Handum Mo Bala nga Makaalagad Pa sing Bug-os?

“AKIG ako anay kay Jehova,” siling ni Laura. “Pirme ako anay nagapangamuyo nga buligan niya kami nga malubad ang amon mga problema sa pinansial agod padayon ako nga makapayunir​—⁠apang sa wala pulos. Nag-untat ako sang ulihi sa pagpayunir. Ginabaton ko nga nahisa ako sa mga nakapadayon sa pagpayunir.”

Binagbinaga, man, ang halimbawa ni Michael, ministeryal nga alagad sa isa ka kongregasyon sang mga Saksi ni Jehova. Madugay na niya nga handum nga mangin manugtatap. (1 Timoteo 3:1) Sang ang iya handum wala matuman sa sulod sang pila ka tuig, naglain gid ang iya buot sa bagay nga indi na niya luyag nga irekomendar pa para sa pribilehiyo. “Indi ko masarangan nga mabang-awan pa liwat,” siling niya.

Naagihan mo na bala ini? Kinahanglan gid bala nga biyaan mo ang isa ka ginapakabahandi nga teokratikong pribilehiyo? Halimbawa, kinahanglan bala nga mag-untat ka sa pagpayunir, subong bug-os tion nga manugwali sang Ginharian? Ukon ginahandum mo bala ang mga responsabilidad sa kongregasyon nga gintugyan sa iban? Mahimo pa gani nga handum mo gid nga mag-alagad sa Bethel ukon mangin misyonero, apang wala ini ginatugot sang imo mga kahimtangan.

“Ang paglaum nga napalantang nagapasakit sang tagipusuon,” siling sang tulun-an sang Hulubaton. (Hulubaton 13:12) Mahimo nga amo gid sini ilabi na kon iban ang nakabaton sang mga pribilehiyo nga ginalauman mo. Ang Pulong sang Dios bala nagahatag sing paghangop, lugpay, kag paglaum para kay bisan sin-o nga nakaagi sing amo sini nga mga kapaslawan? Huo. Sa katunayan, ang ika-84 nga Salmo nagapabutyag sang mga balatyagon sang isa ka alagad ni Jehova nga may mga handum man nga wala matuman tuhoy sa pag-alagad kay Jehova.

Ang Apresasyon sang Isa ka Levinhon

Ang mga kompositor sang ika-84 nga Salmo amo ang mga anak nga lalaki ni Core, ang mga Levinhon nga nag-alagad sa templo ni Jehova kag nagpakabahandi gid sang ila mga pribilehiyo sa pag-alagad. “Daw ano katahom sang imo daku nga tabernakulo, O Jehova sang mga kasuldadusan!” tu-aw sang isa sa ila. “Ang akon kalag ginahidlaw kag ginapunaw man tungod sa mga luwang ni Jehova. Ang akon tagipusuon kag ang akon unod nagahugyaw sa Dios nga buhi.”​—⁠Salmo 84:​1, 2.

Daku gid ang handum sining Levinhon nga makaalagad sa templo ni Jehova sa bagay nga bisan ang ordinaryo nga talan-awon sa dalan pakadto sa Jerusalem matahom gid para sa iya. “Nagalatas sa kapatagan sang mga tanom nga baca,” siling niya, “ginahimo nila ini nga isa ka tuburan.” (Salmo 84:6) Huo, ang kinaandan na nga mamala nga duog nangin kaangay sang natubigan sing maayo nga rehiyon.

Bangod ang salmista indi isa ka saserdotenhon nga Levinhon, makaalagad sia sa templo sa isa lamang ka semana kada anom ka bulan. (1 Cronica 24:​1-19; 2 Cronica 23:​8; Lucas 1:​5, 8, 9) Ginhinguyang niya ang nabilin pa nga tion sa isa sang mga siudad sang mga Levinhon. Busa nag-amba sia: “Bisan ang pispis nakakita sing balay, kag ang balinsasayaw sing pugad para sa iya kaugalingon, diin mabutang niya ang iya mga buto​—⁠ang imo dakung halaran, O Jehova sang mga kasuldadusan, Hari nakon kag Dios nakon!” (Salmo 84:3) Daw ano gid kuntani ka malipayon ang Levinhon kon may permanente sia nga puluy-an sa templo kaangay sa mga pispis!

Mahapos gid kuntani para sa Levinhon nga maglain ang iya buot bangod indi sia makaalagad sa templo sing mas masunson. Apang, nalipay sia sa pag-alagad subong sa masarangan niya, kag nahangpan gid niya nga ang bug-os tagipusuon nga debosyon kay Jehova takus gid sa panikasog. Ano ang nakabulig sa sining matutom nga Levinhon sa pagpabilin nga kontento sa iya mga pribilehiyo sa pag-alagad?

Magtuon nga Mangin Kontento

“Ang isa ka adlaw sa sulod sang imo mga luwang labi pa kaayo sa isa ka libo bisan diin,” siling sang Levinhon. “Ginpili ko nga magtindog sa atangan sang balay sang akon Dios sangsa magdayandayan sa mga layanglayang sang kalautan.” (Salmo 84:10) Nahangpan niya nga ang paghinguyang sing bisan isa ka adlaw sa balay ni Jehova isa ka hamili nga pribilehiyo. Kag indi lamang isa ka adlaw nga nagaalagad ang Levinhon sa templo. Bangod kontento sia sa iya mga pribilehiyo, nakaamba sia sa kalipay.

