Mag-andam sa mga Siod sang Yawa!

‘Magpalagyo sa siod sang yawa.’—2 TIM. 2:26, Ang Biblia, HIL.

ANO ANG IMO SABAT?

Ano ang usisaon naton sa aton kaugalingon kon ginaduhaduhaan naton ang motibo sang iban?

Ano ang matun-an naton sa natabo kanday Pilato kag Pedro parte sa indi pagpadala sa kahadlok kag pag-ipit?

Paano mo malikawan ang sobra nga pagbasol sa kaugalingon?

1, 2. Ano nga siod sang Yawa ang binagbinagon naton sa sini nga artikulo?

GINATIID sang Yawa ang mga alagad ni Jehova. Apang indi kaangay sang mangangayam, wala niya ginapatay ang iya mga biktima. Sa baylo, luyag sang Yawa nga dakpon sila nga buhi kag ipahimo sa ila ang iya kabubut-on.—Basaha ang 2 Timoteo 2:24-26.

² Para madakpan nga buhi ang isa ka sapat, ang mangangayam mahimo maggamit sing lainlain nga siod. Mahimo mangita sia sing paagi para maggua ang sapat sa ginapanaguan sini. Dayon nagagamit sia sing pisi para masiod ang sapat. Ukon ayhan nagagamit sia sing siod nga indi makita. Ang Yawa nagagamit man sing pareho sini nga mga siod para dakpon nga buhi ang mga alagad sang Dios. Para indi kita madakpan, dapat magbantay kita kag magpamati sa mga paandam parte sa mga siod ni Satanas. Binagbinagon sini nga artikulo kon paano kita magbantay batok sa tatlo ka siod sang Yawa nga masami nagamadinalag-on. Amo ini ang (1) indi makontrol nga dila, (2) kahadlok kag pag-ipit, kag (3) sobra nga pagbasol sa kaugalingon. Binagbinagon sang masunod nga artikulo ang duha pa ka siod ni Satanas.

PALUNGA ANG KALAYO SANG INDI MAKONTROL NGA DILA

3, 4. Ano ang mahimo mangin resulta kon indi naton pagkontrolon ang aton dila? Maghatag sing halimbawa.

³ Para mapagua ang mga sapat sa ila ginapanaguan, ginasunog sang mangangayam ang kahilamnan, dayon ginadakop niya ang mga sapat nga nagapinalagyo. Sing malaragwayon, luyag man sang Yawa nga magdabok sing kalayo sa kongregasyon. Kon magdabdab na ang kagamo, mahimo magbiya ang mga miembro sini, kag madakpan sila sang Yawa. Paano kita indi hungod nga magakooperar sa Yawa kag dayon masiod niya?

⁴ Ginpaanggid ni disipulo Santiago ang dila sa kalayo. (Basaha ang Santiago 3:6-8.) Kon indi naton pagkontrolon ang aton dila, makatuga kita sing kalayo sa kongregasyon. Paano? Binagbinaga ang masunod nga sitwasyon: Sa miting sang kongregasyon, ginpahibalo nga ang isa ka sister gintangdo subong regular payunir. Pagkatapos sang miting, gin-istoryahan ini sang duha ka manugbantala. Nagsiling ang isa nga nalipay sia kag nagalaum nga mangin madinalag-on ang bag-o nga payunir. Pero, ginduhaduhaan sang isa ang motibo sang payunir kay luyag lang kuno sini nga makilala sa kongregasyon. Sa diin sa ila ang luyag mo mangin abyan? Maathag gid kon sin-o sa ila ang mahimo magtuga sing kalayo sa kongregasyon paagi sa iya dila.

5. Para mapalong ang kalayo sang indi makontrol nga dila, ano ang usisaon naton sa aton kaugalingon?

⁵ Paano naton mapalong ang kalayo sang indi makontrol nga dila? Si Jesus nagsiling: “Gikan sa kabuganaan sang tagipusuon nagahambal ang baba.” (Mat. 12:34) Gani ang una nga tikang amo ang pag-usisa sa aton tagipusuon. Ginasikway bala naton ang malaut nga mga balatyagon nga magaresulta sa paghambal sing malain sa iban? Halimbawa, kon nabatian naton nga ang isa ka utod nagatinguha nga makalab-ot sing pila ka pribilehiyo sa pag-alagad, nagapati gid bala kita nga matuod ang iya nga mga motibo, ukon nagapamensar kita nga ginahimo lang niya ini para sa iya kaugalingon nga interes? Kon madali kita magduhaduha sa motibo sang iban, mas maayo nga dumdumon naton nga ginduhaduhaan man sang Yawa ang motibo sang matutom nga alagad sang Dios nga si Job. (Job 1:9-11) Sa baylo nga duhaduhaan ang aton utod, mas maayo nga binagbinagon naton kon ngaa amo sini ang aton pagtamod sa iya. May rason bala kita nga maghunahuna sini? Ukon ayhan nahiluan na ang aton tagipusuon sang indi mahigugmaon nga panimuot nga lapnag sa sining katapusan nga mga adlaw?—2 Tim. 3:1-4.

