Ang Pagkabun-ag Liwat—Paagi Bala Para Maluwas?

ANO ang imo sabat kon pamangkuton ka, “Nabun-ag ka bala liwat?” Minilyon ka tumuluo sa bug-os nga kalibutan ang sigurado gid nga magasabat sing “Huo!” Nagapati sila nga ang pagkabun-ag liwat tanda sang tanan nga matuod nga Cristiano kag amo lamang ang paagi para maluwas. Nagaugyon sila sa pagpati sang mga lider sang relihion subong sang teologo nga si Robert C. Sproul nga nagsiling: “Kon ang isa wala mabun-ag liwat, . . . indi sia isa ka Cristiano.”

Isa ka bala sa mga nagapati nga ang pagkabun-ag liwat amo ang dalan padulong sa kaluwasan? Kon amo, pat-od gid nga gusto mo man buligan ang imo mga paryente kag mga abyan nga makita ini nga dalan kag makalakat sa sini. Pero agod mahimo nila ini, dapat nahangpan nila ang kinatuhayan sang tawo nga nabun-ag liwat kag sang isa nga wala. Paano mo ipaathag sa ila kon ano ang buot silingon sang pagkabun-ag liwat?

Madamo ang nagapati nga ang ekspresyon nga “mabun-ag liwat” nagapatuhoy sa isa nga naghimo sing sinsero nga saad nga alagaron ang Dios kag si Cristo, kag gani kon sang una indi sia matutom sa Dios, subong diosnon na sia. Ang matuod, ang isa ka diksionaryo naghatag sing kahulugan sa isa nga nabun-ag liwat subong “isa ka Cristiano nga nagbag-o kag nagpabakod sang iya pagtuo ilabi na sa tapos nga naeksperiensiahan niya ang isa ka makatalandog nga hitabo sa iya kabuhi.—Merriam-Webster’s Collegiate Dictionary—Eleventh Edition.

Matingala ka bala kon mahibal-an mo nga wala gali nagaugyon ang Biblia sa sini? Gusto mo bala mahibal-an kon ano gid ang ginatudlo sang Pulong sang Dios parte sa pagkabun-ag liwat? Mabuligan ka gid kon binagbinagon mo sing maayo ini nga topiko. Ngaa? Bangod ang eksakto nga paghangop parte sa kahulugan sang pagkabun-ag liwat may epekto sa imo kabuhi kag sa imo palaabuton.

Ano ang Ginatudlo sang Biblia?

Sa Biblia, sa Juan 3:1-12 lamang makita ang ekspresyon nga “mabun-ag liwat.” Parte ini sa makawiwili nga paghambalanay ni Jesus kag sang isa ka lider sang relihion sa Jerusalem. Mabasa mo ang kabug-usan sang ila paghambalanay sa masunod nga pahina. Ginaagda ka namon nga basahon ini sing maayo.

Sa ila paghambalanay, ginpadaku ni Jesus ang pila ka bahin sang “bag-o nga pagkabun-ag.”a Makabulig ini sa aton nga masabat ining lima ka importante nga pamangkot:

◼ Daw ano ka importante ang bag-o nga pagkabun-ag?

◼ Kita bala ang magadesisyon kon gusto naton nga mabun-ag liwat?

◼ Ano ang katuyuan sini?

◼ Paano ang isa ka tawo mabun-ag liwat?

◼ Ano nga pagbag-o ang resulta sini?

Binagbinagon naton sing isaisa ini nga mga pamangkot.

[Nota]

[Kahon/Retrato sa pahina 4]

“Dapat Kamo Mabun-ag Liwat”

