Ang Pagtamod sang Biblia
Ang Asetisismo Bala ang Yabi sa Kaalam?
“ANG mga ermitanyo nagasuksok sing salsalon nga mga gapos, kadena, mataliwis nga mga paha kag mataliwis nga mga kulintas . . . Ang iban nagaligid sa mga tunok kag tunukon nga mga tanom, hungod nga nagapakagat sa mga insekto, ginapaso ang ila kaugalingon kag padayon nga ginapanana ang ila mga pilas. Kinaandan ang pagkaon kag pag-inom sing diutay, sobra pa sini ang ginahimo sang iban paagi sa pagkaon lamang sing pan-os ukon makaluluod nga kalan-on.”—The Saints, ni Edith Simon.
Mga asetiko sila. Ngaa ginapaantos nila ang ila kaugalingon? Ginapaathag sang mga awtor sa libro nga For the Sake of the World—The Spirit of Buddhist and Christian Monasticism, nga “kutob pa sang panahon ni Socrates (ikalima nga siglo B.C.E.), ginhangop sang madamo nga ang tuman ka simple nga kabuhi, nga wala ginapabug-atan sang undanon kag materyal nga kabuganaan, isa ka kinahanglanon para matigayon ang matuod nga kaalam.” Ginhunahuna sang mga asetiko nga ang pagdingot sa lawas makapauswag sang ila igbalatyag sa espirituwal kag magadul-ong sa matuod nga kasanagan.
Mabudlay ipaathag kon ano gid ang asetisismo. Para sa iban, nagakahulugan lamang ini sing disiplina-sa-kaugalingon ukon pagdingot sa kaugalingon. Ginapabaloran sang una nga mga Cristiano ina nga mga kinaiya. (Galacia 5:22, 23; Colosas 3:5) Ginrekomendar mismo ni Jesucristo ang isa ka simple nga kabuhi nga wala ginasablagan sang mga kahuol nga ginadala sang isa ka materyalistiko nga estilo sang kabuhi. (Mateo 6:19-33) Apang, ang asetisismo masami nga ginaupdan sang estrikto kag masami sobra nga mga buhat, subong sang mga ginalaragway sa ibabaw. Ining asetiko nga mga buhat bala, ilabi na ang sobra nga mga buhat sini, amo gid ang yabi sa kaalam?
Pasad sa Sayop nga mga Teoriya
Ang pila ka mga pilosopiya nga nagsakdag sa pagluntad sang asetisismo amo ang ideya nga ang materyal nga mga butang kag ang pisikal nga kalipayan duna nga malain kag sa amo mga sablag sa espirituwal nga pag-uswag. Ang isa pa ka ideya nga nagbukas sing dalan para sa asetisismo amo ang lapnag nga pagpati nga ang isa ka tawo ginahuman sang isa ka lawas kag isa ka kalag. Ginapatihan sang mga asetiko nga ang pisikal nga lawas amo ang prisuhan sang kalag kag nga ang unod kaaway sini.
Ano ang ginasiling sang Biblia? Ginapakita sang Kasulatan nga sang natapos sang Dios ang pagtuga sa duta, ginpahayag niya nga ang tanan nga iya ginhimo—ang iya tanan nga pisikal kag materyal nga tinuga—“tuman gid kaayo.” (Genesis 1:31) Gintuyo sang Dios nga ang lalaki kag babayi sa hardin sang Eden magkalipay sa materyal nga mga butang. Ang ngalan mismo nga Eden nagakahulugan “Kalipay” ukon “Kasadya.” (Genesis 2:8, 9) Sanday Adan kag Eva himpit kag natigayon nila ang maayo nga kaangtanan sa ila Manunuga tubtob nga nagpakasala sila. Kutob sadto, ang dikahimpitan nangin isa ka sablag sa ulot sang Dios kag sang tawo. Apang, ang pagpaayaw sa nagakaigo nga mga handum sang tawo ukon ang pagtigayon sing hatag-Dios nga pisikal nga kalipay kon ginahimo nahisanto sa moral nga mga kasuguan sang Dios indi gid makasablag sa pagpakig-angot sa ulot sang Dios kag sang iya mga sumilimba!—Salmo 145:16.
Dugang pa, maathag nga ginatudlo sang Biblia nga ang tawo, nga gintuga halin sa yab-ok kag nangin unod, isa ka kalag. Wala ginasakdag sang Kasulatan ang ideya nga ang kalag dimateryal kag dimamalatyon nga napriso sa sulod sang pisikal nga lawas ukon ang ideya nga sa pila ka paagi ginaupangan sang unod ang isa nga matigayon ang suod nga kaangtanan sa Dios.—Genesis 2:7.