6, 7. (a) Ano ang pila ka rason kon ngaa mahimo mangin negatibo ang aton pagtamod sa iban? (b) Ano ang aton himuon kon ginatamay kita?

⁶ Binagbinaga ang pila ka rason kon ngaa mahimo mangin negatibo ang aton pagtamod sa iban. Ayhan gusto naton nga ang aton mga hinimuan amo ang mas matalupangdan. Mahimo nga ginapakanubo naton ang iban para paguaon nga mas maayo kita sangsa ila. Ukon ayhan nagapangita lang kita sing itabon sa aton mismo mga kakulangan. Ano man ang aton rason—bugal, kahisa, ukon kakulang sing kompiansa sa kaugalingon—mahimo ini makahalit.

⁷ Mahimo daw husto man kita nga pakalainon ang iban. Ayhan sang una may ginhambal man sila nga malain sa aton. Kon amo sina, indi maayo nga magbalos. Magapadabdab lang ini sang kalayo kag matuman ang kabubut-on sang Yawa, indi ang iya sang Dios. (2 Tim. 2:26) May kaangtanan sini, dapat ilugon naton si Jesus. Sang gintamay sia, “wala sia magbalos sang pagtamay.” Kundi “padayon niya nga gintugyan ang iya kaugalingon sa isa nga nagahukom sing matarong.” (1 Ped. 2:21-23) Nagasalig si Jesus nga magapanghikot si Jehova sa Iya kaugalingon nga paagi kag tion. Dapat may amo man kita sini nga pagsalig sa Dios. Kon gamiton naton ang aton dila sa pagpaayo, makabulig kita nga mahuptan ang “nagapahiusa nga higot sang paghidait” sa aton kongregasyon.—Basaha ang Efeso 4:1-3.

MAGPALAGYO SA SIOD SANG KAHADLOK KAG PAG-IPIT

8, 9. Ngaa nagpasugot si Pilato nga patyon si Jesus?

⁸ Kon ang isa ka sapat masiod, indi na ini makahulag sing maayo. Sing kaanggid, ang isa nga nagapadala sa kahadlok kag pag-ipit nagapakontrol na sang iya kabuhi sa iban. (Basaha ang Hulubaton 29:25.) Binagbinagon naton ang halimbawa sang duha ka lalaki nga nagpadala sa pag-ipit kag kahadlok, kag kon ano ang aton matun-an sa ila.

⁹ Ang Romano nga gobernador nga si Poncio Pilato nakahibalo nga wala sing sala si Jesus gani indi niya ini luyag nga ipapatay. Nagsiling pa gani si Pilato nga “wala [si Jesus] sing nahimo nga takus sa kamatayon.” Pero, nagpasugot si Pilato nga patyon sia. Ngaa? Bangod nagpadala sia sa pag-ipit sang kadam-an. (Luc. 23:15, 21-25) Gin-ipit sia sang mga manugpamatok nga nagasinggitan: “Kon buy-an mo ini nga tawo, indi ka abyan ni Cesar.” (Juan 19:12) Nahadlok si Pilato nga basi madula niya ang iya posisyon—ukon ang iya mismo kabuhi—kon apinan niya ang Cristo. Gani, nagpadala sia sa pag-ipit kag ginhimo ang kabubut-on sang Yawa.

10. Ngaa ginpanghiwala ni Pedro si Cristo?

¹⁰ Si apostol Pedro isa sa pinakasuod nga kaupod ni Jesus. Ginsugid niya sa mga tawo nga si Jesus ang Mesias. (Mat. 16:16) Nangin matutom si Pedro bisan pa ginsikway sang iban nga disipulo si Jesus bangod wala nila mahangpan ang kahulugan sang Iya ginsiling. (Juan 6:66-69) Kag sang gindakop sang mga kaaway si Jesus, naggamit si Pedro sang espada para pangapinan ang iya Agalon. (Juan 18:10, 11) Pero sang ulihi, nagpadala si Pedro sa kahadlok kag ginpanghiwala si Jesucristo. Sa malip-ot nga tion, nasiod si Pedro sang kahadlok sa tawo amo nga nadulaan sia sing kaisog.—Mat. 26:74, 75.

