KON nagapakighambal ka sa iban tuhoy sa mga katuyuan sang Dios, sing pribado man ukon sa plataporma, ang imo ginahambal dapat nasentro sa kon ano ang yara sa Pulong sang Dios. Masami nga nagalakip ini sang pagbasa sing mga kasulatan gikan sa Biblia, nga dapat himuon sing maayo.

Ang Nagakaigo nga Empasis Nagadalahig Sang Balatyagon. Ang mga kasulatan dapat basahon upod ang balatyagon. Binagbinaga ang pila ka halimbawa. Kon ginabasa mo sing mabaskog ang Salmo 37:​11, ang imo tingog dapat magpaalinton sang kalangkag sa paghidait nga ginasaad didto. Kon nagabasa ka sang Bugna 21:4 tuhoy sa pagdula sang pag-antos kag kamatayon, ang imo tingog dapat magpabanaag sang apresasyon sa makalilipay nga kaumpawan nga ginatagna. Ang Bugna 18:​2, 4, 5, nga nagahingyo nga magguwa sa makasasala nga “Babilonia nga Daku,” dapat basahon nga may tono sang pagkahilingagawon. Sa pagkamatuod, ang balatyagon nga ginapabutyag dapat mangin tinagipusuon apang wala ginapasobrahan. Ang nagakaigo nga kabaskugon sang emosyon nagadepende sa teksto mismo kag sa paagi sang paggamit sini.

Ipadaku ang Nagakaigo nga mga Tinaga. Kon ang imo mga komento napasad sa isa ka bahin lamang sang isa ka bersikulo, dapat mo ipadaku ini nga bahin kon nagabasa sang teksto. Halimbawa, kon nagabasa sang Mateo 6:​33, indi mo paghatagan sing panguna nga pagpadaku ang “iya pagkamatarong” ukon ang “ining tanan iban pa nga mga butang” kon ang luyag mo binagbinagon amo ang kahulugan sang “pangitaa anay ang ginharian.”

Sa isa ka pamulongpulong sa Miting sa Serbisyo, mahimo ginaplano mo nga basahon ang Mateo 28:19. Ano nga mga tinaga ang imo ipadaku? Kon ginapalig-on mo ang kaukod sa pagsugod sing mga pagtuon sa Biblia sa puluy-an, ipadaku ang “maghimo sing mga disipulo.” Sa pihak nga bahin, kon ginaplano mo nga binagbinagon ang Cristianong responsabilidad sa pagpaambit sing kamatuoran sa Biblia sa pangayaw nga mga pumuluyo ukon luyag mo nga palig-unon ang pila ka manugbantala sa pag-alagad kon diin may daku pa nga pagkinahanglan, mahimo mo ipadaku ang “mga tawo sa tanan nga kapungsuran.”

Sa masami, ang isa ka kasulatan ginapresentar bilang sabat sa isa ka pamangkot ukon bilang pagsakdag sa isa ka argumento nga ginatamod sang iban nga kontrobersial. Kon ang tagsa ka ideya sa teksto ginapadaku sing alalangay, indi makita sang imo mga tagpalamati ang koneksion. Mahimo nga maathag ang punto sa imo apang indi maathag sa ila.

Halimbawa, kon nagabasa sang Salmo 83:18 gikan sa Biblia nga may ngalan sang Dios, kon ibutang mo ang tanan nga empasis sa ekspresyon nga “ang Labing Mataas,” mahimo nga indi mahangpan sang isa ka tagbalay ang maathag nga katunayan nga ang Dios may personal nga ngalan. Dapat ipadaku mo ang ngalan nga “Jehova.” Apang, kon ginagamit mo ang amo gihapon nga kasulatan sa isa ka paghambalanay tuhoy sa pagkasoberano ni Jehova, dapat hatagan mo sing panguna nga empasis ang ekspresyon nga “ang Labing Mataas.” Sing kaanggid, kon ginagamit ang Santiago 2:24 sa pagpakita sang importansia nga ang pagtuo dapat updan sang buhat, mahimo nga indi mahangpan sang pila nga nagapamati sa imo ang punto kon hatagan mo sing panguna nga empasis ang “ginapahayag nga matarong” sa baylo sang “mga binuhatan.”

