Ang Katinlo Nagapadungog kay Jehova
1 Sang ang Israelinhon nga nagkalabilin nagpauli gikan sa pagkabihag sa Babilonia, ginsugo sila: “Hupti ang inyo kaugalingon nga matinlo, kamo nga nagadala sing mga gamit ni Jehova.” (Isa. 52:11) Sanglit ginatulinan kita karon sing sagrado nga katungdanan nga ibantala ang maayong balita, luyag man naton padunggan si Jehova paagi sa paghupot sang aton kaugalingon, sang aton mga puluy-an, kag sang aton mga Kingdom Hall nga matinlo kag indi makahuluya.
2 Sa Ministeryo: Kon nagaalagad sa latagon, ang aton bala panapton, bag sang libro, kag personal nga pamustura mahipid kag indi makahuluya, nga wala nagapasandad? Nagapadungog ini kay Jehova kon ginahuptan naton ang aton kaugalingon kag ang aton panapton nga matinlo paagi sa pirme nga pagpaligo kag pagpanglaba. Maayo man nga tan-awon ang aton Biblia kag ang mga libro nga ginagamit naton pirme agod pat-uron nga indi ini gision kag mahigko tan-awon. Walay sapayan nga ang katawhan ni Jehova subong isa ka grupo nakilal-an nga matinlo, maayo nga usisaon sang kada isa sa aton ang aton kaugalingon may kaangtanan sini.
3 Sa Aton mga Puluy-an: Kamusta naman ang hitsura sang aton puluy-an? Ginapakahuy-an bala sini ang mensahe sang Ginharian nga ginadala naton? Kon ang aton puluy-an magamo kag ang mga palibot mahigko, indi ayhan duhaduhaan sang iban ang aton pagkasinsero kon maghambal kita tuhoy sa duta nga himuon nga isa ka paraiso? Kon amo, masiling bala nga napalambo naton ang “mga pagsinalayo sa katinlo nga nagakabagay sa bag-ong kalibutan sa idalom sang Ginharian sang Dios”?—om, pahina 130-1.
4 Sa Aton Kingdom Hall: Sa masami nalangkag kita nga agdahon ang bag-ong mga interesado sa pagduaw sa aton Kingdom Hall. Matuod ini ilabi na kon ang Kingdom Hall matahom kag matinlo, sa sulod kag sa guwa. Ang paghupot nga matinlo sang propiedad nagakinahanglan sing panikasog. Manghulonghulong sa palibot sang inyo tilipunan. Matinlo bala ang mga bangko, salog, kag dingding? Matinlo bala kag indi mabaho ang mga kasilyas? Kamusta naman ang karatula sang Kingdom Hall? Sa masami amo ini ang una nga butang nga makita sang mga tawo, gani dapat naton ini pinturahan kag tinluan pirme.
5 Mahimaya naton ang Dios paagi sa aton personal nga hitsura kag sa kahipid sang aton mga puluy-an kag mga Kingdom Hall nga wala sing hambal. Ang aton maayo nga halimbawa indi magahatag sing bisan ano man nga rason sa pagkasandad kundi magapamatuod nga ang aton pagsimba matinlo kag matadlong.—1 Cor. 10:31, 32; Sant. 1:27.