11. Anong malain nga mga impluwensia ang dapat naton pakigbatuan?

¹¹ Subong mga Cristiano, dapat naton pakigbatuan ang pag-ipit nga himuon ang mga butang nga wala nagapahamuot sa Dios. Mahimo piliton kita sang aton amo ukon sang iban nga mangin di-bunayag ukon maghimo sing seksuwal nga imoralidad. Ang mga estudyante mahimo piliton sang ila mga kaupod nga manunod ukon mangudigo kon eksam, magtan-aw sing pornograpiya, manigarilyo, magdroga, magpahubog, ukon maghimo sing seksuwal nga imoralidad. Gani, ano ang makabulig sa aton agod indi kita masiod sang kahadlok kag pag-ipit nga himuon ang butang nga wala nagapahamuot kay Jehova?

12. Ano ang matun-an naton sa natabo kanday Pilato kag Pedro?

¹² Ano ang aton matun-an sa natabo kanday Pilato kag Pedro? Diutay lang ang nahibaluan ni Pilato parte sa Cristo. Pero, nahibaluan niya nga inosente si Jesus kag indi ordinaryo nga tawo. Apang indi mapainubuson si Pilato kag wala sing gugma sa matuod nga Dios. Gani, mahapos sia nga nasiod sang Yawa. Si Pedro naman may sibu nga ihibalo kag may gugma sa matuod nga Dios. Pero may tion nga nagsalig sia sa iya kaugalingon, nagbatyag sing kahadlok, kag nagpadala sa pag-ipit. Antes pa gindakop si Jesus, nagpahambog si Pedro: “Bisan pa ang tanan masandad, apang ako indi.” (Mar. 14:29) Nakahanda kuntani si Pedro sa mga pagtilaw kon nagsalig sia sa Dios kaangay sang salmista nga nag-amba: “Kaupud sang GINOO sa akon luyo wala ako sing kahadluk. Ano bala ang mahimo sang tawo sa akon?” (Sal. 118:6) Sa katapusan nga gab-i sang Iya kabuhi sa duta, gindala ni Jesus si Pedro kag ang iya duha pa ka apostoles sa hardin sang Getsemane. Pero, imbes nga magbantay, natulugan si Pedro kag ang iya mga kaupod. Ginpukaw sila ni Jesus kag ginsilingan: “Magpadayon kamo sa pagbantay kag sa pagpangamuyo, agod indi kamo masulay.” (Mar. 14:38) Pero natulugan liwat si Pedro kag sang ulihi nagpadala sa kahadlok kag pag-ipit.

13. Paano naton mabatuan ang pag-ipit nga himuon ang malain?

¹³ Ang natabo kanday Pilato kag Pedro nagatudlo sa aton sang isa pa ka importante nga leksion: Mabatuan naton ang pag-ipit paagi sa sibu nga ihibalo, pagkamapainubuson, indi pagsalig sa kaugalingon, gugma sa Dios, kag kahadlok kay Jehova, indi sa mga tawo. Kon ang aton pagtuo nabase sa sibu nga ihibalo, isugid naton sing maisugon ang aton mga pagpati. Makabulig ini para mabatuan naton ang pag-ipit kag madaug ang kahadlok sa tawo. Indi kita dapat magsalig sa aton kaugalingon nga kusog. Sa baylo, batunon naton sing mapainubuson nga kinahanglan naton ang gahom sang Dios para mabatuan ang pag-ipit. Dapat mangamuyo kita sing espiritu ni Jehova. Ang aton gugma sa iya dapat magpahulag sa aton nga sundon ang iya mga talaksan kag indi pagpakahuy-an ang iya ngalan. Isa pa, dapat nahandaan na naton ang mga pag-ipit antes naton maatubang ini. Halimbawa, ang paghanda sing abanse kag ang pagpangamuyo makabulig sa aton kabataan nga makapanindugan kon piliton sila sang ila mga katubotubo nga maghimo sing malain.—2 Cor. 13:7.a

LIKAWI ANG SIOD NGA NAGADUGMOK—SOBRA NGA PAGBASOL SA KAUGALINGON

14. Ano ang luyag sang Yawa nga pensaron naton parte sa aton mga sala sang una?

¹⁴ May isa ka sahi sang siod diin ginabitay ang daku nga troso ukon bato sa ibabaw sang ginaagyan sang mga sapat. Kon matapakan sang sapat ang higot nga naangot sa sini, mahulog ang troso ukon bato kag madugmok ang biktima. Ang sobra nga pagbasol sa kaugalingon mahimo mapaanggid sa mabug-at nga troso ukon bato nga nagadugmok. Kon hunahunaon naton ang aton mga sala sang una, mahimo kita magbatyag nga nadugmok ukon “nahanog sing tama.” (Basaha ang Salmo 38:3-5, 8.) Luyag ni Satanas nga papatihon kita nga indi na kita pagkaluoyan ni Jehova kag indi gid naton malab-ot ang Iya mga ginapatuman.

15, 16. Paano mo malikawan ang siod sang sobra nga pagbasol sa kaugalingon?