Kamusta naman kita? Ginaisip bala naton ang aton mga kabulahanan, ukon ginakalimtan bala naton kon ano na ang aton mga pribilehiyo sa pag-alagad kay Jehova? Bangod sang ila debosyon sa iya, gintugyanan ni Jehova ang iya katawhan sing madamo nga pribilehiyo kag katungdanan. Nagalakip ini sa mas mabug-at nga mga responsabilidad sang pagtatap, pagbantay, pagtudlo, kag sa lainlain nga bahin sang bug-os tion nga pag-alagad. Apang nagalakip man ini sa iban pa hamili nga mga butang nga may kaangtanan sa pagsimba kay Jehova.

Halimbawa, binagbinaga ang Cristianong ministeryo. Ginapaanggid ni apostol Pablo ang aton pribilehiyo nga magbantala sing maayong balita sa pagtigayon naton sing “bahandi sa mga suludlan nga duta.” (2 Corinto 4:7) Kaangay bala sa hamili nga bahandi ang imo pagtamod sa sining pag-alagad? Amo sina ang pagtamod ni Jesucristo sa sini, nga nanguna sa pagbantala sang Ginharian nga hilikuton, nagahatag sing sulundan. (Mateo 4:17) “Bangod may amon kami sining ministeryo . . . , wala kami nagauntat,” siling ni Pablo.​—⁠2 Corinto 4:⁠1.

Ang Cristianong mga miting isa man ka sagrado nga aman nga indi dapat pasapayanan. Sa aton mga miting, nagabaton kita sing importante nga instruksion kag nagaagom sing kinahanglanon nga pagpakig-upod. Sa mga miting mapahayag man naton sing dayag ang aton pagtuo kag paglaum paagi sa pagkomento sing regular kag paagi sa pagpakigbahin sa programa sa iban nga mga paagi. (Hebreo 10:​23-25) Ang aton mga miting isa gid ka aman nga dapat pakabahandion!

Si Michael, nga ginsambit kaina, nagpakabahandi sing daku sining mga pagpakamaayo kag nag-apresyar sini sing tudok. Apang bangod sa kapaslawan niya nga indi sia makaalagad subong gulang, ang iya apresasyon para sa sini umalagi nga nabuhinan. Paagi sa pagkonsentrar liwat sa sini, natigayon niya liwat ang iya pagkatimbang kag mapailubon nga naghulat kay Jehova.

Sa baylo nga magbatyag nga indi kontento bangod sa indi pagtigayon sing isa ka pribilehiyo, maayo nga usisaon naton liwat ang mga paagi nga ginapakamaayo kita ni Jehova, subong sa ginhimo sang salmista.⁠a Kon wala kita sing makita, dapat kita liwat magtan-aw, nagapangabay kay Jehova nga pamuklaton ang aton mga mata agod makita ang aton mga pribilehiyo kag ang mga paagi nga sia nagapakamaayo sa aton kag nagagamit sa aton sa kadayawan niya.​—⁠Hulubaton 10:⁠22.

Importante man mahangpan nga ang pinasahi nga mga pribilehiyo, subong sa katungdanan sang manugtatap, nagakinahanglan sing espesipiko nga mga kalipikasyon. (1 Timoteo 3:​1-7; Tito 1:​5-9) Gani dapat naton usisaon ang aton kaugalingon, nagapangita sang mga bahin diin kinahanglan ang pag-uswag kag nian manikasog sing hanuot nga mag-uswag.​—⁠1 Timoteo 4:​12-15.

Indi Maluyahan sing Buot

Kon wala naton mabaton ang isa ka pribilehiyo sa pag-alagad, indi kita dapat maghinakop nga mas ginahigugma ni Jehova ang mga nagaagom sini ukon ginadingot niya ang maayo sa aton. Indi gid kita dapat maghunahuna sing mahisaon nga natigayon sing dinagakaigo sang iban ang ila mga pribilehiyo paagi sa tawhanon nga paboritismo sa baylo sang teokratikong pagtangdo. Ang pagpalambo sini nga mga ideya mahimo nga magadul-ong sa kahisa, kaawayon, kag bisan sa pag-untat naton.​—⁠1 Corinto 3:​3; Santiago 3:​14-16.

Si Laura, nga ginsambit sa pamuno, wala mag-ampo. Nalandas niya sang ulihi ang iya kaakig kag kahisa. Nangamuyo pirme si Laura sing bulig sa Dios agod malandas ang iya negatibo nga reaksion nga indi na sia liwat makapayunir. Nangayo man sia sing bulig sa kalipikado nga mga lalaki sa kongregasyon kag nakabatyag sing liwat nga pagpasalig sang gugma sang Dios. “Ginhatagan ako ni Jehova sing kalinong sa hunahuna,” siling niya. “Bisan pa nga indi kami karon makapayunir sang akon bana, ginapakabahandi namon ang tion sadtong payunir pa kami kag nagakuha sing kusog gikan sa amon anay mga eksperiensia. Ginbuligan man namon ang amon anak nga lalaki sa iya pagpayunir.” Bangod kontento na, si Laura karon ‘nagkasadya na kaupod sang mga tawo nga nagakasadya’ sa ila pagpayunir.​—⁠Roma 12:⁠15.