Ang isa pa ka mapuslanon nga halimbawa masapwan sa Roma 15:7-13. Bahin ini sang isa ka sulat ni apostol Pablo sa isa ka kongregasyon nga ginatapuan sang mga Gentil kag kinaugali nga mga Judiyo. Nangatarungan diri ang apostol nga ang ministeryo ni Cristo nagahatag sing kaayuhan indi lamang sa sirkunsidado nga mga Judiyo kundi sa mga tawo man sang mga pungsod agod nga “himayaon sang mga pungsod ang Dios bangod sang iya kaluoy.” Nian nagkutlo si Pablo sing apat ka kasulatan, nagapatalupangod sa sina nga kahigayunan para sa mga pungsod. Paano mo basahon yadtong mga kinutlo agod mapadaku ang punto nga ginahunahuna ni Pablo? Kon ginamarkahan mo ang mga ekspresyon nga ipadaku, mahimo mo markahan ang “mga pungsod” sa bersikulo 9, “kamo nga mga pungsod” sa bersikulo 10, “kamo tanan nga pungsod” kag “tanan nga katawhan” sa bersikulo 11, kag “mga pungsod” sa bersikulo 12. Tilawi nga basahon nga may subong sina nga empasis ang Roma 15:7-13. Samtang ginahimo mo ini, mangin mas maathag kag mas mahapos hangpon ang argumento ni Pablo.

Mga Paagi Sang Paghatag Sing Empasis. Ang nagadala-ideya nga mga tinaga nga luyag mo palutawon sarang mapadaku sa pila ka paagi. Ang mga paagi nga imo ginagamit dapat nahisuno sa kasulatan kag sa danyag sang pamulongpulong. Yari ang pila ka panugda.

Pagpadaku sang tingog. Nagadalahig ini sang bisan ano nga pagbulubag-o sa tingog nga nagapalutaw sang nagadala-ideya nga mga tinaga gikan sa iban nga bahin sang dinalan. Ang empasis sarang himuon paagi sa pagbag-o sa kabaskugon sang tingog​—paagi sa pagpatunog sini ukon sa pagpahinay sini. Sa madamo nga lenguahe, ang pagbag-o sa kataason sang tingog nagadugang sang empasis. Apang, sa pila ka lenguahe, mahimo nga bag-uhon sini ang kahulugan. Kon nagalagday ang imo tingog sa yabi nga mga ekspresyon, ini nagapadaku pa sang importansia sini. Sa mga lenguahe nga indi puwede ang pagpadaku sang tingog subong paagi sa paghatag sing empasis sa pila ka tinaga, dapat sundon kon ano ang naandan sa sina nga lenguahe agod mangin maayo ang mga resulta.

Pagdulog. Sarang ini himuon antes ukon pagkatapos basahon ang yabi nga bahin sang isa ka kasulatan​—ukon pareho. Ang pagdulog gilayon antes mo basahon ang panguna nga ideya nagapukaw sing kalangkag; ang pagdulog pagkatapos nagapatudok pa sini sa hunahuna. Apang, kon tuman kadamo ang pagdulog, wala sing magalutaw nga ideya.

Pagsulit. Mahatagan mo sing empasis ang isa ka partikular nga punto paagi sa pagdulog kag pagbasa liwat sang tinaga ukon prase. Ang ginapasulabi pirme nga paagi amo ang pagtapos sang teksto kag nian suliton ang yabi nga ekspresyon.

Mga kumpas. Ang paghulaghulag sang lawas subong man ang pangguyahon masami nga makadugang sang emosyon sa isa ka tinaga ukon prase.

Tono sang tingog. Sa pila ka lenguahe, kon kaisa mahimo nga ang tono sa pagbasa sing mga tinaga may epekto sa kahulugan sini kag nagapain sa sini. Diri, kinahanglan man ang paghalong, ilabi na sa paggamit sing pagyubit.

Kon Iban ang Magbasa Sang mga Teksto. Kon ang tagbalay ang magbasa sang isa ka kasulatan, mahimo padakuon niya ang sayop nga mga tinaga ukon mahimo nga wala gid. Ano karon ang himuon mo? Sa masami labing maayo nga ipaathag mo ang kahulugan paagi sa pag-aplikar mo sang mga teksto. Pagkatapos maaplikar, mahimo mo direkta nga hatagan sang pinasahi nga igtalupangod ang nagadala-ideya nga mga tinaga sa Biblia.