¹⁵ Paano naton malikawan ining siod nga nagadugmok? Kon nakahimo ka sing mabug-at nga sala, tinguhai nga ipasag-uli na subong ang imo kaangtanan kay Jehova. Palapiti ang mga gulang kag magpabulig sa ila. (Sant. 5:14-16) Tinguhai nga tadlungon ang imo sayop. (2 Cor. 7:11) Kon gindisiplina ka, indi ka dapat maluyahan. Ginapakita lang sini nga ginahigugma ka ni Jehova. (Heb. 12:6) Mangin determinado nga indi na paghimuon ang mga butang nga nagresulta sa pagpakasala, kag manindugan sa sini. Kon naghinulsol ka na kag nagbag-o, saligi nga ang halad gawad ni Jesucristo makasarang magtabon sang imo mga sala.—1 Juan 4:9, 14.

¹⁶ May pila nga ginakonsiensia gihapon bisan pa napatawad na ang ila sala. Kon amo sini ang imo ginabatyag, dumduma nga ginpatawad ni Jehova si Pedro kag ang iban pa nga apostoles sang ginsikway nila ang Iya pinalangga nga Anak sang tion nga kinahanglan gid niya sila. Ginpatawad man ni Jehova ang isa ka tawo nga naghinulsol sa tapos nga ginsikway sia sa kongregasyon sang Corinto bangod sa imoralidad. (1 Cor. 5:1-5; 2 Cor. 2:6-8) Ang Pulong sang Dios nagasugid parte sa mga tawo nga nakahimo sing mabug-at nga sala pero naghinulsol kag ginpatawad sang Dios.—2 Cron. 33:2, 10-13; 1 Cor. 6:9-11.

17. Ano ang mahimo sang gawad sa aton?

¹⁷ Kon maghinulsol ka kag batunon ang kaluoy ni Jehova, patawaron kag kalimtan niya ang imo mga sala. Indi maghunahuna nga indi matabunan sang halad gawad ni Jesus ang imo mga sala. Kon amo sini ang imo batyagon, mahimo ka masiod ni Satanas. Ano man ang ginapapati sa imo sang Yawa, dumduma nga ang gawad makasarang magtabon sang mga sala sang mga mahinulsulon. (Hulu. 24:16) Kon magtuo ka sa gawad, mahimo madula ang imo ginabatyag nga pagbasol sa kaugalingon kag matigayon mo ang kabakod nga alagaron ang Dios sing bug-os tagipusuon, hunahuna, kag kalag.—Mat. 22:37.

NAHIBALUAN NATON ANG MGA PAHITO NI SATANAS

18. Paano naton malikawan ang mga siod sang Yawa?

¹⁸ Indi importante kay Satanas kon ano nga siod ang makadala sa aton, basta masiod niya kita. Bangod nahibaluan naton ang mga pahito ni Satanas, malikawan naton nga madaug sang Yawa. (2 Cor. 2:10, 11) Indi niya kita masiod kon mangamuyo kita sing kaalam para maatubang ang mga pagtilaw. “Kon may isa sa inyo nga kulang sang kaalam,” sulat ni Santiago, “padayon sia nga magpangayo sa Dios, kay maalwan Sia nga nagahatag sa tanan kag wala nagapangita sang sayop; kag ihatag ini sa iya.” (Sant. 1:5) Dapat kita manghikot suno sa aton mga pangamuyo paagi sa regular nga personal nga pagtuon kag pag-aplikar sa Pulong sang Dios. Ang mga publikasyon nga gin-aman sang matutom kag mainandamon nga ulipon nagapaandam sa aton parte sa mga siod sang Yawa kag kon paano ini malikawan.

19, 20. Ngaa dumtan naton ang malain?

¹⁹ Ang pangamuyo kag pagtuon sa Biblia nagabulig sa aton nga higugmaon ang maayo. Pero importante man nga dumtan naton ang malain. (Sal. 97:10) Kon pamalandungan naton ang mga resulta sang maiyaiyahon ukon makagod nga mga handum, mabuligan kita nga malikawan ini. (Sant. 1:14, 15) Kon tun-an naton nga dumtan ang malain kag higugmaon ang maayo, mangin makangilil-ad sa aton ang mga paon ni Satanas; indi ini makaganyat sa aton.

²⁰ Nagapasalamat gid kita nga nagabulig ang Dios sa aton agod indi kita madaug ni Satanas! Paagi sa Iya espiritu, Pulong, kag organisasyon, ginaluwas kita ni Jehova “gikan sa isa nga malauton.” (Mat. 6:13) Sa masunod nga artikulo, tun-an naton kon paano malikawan ang duha pa ka siod sang Yawa para madakpan nga buhi ang mga alagad sang Dios.

