Ginapadyaan ang Pagbatas

¹ “Paagi sa inyo pagbatas matigayon ninyo ang inyo mga kalag.” (Luc. 21:19) Sa sining mga pinamulong, nga bahin sang tagna ni Jesus tuhoy sa “katapusan sang sistema sang mga butang,” maathag nga ginapakita nga agod mahuptan ang integridad, dapat mangin handa kita nga atubangon ang madamo nga pagtilaw. Apang paagi sa kusog ni Jehova, ang kada isa sa aton ‘makabatas tubtob sa katapusan’ kag “maluwas.”​—⁠Mat. 24:​3, 13; Fil. 4:⁠13.

² Ang paghingabot, balatian, kapigaduhon, kag kahuol mangin pagtilaw kada adlaw. Apang, indi gid naton pagkalimtan nga ginatinguhaan ni Satanas nga gub-on ang aton integridad kay Jehova. Sa kada adlaw nga nagapabilin kita nga matutom sa aton Amay, nagapakigbahin kita sa pagsabat sa panghangkat sang Manug-uligyat. Makapaumpaw gid mahibaluan nga ang aton “mga luha” kon ginahingabot wala ginakalimtan! Hamili ini kay Jehova, kag nalipay sia sa aton integridad!​​—⁠Sal. 56:⁠8; Hulu. 27:11.

³ Gin-ulay Sang mga Pagtilaw: Ang paghingabot makapadayag sang kaluyahon sang pagtuo ukon diperensia sa personalidad, subong sang bugal ukon pagkadimapailubon. Sa baylo nga tinguhaan nga likawan ukon tapuson ang mga pagtilaw paagi sa di-Makasulatanhon nga paagi, dapat sundon naton ang laygay sang Pulong sang Dios nga “ipatapos sa pagbatas ang hilikuton sini.” Ngaa? Bangod ang matutom nga pagbatas sa mga pagtilaw nagabulig sa aton nga mangin “bug-os kag maayo sa tanan nga bahin.” (Sant. 1:2-4) Mabuligan kita sang pagbatas nga mapalambo ang hamili nga mga kinaiya, subong sang pagkamakatarunganon, empatiya, kag kaluoy.​—⁠Roma 12:15.

⁴ Natilawan nga Kinaiya Sang Pagtuo: Kon nagabatas kita sang mga pagtilaw, matigayon naton ang natilawan nga kinaiya sang pagtuo nga hamili gid sa itululok sang Dios. (1 Ped. 1:​6, 7) Ini nga pagtuo nagasangkap sa aton nga magpabilin nga matutom sa bisan ano nga mga pagtilaw sa palaabuton. Dugang pa, mabatyagan naton ang kahamuot sang Dios, kag nagapabakod ini sang aton paglaum, nga nagahimo sini nga mas matuod sa aton.​​—⁠Roma 5:​3-5.

⁵ Ang labing daku nga padya bangod sa pagbatas ginpadaku sa Santiago 1:​12, nga nagasiling: “Malipayon ang tawo nga padayon nga nagabatas sang pagtilaw, kay bangod nga nahamut-an magabaton sia sing purongpurong sang kabuhi.” Busa, magpabilin kita nga dimationg sa aton debosyon kay Jehova, nagasalig nga pagapadyaan niya sing bugana ‘yadtong padayon nga nagahigugma sa iya.’

Bahin 2—Pagdumala sing Mainuswagon nga mga Pagtuon sa Biblia

Paghanda sa Pagdumala sang Pagtuon

¹ Ang pagtudlo sing epektibo sa isa ka pagtuon sa Biblia nagalakip indi lamang sa paghinun-anon sang materyal kag pagtan-aw sang ginsambit nga mga teksto. Kinahanglan ipresentar naton ang impormasyon sa paagi nga matandog ang tagipusuon sang estudyante. Nagakinahanglan ini sing paghanda sing maayo sa kon ano ang kinahanglanon sang estudyante.​​—⁠Hulu. 15:28.

² Kon Paano Maghanda: Magsugod paagi sa pagpangamuyo kay Jehova tuhoy sa estudyante kag sa iya mga kinahanglanon. Mangayo sing bulig ni Jehova agod malab-ot mo ang tagipusuon sang estudyante. (Col. 1:​9, 10) Agod mahangpan sing maayo ang tema, maghinguyang sing tion sa pagbinagbinag sang tig-ulo sang kapitulo ukon leksion, sang mga subtitulo, kag sang bisan ano nga makita nga mga bulig. Pamangkuta ang imo kaugalingon, ‘Ano ang panguna nga tulumuron sang materyal?’ Makabulig ini sa imo nga makapabilin sa panguna nga mga punto samtang ginadumalahan mo ang pagtuon.

³ Repasuha sing maayo ang materyal kada parapo. Hibalua ang mga sabat sa naimprinta nga mga pamangkot, nagakurit lamang sing yabi nga mga tinaga ukon mga prase. Analisaha kon paano ang ginsambit apang wala ginkutlo nga mga teksto naangot sa panguna nga punto sang parapo, kag mamat-od kon diin ang basahon samtang nagatuon. Makabulig man kon may malip-ot nga mga nota sa marhin sang publikasyon. Dapat maathag sa estudyante nga ang iya ginatun-an gikan sa Pulong sang Dios.​​—⁠1 Tes. 2:⁠13.

⁴ Ipasibu ang Leksion: Masunod, binagbinaga ang leksion agod magsibu sa kinahanglanon sang tagsa ka estudyante. Tilawi nga hunahunaa sing abanse ang iya mga pamangkot kag ang mga punto nga mabudlay niya mahangpan ukon batunon. Pamangkuta ang imo kaugalingon: ‘Ano ang dapat niya mahangpan ukon panikasugan agod mag-uswag sa espirituwal? Paano ko malab-ot ang iya tagipusuon?’ Ipasibu dayon ang imo panudlo. Kon kaisa, basi kinahanglan maghanda ka sing isa ka ilustrasyon, paathag, ukon mga pamangkot agod mabuligan ang estudyante nga makahangop sang kahulugan sang isa ka punto ukon teksto. (Neh. 8:8) Apang likawi nga magdugang sing impormasyon nga wala sing labot sa tema. Ang malip-ot nga repaso sa katapusan sang pagtuon makabulig sa iya nga indi malimtan ang panguna nga mga punto.

⁵ Makalilipay gid kon may mga bag-uhan nga magpatubas sing matarong nga bunga sa kadayawan ni Jehova! (Fil. 1:11) Agod mabuligan sila nga malab-ot ini nga tulumuron, maghanda sing maayo sa kada dumala mo sang pagtuon sa Biblia.