KON nagatudlo sa iban, indi lamang ang pagbasa sing mga bersikulo sa Biblia ang kinahanglan. Si apostol Pablo nagsulat sa iya kaupod nga si Timoteo: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.”​—2 Tim. 2:15.

Ang paghimo sini nagakahulugan nga ang aton pagpaathag sang mga kasulatan dapat nahisanto sa ginatudlo mismo sang Biblia. Nagakinahanglan ini nga binagbinagon naton ang konteksto, sa baylo nga pilion lamang ang mga ekspresyon nga makagalanyat sa aton kag dugangan ini sang aton mga ideya. Paagi kay manalagna Jeremias, nagpaandam si Jehova batok sa mga propeta nga nagapangangkon nga nagahambal gikan sa baba ni Jehova apang ang matuod ginapahayag nila ang “palanan-awon sang ila kaugalingon nga tagipusuon.” (Jer. 23:16) Ginpaandaman ni apostol Pablo ang mga Cristiano batok sa pagdagta sa Pulong sang Dios paagi sa tawhanon nga mga pilosopiya sang sia nagsulat: “Gintalikdan namon ang natago nga mga butang nga dapat ikahuya, nga wala nagalakat nga may limbong, ni ginasimbugan ang pulong sang Dios.” Sadtong mga adlaw ang di-bunayag nga mga negosyante sang alak nagsimbog sang ila alak agod magdamo ini kag agod magdugang ang ila kita. Wala naton ginasimbugan ang Pulong sang Dios sing tawhanon nga mga pilosopiya. “Indi kita mga manuglibod sing pulong sang Dios subong sang madamo nga tawo,” siling ni Pablo, “kundi bangod sang pagkasinsero, huo, subong ginpadala gikan sa Dios, sa idalom sang pagtamod sang Dios, upod kay Cristo, nagahambal kita.”​—2 Cor. 2:17; 4:2.

Kon kaisa, mahimo nga magkutlo ikaw sing isa ka kasulatan agod padakuon ang isa ka prinsipio. Ang Biblia puno sing mga prinsipio nga nagahatag sing maayo nga panuytoy sa pag-atubang sang nanuhaytuhay nga mga kahimtangan. (2 Tim. 3:​16, 17) Apang dapat mo pat-uron nga sibu ang imo pag-aplikar kag indi sayop ang imo paggamit sa kasulatan, subong bala nga daw ginahambal sini ang luyag mo nga ihambal sini. (Sal. 91:​11, 12; Mat. 4:​5, 6) Ang pag-aplikar dapat nahisanto sa katuyuan ni Jehova, kag nahisanto sa bug-os nga Pulong sang Dios.

Ang ‘paggamit sing matadlong sang pulong sang kamatuoran’ nagalakip man sang paghangop sa ginasiling sang Biblia. Indi ini isa ka “batuta” agod pahugon ang iban. Ang relihiosong mga manunudlo nga nagpamatok kay Jesucristo nagkutlo gikan sa Kasulatan, apang ginapiyong nila ang ila mga mata sa mas importante nga mga butang​—yadtong nagalakip sang katarungan kag kaluoy kag katutom​—​nga ginapatuman sang Dios. (Mat. 22:​23, 24; 23:​23, 24) Kon nagatudlo sang Pulong sang Dios, ginapabanaag ni Jesus ang personalidad sang iya Amay. Ang kakugi ni Jesus sa kamatuoran ginaupdan sang iya tudok nga gugma sa mga tawo nga iya gintudluan. Dapat panikasugan naton nga sundon ang iya halimbawa.​—Mat. 11:28.

Paano naton mapat-od nga husto ang pag-aplikar naton sang isa ka kasulatan? Makabulig ang regular nga pagbasa sing Biblia. Kinahanglan man nga apresyahon naton ang gin-aman ni Jehova nga “matutom kag mainandamon nga ulipon,” ang hubon sang gintangdo-sang-espiritu nga mga Cristiano nga paagi sa ila nagaaman sia sing espirituwal nga pagkaon para sa panimalay sang pagtuo. (Mat. 24:45) Ang personal nga pagtuon subong man ang regular nga pagtambong kag pagpakigbahin sa mga miting sa kongregasyon magabulig sa aton nga makabenepisyo gikan sa instruksion nga ginaaman paagi sa sining matutom kag mainandamon nga ulipon nga klase.