Magtindog sing Malig-on kag Likawi ang mga Siod ni Satanas!

‘Magtindog sing malig-on batok sa mga pahito sang Yawa.’—EFE. 6:11.

ANO ANG IMO SABAT?

Paano malikawan sang mga alagad ni Jehova ang siod sang materyalismo?

Ano ang makabulig sa minyo nga mga Cristiano agod indi mahulog sa tugalbong sang pagpanghilahi?

Ngaa nagapati ka nga may mga benepisyo ang pagtindog sing malig-on batok sa materyalismo kag seksuwal nga imoralidad?

1, 2. (a) Ngaa wala sing kaluoy si Satanas sa mga hinaplas kag sa “iban nga mga karnero”? (b) Ano nga mga siod ni Satanas ang binagbinagon sa sini nga artikulo?

SI Satanas nga Yawa wala sing kaluoy sa mga tawo, ilabi na sa mga alagad ni Jehova. Ang matuod, nagapakig-away sia sa hinaplas nga nagkalabilin. (Bug. 12:17) Ining matutom nga mga Cristiano amo ang nagapanguna sa pagbantala sang Ginharian sa karon kag nagabuyagyag nga si Satanas amo ang manuggahom sang kalibutan. Wala man sing kaluoy ang Yawa sa “iban nga mga karnero,” nga nagasuporta sa mga hinaplas kag may paglaum nga mabuhi sing walay katapusan—butang nga indi na gid matigayon ni Satanas. (Juan 10:16) Gani, grabe gid ang iya kaakig! Sa langit man ukon sa duta ang aton paglaum, indi gid interesado si Satanas sa aton kaayuhan. Luyag gid niya kita biktimahon.—1 Ped. 5:8.

² Agod mahimo ini, nagabutang si Satanas sing lainlain nga siod. Bangod ‘ginbulag niya ang hunahuna’ sang mga di-tumuluo, wala nila ginbaton ang maayong balita kag indi nila makita ini nga mga siod. Pero, ginasiod man sang Yawa ang pila nga nagbaton sang mensahe sang Ginharian. (2 Cor. 4:3, 4) Ginbinagbinag sa nagligad nga artikulo kon paano naton malikawan ang tatlo ka siod ni Satanas: (1) indi makontrol nga dila, (2) kahadlok kag pag-ipit, kag (3) sobra nga pagbasol sa kaugalingon. Binagbinagon naton subong kon paano kita makatindog sing malig-on batok sa duha pa ka siod ni Satanas—ang materyalismo kag ang pagsulay nga magpanghilahi.

ANG SIOD SANG MATERYALISMO NAGALUMOS

3, 4. Paano ang mga kabalaka sa sining sistema sang mga butang nagaresulta sa materyalismo?

³ Sa isa niya ka ilustrasyon, ginsambit ni Jesus ang binhi nga ginsab-ug sa tunga sang tunukon nga mga tanom. Ginpadaku niya nga ang isa ka tawo mahimo magapamati sa pulong, “apang ang kabalaka sining sistema sang mga butang kag ang madaya nga gahom sang manggad nagalumos sang pulong, kag sia nangin di-mabungahon.” (Mat. 13:22) Huo, ang materyalismo amo ang isa ka siod sang aton kaaway nga si Satanas.

⁴ Duha ka butang ang nagalumos sa pulong. Ang isa amo ang “ang kabalaka sining sistema sang mga butang.” Sa sining “makahalanguyos nga mga tion nga mabudlay atubangon,” madamo sing rason nga mabalaka kita. (2 Tim. 3:1) Nagamahal ang mga balaklon kag nagadamo ang wala sing obra amo nga mabudlayan ka sa pagbadyet sang imo kinitaan. Mahimo mabalaka ka parte sa palaabuton kag mamensar, ‘May bastante bala ako nga kuarta sa akon pagretiro?’ Bangod sini nga kabalaka, ang iban nagtinguha sing manggad, nga nagahunahuna nga makahatag ini sing kalig-unan.

5. Paano ang “gahom sang manggad” nangin madaya?

⁵ Ginsugid ni Jesus ang isa pa ka rason—“ang madaya nga gahom sang manggad.” Ini kag ang kabalaka mahimo maglumos sa pulong. Ang Biblia nagasiling nga “ang cuarta pangapin.” (Man. 7:12) Pero ang pagtinguha sing manggad indi maalamon. Narealisar sang madamo nga kon ginatinguhaan nila ang manggad, labi nga ginasiod sila sang materyalismo. Ang pila gani sa ila nangin ulipon sang manggad.—Mat. 6:24.

6, 7. (a) Paano ang isa masiod sang materyalismo sa iya ulubrahan? (b) Ano ang dapat binagbinagon sang isa ka Cristiano kon ginapangabay sia nga mag-obertaym?

