20. Para pangamlig gikan sa Manugtimalos sang dugo, ano ang dapat himuon sadtong yara sa antitipiko nga siudad nga dalangpan?

²⁰ Para pangamlig gikan sa manugtimalos sang dugo, ang dihungod nga mga nakapatay sing tawo dapat magpabilin sa siudad nga dalangpan kag indi maglampas sa mga halalban sini. Ano naman yadtong yara sa antitipiko nga siudad nga dalangpan? Agod makalikaw sa dakung Manugtimalos sang dugo, indi sila dapat magbiya sa siudad. Sa pagkamatuod, dapat sila magbantay batok sa mga pagsulay nga magkadto sa dulunan sang mga halalban, kon hambalon pa. Dapat sila maghalong nga indi pagtugutan nga magtubo sa ila tagipusuon ang gugma para sa kalibutan ni Satanas. Mahimo ini magakinahanglan sing pangamuyo kag panikasog, apang ang ila kabuhi nagasandig sa sini.​—⁠1 Juan 2:​15-17; 5:⁠19.

Mga Diosa sang Pertilidad kag Inaway

SA ISA ka arkeolohiko nga kampanya sa Ebla, Siria, ang relikya nga nagalarawan kay Ishtar, ang diosa sang pertilidad kag inaway sang Babilonia, natukiban. Ginalaragway ini sang arkeologo nga si Paolo Mat­thi­ae subong “silindriko nga timbrehan nga may isa ka kulto nga larawan nga nagapakita sa isa ka nagamanto nga pari nga babayi sa atubangan sang isa ka diosnon nga imahen . . . kag ang ulo sini naangot sa mataas kag maniwang nga haligi.”

Ang natukiban importante, kay ang imahen napetsahan sadtong pamuno sang ika-18 nga siglo B.C.E. Suno kay Mat­thi­ae, nagahatag ini sing “malig-on nga pamatuod” nga ang pagsimba kay Ishtar naglawig sing mga 2,000 ka tuig.

Ang pagsimba kay Ishtar nagsugod sa Babilonia kag naglapnag sa bug-os nga Romanong Emperyo sang masunod nga mga siglo. Ginsugo ni Jehova ang mga Israelinhon nga dulaon ang tanan nga agi sang butig nga pagsimba sa Ginsaad nga Duta, apang bangod napaslawan sila sa paghimo sini, ang pagsimba kay Astoret (ang Canaanhon nga katumbas ni Ishtar) nangin siod sa ila.​—⁠Deuteronomio 7:​2, 5; Hukom 10:⁠6.

Bisan pa nga si Ishtar kag ang iya katumbas nga si Astoret wala na nagaluntad, ang mga kinaiya nga ila ginpresentar​—⁠ang imoralidad kag kasingki⁠—​lapnag. Mahimo kita mamangkot kon bala ang modernong katilingban tuhay gid sa sadtong dumaan nga mga sibilisasyon nga nagsimba sining mga diosa sang pertilidad kag inaway.