21. Paano kag ngaa dapat ipatuhay sang mga alagad ni Jehova ang ila kaugalingon gikan sa kadam-an sang Yawa, kag ano ang binagbinagon sa masunod nga artikulo?

²¹ Huo, ang hinaplas nga nagkalabilin sang espirituwal nga mga Israelinhon kag ang ila mga kaupod, ang iban nga mga karnero, nagapakilala sang ila kaugalingon karon subong isa ka katawhan nga napain gikan sa kalibutan ni Satanas, nga para sa sini ang ideya nga pagkabalaan nadulaan na sing tanan nga kahulugan. Wala sing bisan ano nga balaan sa kadam-an sang Yawa nga nagalakat sa “malapad kag masangkad . . . nga dalan nga nagapadulong sa kalaglagan.” Indi lamang sila dimatinlo sa espirituwal kag sa moral kundi sa madamo nga kaso indi sila matinlo sa pisikal kag ang ila panagway mahigko, sa pinakakubos nga paghambal. Apang, si apostol Pablo nagasiling: “Tinluan ta ang aton kaugalingon sang tanan nga kadagtaan sang lawas kag espiritu, kag himpiton ta ang pagkabalaan sa kahadlok sa Dios.” (2 Corinto 7:1) Binagbinagon sang masunod nga artikulo kon sa anong mga paagi dapat maghalong ang katawhan sang Dios nga mangin matinlo sa hunahuna kag sa lawas.

Mangin Matinlo sa Painoino kag sa Lawas

“Ihalad ang inyo lawas subong isa ka halad nga buhi, balaan, kag kalahamut-an sa Dios.”​—⁠ROMA 12:⁠1.

1. Suno kay apostol Pablo, ngaa kinahanglanon ang pagkatinlo sa painoino kag sa lawas?

ANG tawo nga nagahandum sa pag-alagad sa balaan nga Dios nga si Jehova dapat mangin putli sa espirituwal kag sa moral. Sing makatarunganon, nagapahangop man ini sing pagkatinlo sa painoino kag sa lawas. Ang mga tawo nga nagaguwa sa sistema sang mga butang karon agod mag-alagad kay Jehova dapat magbag-o indi lamang sang ila mga panghunahuna kundi sa masami sang ila man mga batasan. Si apostol Pablo nagsulat sa mga Cristiano sa Roma: “Busa ginapakiluoy ko sa inyo, mga kauturan, bangod sang mga kaluoy sang Dios, sa paghalad sang inyo mga lawas subong nga halad nga buhi, balaan kag kalahamut-an sa Dios, isa ka balaan nga pag-alagad upod ang inyo ikasarang sa pagpangatarungan. Kag dili kamo magpauyon sa sining sistema sang mga butang, kundi magbalhin kamo paagi sa pagbag-o sang inyo painoino, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:​1, 2) Ano ang nadalahig sa pagkatinlo sa painoino kag sa lawas?

Pagkatinlo sa Painoino

2. Paano ang aton mga mata kag tagipusuon makatiklod sa aton sa paghimo sing kaulag, kag ano ang kinahanglanon agod malikawan ini?

² Bisan sa wala pa mahatag ang Kasuguan, ginpakita sang matutom nga si Job nga ang aton mga mata kag tagipusuon makatiklod sa aton sa paghimo sing kaulag kon indi naton pagkontrolon ini. Sia nagsiling: “Nagapakigkatipan ako sa akon mga mata. Paano bala nian ang pagtulok ko sa ulay? Kon ang akon tagipusuon nahaylo sa babayi, . . . kaulag ina, kag kalautan ini nga silutan sang mga hukom.” (Job 31:​1, 9-11) Kon may yara kita nagaliyong nga mga mata kag palikero nga tagipusuon, dapat naton disiplinahon ang aton painoino, “ang disiplina nga nagahatag sing paghangop.”​—⁠Hulubaton 1:⁠3.

3, 4. (a) Ano ang ginapakita sang halimbawa ni David kag ni Bat-seba, kag ano ang kinahanglanon agod mabag-o ang malain nga batasan sa pagpainoino? (b) Ngaa dapat labi na maghalong ang Cristianong mga gulang?

