Kapitulo 5

Nakita ni Juan ang Ginhimaya nga si Jesus

Palanan-awon 1​—Bugna 1:10–3:22

Tema: Gin-usisa ni Jesus ang espirituwal nga Israel sa duta kag naghatag sing pagpalig-on

Tion sang katumanan: Ini nga bahin sang adlaw sang Ginuo nagsugod sang 1914 kag nagapadayon tubtob mapatay kag mabanhaw ang katapusan sang matutom nga mga hinaplas

1. Paano ginapresentar ang una nga palanan-awon, kag paano ginpahangop ni Juan ang tion sang matuod nga aplikasyon sini?

ANG una nga palanan-awon sa tulun-an sang Bugna nagasugod sa kapitulo 1, bersikulo 10. Ini nga palanan-awon, kaangay sang iban pa sa Bugna, ginapakilala sang pahayag nga si Juan nakabati ukon nakakita sing butang nga tumalagsahon. (Bugna 1:10, 12; 4:1; 6:1) Ini nga palanan-awon ginapresentar suno sa kahimusan sang una nga siglo nga ang mga mensahe ginapatuhoy sa pito ka kongregasyon sang tion ni Juan. Apang ginapakita ni Juan ang tion sang matuod nga aplikasyon sini sang magsiling sia: “Paagi sa inspirasyon nagdangat ako sa adlaw sang Ginuo.” (Bugna 1:10a) San-o ini nga “adlaw”? May kaangtanan bala sa sini ang talalupangdon nga mga hitabo sa sining magamo nga mga panahon? Kon amo, dapat naton talupangdon sing maayo ang tagna, kay nagaapektar ini sang aton mismo kabuhi—sang aton kaluwasan.—1 Tesalonica 5:20, 21.

Sa Adlaw Sang Ginuo

2. San-o nagsugod ang adlaw sang Ginuo, kag san-o ini matapos?

² Sa ano nga hut-ong sang tion ginatalana sini ang katumanan sang Bugna? Ano ang adlaw sang Ginuo? Ginapatuhuyan ini ni apostol Pablo subong tion sang paghukom kag sang katumanan sang mga saad sang Dios. (1 Corinto 1:8; 2 Corinto 1:14; Filipos 1:6, 10; 2:16) Sa pag-abot sina nga “adlaw,” ang daku nga mga katuyuan ni Jehova progresibo kag madinalag-on nga nagapadulong sa talipuspusan. Nagsugod ina nga “adlaw” sang ginkoronahan si Jesus subong langitnon nga Hari. Bisan sa tapos mahukman ni Jesus ang kalibutan ni Satanas, ang adlaw sang Ginuo magapadayon, sa pagpasag-uli sang Paraiso kag sa pagpahimpit sa katawhan, tubtob sa ulihi “itugyan [ni Jesus] ang ginharian sa iya Dios kag Amay.”—1 Corinto 15:24-26; Bugna 6:1, 2.

3. (a) Paano ang tagna ni Daniel tuhoy sa “pito ka panahon” nagabulig sa aton sa paghangop kon san-o nagsugod ang adlaw sang Ginuo? (b) Ano nga mga hitabo sa duta ang nagpamatuod nga ang tuig 1914 amo ang pamuno sang adlaw sang Ginuo?

³ Ang katumanan sang iban nga mga tagna sa Biblia nagabulig sa aton sa paghibalo kon san-o nagsugod ang adlaw sang Ginuo. Halimbawa, ginlaragway ni Daniel ang pag-utod sang paggahom sa kaliwatan ni Hari David; pagligad sang “pito ka panahon” makilala “nga ang Labing Mataas amo ang Manuggahom sa ginharian sang mga tawo, kag ihatag niya ini sa isa nga maluyagan niya.” (Daniel 4:23, 24, 31, 32) Ang daku nga katumanan sina nga tagna nagsugod sang mahapay ang ginharian sang Juda, nga suno sa pamatuod sang Biblia natapos sang Oktubre 607 B.C.E. Ginapakita sang Bugna 12:6, 14 nga ang 3 1/2 ka panahon katumbas sa 1,260 ka adlaw; busa, ang pito ka panahon (doble sina nga numero) dapat nga 2,520 ka adlaw. Kon isipon naton nga ang “isa ka adlaw [katumbas] sa isa ka tuig,” magadangat kita sa 2,520 ka tuig subong amo ang kalawigon sang “pito ka panahon.” (Ezequiel 4:6) Busa, nagsugod si Cristo Jesus sa paggahom sa langit sang ulihi nga bahin sang 1914. Ang pagdabdab sang una nga bug-os kalibutan nga inaway sadto nga tuig nagtanda sang ‘pamuno sang kasakit’ nga nagpadayon sa pagsalot sa katawhan. Sugod sang 1914, talalupangdon gid nga ginpamatud-an sang mga hitabo sa sining namansahan sing dugo nga duta yadto nga tuig subong ang pamuno sang “adlaw” sang presensia ni Jesus!—Mateo 24:3-14.a