“Karon may isa ka Fariseo nga si Nicodemo, nga isa ka manugdumala sang mga Judiyo. Nagkadto sia kay Jesus sa gab-i kag nagsiling sa iya: “Rabbi, nahibaluan namon nga ikaw isa ka manunudlo gikan sa Dios; kay wala sing makahimo sini nga mga tanda nga imo ginahimo kon indi niya kaupod ang Dios.” Bilang sabat si Jesus nagsiling sa iya: “Sa pagkamatuod nagasiling ako sa imo, Kon ang isa indi mabun-ag liwat, indi niya makita ang ginharian sang Dios.” Si Nicodemo nagsiling sa iya: “Paano mabun-ag ang isa ka tawo kon tigulang na sia? Indi sia makasulod sa taguangkan sang iya iloy sa ikaduha nga higayon kag mabun-ag, indi bala?” Si Jesus nagsabat: “Sa pagkamatuod nagasiling ako sa imo, Kon ang isa indi mabun-ag paagi sa tubig kag espiritu, indi sia makasulod sa ginharian sang Dios. Ang nabun-ag paagi sa unod, unod, kag ang nabun-ag paagi sa espiritu, espiritu. Indi magkatingala bangod nagasiling ako sa imo, Dapat kamo mabun-ag liwat. Ang hangin nagahuyop kon diin sini luyag, kag mabatian mo ang tunog sini, apang wala mo mahibaluan kon diin ini nagahalin kag kon diin ini nagapadulong. Amo man ang tagsatagsa nga nabun-ag paagi sa espiritu.” Bilang sabat si Nicodemo nagsiling sa iya: “Paano matabo ini nga mga butang?” Bilang sabat si Jesus nagsiling sa iya: “Ikaw isa ka manunudlo sang Israel apang wala ka makahibalo sini nga mga butang? Sa pagkamatuod nagasiling ako sa imo, Nagahambal kami sang amon nahibaluan kag nagapanaksi kami sang amon nakita, apang wala ninyo ginabaton ang amon panaksi. Kon wala kamo magpati sang ginsugiran ko kamo sang dutan-on nga mga butang, paano kamo makapati kon sugiran ko kamo sang langitnon nga mga butang?’”—Juan 3:1-12.

Ang Bag-o nga Pagkabun-ag—Daw Ano ka Importante?

SA ILA paghambalanay ni Nicodemo, ginpadaku ni Jesus nga importante gid ang bag-o nga pagkabun-ag ukon ang pagkabun-ag liwat. Paano niya ini gin-athag?

Talupangda kon paano ginpadaku ni Jesus ang bag-o nga pagkabun-ag. Nagsiling sia: “Kon ang isa indi mabun-ag liwat, indi niya makita ang ginharian sang Dios.” (Juan 3:3) Ang mga tinaga nga “kon” kag “indi” nagapakita nga kinahanglan gid ang bag-o nga pagkabun-ag. Sa pag-ilustrar: Kon ang isa magsiling, “Kon ang adlaw indi magbutlak, indi magsanag,” buot niya silingon nga kinahanglan gid magbutlak ang adlaw para magsanag. Sing kaanggid, nagsiling si Jesus nga ang pagkabun-ag liwat kinahanglan gid para makita ang ginharian sang Dios.

Sang ulihi, para athagon pa gid si Jesus nagsiling: “Dapat kamo mabun-ag liwat.” (Juan 3:7) Maathag nga suno kay Jesus, ang pagkabun-ag liwat importante gid nga kinahanglanon para ang isa “makasulod sa ginharian sang Dios.”—Juan 3:5.

Ang pagkabun-ag liwat importante gid kay Jesus, gani dapat pat-uron sang mga Cristiano nga eksakto ang ila paghangop sa sini. Halimbawa, makapili bala ang isa ka Cristiano kon gusto niya nga mabun-ag liwat?

[Blurb sa pahina 5]

“Kon ang adlaw indi magbutlak, indi magsanag”

Ang Bag-o nga Pagkabun-ag—Isa Bala ka Personal nga Desisyon?

SIN-O ang ginhalinan sang bag-o nga pagkabun-ag? Kon ginapalig-on sang iban nga mga ministro ang ila mga tagpalamati nga mangin Cristiano nga nabun-ag liwat, ginasulit nila ang ginasiling ni Jesus: “Dapat kamo mabun-ag liwat.” (Juan 3:7) Ginagamit nila ini subong sugo nga daw nagasiling, “Dapat ka mabun-ag liwat!” Gani, ginatudlo nila nga depende na sa kada isa kon bala tumanon nila si Jesus kag himuon ang pila ka tikang para mabun-ag liwat. Buot nila silingon nga makapili ang mga tawo kon gusto nila nga mabun-ag liwat ukon indi. Pero, amo gid bala sini ang gusto nga ipahangop ni Jesus kay Nicodemo?