³ Ang mga mata ni Hari David nagdul-ong sa iya sa pagpanghilahi kay Bat-seba. (2 Samuel 11:​2, 4) Ginapakita sining halimbawa nga bisan ang mga lalaki nga ginagamit sing lutaw ni Jehova mahimo makasala kon indi nila pagdisiplinahon ang ila painoino. Mahimo kinahanglan ang daku nga panikasog sa pagbag-o sang aton panghunahuna. Ina nga panikasog dapat updan sang hanuot nga pangamuyo para sa bulig ni Jehova. Sa tapos maghinulsol sa iya sala upod kay Bat-seba, si David nangamuyo: “Tugaha sa akon, O Dios, ang tagipusuon nga matinlo kag butangi ako sing bag-o nga espiritu, nga malig-on.”​—⁠Salmo 51:⁠10.

⁴ Ang Cristianong mga gulang dapat labi na maghalong nga indi maghupot sing sayop nga mga handum nga mahimo magdul-ong sa ila sa serioso nga sala. (Santiago 1:​14, 15) Ginsulatan ni Pablo ang Cristianong gulang nga si Timoteo: “Ang katuyuan sining sugo amo ang gugma nga gikan sa tagipusuon nga putli kag sa konsiensia nga maayo kag sa pagtuo nga wala sing pagkasalimpapaw.” (1 Timoteo 1:5) Pagkasalimpapaw gid sa pagkamatuod kon ginatuman sang gulang ang iya espirituwal nga mga katungdanan samtang ang iya nagaliyong nga mata nagapukaw sa iya tagipusuon sing mga panghunahuna sa paghimo sing pagkadimatinlo.

5. Ano ang dapat likawan agod mahuptan ang matinlo nga painoino?

⁵ Subong mga Cristiano dapat naton tanan himuon ang aton labing masarangan nga mangin matinlo sa painoino. Nagakahulugan ini nga likawan ang bisan anong pelikula, mga programa sa TV, ukon balasahon nga makaimpluwensia sa aton painoino sa malain. Ang pagkatinlo sa painoino nagakinahanglan sing panikasog nga hunahunaon ang mga butang nga “matuod, . . . matarong, . . . putli.” Si apostol Pablo nagdugang: “Ang bisan anong maayo kag ang bisan anong dalayawon nga butang, painoinoha ining mga butang.”​—⁠Filipos 4:⁠8.

Personal nga Pagkatinlo

6. (a) Maghatag sing mga halimbawa gikan sa tolon-an sang Levitico nga nagapakita nga ang personal subong man ang kabilugan nga pagkatinlo ginpatuman anay sa Israel. (b) Ano ang katuyuan sadtong mga kasuguan?

⁶ Ginasiling nga ang “pagkatinlo masunod sa pagkadiosnon.” Matuod, ang isa ka tawo nga matinlo sa moral kag sa pisikal mahimo nga indi diosnon. Apang ang diosnon nga tawo dapat gid mangin matinlo sa moral kag sa pisikal. Ang Mosaikong Kasuguan naghatag sing pat-od nga mga instruksion tuhoy sa pagtinlo sa nahigkuan nga mga balay kag tuhoy sa personal nga pagpaligo sa nanuhaytuhay nga kaso sang pagkadimatinlo. (Tan-awa ang Levitico, kapitulo 14 kag 15.) Ang tanan nga Israelinhon gin-obligar nga pamatud-an ang ila kaugalingon nga balaan. (Levitico 19:2) Ang publikasyon nga Insight on the Scriptures nagasiling: “Ang kasuguan tuhoy sa pagkaon, sa pagkatinlo, kag sa moral nga ginhatag sang Dios sa [mga Israelinhon] dalayon nga mga pahanumdom sa ila sang ila pagkanapain kag pagkabalaan sa Dios.”​—⁠Tomo 1, pahina 1128.

7. Ano ang matuod tuhoy sa mga Saksi ni Jehova subong isa ka katawhan, apang ano ang ginreport sang pila ka nagalakbay nga mga manugtatap?

⁷ Samtang ang mga Saksi ni Jehova subong katawhan matinlo gikan sa tanan nga pagdagta sang Babiloniko nga dimatuod nga relihion kag wala nagapabaya sang pagkahigko sa moral sa tunga nila, ang mga report gikan sa nagalakbay nga mga manugtatap nagapakita nga ginapatumbayaan sang iban nga mga indibiduwal ang personal nga pagkatinlo kag pagkahipid. Paano naton mapat-od nga matinlo man kita sa sining bahin? Ang isa ka maayong modelo para sa tanan nga Cristianong puluy-an amo ang Bethel, nga nagakahulugan sing “Balay sang Dios.”