4. (a) Ano ang ginapahangop sang mga pulong mismo sang Bugna sa kon san-o natuman ang una nga palanan-awon? (b) San-o matapos ang katumanan sang una nga palanan-awon?

⁴ Busa, ining una nga palanan-awon kag ang laygay nga ginaunod sini, ginapatuhoy sa adlaw sang Ginuo, halin sang 1914 padayon. Ini nga panahon ginasakdag sang katunayan nga, sa ulihi nga bahin sang Bugna, ginalaragway sang rekord ang paghikot sang matuod kag matarong nga mga paghukom sang Dios—mga hitabo nga si Ginuong Jesus magatungod sing talalupangdon gid nga papel. (Bugna 11:18; 16:15; 17:1; 19:2, 11) Kon ang katumanan sang una nga palanan-awon nagsugod sang 1914, san-o ini matapos? Subong sang ginapakita mismo sang mga mensahe, ang organisasyon nga ginapatuhuyan amo ang kongregasyon sang mga hinaplas sang Dios sa duta. Busa, ang katumanan sining una nga palanan-awon matapos kon ang katapusan nga matutom nga katapo sinang hinaplas nga kongregasyon mapatay kag mabanhaw padulong sa langitnon nga kabuhi. Apang, ang Adlaw sang Ginuo, nga may mga pagpakamaayo sa iban nga mga karnero sa duta, magapadayon tubtob sa katapusan sang Isa ka Libo ka Tuig nga Paghari ni Jesucristo.—Juan 10:16; Bugna 20:4, 5.

5. (a) Ano ang ginsugo sang tingog kay Juan nga himuon niya? (b) Ngaa paborable ang lokasyon sang “pito ka kongregasyon” para sa pagpadala sang linukot sa ila?

⁵ Sa sining una nga palanan-awon, sa wala pa sing nakita si Juan, may nabatian sia: “Kag nabatian ko sa akon likod ang mabaskog nga tingog nga daw trumpeta, nga nagasiling: ‘Ang imo nakita isulat sa isa ka linukot kag ipadala ini sa pito ka kongregasyon, sa Efeso kag sa Smirna kag sa Pergamo kag sa Tiatira kag sa Sardis kag sa Filadelfia kag sa Laodicea.’” (Bugna 1:10b, 11) Isa ka tingog nga may awtoridad kag nagasugo subong sang tunog sang trumpeta ang nagsiling kay Juan nga magsulat sa “pito ka kongregasyon.” Magabaton sia sing isa ka serye sang mga mensahe kag isulat niya ang mga butang nga iya makita kag mabatian. Talupangda nga ang mga kongregasyon nga ginasambit diri aktual nga nagluntad sang adlaw ni Juan. Sila tanan nahamtang sa Asia Minor, sa tabok sang dagat halin sa Patmos. Madali kadtuan ang tagsatagsa sini bangod sang maayo nga mga dalan sang mga Romano sa sadto nga duog. Indi mabudlayan ang mensahero sa pagdala sang linukot gikan sa isa ka kongregasyon padulong sa masunod. Ining pito ka kongregasyon nagaanggid sa isa ka bahin sang isa ka sirkito sang mga Saksi ni Jehova sa karon.

6. (a) Ano ang buot silingon sang “mga butang nga amo karon”? (b) Ngaa mapat-od naton nga ang mga kahimtangan sa kongregasyon sang hinaplas nga mga Cristiano karon kaanggid sa mga kahimtangan sang adlaw ni Juan?