Kon basahon naton sing maayo ang ginsiling ni Jesus, makita naton nga wala sia nagtudlo nga personal nga desisyon sang isa kon bala gusto niya nga mabun-ag liwat ukon indi. Ngaa nasiling naton ini? Ang Griego nga ekspresyon nga “nabun-ag liwat” nagakahulugan man sing matawo “halin sa ibabaw.” (Juan 3:3, Maayong Balita nga Biblia, footnote) Gani, suno sa sini nga kahulugan, ang bag-o nga pagkabun-ag “gikan sa ibabaw,” buot silingon, ‘nagagikan sa Amay.’ (Juan 19:11; Santiago 1:17) Huo, naghalin ini sa Dios.—1 Juan 3:9.

Kon dumdumon naton nga ang orihinal nga ekspresyon nagakahulugan man sing “gikan sa ibabaw,” mahapos lang hangpon kon ngaa indi ang isa ang makadesisyon nga mabun-ag liwat. Hunahunaa ang imo pagkabun-ag. Ikaw bala ang nagpili nga mabun-ag ka? Siempre, indi! Sing kaanggid, indi ang isa ka tumuluo ang magapili kon bala mabun-ag sia liwat. Maeksperiensiahan lamang naton ang pagkabun-ag liwat kon kabubut-on ini sang Dios, ang aton Amay sa langit. (Juan 1:13) Gani, eksakto lang nga magsiling si apostol Pedro: “Dayawon ang Dios kag Amay sang aton Ginuong Jesucristo, kay suno sa iya daku nga kaluoy ginhatagan niya kita sang bag-o nga pagkabun-ag.”—1 Pedro 1:3.

Sugo Bala Ini?

Ang iban mahimo mamangkot, ‘Kon wala sing may makapili nga mabun-ag sia liwat, ngaa nagsugo pa si Jesus nga: “Dapat kamo mabun-ag liwat”?’ Maayo ina nga pamangkot. Kay kon matuod nga sugo gid ini ni Jesus, ginasugo niya kita nga himuon ang indi naton masarangan, kag daw indi ini rasonable. Kon amo, paano naton hangpon ang mga tinaga nga dapat kamo “mabun-ag liwat”?

Kon usisaon sing maayo sa orihinal nga lenguahe, ini nga mga tinaga nagapakita nga wala nagasugo si Jesus kundi nagahambal sing isa ka katunayan. Para iilustrar ang kinatuhayan sang isa ka sugo kag paghambal sang isa ka katunayan, hunahunaa ang isa ka siudad nga may madamo sing eskwelahan. Ang isa sini nga mga eskwelahan para lamang sa mga tumandok nga nagaistar malayo sa siudad. Isa ka adlaw, ang isa ka pamatan-on nga lalaki nga indi tumandok, nagkadto sa prinsipal kag nagsiling, “Gusto ko diri mag-eskwela.” Ginsilingan sia sang prinsipal, “Para makaeskwela ka diri, dapat ka mangin tumandok.” Siempre, wala nagasugo ang prinsipal. Wala niya ginasilingan ang estudyante nga, “Dapat ka mangin tumandok!” Ginahambal lang sang prinsipal ang katunayan, ang kinahanglanon para makaeskwela sa sina nga eskwelahan. Sing kaanggid, sang magsiling si Jesus: “Dapat kamo mabun-ag liwat,” ginahambal lamang niya ang katunayan—ang kinahanglanon para ang isa “makasulod sa ginharian sang Dios.”

Ining katapusan nga mga tinaga nga Ginharian sang Dios may labot sa isa pa ka bahin sang bag-o nga pagkabun-ag. Nalakip sa sini ang pamangkot, Ano ang katuyuan sini? Ang sabat sa sina nga pamangkot makabulig sa aton para mahangpan sing eksakto ang kahulugan sang pagkabun-ag liwat.

[Retrato sa pahina 6]

Sa ano magkaanggid ang bag-o nga pagkabun-ag sa pagkabun-ag sang isa ka lapsag?

Ang Bag-o nga Pagkabun-ag—Ano ang Katuyuan Sini?