⁶ Ang paghandum sa manggad mahimo indi mabatyagan sa umpisa. Halimbawa, binagbinaga ini nga kahimtangan. Ginpalapitan ka sang imo boss kag ginsilingan: “May maayo ako nga balita! Nagdaug ang aton kompanya sa isa ka daku nga kontrata. Gani kinahanglan mo mag-obertaym pirme sa masunod nga binulan. Pero, indi magkabalaka kay taasan ko ang imo sueldo!” Ano ang himuon mo kon ikaw ang gintanyagan sini? Siempre, ang pag-aman sa imo pamilya sa materyal isa ka serioso nga responsibilidad, pero indi lang amo sini ang imo responsibilidad. (1 Tim. 5:8) May iban pa nga butang nga kinahanglan mo binagbinagon. Daw ano kalawig ka mag-obertaym? Mahimo bala sini maupangan ang imo espirituwal nga mga hilikuton, lakip na ang pagtambong sa mga miting kag pagdumala sing Pangpamilya nga Pagsimba?

⁷ Kon maghimo ka sing desisyon, binagbinaga kon ano gid ang importante sa imo—ang dugang nga sueldo ukon ang imo espirituwalidad? Ang imo bala pagtinguha nga makatigayon sing dugang nga kuarta mahimo magpugong sa imo nga unahon ang intereses sang Ginharian? Nabinagbinag mo bala ang mangin epekto sang materyalismo kon pabay-an mo ang imo espirituwalidad kag ang espirituwalidad sang imo pamilya? Kon nagakatabo na ini sa imo, paano ka makatindog sing malig-on kag makalikaw nga malumos sang materyalismo?—Basaha ang 1 Timoteo 6:9, 10.

8. Anong mga halimbawa sa Kasulatan ang makabulig sa aton nga usisaon ang aton pagkabuhi?

⁸ Agod indi masiod sang materyalismo, usisaa pirme ang imo pagkabuhi. Indi gid naton luyag nga mangin kaangay ni Esau nga nagtamay sang espirituwal nga mga butang! (Gen. 25:34; Heb. 12:16) Kag pat-od nga indi man naton gusto mangin pareho sang manggaranon nga lalaki nga ginhambalan nga ibaligya ang iya mga pagkabutang, ihatag ini sa mga imol, kag magsunod kay Jesus. Sa baylo nga tumanon ini, “naglakat sia nga masinulub-on, kay may madamo sia nga pagkabutang.” (Mat. 19:21, 22) Bangod nasiod sia sang manggad, nadula niya ang daku nga pribilehiyo nga mangin sumulunod sang pinakabantog nga tawo nga nagkabuhi! Dapat man kita maghalong nga indi madula ang pribilehiyo nga mangin disipulo ni Jesucristo.

9, 10. Paano naton dapat tamdon ang materyal nga mga butang suno sa Kasulatan?

⁹ Agod mabatuan ang indi nagakaigo nga kabalaka sa materyal nga mga butang, sunda ang laygay ni Jesus: “Indi gid kamo magkabalaka kag magsiling, ‘Ano ang aton kaunon?’ ukon, ‘Ano ang aton imnon?’ ukon, ‘Ano ang aton ipanapot?’ Kay ini tanan amo ang mga butang nga maukod nga ginatinguhaan nga maagom sang mga pungsod. Bangod nahibaluan sang inyo langitnon nga Amay nga kinahanglan ninyo ini tanan nga butang.”—Mat. 6:31, 32; Luc. 21:34, 35.

¹⁰ Sa baylo nga magpadala sa madaya nga gahom sang manggad, tinguhai nga iluga ang pagtamod sang manunulat sang Biblia nga si Agur: “Indi ako pagpamanggaruna ukon pagpaimula, kundi hatagi lang ako sang akon ginakinahanglan.” (Hulu. 30:8, Ang Pulong sang Dios, APD) Maathag nga nahangpan ni Agur nga makaamlig ang kuarta pero mahimo man ini makadaya. Dumduma nga ang mga kabalaka sa sining sistema kag ang madaya nga gahom sang manggad makahalit sa aton espirituwalidad. Ang indi nagakaigo nga kabalaka sa materyal nga mga butang mahimo mag-ubos sang imo tion kag kusog, amo nga madulaan ka na sing gana sa pagpangita sang intereses sang Ginharian. Gani, tinguhai nga indi ka masiod ni Satanas paagi sa materyalismo!—Basaha ang Hebreo 13:5.

PANGHILAHI—INDI HILMUNON NGA TUGALBONG

11, 12. Paano ang isa ka Cristiano mangin biktima sang pagpanghilahi sa iya ulubrahan?

