“Ang Gahom nga Labaw sa Kinaandan”

DAW ano ka daku nga pag-antos ang mabatas sang isa ka Cristiano? Sa karon, ang mga Cristiano sa bilog nga kalibutan nagaatubang sing kaimulon, kagamo sa pamilya, napilasan nga emosyon, balatian, mga inaway, kag paghingabot. Makatarunganon bala nga paabuton sila sa paghupot sing integridad walay sapayan sini tanan? Si apostol Pablo nagsiling nga makatarunganon ini. Sia nagsulat: “May kusog ako para sa tanan nga butang bangod sa iya nga nagapabakod sa akon.”—Filipos 4:13.

Ginpakita sang maragtas nga ang kusog gikan kay Jehova nagakaigo gid para sa tanan nga butang. Halimbawa, sa tion sang paggahom sang mga Nazi sa Alemanya, ang mga Saksi ni Jehova nag-antos sing mapintas nga paghingabot. Nagbatas bala sila? Ang libro nga Les Bibelforscher et le nazisme (The Bible Students and Nazism) nagasiling: “Walay sapayan sang tanan nga pagpanakit, pamahog, kag mga pagdumili, walay sapayan sang pagpakahuya sa publiko, mga pagbilanggo kag mga pagbukot sa mga kampo konsentrasyon, ang mga Bible Student [mga Saksi ni Jehova] wala gid magtugot sang ila kaugalingon nga ‘tudluan liwat.’”

Sa mga kampo konsentrasyon, ang mga Saksi ginpakilala paagi sa diutay lila nga mga trayanggulo sa ila mga pako kag ginpintasan sa pinasahi nga paagi. Nag-ampo bala sila? Ang sikologo nga si Bruno Bettelheim nagsiling nga sila “wala lamang magpakita sing tumalagsahon kadaku nga tawhanon nga dignidad kag moral nga paggawi, kundi daw naamligan sila batok sa pareho nga eksperiensia sa kampo nga wala madugay nagpierdi sa mga tawo nga ginkabig sang akon sikoanalitiko nga mga abyan kag nakon subong indi mationg.”

Huo, may ‘kusog [sila] para sa tanan nga butang.’ Ngaa? Bangod nagsandig sila kay Jehova. Si Pablo nagsiling: “May amon kami sining bahandi sa mga suludlan nga sa duta, agod nga ang gahom nga labaw sa kinaandan mangin iya sang Dios kag indi sa amon kaugalingon.” (2 Corinto 4:7) Kon makasumalang ikaw sing mabudlay nga kahimtangan, masinaligon nga mangayo sing bulig kay Jehova. Napabakod sang gahom nga labaw sa kinaandan nga iya ginaaman, makabatas ikaw.—Lucas 11:13.

Abiabihon Mo Bala ang Isa ka Pagduaw?

Bisan sa sining magamo nga kalibutan, makatigayon ikaw sing kalipay gikan sa sibu nga ihibalo sa Biblia tuhoy sa Dios, sa iya Ginharian, kag sa iya dalayawon nga katuyuan para sa katawhan. Kon luyag mo sing dugang pa nga impormasyon ukon may isa nga magduaw sa imo agod magdumala sing isa ka walay bayad nga pagtuon sa Biblia sa puluy-an, magsulat palihug sa Watch Tower, P.O. Box 2044, 1099 Manila, ukon sa nagakaigo nga direksion nga nalista sa pahina 2.