8, 9. (a) Ano ang ginalaygay sa tanan nga bag-ong mga katapo sang pamilya Bethel? (b) Anong mga prinsipio nga ginasunod sa mga Puluy-an Bethel ang dapat man sundon sa tanan nga Cristianong panimalay?

⁸ Kon ang isa ka tawo mangin katapo sang panimalay Bethel sa ulong-talatapan sang Watch Tower Society ukon sa bisan diin sang mga sanga sini sa bug-os nga kalibutan, ginahatagan sia sing brosyur nga ginhanda sang Nagadumala nga Hubon. Ginapaathag sining publikasyon kon ano ang ginapaabot sa iya kon tuhoy sa iya mga batasan sa pagpangabudlay kag personal nga mga batasan. Sa idalom sang tig-ulo nga “Room Care and Clean­liness,” ini nagasiling: “Ang kabuhi sa Beth­el nagakinahanglan sing paghupot sing mataas nga mga talaksan sa pisikal, moral kag espirituwal. Ang tanan sa Bethel dapat mabalaka sa paghupot sang iya kaugalingon kag sang iya kuwarto nga matinlo. Makabulig ini sa maayong panglawas. Wala sing rason nga mangin mahigko ang bisan sin-o. Isa ka maayong buhat nga magpaligo kada adlaw. . . . Ang pagpanghinaw antes magkaon kinahanglanon gid kag ginapaabot sa tanan. Bilang konsiderasyon sa imo kaupod sa kuwarto kag sa house­keeper, ang lababo ukon banyera dapat tinluan kada matapos gamiton.”

⁹ Sa mga Puluy-an Bethel, ang mga kasilyas ginatipigan gid nga matinlo, kag may gripo nga gintakod agod ang mga nagagamit sini makapanghinaw dayon sang ila kamot. Ang mga katapo sang pamilya ginapaabot nga biyaan ang kasilyas nga matinlo sa tapos magamit, nga buot silingon ginasigurado gid nga ang onodoro matinlo. Nagapakita ini sing konsiderasyon sa masunod nga magagamit sini ukon sa house­keeper. Indi bala dapat nga ina nga maayo kag mahigugmaon nga mga prinsipio amo ang dapat sundon sa tagsa ka Cristianong panimalay?

10. (a) Ngaa indi kinahanglanon ang matahom katama nga banyo agod mahuptan ang kaugalingon kag ang mga anak nga matinlo? (b) Anong kasuguan sa Israel ang nakabulig sa maayong panglawas, kag anong leksion ang maton-an karon sang katawhan ni Jehova gikan sa sini?

¹⁰ Matuod, ang mga kahimtangan sa lainlain nga mga pungsod wala nagapalareho. Sa iban nga mga duog, ang mga balay wala sing banyera ukon shower pa gani. Apang, sa kabilugan nga paghambal, may yara bastante nga habon kag tubig agod mahuptan sang Cristianong mga lalaki kag mga babayi ang ila lawas nga matinlo kag pat-uron nga ang ila mga anak matinlo man.⁠a Madamo nga puluy-an sa bug-os nga kalibutan ang indi konektado sa sistema sa paghaboy sang higko. Apang ang higko sarang mahaboy paagi sa paglubong sini sa duta, subong amo anay ang ginpatuman sa mga Israelinhon sa mga kampo militar. (Deuteronomio 23:​12, 13) Luwas sini, ang kasuguan ni Jehova tuhoy sa pagkabuhi sa kampo nagkinahanglan sing masunson nga paglaba sang mga panapton kag pagpaligo, sing madasig nga pagtukib kag pagbulong sa balatian, sing nagakaigo nga pag-atipan sa mga bangkay, kag sing paghupot sa tubig kag pagkaon nga matinlo. Ini tanan nga kasuguan nakabulig sa ikaayong lawas sang pungsod. Dapat bala mangin indi tanto katinlo ang katawhan ni Jehova karon sa ila personal nga mga batasan?​—⁠Roma 15:⁠4.

Mahipid nga mga Puluy-an kag mga Awto

11. (a) Ano dapat ang mangin matuod bisan sa pinakagamay nga Cristianong puluy-an? (b) Anong pagbuligay ang ginakinahanglan sa tanan nga katapo sang pamilya Bethel?