⁶ Ang kalabanan nga tagna sa Bugna matuman sa tapos sang panahon ni Juan. Nagapatuhoy ini sa “mga butang nga mahanabo pagkatapos sini.” Apang ang laygay sa pito ka kongregasyon nagapatuhoy sa “mga butang nga amo karon,” ang mga kahimtangan nga nagaluntad gid sadto sa pito ka kongregasyon. Ang mga mensahe mapuslanon nga mga bulig sa gintangdo nga matutom nga mga gulang sa sadtong pito ka kongregasyon, subong man sa tanan nga iban pa nga kongregasyon sang hinaplas nga mga Cristiano sadtong tion.b Sanglit ang palanan-awon una nga naaplikar sa adlaw sang Ginuo, ang ginasiling ni Jesus nagapahangop nga ang kaanggid sadto nga mga kahimtangan paabuton man sa kongregasyon sang hinaplas nga mga Cristiano sa aton panahon.—Bugna 1:10, 19.

7. Sin-o ang nakita ni Juan sa sining una nga palanan-awon, kag ngaa tuman ini ka importante kag makakulunyag para sa aton karon?

⁷ Sa sining una nga palanan-awon, nakita ni Juan ang makasililaw nga si Ginuong Jesucristo sa Iya langitnon nga himaya. May mas nagakaigo pa bala sa sini sa isa ka tulun-an sang mga tagna nga may kaangtanan sa daku nga adlaw sining Ginuo nga ginpadala sang langit? Kag mas may importante pa bala sa sini para sa aton, nga nagakabuhi karon sa sinang panahon kag nagasunod sa iya tagsa ka sugo? Dugang pa, daw ano ka makakulunyag para sa mga sumalakdag sang pagkasoberano ni Jehova nga pasaligon sila nga ang Mesianiko nga Binhi, sa tapos makabatas sang mga pagtilaw kag mga paghingabot nga ginpahanabo ni Satanas kag sa tapos makaantos sang masakit nga kamatayon sang ang Iya “tikod” gindugmok sang nagligad nga halos 2,000 ka tuig, nagakabuhi karon sa langit, kag may gahom sa pagdala sang dakung katuyuan sang Dios sa madaugon nga katumanan sini!—Genesis 3:15.

8. Ano ang handa nga himuon ni Jesus karon?

⁸ Maathag nga si Jesus nakahanda na karon sa paghikot subong nakalingkod sa trono nga Hari. Gintangdo sia ni Jehova subong Pangulo nga Manuglaglag sa pagtuman sang katapusan nga mga paghukom ni Jehova batok sa sining daan kag malaut nga sistema sang mga butang kag sa mapintas nga dios sini, si Satanas. Hukman man niya ang iya kongregasyon sang mga hinaplas kag ang dakung kadam-an nga ila mga kaupod, subong man ang kalibutan.—Bugna 7:4, 9; Binuhatan 17:31.

9. (a) Paano ginalaragway ni Juan ang ginhimaya nga si Jesucristo sa tunga sang bulawan nga mga kandelero? (b) Ano ang ginapahangop sang tulad-templo nga danyag kag sang panapton nga ginasul-ob ni Jesus? (c) Ano ang ginasimbulo sang iya wagkus nga bulawan?