Kon sarang matigayon ang libro nga Reasoning From the Scriptures sa imo lenguahe kag matun-an mo nga gamiton ini sing maayo, mahapos mo matigayon ang isa ka panuytoy nga kinahanglanon mo agod maaplikar sing husto ang ginatos ka kasulatan nga pirme ginagamit sa aton ministeryo. Kon ginaplano mo nga gamiton ang indi pamilyar nga kasulatan, ang kaugdang magapahulag sa imo nga magpanalawsaw agod nga kon maghambal ka, magamit mo sing matadlong ang pulong sang kamatuoran.​—Hulu. 11:2.

Pag-aplikar Sing Maathag. Kon nagatudlo sa iban, pat-ura nga makita nila sing maathag ang kaangtanan sa ulot sang topiko nga imo ginabinagbinag kag sang mga kasulatan nga imo ginagamit. Kon ginapakilala mo ang kasulatan paagi sa pamangkot, dapat makita sang imo mga tagpalamati kon paano ginasabat sang kasulatan ina nga pamangkot. Kon ginagamit mo ang kasulatan bilang pagsakdag sa pila ka dinalan, pat-ura nga nahangpan sing maayo sang estudyante kon paano ginapamatud-an sang teksto ang punto.

Ang pagbasa lamang sing kasulatan​—bisan pa may empasis​—​masami nga indi pa tuman. Dumduma, ang ordinaryo nga tawo indi pamilyar sa Biblia kag mahimo nga indi niya mahangpan ang imo punto sa isa lamang ka pagbasa. Ipatalupangod ang bahin sang teksto nga direkta nga naaplikar sa inyo ginahambalan.

Sa masami nagakinahanglan ini nga painon mo ang yabi nga mga tinaga, yadtong may direkta nga kaangtanan sa punto nga ginahambalan. Ang pinakasimple nga metodo amo ang pagsambit liwat sinang nagadala-ideya nga mga tinaga. Kon nagapakighambal ka sa isa ka tawo, mahimo ka makapamangkot agod buligan sia nga makilala ang yabi nga mga tinaga. Kon nagahambal sa isa ka grupo, ginapasulabi sang pila ka humalambal nga lab-uton ang ila tulumuron paagi sa paggamit sing mga synonym ukon mga tinaga nga may pareho nga kahulugan ukon paagi sa pagsulit sang ideya. Apang, kon himuon mo ini, maghalong nga indi madula sang mga tagpalamati ang kaangtanan sa ulot sang ginahambalan nga punto kag sang pinamulong sa kasulatan.

Kon napain mo na ang yabi nga mga tinaga, may maayo ka na nga pundasyon. Karon padayuna ini. Ginpakilala mo bala ang kasulatan upod ang pagpaathag sang rason kon ngaa gingamit mo ang teksto? Kon amo, ipakita kon paano ang mga tinaga nga imo ginpadaku naangot sa luyag mo nga paabuton sang imo mga tagpalamati. Ipaathag sing maayo kon ano ini nga kaangtanan. Bisan pa wala mo gingamit ining direkta nga pagpakilala sa teksto, dapat ini ipaathag.

Ang mga Fariseo namangkot kay Jesus sang ginahunahuna nila nga isa ka mabudlay nga pamangkot, nga amo: “Tugot bala sa isa ka tawo ang pagbulag sa iya asawa sa bisan ano nga kabangdanan?” Ginpasad ni Jesus ang iya sabat sa Genesis 2:24. Talupangda nga ginsentro niya ang igtalupangod sa isa lamang ka bahin sini, kag nian gin-aplikar ini. Pagkatapos mapatalupangod nga ang bana kag ang iya asawa nangin “isa ka unod,” si Jesus naghinakop: “Busa, ang gintingob sang Dios dili pagbulagon sang tawo.”​—Mat. 19:3-6.

Daw ano kadamo nga paathag ang imo ihatag agod mangin maathag ang pag-aplikar sang kasulatan? Depende ini sa imo mga tagpalamati kag sa importansia sang punto nga ginahambalan. Mangin simple kag direkta.