¹¹ Ang aton balay, bisan pa daw ano kagamay, sarang mahuptan nga mahim-ong kag matinlo, apang nagakinahanglan ini sing maayong pag-organisar sa pamilya. Handumon sang isa ka Cristianong iloy nga maghinguyang sing daku nga tion nga mahimo sa espirituwal nga mga butang, lakip ang pagbantala nga hilikuton, agod nga indi niya mahinguyang ang iya tion kada adlaw sa pagsunod tinlo sang panapton, mga libro, mga papel, mga magasin, kag iban pa nga ginalaghit sang mga katapo sang pamilya. Sa Bethel, bisan pa may yara mga house­keeper nga nagapaninlo, ang tagsa ka katapo sang pamilya ginapaabot sa pag-areglar sang iya katre kag biyaan ang iya kuwarto nga mahipid sa aga. Kita tanan nagaapresyar sa aton mahipid kag matinlo nga mga King­dom Hall kag mga As­sem­bly Hall. Kabay nga ang aton puluy-an magpamatuod man nga kita bahin sang matinlo kag balaan nga katawhan ni Jehova!

12, 13. (a) Ano ang ginalaygay tuhoy sa mga awto nga ginagamit sa pag-alagad kay Jehova, kag ngaa indi kinahanglan nga mangin makonsumo ini sa tion? (b) Ano ang espirituwal nga rason sa paghupot sang pisikal nga pagkatinlo kag sang mahipid nga mga puluy-an kag mga awto?

¹² Madamo sang mga alagad ni Jehova karon ang nagagamit sing awto sa pagkadto sa mga miting kag sa pag-alagad sa latagon. Sa iban nga mga pungsod ang awto nangin kinahanglanon gid subong instrumento sa pag-alagad kay Jehova. Subong amo sini, dapat ini huptan nga mahipid kag matinlo, subong sang aton puluy-an. Sa pagkamatuod, indi nagakaigo nga ang mga Cristiano maghinguyang sing sobra nga tion sa pagpatahom sa ila awto subong sang ginahimo sang pila ka kalibutanon nga mga tawo. Apang wala ginahimo ina nga pagpasobra, dapat magtinguha ang mga alagad ni Jehova nga huptan ang ila awto nga matinlo kag sa maayong kahimtangan. Sa iban nga mga pungsod ang pagpatinlo sing awto sa estasyonan sang gas indi mahal ukon makonsumo sa tion. Tuhoy sa sulod sang awto, ang dies minutos nga pagtinlo kag paghipid sini makahimo sing mga kalatingalahan. Ang mga gulang kag ministeryal nga mga gulang, labi na, dapat magtinguha nga mangin mga huwaran sa sining bahin, kay ginagamit nila pirme ang ila awto sa pagdala sa mga grupo sang mga manugbantala sa pag-alagad sa latagon. Kon ginasugat sang isa ka manugbantala ang isa ka interesado nga tawo agod dalhon sa miting, sa pagkamatuod indi maayong pagpanaksi kon ang iya awto mahigko kag magamo.

¹³ Sa amo, paagi sa aton mga panikasog nga mangin matinlo sa pisikal kag sa paghupot sa aton mga puluy-an kag mga awto nga matinlo kag mahipid, ginapadunggan naton si Jehova subong mga katapo sang iya matinlo nga organisasyon.

Pagkatinlo Kon Nagahalad sing Espirituwal nga mga Halad

14. Ano ang kasuguan tuhoy sa seremonyal nga pagkatinlo sa Israel, kag ano ang ginapakita sining mga kasuguan?

¹⁴ Ang seremonyal nga pagkatinlo may kaangtanan sa pagsimba ginpatuman anay sa Israel, nga ang silot amo ang kamatayon. Ginsugo ni Jehova si Moises kag si Aaron: “Dapat ninyo painon ang mga anak sang Israel gikan sa ila pagkadimatinlo, agod nga indi sila mapatay sa ila pagkadimatinlo kon dagtaan nila ang akon tabernakulo nga yara sa tunga nila.” (Levitico 15:31) Sa Adlaw sang Katumbasan, ang mataas nga saserdote dapat maligo sang iya lawas sa tubig sing makaduha. (Levitico 16:​4, 23, 24) Ang batiya nga saway sa tabernakulo, kag sang ulihi ang daku nga saway nga dagat sa templo, nag-aman sing tubig agod makapanghinaw ang mga saserdote antes sila maghalad sing mga halad kay Jehova. (Exodo 30:​17-21; 2 Cronica 4:6) Kamusta ang mga Israelinhon sa kabilugan? Kon sila nangin dimatinlo sa seremonyal nga paagi bangod sang bisan anong rason, ginadumilian sila sa pagpakigbahin sa pagsimba tubtob matuman nila ang mga kinahanglanon para sa pagpaninlo. (Numeros 19:​11-22) Ini tanan nagpadaku nga ang pisikal nga pagkatinlo ginapatuman sa mga nagasimba sa balaan nga Dios nga si Jehova.