¹¹ Ang mga mangangayam nga gusto magdakop sang makusog nga sapat mahimo magkutkot sing buho sa ginaagyan sini, butangan ini sing mga lipak, kag tabunan sing duta. Ang isa sa labing epektibo nga siod ni Satanas nga kaangay sini nga tugalbong amo ang imoralidad. (Hulu. 22:14; 23:27) Nahulog sa sini ang pila ka Cristiano kay gintugutan nila nga mabutang sila sa sitwasyon nga madali sila magkompromiso. Ang iban nga minyo nga Cristiano nakapanghilahi sa tapos sila makigrelasyon sa iban.

¹² Puede ini matabo sa ulubrahan. Suno sa isa ka pagtuon, sobra katunga sa mga babayi nga nakapanghilahi kag halos tatlo sa kada apat ka lalaki nga nakapanghilahi ang nakigrelasyon sa ila katrabaho. Nagakinahanglan bala nga makig-upod ka sa tuhay nga sekso sa imo ginatrabahuan? Kon amo, ano ang inyo kaangtanan? May ginabutang ka bala nga mga limitasyon agod ang imo pagpakig-angot sa ila para lang gid sa trabaho, kag wala na sing iban pa? Halimbawa, ang isa ka Cristiano nga babayi mahimo makig-istorya pirme sa iya katrabaho nga lalaki. Sa ulihi, mahimo mangin palautwasan na niya ini sang iya mga problema, lakip na sang problema nila nga mag-asawa. Sa isa naman ka sitwasyon, ang isa ka Cristiano nga lalaki mahimo makig-abyan sa iya katrabaho nga babayi, kag ayhan mamensar: “Ginapabaloran gid niya ang akon mga opinyon kag nagapamati gid sia sa akon. Nahangpan gid niya ako. Kuntani amo man sini ang akon asawa!” Natalupangdan mo bala kon paano ang isa ka Cristiano sa sini nga kahimtangan mahimo masiod nga magpanghilahi?

13. Paano ang indi nagakaigo nga pagpakigrelasyon sa iban mahimo matabo sa sulod sang kongregasyon?

¹³ Ang indi nagakaigo nga pagpakigrelasyon sa iban mahimo man matabo sa sulod sang kongregasyon. Binagbinaga ining matuodtuod nga halimbawa. Si Daniel kag ang iya asawa nga si Sarah,a mga regular payunir. Si Daniel isa ka gulang kag wala gid nagapamalibad sa bisan ano nga responsibilidad. May ginatun-an sia sa Biblia nga lima ka lalaki. Tatlo sa ila ang nabawtismuhan na. Ining tatlo kinahanglan pa buligan. Kon masako si Daniel sa iya teokratiko nga mga katungdanan, si Sarah ang nagabulig sa ila. Sang ulihi, amo na sini pirme ang nagakatabo: Kon nagakinahanglan sing bulig ining tatlo ka lalaki, si Sarah ang nagahimo sini. Kon si Sarah naman ang nagakinahanglan sing atension, sila ang nagahatag sini sa iya. Ini nga sitwasyon nangin siod. “Sa sulod sang mga binulan nga pagbulig sa ila sang akon asawa, nagluya sia sa espirituwal kag emosyonal,” siling ni Daniel. “Ini nga sitwasyon kag ang pagpabaya ko sa iya nagresulta sa masakit nga hitabo. Nakapanghilahi ang akon asawa sa isa sa akon anay mga estudyante sa Biblia. Tuman sa akon kasako amo nga nagluya sia sa espirituwal bisan pa nagaupdanay kami.” Paano mo malikawan ini nga hitabo?

14, 15. Ano ang makabulig sa minyo nga mga Cristiano agod malikawan ang tugalbong sang pagpanghilahi?

¹⁴ Agod malikawan ang tugalbong sang pagpanghilahi, pamalandungi ang buot silingon sang katutom sa pag-asawahay. Si Jesus nagsiling: “Ang gintingob sang Dios indi pagbulagon sang tawo.” (Mat. 19:6) Indi paghunahunaa nga mas importante ang imo mga pribilehiyo sa pag-alagad sangsa imo asawa. Isa pa, dumduma nga kon pirme ka nagapahilayo sa imo asawa para sa indi importante nga mga hilikuton, nagapakita ini nga maluya ang inyo pag-asawahay kag mahimo magresulta sa tentasyon kag dayon sa mabug-at nga sala.