MADAMO ang nagapati nga kinahanglan nga mabun-ag liwat para makatigayon sing dayon nga kaluwasan. Pero, talupangda kon ano ang katuyuan sang bag-o nga pagkabun-ag suno kay Jesus. Nagsiling sia: “Kon ang isa indi mabun-ag liwat, indi niya makita ang ginharian sang Dios.” (Juan 3:3) Gani, kinahanglan nga mabun-ag liwat indi para maluwas, kundi para makasulod sa Ginharian sang Dios. Pero mahimo magbais ang iban, ‘indi bala nga ang pagsulod sa Ginharian kag ang pagtigayon sing kaluwasan pareho lang?’ Indi. Para mahangpan naton ang kinatuhayan sini, binagbinagon anay naton ang kahulugan sang “ginharian sang Dios.”

Ang ginharian isa ka paggobierno. Gani, ang “ginharian sang Dios” nagakahulugan sing “gobierno sang Dios.” Ginatudlo sang Biblia nga si Jesucristo, ang “anak sang tawo,” amo ang Hari sang Ginharian sang Dios kag may yara sia kaupod nga magagahom. (Daniel 7:1, 13, 14; Mateo 26:63, 64) Dugang pa, ginpakita sa palanan-awon ni apostol Juan nga ang magagahom kaupod ni Cristo ginpili “gikan sa tagsa ka tribo kag hambal kag katawhan kag pungsod” kag “magagahom sila sa duta subong mga hari.” (Bugna 5:9, 10; 20:6) Ginasugid pa gid sang Pulong sang Dios nga ang magagahom subong mga hari amo ang “diutay nga panong” sang 144,000 ka tawo “nga ginbakal gikan sa duta.”—Lucas 12:32; Bugna 14:1, 3.

Sa diin tukuron ang Ginharian sang Dios? Ang “ginharian sang Dios” ginatawag man nga “ginharian sang langit.” Ginapakita sini nga si Jesus kag ang iya kaupod nga mga hari magagahom halin sa langit. (Lucas 8:10; Mateo 13:11) Gani, ang Ginharian sang Dios isa ka ginharian sa langit nga pagagamhan ni Jesucristo kag sang iya mga kaupod nga ginpili halin sa mga tawo.

Kon amo, ano ang buot silingon ni Jesus sang nagsiling sia nga ang isa dapat mabun-ag liwat para “makasulod sa ginharian sang Dios”? Buot niya silingon nga ang isa dapat mabun-ag liwat para mangin kaupod ni Cristo nga magagahom sa langit. Sa simple nga hambal, ang katuyuan sang pagkabun-ag liwat amo ang paghanda sa diutay nga grupo sang mga tawo para maggahom sa langit.

Nahangpan na naton karon nga ang bag-o nga pagkabun-ag importante. Matabo lang ini kon kabubut-on sang Dios, kag ginahanda sini ang isa ka grupo sang mga tawo nga magagahom sa langit. Pero, paano mabun-ag liwat ang isa ka tawo?

[Blurb sa pahina 7]

Ang katuyuan sang pagkabun-ag liwat amo ang paghanda sa diutay nga grupo sang mga tawo para maggahom sa langit

[Retrato sa pahina 7]

Ang Ginharian sang Dios pagagamhan ni Jesucristo kag sang iya mga kaupod nga ginpili halin sa mga tawo

Ang Bag-o nga Pagkabun-ag—Paano Ini Nagakatabo?

GINSUGID ni Jesus kay Nicodemo indi lamang ang importansia, ang ginhalinan, kag ang katuyuan sang bag-o nga pagkabun-ag, kundi pati man kon paano ini nagakatabo. Nagsiling si Jesus: “Kon ang isa indi mabun-ag paagi sa tubig kag espiritu, indi sia makasulod sa ginharian sang Dios.” (Juan 3:5) Gani, ang isa mabun-ag liwat paagi sa tubig kag espiritu. Ano naman ang buot silingon sang “tubig kag espiritu”?

“Tubig kag Espiritu”—Ano ang Buot Silingon Sini?

Si Nicodemo isa ka iskolar sang relihion sang mga Judiyo, gani sigurado nga naintiendihan niya kon paano ginagamit sang Hebreo nga Kasulatan ang termino nga “espiritu sang Dios.” Amo ini ang aktibo nga puersa sang Dios nga nagapahulag sa mga tawo nga himuon ang indi ordinaryo nga mga buhat. (Genesis 41:38; Exodo 31:3; 1 Samuel 10:6) Gani, sang gingamit ni Jesus ang tinaga nga “espiritu,” naintiendihan ni Nicodemo nga amo ini ang balaan nga espiritu, ang aktibo nga puersa sang Dios.