Maathag nga ang ideya tuhoy sa asetisismo nagapakita sing tiko nga paglaragway sa kaangtanan sang tawo sa Dios. Si apostol Pablo nagpaandam nga pakamaayuhon sang pila ka nagapangangkon nga Cristiano ang malalangon nga mga pilosopiya sang tawo sangsa sadsaran nga mga kamatuoran sa Biblia. (1 Timoteo 4:1-5) Nahanungod sa pila nga may amo sini nga pagtamod, ang isa ka relihioso nga istoryador nagsiling: “Ang pagpati nga ang materyal nga bagay malaut . . . kag nga ang kalag sang mga tawo dapat mahilway gikan sa pagkasiod sa materyal nga bagay, amo ang kabangdanan sing sobra nga asetisismo nga nagadumili sa pagkaon sing karne, seksuwal nga paghuliray kag iban pa, nga mahimo lamang masunod sang mga halangdon nga ‘mga himpit’ ukon perfecti nga napaidalom sa pinasahi nga inisasyon.” Ini nga panghunahuna wala ginasakdag sang Biblia kag wala ginapatihan sang una nga mga Cristiano.—Hulubaton 5:15-19; 1 Corinto 7:4, 5; Hebreo 13:4.
Indi Kinahanglanon ang Asetisismo
Si Jesus kag ang iya mga disipulo indi mga asetiko. Nagbatas sila sing madamo nga pagtilaw kag kapipit-an, apang ining mga kapipit-an indi nila hungod nga ginhimo. Ginpaandaman ni apostol Pablo ang mga Cristiano nga mag-andam kay basi maganyat sila sang malalangon nga mga pilosopiya sang tawo gikan sa kamatuoran sang Pulong sang Dios kag magadul-ong sa ila sa dimakatarunganon, sobra nga mga buhat. Espesipiko nga ginhinambitan ni Pablo ang “tuman nga pagsakit sa lawas.” Sia nagsiling: “Ini nga mga butang mismo, sa pagkamatuod, may dagway sang kaalam sa isa ka ginhungod nga porma sang pagsimba kag pakitakita nga pagkamapainubuson, isa ka tuman nga pagsakit sa lawas; apang wala ini sing pulos sa pagpugong sa pagpaayaw sa unod.” (Colosas 2:8, 23) Ang asetisismo wala nagaresulta sa pinasahi nga pagkabalaan ukon matuod nga kasanagan.
Matuod, ang dalanon sang Cristianong pagkamatinumanon nagapakita sing lakas nga pagpanikasog kag disiplina sa kaugalingon. (Lucas 13:24; 1 Corinto 9:27) Dapat manikasog ang isa agod matigayon ang ihibalo tuhoy sa Dios. (Hulubaton 2:1-6) Subong man, may matigdas nga laygay ang Biblia batok sa mga naulipon sa “mga kailigbon kag mga kinalipay” kag sa “mga mahigugmaon sa kinasadya sa baylo sang sa Dios.” (Tito 3:3; 2 Timoteo 3:4, 5) Apang, ining Makasulatanhon nga mga teksto wala nagatib-ong sa mga buhat sang asetisismo. Si Jesucristo, isa ka himpit nga tawo, nagkalipay sa masadya nga mga okasyon nga may pagkaon, ilimnon, musika, kag sinaot.—Lucas 5:29; Juan 2:1-10.
Ang matuod nga kaalam makatarunganon, wala nagapasobra. (Santiago 3:17) Gintuga ni Jehova nga Dios ang aton pisikal nga lawas nga may ikasarang sa pagkalipay sa kabuhi. Luyag niya nga magmalipayon kita. Ang iya Pulong nagasiling sa aton: “Nahibaluan ko nga wala na sing maayo pa sa ila sangsa magkalipay kag maghimo sing maayo sa tion sang pagkabuhi sang isa; kag nga ang tagsa ka tawo man magkaon kag mag-inom kag makakita sing kaayuhan sa bug-os niya nga kinabudlayan. Dulot ini sang Dios.”—Manugwali 3:12, 13.
[Picture Credit Line sa pahina 20]
Si San Jerome sa Kuweba/The Complete Woodcuts of Albrecht Dürer/Dover Publications, Inc.