Pagbantala sing Ginharian—⁠Isa ka Hamili nga Pribilehiyo

¹ Kada adlaw, binilyon ka pumuluyo sa duta ang nagapanginpulos sa maalwan nga mga aman ni Jehova sa kabuhi. (Mat. 5:45) Apang, diutay gid lang ang nakatigayon sang pinasahi nga pribilehiyo sa pagpakita sing apresasyon sa ila Manunuga paagi sa pagbantala sing maayong balita sang Ginharian sang Dios. (Mat. 24:14) Daw ano ang imo pagpabalor sa sining hamili nga pribilehiyo?

² Ang pagbantala sing Ginharian nagapadungog sa Dios kag nagadala sing paglaum kag paghidait sa katawhan nga nabudlayan sa sining magamo nga mga tion. (Heb. 13:15) Para sa mga nagapamati, nagakahulugan ini sing kabuhi nga walay katapusan. (Juan 17:3) Anong sekular nga karera ukon propesyon ang nagatanyag sing amo sina nga pagpakamaayo? Ginpakita ni apostol Pablo ang iya apresasyon sa ministeryo paagi sa iya pagtuman sini. Ginpakabahandi gid niya ini.—⁠Binu. 20:20, 21, 24; 2 Cor. 4:1, 7.

³ Pagpakabahandi sang Aton Hamili nga Pribilehiyo: Ang isa ka paagi nga mapakita naton ang aton apresasyon sa aton pribilehiyo nga pagbantala amo ang pagpauswag sa kalidad sang aton pag-alagad. Nagahanda bala kita sing maayo agod mapahulag ang aton mga tagpalamati sa aton presentasyon? Mapauswag bala naton ang aton ikasarang sa paggamit sang Kasulatan kag ikasarang sa pagpangatarungan sa mga tawo? Maid-id bala naton nga ginabantalaan ang aton teritoryo? Makahibalo bala kita sa pagsugod kag pagdumala sing pagtuon sa Biblia? Kaangay sang matutom nga mga Cristiano, sang una kag karon, ginapahulag kita sang nagakaigo nga panimuot sa sini nga hilikuton, kag ginapakahamili gid naton ang aton pribilehiyo.—⁠Mat. 25:14-23.

⁴ Kon nagaatubang kita sing mga kabudlayan bangod sang katigulangon, balatian ukon iban pa mabudlay nga mga kahimtangan, makalulugpay mahibaluan nga ginapabaloran gid ang imo makugi nga pagpakigbahin sa ministeryo. Ginapasalig kita sang Pulong sang Dios nga nagapabalor gid si Jehova sina nga panikasog sa pag-alagad sa iya, bisan pa nga ina nga panikasog daw indi man gid talalupangdon para sa iban.—⁠Luc. 21:1-4.

⁵ Tuburan gid sang daku nga kaayawan ang pagbantala sing Ginharian. Ang isa ka 92 anyos nga utod nga babayi nagsiling: “Isa gid ka pribilehiyo nga balikdon ang kapin sa 80 anyos sang dedikado nga pag-alagad sa Dios—⁠nga wala sing paghinulsol! Sa pagkamatuod, kon magkabuhi ako liwat, amo lang gihapon nga pagkabuhi ang pilion ko, bangod, ‘ang mahigugmaon nga kaayo sang Dios mas maayo pa sangsa kabuhi mismo.’” (Sal. 63:3) Kabay nga pakabahandion naton ining hamili nga pribilehiyo gikan sa Dios—⁠ang pagbantala sing Ginharian.

Bahin 11—Pagdumala sing Mainuswagon nga mga Pagtuon sa Biblia

Pagbulig sa Bag-uhan nga mga Manugbantala sa Pagduaw Liwat

¹ Kon ang estudyante sa Biblia nagabantala na, makasalapo sia sang mga tawo nga interesado sa maayong balita. Paano naton mabuligan ang bag-uhan nga mga manugbantala nga mangin epektibo sa pagduaw liwat sa mga interesado?

² Ang paghanda para sa pagduaw liwat nagasugod sa una nga pagpakigsugilanon. Palig-una ang mga estudyante nga mangin interesado gid sa mga tawo nga ila masugilanon. (Fil. 2:4) Hanasa sila sing amat-amat kon paano makumbinsi ang mga tagbalay sa pagpabutyag sang ila balatyagon kag hunahuna, sa pagpamati sa ila mga sabat, kag sa pagtalupangod sa mga butang nga ila ginakabalak-an. Kon may interesado, ipasulat sa bag-uhan nga manugbantala ang pila ka punto nga ginhinun-anunan. Gamita ina nga impormasyon agod buligan sia sa pagplano tuhoy sa dugang pa nga pagsugilanunay.

³ Paghanda sa Pagduaw Liwat: Repasuha ang una nga pagduaw, kag ipakita sa estudyante kon paano magpili sing mensahe tuhoy sa Ginharian nga makapaganyat sa tagbalay. (1 Cor. 9:19-23) Handai ninyo nga duha ang isa ka malip-ot nga presentasyon upod ang isa ka teksto sa Biblia kag isa ka parapo sa ginatun-an nga publikasyon. Dugang pa, maghanda sang pamangkot sa paghinakop sang paghinun-anon agod mangin basehan sa masunod nga pagduaw. Ipakita sa bag-uhan kon paano madugangan ang ihibalo sang tawo sa Pulong sang Dios sa kada pagduaw.

⁴ Mabuligon man ang pagtudlo sing simple nga introduksion sa estudyante. Pagkatapos makapanamyaw sa tagbalay, mahimo sia magsiling: “Nalipay gid ako sa aton pag-istoryahanay sang nagligad, kag nagbalik ako agod ipaambit ang dugang pa nga impormasyon sa Biblia tuhoy sa [hinambiti ang topiko].” Kon lain nga tawo ang maabtan sa balay kinahanglan mo man ipakita sa bag-uhan kon paano ini atubangon.

⁵ Mangin Makugi sa Pagduaw Liwat: Palig-una ang estudyante nga magpahamtang sing maayong halimbawa sa pagbalik gilayon sa mga interesado. Basi kinahanglan nga pirme magbalik sa mga puluy-an agod maistorya ang mga tawo. Tudlui ang estudyante kon paano magkontrata sa pagduaw liwat, kag pahangpa sia nga dapat tumanon gid niya ang iya panaad nga magbalik. (Mat. 5:37) Hanasa ang bag-uhan nga mangin mainayuhon, mapatugsilingon, kag matinahuron samtang nagapangita sing tulad-karnero nga mga tawo kag samtang ginatatap ang ila interes.—⁠Tito 3:2.