Ano naman ang buot silingon ni Jesus sang tubig? Binagbinaga ang mga hitabo nga ginrekord antes kag pagkatapos sang paghambalanay ni Jesus kag ni Nicodemo. Mabasa sa sini nga si Juan Bautista kag ang mga disipulo ni Jesus nagapangbawtismo sa tubig. (Juan 1:19, 31; 3:22; 4:1-3) Ang balita tuhoy sini naglapta sa Jerusalem. Gani, sang naghambal si Jesus parte sa tubig, nahangpan ni Nicodemo nga ang ginapatuhuyan ni Jesus indi ang tubig, kundi ang pagbawtismo sa tubig.

Bawtismo “sa Balaan nga Espiritu”

Kon ang ‘pagkabun-ag paagi sa tubig’ nagakahulugan sing pagbawtismo sa tubig, ano naman ang kahulugan sang ‘pagkabun-ag paagi sa espiritu’? Antes naghambalanay si Jesus kag si Nicodemo, nagsiling si Juan Bautista nga indi lamang tubig ang may papel sa bawtismo kundi pati man ang espiritu. Nagsiling sia: “Nagbawtismo ako sa inyo sa tubig, apang sia [Jesus] magabawtismo sa inyo sa balaan nga espiritu.” (Marcos 1:7, 8) Si Marcos nga manunulat sang Ebanghelyo amo ang naglaragway sang una nga hitabo sini nga sahi sang bawtismo. Sia nagsulat: “Sa sadtong mga adlaw si Jesus nag-abot gikan sa Nazaret sang Galilea kag ginbawtismuhan ni Juan sa Jordan. Kag sa gilayon pagbutwa niya sa tubig nakita niya nga nabuksan ang langit, kag ang espiritu nga nagkunsad sa iya kaangay sa salampati.” (Marcos 1:9, 10) Sang gintum-oy si Jesus sa Jordan, ginbawtismuhan sia sa tubig. Sang nabaton niya ang espiritu halin sa langit, ginbawtismuhan sia sa balaan nga espiritu.

Mga tatlo ka tuig sa tapos sang iya bawtismo, ginpasalig ni Jesus ang iya mga disipulo: “Bawtismuhan kamo sa balaan nga espiritu pila na lang ka adlaw pagkatapos sini.” (Binuhatan 1:5) San-o ini natabo?

Sang adlaw sang Pentecostes, tuig 33 C.E., mga 120 ka disipulo ni Jesus ang nagtilipon sa isa ka balay sa Jerusalem. “Hinali lang nga may gahod gikan sa langit subong sang nagahagunos nga huyop sang hangin, kag naglanog ini sa bug-os nga balay diin nagalingkod sila. Kag nakita nila ang mga dila nga daw kalayo . . . , kag napuno sila tanan sing balaan nga espiritu.” (Binuhatan 2:1-4) Sina man nga adlaw, ang iban sa Jerusalem ginpalig-on nga magpabawtismo sa tubig. Ginsilingan ni apostol Pedro ang kadam-an: “Maghinulsol kamo, kag ang tagsatagsa sa inyo magpabawtismo sa ngalan ni Jesucristo para sa kapatawaran sang inyo mga sala, kag mabaton ninyo ang wala bayad nga dulot nga balaan nga espiritu.” Ano ang ila reaksion? “Ang mga nagbaton sang iya pulong sing tinagipusuon ginbawtismuhan, kag sa amo nga adlaw mga tatlo ka libo ka kalag ang gindugang.”—Binuhatan 2:38, 41.

Duha ka Sahi sang Bawtismo

Ano ang ginapakita sini nga mga bawtismo parte sa bag-o nga pagkabun-ag? Ginapakita sini nga ang bag-o nga pagkabun-ag ginahimo paagi sa duha ka bawtismo. Talupangda nga si Jesus ginbawtismuhan anay paagi sa tubig. Dayon, nakabaton sia sing balaan nga espiritu. Sing kaanggid, ang mga disipulo sang una ginbawtismuhan anay paagi sa tubig (ang iban sa ila ginbawtismuhan ni Juan Bautista), kag dayon nakabaton sang balaan nga espiritu. (Juan 1:26-36) Ang 3,000 ka bag-o nga disipulo, ginbawtismuhan anay sa tubig antes nakabaton sing balaan nga espiritu.