⁹ Nagliso si Juan sang mabatian ang mabaskog nga tingog, kag amo ini ang iya nakita: “Nagbalikid ako agod makita kon kay sin-o tingog ang nagapakighambal sa akon, kag sang pagbalikid ko, nakita ko ang pito ka kandelero nga bulawan.” (Bugna 1:12) Sang ulihi, nahangpan na ni Juan kon ano ang ginasimbulo sining pito ka kandelero. Apang nakuha ang iya igtalupangod sang persona nga yara sa tunga sang mga kandelero. May yara ‘sa tunga sang mga kandelero nga isa nga kaangay sang anak sang tawo, nga nagasuksok sing panapton nga ang kalabaon tubtob sa tiil, kag nawagkusan sa dughan sing wagkus nga bulawan.’ (Bugna 1:13) Si Jesus, nga “anak sang tawo,” nagapresentar diri sang iya kaugalingon sa atubangan sang nalisang nga saksi, nga si Juan, subong isa ka mahimayaon kag nagasilak nga persona. Nagpakita sia nga may makasililaw nga himaya sa tunga sang nagadabdab nga mga kandelero nga bulawan. Ining tulad-templo nga danyag nagpadaku kay Juan sang kamatuoran nga si Jesus nag-abot subong ang gintangdo ni Jehova nga daku nga Mataas nga Saserdote, nga may gahom sa paghukom. (Hebreo 4:14; 7:21-25) Ang iya malaba kag matahom nga panapton nagakaigo sa iya palangakuan subong saserdote. Kaangay sang Judiyo nga mataas nga mga saserdote sang una, nawagkusan sia sing wagkus—isa ka wagkus nga bulawan sa iya dughan nga nagatabon sang iya tagipusuon. Nagakahulugan ini nga tumanon niya sing tinagipusuon ang balaan nga hilikuton nga nabaton niya gikan kay Jehova nga Dios.—Exodo 28:8, 30; Hebreo 8:1, 2.

10. (a) Ano ang ginapahangop sang subong sa niebe kaputi nga buhok ni Jesus kag sang iya nagadabdab nga mga mata? (b) Ano ang kahulugan sang mga tiil ni Jesus nga subong sang nagabaga nga saway?

¹⁰ Ang paglaragway ni Juan nagpadayon: “Dugang pa, ang iya ulo kag ang iya buhok maputi subong sang puti nga de-lana, subong sang niebe, kag ang iya mga mata subong sang nagadabdab nga kalayo.” (Bugna 1:14) Ang iya subong sa niebe kaputi nga buhok nagapahangop sing kaalam bangod sang iya malawig nga kabuhi. (Ipaanggid ang Hulubaton 16:31.) Kag ang iya nagadabdab nga mga mata nagapakita nga sia masipat kag alisto samtang nagausisa sia, nagatilaw, ukon nagapabutyag sing kaakig. Bisan ang mga tiil ni Jesus nahulungan ni Juan: “Kag ang iya mga tiil kaangay sa puro nga saway nga nagabaga sa hurno; kag ang iya tingog subong sang daganas sang madamo nga tubig.” (Bugna 1:15) Sa palanan-awon, ang mga tiil ni Jesus kaangay sang saway, nagabaga kag nagainggat—nagakaigo gid para sa isa nga nagalakat sing makugi kag may maayo nga panindugan sa atubangan ni Jehova nga Dios. Dugang pa, samtang ang balaan nga mga butang nga ginasambit sa Biblia masami nga ginalaragway sang bulawan, ang mga butang nga tawhanon ginalaragway kon kaisa sang saway.c Gani ang nagabaga nga mga tiil ni Jesus subong sang saway nagapahanumdom sa aton kon daw ano “katahom” ang iya mga tiil sang maglakat sia sa duta nga nagabantala sing maayong balita.—Isaias 52:7; Roma 10:15.

11. (a) Ano ang ginapahanumdom sa aton sang mahimayaon nga mga tiil ni Jesus? (b) Ano ang ginapahangop sang kamatuoran nga ang tingog ni Jesus “subong sang daganas sang madamo nga tubig”?

¹¹ Sa pagkamatuod, subong himpit nga tawo, nakatigayon si Jesus sing kasilaw nga dayag gid sa mga anghel kag mga tawo. (Juan 1:14) Ang iya mahimayaon nga mga tiil nagapahanumdom man sa aton nga nagalakat sia sa balaan nga duta sang organisasyon ni Jehova, nga sa diin sia ang Mataas nga Saserdote. (Ipaanggid ang Exodo 3:5.) Dugang pa, ang iya tingog nagadaguob sing mabaskog subong sang isa ka daku nga nagadaganas nga busay. Makadalayaw ini kag makapulunaw, subong nagakaigo gid para sa isa nga gintawag Pulong sang Dios, ang isa nga magakari ‘sa paghukom sa napuy-an nga duta sa pagkamatarong.’—Binuhatan 17:31; Juan 1:1.

