimo sing mga tikang sa pagbalik sa mahigugmaon nga palibot sang Cristianong kongregasyon. Sa amo ginaapresyar nila ang mga pinamulong ni Jehova sa Isaias 57:15.
Agod punggan ang mga indibiduwal gikan sa pagbalik sa mahigugmaon nga pag-atipan ni Jehova, si Satanas maluyag magpakunokuno nga ang mga sala nga ginhimo wala sing kapatawaran. Apang ang halad nga gawad ni Cristo Jesus nagakaigo na sa pagtabon sang mga sala ni bisan sin-o nga nagahinulsol—huo, bisan pa sang napanubli nga pagkamakasasala sang “bug-os nga kalibutan.” (1 Juan 2:1, 2) Ang isa ka sala nga wala ginatabunan sang gawad amo ang sala batok sa balaan nga espiritu sang Dios, nga katumbas sa hungod nga pagrebelde batok sa pagpanghikot sang espiritu sang Dios, kaangay sang daku nga mga kasal-anan ni Judas Iscariote kag sang madamong escriba kag Fariseo.—Mateo 12:24, 31, 32; 23:13, 33; Juan 17:12.
Pagsakdag sa Pagkamatarong ni Jehova
Sanglit ang nagkalabilin sang espirituwal nga mga Israelinhon ginpasag-uli sa kahamuot ni Jehova sang 1919, labi kag labi sila nga ginpakataas gikan sa nagapalibot nga kalibutan. Indi ini bangod sang pagkaayo nila kundi bangod sang ila kinabubut-on nga pagpasakop sa mga kasuguan kag mga talaksan ni Jehova. Subong resulta, minilyon sang “iban nga mga karnero” ni Cristo ang naganyat nga makig-upod sa espirituwal nga Israel subong mainunungon nga mga kaupdanan. (Juan 10:16) Nagadala sila sing kahimayaan kag kadungganan kay Jehova sa kalibutan nga malayo sa matarong nga mga talaksan sang Dios. Kaangay ini sang napanilagan anay sang magasin nga Personality sa South Africa: “Ang mga Saksi ni Jehova daw nagaawas sa maayong mga kinaiya kag halos hilway gikan sa malain nga mga kinaiya.”
Agod mahuptan ining mataas nga posisyon sa didiosnon nga kalibutan, ang tagsa ka indibiduwal nga katapo sang Cristianong kongregasyon dapat magkabuhi sing matinlo kag matadlong sa atubangan ni Jehova. Sa Biblia, ang langitnon nga organisasyon ni Jehova ginalarawan sang matinlo nga mga butang. Makita ini subong isa ka matahom nga babayi nga napanaptan sing adlaw kag may bulan sa idalom sang iya mga tiil. (Bugna 12:1) Ang Bag-ong Jerusalem ginalaragway subong isa ka balaan nga siudad, matahom sing hitsura. (Bugna 21:2) Ang matutom nga mga katapo sang nobya ni Cristo ginahatagan sing “mahining, matinlo, manipis nga lino.” (Bugna 19:8) Yadtong yara sa dakung kadam-an nakita nga “napanaptan sing maputi.” (Bugna 7:9) Ang katawhan nga nahuyog sa pagkamatarong naganyat sa matinlo nga organisasyon. Sa kabaliskaran, ang organisasyon ni Satanas indi matinlo. Ang iya relihiosong sistema ginalaragway subong isa ka babayi nga makihilawason, kag yadtong sa guwa sang balaan nga siudad ginalaragway subong mahigko, dimatinlo.—Bugna 17:1; 22:15.
Ang kabuhi nga walay katapusan ginasaad sa mga matarong. Ang nagtipon nga katawhan nga nagasakdag sang pagkamatarong ni Jehova may paglaum nga makalampuwas sa katapusan sining malauton nga sistema. “Ang nagapamati sa akon . . . magapuyo sa kalig-unan kag indi pagatublagon sang kahadlok sa kapahamakan,” panaad sang Dios sa Hulubaton 1:33.
Daw ano kasadya kon ang Daku Pa nga Solomon, nga si Cristo Jesus, magagahom sa sinang bag-ong kalibutan sang pagkamatarong, nga nagakahadlok kay Jehova! (2 Pedro 3:13) Mangin subong ini sang kasanag sa kaagahon kon ang adlaw magasubang, sa kaagahon nga wala sing gal-um. Ang mga pumuluyo sang bug-os nga duta magapuyo sa kalig-unan, ang kada isa nagalingkod sa iya kaugalingon nga ubasan kag higuera, kon sa aton pa. Ang matarong nga katilingban sang tawo magapatahom sang duta kag magapuyo sa nagakaigo nga duog sini sa uniberso sa walay katapusan nga kadayawan sang aton Dios, si Jehova.—Miqueas 4:3, 4; tan-awa man ang Isaias 65:17-19, 25.
[Credit Line sang retrato sa pahina 26]
Garo Nalbandian