¹⁵ Pero kon isa ikaw ka gulang, kamusta ang panong? Si apostol Pedro nagsulat: “Bantayi ninyo ang panong sang Dios nga yara sa inyo pag-atipan, indi nga napilitan, kundi sing kinabubut-on; indi tungod sa gugma sa di-bunayag nga pagganar, kundi sing malangkagon.” (1 Ped. 5:2) Ang mga kauturan sa inyo kongregasyon indi dapat pagpabay-an. Pero, indi mo dapat pagpatumbayaan ang imo papel subong bana para matuman lang ang imo katungdanan subong manugbantay sang panong. Wala gid sing pulos—ukon makatalagam pa gani—nga ihatag mo ang imo tanan nga tion sa pagpakaon sa kongregasyon samtang “ginagutom” ang imo asawa. Si Daniel nagsiling, “Indi ka dapat mangin tuman kasako sa pag-atipan sa imo mga responsibilidad, amo nga mapabay-an mo na ang imo pamilya.”

16, 17. (a) Ano ang pila ka praktikal nga paagi nga mapakita sang minyo nga mga Cristiano nga indi na sila puede makigrelasyon sa iban? (b) Maghatag sing halimbawa gikan sa aton mga publikasyon nga makabulig para malikawan sang mga Cristiano ang pagpanghilahi.

¹⁶ Madamo nga laygay sa Ang Lalantawan kag Magmata! ang makabulig sa minyo nga mga Cristiano para malikawan ang siod sang pagpanghilahi. Halimbawa, ang Septiembre 15, 2006 nga Ang Lalantawan naglaygay: “Sa trabaho kag bisan diin, mag-andam sa mga sitwasyon nga mahimo magresulta sa sobra nga pagpakigsuod. Halimbawa, ang paghinguyang sing dugang nga oras sa pagtrabaho sing suod upod sa isa nga di-kasekso mahimo magdul-ong sa pagsulay. Subong isa ka minyo nga lalaki ukon babayi, dapat makita sa imo panghambal kag paggawi nga may tiayon ka na. Subong isa nga nagahimud-os sing diosnon nga debosyon, pat-od nga indi mo luyag mangganyat paagi sa pagkiat ukon paagi sa di-maugdang nga pamayo kag pamustura. . . . Ang pagbutang sing retrato sang imo tiayon kag mga kabataan sa imo ulubrahan mangin isa ka kitaon nga pahanumdom sa imo kag sa iban nga ginapabaloran mo ang imo pamilya. Mangin determinado nga indi gid pagpalig-unon—ukon pagpahanugutan pa gani—ang romantiko nga pangganyat sang iban.”

¹⁷ Ang artikulo nga “Katutom sa Pag-asawahay—Ano Gid Bala ang Buot Silingon Sini?” sa Abril 2009 nga Magmata! nagapaandam parte sa pagpantasya sa iban nga indi mo tiayon. Ginapakita sang artikulo nga ang paghimo sini mahimo magresulta sa pagpanghilahi. (Sant. 1:14, 15) Kon minyo ka, mas maayo nga repasuhon ninyo pirme sing magkaupod ini nga mga artikulo. Ang pag-asawahay kahimusan ni Jehova, gani sagrado ini. Ang paghatag sing tion nga maistoryahan ninyo nga mag-asawa ang inyo pag-asawahay nagapakita nga ginapabaloran ninyo ang sagrado nga mga butang.—Gen. 2:21-24.

18, 19. (a) Ano ang mga resulta sang pagpanghilahi? (b) Ano ang mga benepisyo sang katutom sa pag-asawahay?

¹⁸ Kon ginasulay ka nga makigrelasyon sa iban, hunahunaa sing maayo ang halit sang pagpakighilawas kag pagpakighilahi. (Hulu. 7:22, 23; Gal. 6:7) Ang mga nagahimo sang imoralidad wala nagapahamuot kay Jehova kag nagasakit sa balatyagon sang ila tiayon kag sa ila kaugalingon. (Basaha ang Malaquias 2:13, 14.) Sa pihak nga bahin, pamalandungi ang mga benepisyo sang mga nagahupot sang matinlo nga paggawi. May paglaum sila nga mabuhi sing walay katapusan kag naeksperiensiahan nila ang pinakamaayo nga kabuhi karon, lakip na ang matinlo nga konsiensia.—Basaha ang Hulubaton 3:1, 2.

¹⁹ Ang salmista nag-amba: “May daku nga paghidait ang mga nagahigugma sang imo [Dios] kasogoan; wala sila sing kahigayonan sa pagkasandad.” (Sal. 119:165) Gani higugmaa ang kamatuoran, kag “padayon ninyo nga bantayi sing maayo nga ang inyo paglakat indi subong di-maalam kundi subong maalam nga mga tawo” sa sining malaut nga mga tion. (Efe. 5:15, 16) Ang aton mga alagyan ginabutangan ni Satanas sing mga siod para mabiktima kita. Pero nasangkapan kita sing maayo agod amligan ang aton kaugalingon. Ginahatagan kita ni Jehova sang aton kinahanglanon para ‘makatindog sing malig-on’ kag “mapalong . . . ang tanan nga nagadabadaba nga baslay sang isa nga malauton”!—Efe. 6:11, 16.