12. Ano ang kahulugan sang “matalom kag malaba nga espada nga duha sing sulab”?

¹² “Kag sa iya tuo nga kamot may pito ka bituon, kag sa iya baba nagagua ang isa ka matalom kag malaba nga espada nga duha sing sulab, kag ang iya nawong subong sang adlaw nga nagasilak sa bug-os nga kasanag sini. Kag sang nakita ko sia, napukan ako nga daw patay sa iya tiilan.” (Bugna 1:16, 17a) Ginpaathag mismo ni Jesus sang ulihi ang kahulugan sang pito ka bituon. Apang talupangda kon ano ang nagagua sa iya baba: “isa ka matalom kag malaba nga espada nga duha sing sulab.” Daw ano ka nagakaigo nga paglaragway! Kay si Jesus amo ang gintangdo sa pagpahayag sang katapusan nga mga paghukom ni Jehova batok sa Iya mga kaaway. Ang mahukmanon nga mga pulong gikan sa iya baba magaresulta sa kalaglagan sang tanan nga malauton.—Bugna 19:13, 15.

13. (a) Ano ang ginapahanumdom sa aton sang masanag kag nagasilak nga nawong ni Jesus? (b) Ano nga kabilugan nga impresyon ang matigayon naton gikan sa paglaragway ni Juan kay Jesus?

¹³ Ang masanag kag nagasilak nga nawong ni Jesus nagapahanumdom sa aton sang nagasilak nga nawong ni Moises sa tapos nakighambal sa iya si Jehova sa Bukid sang Sinai. (Exodo 34:29, 30) Dumduma man, nga sang magbaylo-dagway si Jesus sa atubangan sang iya tatlo ka apostoles sang nagligad nga halos 2,000 ka tuig, “ang iya nawong nagsilak subong sang adlaw, kag ang iya sampaw nga mga panapton nagsanag subong sang kapawa.” (Mateo 17:2) Karon, sa laragway ni Jesus sa palanan-awon sa tion sang adlaw sang Ginuo, ang iya nawong nagasilak man kaangay sang isa nga yara sa atubangan ni Jehova. (2 Corinto 3:18) Sa kamatuoran, ang kabilugan nga impresyon nga ginapaalinton sang palanan-awon ni Juan amo ang nagasilak nga himaya. Halin sa subong kaputi sa niebe nga buhok, nagadabdab nga mga mata, kag nagasilak nga nawong tubtob sa nagabaga nga mga tiil, isa ini ka ekselente gid nga palanan-awon tuhoy sa Isa nga nagapuyo karon sa “kapawa nga di-mapalapitan.” (1 Timoteo 6:16) Maathag kag daw buhi gid ini nga palanan-awon! Ano ang nangin reaksion sang nalisang nga si Juan? Ang apostol nagasugid sa aton: “Kag sang nakita ko sia, napukan ako nga daw patay sa iya tiilan.”—Bugna 1:17.

14. Ano ang dapat mangin reaksion naton kon ginabasa naton ang palanan-awon ni Juan tuhoy sa ginhimaya nga si Jesus?

¹⁴ Sa karon, tinagipusuon nga ginaapresyar sang katawhan sang Dios ang maduagon kag detalyado nga paglaragway sa palanan-awon ni Juan. Naagihan na naton ang halos 90 ka tuig sang adlaw sang Ginuo, kag sa sulod sining tion ang palanan-awon padayon sa makahalawathawat nga katumanan sini. Para sa aton, ang paggahom ni Jesus sa Ginharian isa ka buhi nga katunayan karon, indi isa ka paglaum sa palaabuton. Busa, nagakaigo para sa aton subong matutom nga mga sakop sang Ginharian nga magpadayon sa pagtan-aw nga may pagdayaw sa ginalaragway ni Juan sa sining una nga palanan-awon kag matinumanon nga mamati sa mga pulong sang ginhimaya nga si Jesucristo.

[Mga nota]

[Mga Retrato sa pahina 23]

Ang arkeolohiko nga mga bilin sang mga siudad nga nahamtangan anay sang pito ka kongregasyon nagapamatuod sa rekord sang Biblia. Diri nabaton sang mga Cristiano sang nahauna nga siglo ang makapalig-on nga mga mensahe ni Jesus nga nagapapagsik karon sa bug-os kalibutan nga kongregasyon

PERGAMO

SMIRNA

TIATIRA

SARDIS

EFESO

FILADELFIA

LAODICEA