Kon ibase naton sa pagbawtismo nga natabo sang Pentecostes 33 C.E., paano ginahimo ang bag-o nga pagkabun-ag karon? Pareho man sa ginahimo sang mga apostoles ni Jesus kag sang mga disipulo sadto. Una, ang isa ka tawo maghinulsol sa iya mga sala, magliso sa iya malain nga buhat, magdedikar sang iya kabuhi kay Jehova para simbahon sia kag alagaron, kag magpahibalo sa publiko sang iya dedikasyon paagi sa pagpabawtismo. Dayon, kon pilion sia sang Dios nga maggahom sa Iya Ginharian, ginahaplasan sia sing balaan nga espiritu. Ang una nga bahin (bawtismo sa tubig) himuon mismo sang tawo, kag ang ikaduha (bawtismo sa espiritu) himuon sang Dios. Kon naeksperiensiahan sang isa ining duha ka bawtismo, nian nabun-ag sia liwat.

Kon amo, ngaa naggamit si Jesus sang ekspresyon nga “mabun-ag paagi sa tubig kag espiritu” sa ila paghambalanay ni Nicodemo? Ginapakita diri ni Jesus ang daku nga pagbag-o nga himuon sang mga nabawtismuhan sa tubig kag espiritu. Binagbinagon sang masunod nga artikulo ina nga bahin sang bag-o nga pagkabun-ag.

[Retrato sa pahina 9]

Ginbawtismuhan ni Juan sa tubig ang mga Israelinhon nga naghinulsol

Ang Bag-o nga Pagkabun-ag—Ano ang Resulta Sini?

NGAA naggamit si Jesus sing ekspresyon nga ‘pagkabun-ag paagi sa espiritu’ sang naghambal sia parte sa bawtismo sa balaan nga espiritu? (Juan 3:5) Kon ginagamit sa paglaragway, ang tinaga nga “nabun-ag” nagakahulugan sing “panugod,” pareho sa pagsiling sing “pagkabun-ag sang isa ka pungsod.” Gani, ang termino nga “bag-o nga pagkabun-ag” nagapakita sang “bag-o nga panugod.” Sa amo, ang mga tinaga nga “nabun-ag” kag “bag-o nga pagkabun-ag” nagapadaku sing bag-o nga panugod sa tunga sang Dios kag sang mga nabawtismuhan sa balaan nga espiritu. Paano ini nagakatabo?

Sa pagpaathag kon paano ginahanda sang Dios ang mga tawo nga magagahom sa langit, gingamit ni apostol Pablo ang ilustrasyon parte sa pamilya. Nagsulat sia sa mga Cristiano sadto nga maeksperiensiahan nila ang ‘pag-adoptar subong mga anak,’ kag gani makabig na sila sang Dios ‘subong mga anak.’ (Galacia 4:5; Hebreo 12:7) Para mahangpan naton ang kaangtanan sang pag-adoptar sa matabo nga pagbag-o kon ang isa bawtismuhan sa balaan nga espiritu, binagbinagon naton liwat ang ilustrasyon parte sa pamatan-on nga gusto mag-eskwela sa eskwelahan nga para lang sa mga tumandok.

Ang Pagbag-o Paagi sa Pag-adoptar

Sa ilustrasyon, ang pamatan-on indi makaeskwela sa eskwelahan bangod indi sia tumandok. Ibutang ta nga isa ka adlaw, may pagbag-o nga natabo. Gin-adoptar sia sing legal sang isa ka tumandok nga amay. Ano ang epekto sini sa pamatan-on? Karon nga gin-adoptar na sia subong anak, mahimo may mga kinamatarong na sia pareho sa iban nga tumandok nga pamatan-on. Puede na sia makaeskwela sa ila eskwelahan. Bangod sa pag-adoptar sa iya, mahimo na niya ang mga butang nga indi niya mahimo sadto.