Mangatarungan Gikan sa Kasulatan. Tuhoy sa ministeryo ni Pablo sa Tesalonica, ang Binuhatan 17:​2, 3 nagasugid sa aton nga sia ‘nangatarungan gikan sa Kasulatan.’ Isa ini ka ikasarang nga dapat tinguhaan nga palambuon sang tagsa ka alagad ni Jehova. Halimbawa, ginsaysay ni Pablo ang mga kamatuoran tuhoy sa kabuhi kag ministeryo ni Jesus, ginpakita nga ini gintagna sa Hebreong Kasulatan, kag nian naghatag sing epektibo nga konklusion paagi sa pagsiling: “Ini amo ang Cristo, ining Jesus nga akon ginabantala sa inyo.”

Sang nagsulat sa mga Hebreo, pirme nagkutlo si Pablo gikan sa Hebreong Kasulatan. Sa pagpadaku ukon sa pagpaathag sang isa ka punto, masami nga ginapain niya ang isa ka tinaga ukon malip-ot nga prase kag nian ginapakita ang importansia sini. (Heb. 12:​26, 27) Sa kasaysayan nga masapwan sa Hebreo kapitulo 3, nagkutlo si Pablo gikan sa Salmo 95:7-11. Talupangda nga ginpasangkad niya dayon ang tatlo sini ka bahin: (1) ang pagpatuhoy sa tagipusuon (Heb. 3:8-12), (2) ang importansia sang ekspresyon nga “Karon” (Heb. 3:​7, 13-15; 4:6-11), kag (3) ang kahulugan sang dinalan: “Indi gid sila makasulod sa akon kapahuwayan” (Heb. 3:​11, 18, 19; 4:1-11). Panikasugi nga ilugon ini nga halimbawa samtang ginaaplikar mo ang tagsa ka kasulatan.

Talupangda kon daw ano ka epektibo ang pagpangatarungan ni Jesus gikan sa Kasulatan sa hitabo nga masapwan sa Lucas 10:25-37. Ang tawo nga batid sa Kasuguan namangkot: “Manunudlo, paagi sa paghimo sing ano nga mapanubli ko ang kabuhi nga walay katapusan?” Sa pagsabat ginpangabay anay ni Jesus ang tawo nga ipabutyag ang iya pagtamod tuhoy sa butang, kag nian ginpadaku ni Jesus ang importansia sang paghimo sang ginasiling sang Pulong sang Dios. Sang nangin maathag nga wala mahangpan sang tawo ang punto, ginbinagbinag sing masangkad ni Jesus ang isa lang ka tinaga sa kasulatan​—ang “isigkatawo.” Sa baylo nga ihatag lamang ang kahulugan sini, naggamit sia sing isa ka ilustrasyon agod buligan ang tawo nga makahimo mismo sang nagakaigo nga konklusion.

Maathag nga kon nagasabat sing mga pamangkot, wala lamang nagkutlo si Jesus sang mga teksto nga naghatag sing direkta, maathag nga sabat. Ginaanalisar niya kon ano ang ginasiling sini kag nian gin-aplikar ini sa pamangkot.

Sang ginpangduhaduhaan sang mga Saduceo ang paglaum nga pagkabanhaw, ginsentro ni Jesus ang igtalupangod sa isa ka espesipiko nga bahin sang Exodo 3:6. Apang wala sia mag-untat pagkatapos nga makutlo ang kasulatan. Nangatarungan sia sa sini agod ipakita sing maathag nga ang pagkabanhaw isa ka bahin sang katuyuan sang Dios.​—Mar. 12:24-27.

Ang mangin batid sa pagpangatarungan sing husto kag sing epektibo gikan sa Kasulatan isa ka importante nga butang agod ikaw mangin isa ka lantip nga manunudlo.

NAGAHAMBAL ka man sa nagaisahanon nga tawo ukon sa mas madamo nga tagpalamati, indi maalamon ang paghunahuna nga mangin interesado ang imo (mga) tagpalamati sa imo topiko bangod lamang interesado ka sa sini. Ang imo mensahe importante, apang kon indi mo mapaathag ang praktikal nga kapuslanan sini, ayhan indi mo mahuptan sing madugay ang interes sang imo mga tagpalamati.

Matuod ini bisan sa mga tumalambong sa Kingdom Hall. Mahimo sila mamati kon maggamit ka sing isa ka ilustrasyon ukon eksperiensia nga wala pa nila anay mabatii. Apang mahimo nga indi na sila magpamati kon maghambal ka sing mga butang nga ila na nahibaluan, ilabi na kon wala mo mapasangkad ini nga mga butang. Kinahanglan buligan mo sila nga mahangpan kon ngaa kag kon paano nga ang imo ginasiling makabenepisyo gid sa ila.