15. Ngaa indi na kinahanglanon ang sapat nga mga halad, apang anong mga pamangkot ang ginapautwas?

¹⁵ Matuod, ang katawhan ni Jehova karon wala ginaobligar nga maghalad sing sapat nga mga halad sa dutan-on nga templo. Ang mga halad nga ginpatuman sang Kasuguan gin-islan sing “paghalad sang lawas ni Jesucristo sing makaisa gid lang.” (Hebreo 10:​8-10) Kita “nagasimba sa Amay sa espiritu kag kamatuoran.” (Juan 4:​23, 24) Apang nagakahulugan bala ini nga wala kita sing halad nga ihalad sa aton balaan nga Dios nga si Jehova? Kag ang pagkatinlo bala indi na tanto ka kinahanglanon sa aton subong sang sa mga Israelinhon anay?

16. Paano ang tagna sang Malaquias 3:​3, 4 natuman sa hinaplas nga mga Cristiano sugod sang 1918, kag anong kalahamut-an nga mga halad ang mahalad nila kay Jehova?

¹⁶ Ginapakita sang tagna ni Malaquias nga ang hinaplas nga mga Cristiano sa duta sa tion sang katapusan pagatinluan, ukon paputlion, para sa pag-alagad sa templo. Ginapakita sang maragtas nga ining pagtinlo nagsugod sang 1918. Sugod sang 1919 ang hinaplas nga nagkalabilin nangin isa ka ‘katawhan kay Jehova nga nagadulot sing halad sa pagkamatarong,’ kag ang ila halad “kalahamut-an kay Jehova.” (Malaquias 3:​3, 4) Sa amo, sila “nagahalad sing espirituwal nga mga halad nga kalahamut-an sa Dios paagi kay Jesucristo.” (1 Pedro 2:5) Si apostol Pablo nagsulat: “Paagi sa iya maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sang iya ngalan.”​—⁠Hebreo 13:⁠15.

17. Bisan pa ang “dakung kadam-an” indi bahin sang harianon nga pagkasaserdote, ngaa dapat sila mangin matinlo sa pisikal, sa mental, sa moral, kag sa espirituwal?

¹⁷ Samtang ang “dakung kadam-an” wala ginatawag sa pag-alagad subong mga saserdote sa templo kaangay sang hinaplas nga nagkalabilin, sila “nagahalad [kay Jehova] sing balaan nga pag-alagad sa adlaw kag gab-i” sa dutan-on nga luwang sang iya espirituwal nga templo. (Bugna 7:​9, 10, 15) Dumdumon naton nga ang indi saserdote nga mga Israelinhon dapat mangin matinlo paagi sa seremonya agod makapakigbahin sila sa pagsimba sa tabernakulo ukon, sa ulihi, sa templo. Subong man, ang dakung kadam-an sang iban nga mga karnero dapat mangin matinlo sa pisikal, sa mental, sa moral, kag sa espirituwal kon luyag nila mag-alagad sa templo kag magpakigbahin upod sa nagkalabilin sa ‘paghalad sa Dios sing halad sang pagdayaw’ paagi sa “dayag nga pagtu-ad sang iya ngalan.”

Matinlo kag Mahipid Para sa Pag-alagad sa Latagon kag sa mga Miting

18. Samtang nagapanaksi sa publiko kag nagatambong sa mga miting, ano dapat ang kabalak-an naton tuhoy sa personal nga pagkatinlo, pagpanapot, kag sapatos?