Sa mas masangkad nga kahulugan, ginapakita sini ang puede matabo sa mga nakaeksperiensia sing bag-o nga pagkabun-ag. Binagbinaga ang pila ka pagkaanggid. Ang pamatan-on sa ilustrasyon makaeskwela lamang sa sini nga eskwelahan kon malab-ot niya ang kinahanglanon. Dapat tumandok sia. Pero wala sia sing mahimo kon sia lang. Amo man sini sa mga tawo nga magagahom sa Ginharian sang Dios, ukon sa gobierno sa langit. Mangin bahin lamang sila sang Ginharian kon malab-ot nila ang kinahanglanon. Dapat sila “nabun-ag liwat.” Pero indi nila ini mahimo kon sila lang kay ang pagkabun-ag liwat naghalin sa Dios.

Ano ang nagpabag-o sa kahimtangan sang pamatan-on? Ang legal nga proseso sang pag-adoptar. Siempre bisan gin-adoptar sia, amo man sia gihapon nga pamatan-on. Pero, sang nakompleto ang mga kinahanglanon para sa legal nga pag-adoptar sa pamatan-on, nangin tumandok na sia. Sa amo, may bag-o sia nga panugod, nga daw subong bala nabun-ag sia liwat. Nangin anak sia sang isa ka tumandok, gani may kinamatarong na sia nga mag-eskwela sa eskwelahan sang mga tumandok kag mangin miembro sang pamilya sang nag-adoptar sa iya.

Sing kaanggid, ginbag-o ni Jehova ang kahimtangan sang isa ka grupo sang indi perpekto nga mga tawo paagi sa legal nga pag-adoptar sa ila subong mga anak. Si apostol Pablo nga bahin sini nga grupo, nagsulat sa iya kaupod nga mga tumuluo: “Nakabaton kamo sang espiritu sang pag-adoptar sa inyo subong mga anak, nga paagi sini nga espiritu nagatuaw kita sing mabaskog: ‘Abba, Amay!’ Ang espiritu mismo nagasaksi upod sa aton espiritu nga kita mga anak sang Dios.” (Roma 8:15, 16) Huo, paagi sa proseso sang pag-adoptar, ining mga Cristiano nangin miembro sang pamilya sang Dios, ukon nangin “mga anak sang Dios.”—1 Juan 3:1; 2 Corinto 6:18.

Siempre, wala nagbag-o ang mga kahimtangan sini nga mga tawo bisan pa gin-adoptar sila sang Dios. Indi sila gihapon perpekto. (1 Juan 1:8) Pero, subong sang ginpaathag pa ni Pablo, sang makompleto na ang legal nga kinahanglanon para sa pag-adoptar, nangin anak na sila sang Dios. Ginpasalig man sila sang espiritu sang Dios nga magakabuhi sila upod kay Cristo sa langit. (1 Juan 3:2) Ining pat-od nga pasalig sang balaan nga espiritu nagpabag-o sang ila pagtamod sa kabuhi. (2 Corinto 1:21, 22) Gani, may bag-o sila nga panugod, nga daw subong bala nabun-ag sila liwat.

Nagapatuhoy sa gin-adoptar nga mga anak sang Dios, ang Biblia nagsiling: “Mangin mga saserdote sila sang Dios kag ni Cristo, kag magagahom subong mga hari upod sa iya sa sulod sang isa ka libo ka tuig.” (Bugna 20:6) Ang gin-adoptar nga mga anak sang Dios magahari kaupod ni Cristo sa Ginharian sang Dios, ukon gobierno sa langit. Nagsulat si apostol Pedro sa iya kaupod nga mga tumuluo nga makabaton sila sing “isa ka di-madinulunton kag wala sing dagta kag di-maalimunaw nga palanublion” nga ‘ginatigana sa langit’ para sa ila. (1 Pedro 1:3, 4) Isa gid ini ka makalilipay nga palanublion!

Sa pihak nga bahin, may pamangkot parte sa sini nga paggahom. Kon ang mga mabun-ag liwat magagahom subong mga hari sa langit, sin-o ang ila mga sakop? Binagbinagon ini nga pamangkot sa masunod nga artikulo.

[Retrato sa pahina 10]

Ano ang ginsiling ni Pablo parte sa pag-adoptar?