Ginapalig-on kita sang Biblia nga maghunahuna sing praktikal. (Hulu. 3:21) Gingamit ni Jehova si Juan Bautista sa pagtuytoy sa mga tawo sa “praktikal nga kaalam sang mga matarong.” (Luc. 1:17) Kaalam ini nga napasad sa maayo nga kahadlok kay Jehova. (Sal. 111:10) Ang mga nakahangop sini nga kaalam ginabuligan nga makalandas sing madinalag-on sa kabuhi karon kag makapanguyapot sa matuod nga kabuhi, ang walay katapusan nga kabuhi sa palaabuton.​—1 Tim. 4:8; 6:19.

Paghimo Sing Pamulongpulong nga Praktikal. Agod mangin praktikal ang imo pamulongpulong, dapat hunahunaon mo sing maayo indi lamang ang materyal kundi ang imo man mga tagpalamati. Indi sila pagkabiga subong isa ka grupo. Ini nga grupo ginahuman sang mga indibiduwal kag mga pamilya. Mahimo nga may magagmay nga mga kabataan, mga tin-edyer, mga adulto, kag pila ka tigulang. Mahimo nga may bag-uhan nga mga interesado kag may nagaalagad na kay Jehova antes ikaw matawo. Ang pila mahimo nga hamtong sa espirituwal; ang iban mahimo nga naimpluwensiahan gihapon sang pila ka panimuot kag mga buhat sang kalibutan. Pamangkuta ang imo kaugalingon: ‘Paano makabenepisyo ang mga tagpalamati sa materyal nga akon binagbinagon? Paano ko sila buligan agod mahangpan nila ang punto?’ Sarang mo mahatagan sing panguna nga igtalupangod ang isa lamang ukon duha sa mga grupo nga ginsambit diri. Apang, indi pagkalimti sing bug-os ang iban.

Apang ano abi kon gin-asayn ka sa pagbinagbinag sing isa ka sadsaran nga panudlo sang Biblia? Ano ang imo himuon agod makabenepisyo sa sini nga pamulongpulong ang mga tumalambong nga nagapati na sa amo nga panudlo? Panikasugi nga pabakuron pa ang ila pagpati sa sini. Paano? Paagi sa pagpangatarungan sa Makasulatanhon nga pamatuod nga nagasakdag sini. Imo man mapadalom pa ang ila paghangop sa sining panudlo sang Biblia. Sarang ini mahimo paagi sa pagpakita kon paano ini nga panudlo nagahisanto sa iban pa nga kamatuoran sang Biblia kag sa personalidad mismo ni Jehova. Maggamit sing mga halimbawa​—matuod nga mga eksperiensia​—nga nagapakita kon paano ang paghangop sa sining partikular nga panudlo nakahatag sing benepisyo sa mga tawo kag nakaimpluwensia sang ila pagtamod tuhoy sa palaabuton.

Indi paglimitihe ang praktikal nga aplikasyon sa pila lamang ka malip-ot nga mga komento sa konklusion sang imo pamulongpulong. Sa pagsugod pa lang, ang kada isa sa imo tumalambong dapat magbatyag nga “nagadalahig ini sa akon.” Kon napahamtang na ini nga sadsaran, padayuna ang paghimo sing praktikal nga aplikasyon samtang ginapasangkad mo ang tagsa ka panguna nga mga punto sa imo pamulongpulong subong man sa imo konklusion.

Kon nagaaplikar sini, pat-ura nga nagahisanto ini sa mga prinsipio sang Biblia. Ano ang buot silingon sini? Nga ini himuon sing mahigugmaon kag may kahanuklog. (1 Ped. 3:8; 1 Juan 4:8) Bisan sang nag-atubang sing mabudlay nga mga problema sa Tesalonica, ginpat-od ni apostol Pablo nga padakuon ang positibo nga mga bahin sang espirituwal nga pag-uswag sang iya Cristianong mga kauturan didto. Ginpabutyag man niya ang pagsalig nga kon tuhoy sa butang nga ginahambalan, luyag nila nga himuon kon ano ang husto. (1 Tes. 4:1-12) Daw ano kaayo nga halimbawa nga dapat ilugon!