¹⁸ Ano ang kahulugan sini sa praktikal nga mga termino? Nagakahulugan ini nga indi gid nagakaigo kag indi pagtahod kay Jehova nga itiglawas sia sa pamalaybalay nga ministeryo, sa mga kalye, ukon sa puluy-an sang isa kon kita indi matinlo sa pisikal kag indi nakapanapot sing nagakaigo. Busa, indi kita dapat mangin kaswal nahanungod sina nga mga butang. Dapat naton talupangdon ini sing mahalungon, agod nga nagahikot kita sa paagi nga nagakaigo para sa mga ministro nga nagadala sang ngalan ni Jehova. Indi kinahanglan nga mangin malahalon ang aton panapton, kundi dapat ini mangin matinlo, matahom, kag maugdang. Ang aton sapatos dapat man nga indi guba kag maayo ang hitsura. Sing kaanggid, sa tanan nga miting, lakip ang Pagtinuon sa Libro sang Kongregasyon, ang aton lawas dapat mangin matinlo, kag dapat kita magpanapot sing mahipid kag nagakaigo.

19. Anong espirituwal nga mga kaayuhan ang nagaresulta gikan sa aton matinlo kag mahipid nga panagway subong Cristianong mga ministro?

¹⁹ Ang aton matinlo kag mahipid nga panagway samtang nagapanaksi kita kag sa aton mga miting isa ka paagi sa ‘pagpuni sa panudlo sang aton Manluluwas, ang Dios.’ (Tito 2:10) Isa ini ka pagpanaksi sa iya kaugalingon. Madamo nga tawo ang nahamuot sa aton pagkatinlo kag pagkahipid, kag bangod sini, napahulag sila nga mamati sa aton mensahe tuhoy sa dalayawon nga mga katuyuan ni Jehova para sa matarong nga bag-ong mga langit kag isa ka natinluan nga bag-ong duta.​—⁠2 Pedro 3:⁠13.

20. Anong dugang pa nga maayong bunga ang nagagikan sa aton pagkatinlo sa painoino kag lawas?

²⁰ Samtang nagahilapit ang matinlo kag bag-ong sistema ni Jehova, dapat naton tanan usisaon ang aton kaugalingon agod tan-awon kon kinahanglan kita maghimo sing pila ka mga pagbag-o sa aton panghunahuna ukon sa aton personal nga mga batasan. Si Pablo nagsulat: “Nagahambal ako subong nga tawo bangod sang kinaugali ninyo nga mga kaluyahon: kay subong nga gintugyan ninyo anay ang inyo mga bahin sa kahigkuan kag sa daku kag daku pa nga kalautan, gani karon itugyan ninyo ang inyo mga bahin sa pagkamatarong nga sa pagkabalaan.” (Roma 6:19) Ang espirituwal nga pagkatinlo kag pisikal nga pagkatinlo nagadala sing maayong bunga bisan karon, “bunga nga sa pagkabalaan, kag ang katapusan sini [mangin amo] ang kabuhi nga walay katapusan.” (Roma 6:22) Busa, mangin matinlo kita sa painoino kag lawas samtang ‘ginahalad naton ang aton lawas nga isa ka halad nga buhi, balaan, kalahamut-an sa Dios.’​—⁠Roma 12:⁠1.

[Footnote]

Mga Punto nga Dumdumon

◻ Paano ang aton mga mata kag tagipusuon makatiklod sa aton sa paghimo sing kaulag?

◻ Anong mga kaayuhan ang nabaton sang mga Israelinhon sang gintuman nila ang kasuguan ni Jehova tuhoy sa kabilugan kag indibiduwal nga pagkatinlo?

◻ Anong mga prinsipio nga ginasunod sa mga Puluy-an Bethel ang dapat sundon sa tanan nga Cristianong panimalay?

◻ San-o, labi na, dapat kita maghalong nahanungod sa aton panagway?

◻ Ano ang espirituwal nga mga rason sang mga alagad ni Jehova sa paghupot sang ila mga puluy-an kag mga awto nga matinlo kag mahipid?

[Piktyur sa pahina 17]

“Ang kabuhi sa Bethel nagakinahanglan sing paghupot sing mataas nga mga talaksan sa pisikal, sa moral kag sa espirituwal”

[Piktyur sa pahina 18]

Dapat bala ang isa ka iloy maghinguyang sing ekstra nga tion kada adlaw sa pagsunod tinlo sa walay patugsiling nga mga katapo sang pamilya?

[Piktyur sa pahina 19]

Sa dies minutos, sarang mahimo ang mga kalatingalahan sa pagtinlo sang sulod sang awto