Magpahamtang sing Malab-ot nga mga Tulumuron

Ang pagkakontento naton sa karon nga mga pribilehiyo sa pag-alagad wala nagakinahanglan nga mag-untat kita sa pagpahamtang sing dugang pa nga teokratikong mga tulumuron. Sang nagahinun-anon sang langitnon nga pagkabanhaw, si Pablo naghambal tuhoy sa ‘paghimulat ayon sa naunhan.’ Nagsiling man sia: “Kon tubtob diin kita nakahimo sing pag-uswag, magpadayon kita sa paglakat sing mahim-ong sa sining amo gihapon nga rutina.” (Filipos 3:​13-16) Ang teokratikong mga tulumuron makabulig sa aton sa paghimulat ayon sa unahan. Apang, ang hangkat amo ang paghupot sini nga realistiko.

Ang realistiko nga mga tulumuron makatarunganon kag malab-ot. (Filipos 4:5) Wala ini nagakahulugan nga ang tulumuron nga nagakinahanglan sing pila ka tuig sang lakas nga pagpangabudlay indi realistiko. Ining matayog nga tulumuron sarang malab-ot sing amat-amat paagi sa pagpahamtang sing sunodsunod nga mga tulumuron, ukon mga tikang. Mangin muhon ini para sa espirituwal nga pag-uswag. Ang madinalag-on nga paghimo sa tagsa ka tikang makahatag sing kaayawan sa baylo nga kapaslawan.

Maayo nga Pagkatimbang

Apang, importante nga mahangpan nga bangod sa aton mga kahimtangan kag mga limitasyon, ang pila ka pribilehiyo mahimo nga indi mabaton. Ang pagpahamtang sa sini subong mga tulumuron nagadul-ong lamang sa kapaslawan kag kabang-awan. Ini nga mga tulumuron dapat ipahigad, sa dimagkubos sa karon. Indi ini mabudlay himuon kon mangamuyo kita sing diosnon nga pagkakontento kag ang kabalak-an naton sing una amo ang paghimo sa kabubut-on ni Jehova. Kon nagatinguha kita nga malab-ot ang mga pribilehiyo, ang himaya ni Jehova​—⁠indi ang pagkilala sa aton personal nga mga hinimuan​—⁠amo ang importante. (Salmo 16:​5, 6; Mateo 6:33) Ang Biblia nagakaigo nga nagasiling sa aton: “Itugyan kay Jehova ang imo mga buluhaton kag ang imo mga plano pagalig-unon.”​—⁠Hulubaton 16:⁠3.

Sa pagbinagbinag sa ika-84 nga Salmo, makita naton nga ang salmista nagpadayag sing subong sina nga panimuot sa mga pribilehiyo sa pag-alagad, kag ginpakamaayo sia sing bugana ni Jehova. Dugang pa, ining salmo padayon nga nagabulig sa katawhan ni Jehova tubtob karon nga adlaw.

Upod ang mapangamuyuon nga pagsalig kay Jehova, matimbangan mo ang imo paghandum para sa dugang pa nga mga pribilehiyo sing pagkakontento upod sa mga ginaagom mo karon. Indi pagtuguti nga ang imo handum nga makahimo sing dugang pa magadula sang imo apresasyon sa ginatigayon mo karon kag sang kalipay sa pag-alagad kay Jehova sing dayon. Magsalig kay Jehova, kay nagaresulta ini sa kalipay, subong sang ginpakita sang pinamulong sang Levinhon: “O Jehova sang mga kasuldadusan, malipayon ang tawo nga nagasalig sa imo.”​—⁠Salmo 84:⁠12.

[Footnote]

[Kahon sa pahina 11]

Mga Tulumuron nga Mapahamtang Naton

Pagbasa sa Biblia adlaw-adlaw.​—⁠Josue 1:​8; Mateo 4:4

Pagpauswag sa aton ikasarang sa paghantop paagi sa Makasulatanhon nga paghanas.​—⁠Hebreo 5:14

Pagpalambo sing suod pa nga kaangtanan sa Dios.​—⁠Salmo 73:28

Pagpalambo sa tagsa sa mga bunga sang espiritu.​—⁠Galacia 5:​22, 23

Pagpauswag sa kalidad sang aton mga pangamuyo.​—⁠Filipos 4:​6, 7

Mangin labi pa ka epektibo sa pagbantala kag pagtudlo.​—⁠1 Timoteo 4:​15, 16

Pagbasa kag pagpamalandong sa tagsa ka guwa sang Lalantawan kag Magmata! nga mga magasin.​—⁠Salmo 49:3

[Kapsion sa pahina 9]

Sa pagpahamtang sing personal nga mga tulumuron, unaha ang paghimo sa kabubut-on sang Dios