Ang imo bala pamulongpulong gintuyo sa pagpahulag nga makigbahin sa hilikuton nga pagbantala kag pagtudlo sing maayong balita sa iban? Palambua ang kapagsik kag apresasyon sa sini nga pribilehiyo. Apang, samtang ginahimo ini, dumduma nga ang kasangkaron sang pagpakigbahin sang mga indibiduwal sa sining hilikuton nanuhaytuhay, kag ginapakita ini mismo sang Biblia. (Mat. 13:23) Indi pagpabatyaga ang imo mga kauturan nga daw nakasala. Ang Hebreo 10:24 nagapalig-on sa aton nga ‘magpukaw sa gugma kag sa maayong mga buhat.’ Kon kita nagapukaw sa gugma, magasunod ang mga buhat nga napasad sa maayo nga motibo. Sa baylo nga ipilit ang pagtuman, dumduma nga ang luyag ni Jehova amo ang pagpalambo naton sang “pagkamatinumanon paagi sa pagtuo.” (Roma 16:26) Ginahunahuna ini, ginatinguhaan naton nga palig-unon ang pagtuo​—ang aton kag ang ila sang aton mga kauturan.

Pagbulig sa Iban nga Mahangpan ang Punto. Samtang nagapanaksi ka sa iban, indi pagkalimti nga ipadaku ang praktikal nga kapuslanan sang maayong balita. Sa paghimo sini, kinahanglan binagbinagon mo kon ano ang ginahunahuna sang mga tawo sa inyo teritoryo. Paano mo mahibaluan ini? Mamati sa mga balita sa radyo ukon sa telebisyon. Tan-awa ang una nga pahina sang pamantalaan. Subong man, panikasugi nga makapakigsugilanon sa mga tawo, kag mamati kon nagahambal sila. Ayhan masapwan mo nga nagaatubang sila sang mga problema nga nagakinahanglan sing gilayon nga atension​—pagkadula sang trabaho, balayran sa arkila, balatian, kamatayon sang isa ka katapo sang pamilya, katalagman sa krimen, inhustisya sa kamot sang may awtoridad, pagkaguba sang pag-asawahay, pagsuweto sa lamharon nga kabataan, kag iban pa. Makabulig bala sa ila ang Biblia? Pat-od gid.

Kon nagasugod sang paghambalanay, mahimo nga may ginahunahuna ka na nga topiko. Apang, kon ipakita sang tawo nga may pila ka problema nga iya gid ginakabalak-an, indi magpangalag-ag nga hambalan ini kon mahimo mo, ukon isiling nga magabalik ka nga may pila ka impormasyon nga makabulig. Siempre, ginalikawan naton nga ‘magpahilabot sa mga butang nga wala kita sing labot,’ apang malipayon nga ginapaambit naton sa iban ang praktikal nga laygay nga ginahatag sang Biblia. (2 Tes. 3:11) Maathag nga ang nagaganyat gid sa mga tawo amo ang laygay sang Biblia nga nagatandog sang ila mismo kabuhi.

Kon indi makita sang mga tawo nga ang aton mensahe nagaapektar sa ila, mahimo nga tapuson nila gilayon ang paghambalanay. Bisan pa pahambalon nila kita, halos wala sing epekto ang aton mensahe sa ila kabuhi kon indi naton mapakita ang praktikal nga kapuslanan sang topiko nga ginahambalan. Sa kabaliskaran, kon mapaathag naton sing maayo ang praktikal nga kapuslanan sang mensahe, ang aton paghambalanay mahimo makapabag-o sa kabuhi sang mga tawo.

Kon nagadumala sing mga pagtuon sa Biblia, padayuna ang pagpadaku sang praktikal nga aplikasyon. (Hulu. 4:7) Buligi ang mga estudyante nga mahangpan ang Makasulatanhon nga laygay, mga prinsipio, kag mga halimbawa nga nagapakita sa ila kon paano maglakat sa mga dalanon ni Jehova. Ipadaku ang mga benepisyo nga matigayon sa paghimo sini. (Isa. 48:​17, 18) Magapahulag ini sa mga estudyante nga himuon ang kinahanglanon nga mga pagbag-o sa ila kabuhi. Palambua sa ila ang gugma kay Jehova kag ang handum nga pahamut-an sia, kag tuguti nga ang motibasyon sa pag-aplikar sing laygay gikan sa Pulong sang Dios nagagikan mismo sa ila.