Gamita ang Imo Tion Sing Maalamon

¹ Ang aton handum nga pahamut-an si Jehova magapahulag sa aton nga unahon ang espirituwal nga mga hilikuton. Ginsugo kita sang Iya Pulong nga ‘pangitaon anay ang ginharian’ kag ‘pat-uron ang mas importante nga mga butang.’ (Mat. 6:33; Fil. 1:10) Paano naton mabakal ang tion para sa intereses sang Ginharian kag himuon nga ikaduha lamang ang indi tanto ka importante nga mga butang?—⁠Efe. 5:15-17.

² Unaha ang mga Hilikuton sa Ginharian: I-iskedyul ang imo tion agod indi ini mauyang sa indi importante nga mga butang. Sa pag-umpisa sang bulan ang iban nagaiskedyul sing espesipiko nga mga tion sa ila pagministeryo. Nian ginatinguhaan nila nga indi ini maupangan. Subong man sini ang mahimo agod makabakal sing tion para sa mga miting, personal nga pagtuon, kag mga kombension. Ang iban may iskedyul kada adlaw nga ila ginasuguran ukon ginatapos paagi sa pagbasa sing Biblia. I-iskedyul ang importante nga hilikuton, kag indi pagtuguti nga maupangan ini sang indi importante nga mga butang.—⁠Man. 3:⁠1; 1 Cor. 14:40.

³ Limitehi ang Paggamit sa Kalibutan: Sa iban nga pungsod, ang mga isport, kalingawan, pagliwaliwa, mga hobby kag iban pa nga mga butang madali matigayon. Madamo ang nagahinguyang sing sobra nga tion sa pagtan-aw sing telebisyon ukon pagkompyuter. Apang, ang sobra nga paglingawlingaw kag pagkawili sa bag-o nga mga gadyet nga ginatanyag sining kalibutan magaresulta gid sa kapaslawan. (1 Juan 2:15-17) Amo nga ang Kasulatan nagpalig-on sa aton nga indi paggamiton ang kalibutan sing bug-os. (1 Cor. 7:31) Paagi sa pagsunod sini nga laygay, mapakita mo kay Jehova nga ang pagsimba sa iya amo ang una pirme sa imo kabuhi.—⁠Mat. 6:19-21.

⁴ Malapit na lang malaglag ining presente nga sistema. Ang mga nagauna sang intereses sang Ginharian mangin malipayon kag kahamut-an sang Dios. (Hulu. 8:32-35; Sant. 1:25) Kabay nga gamiton naton sing maalamon ining hamili nga ginapanag-iyahan, ang aton tion.

Bahin 12—Pagdumala sing Mainuswagon nga mga Pagtuon sa Biblia

Pagbulig sa mga Estudyante nga Makasugod kag Makadumala sing mga Pagtuon sa Biblia

¹ Kon nagapakigbahin na sa ministeryo ang aton mga estudyante sa Biblia, mahimo kulbaan sila sa paghunahuna nga sila na ang magsugod kag magdumala sing pagtuon sa Biblia. Paano naton sila mabuligan nga mangin positibo sa sining importante nga bahin sang aton ministeryo?—⁠Mat. 24:14; 28:19, 20.

² Kon ang estudyante sa Biblia kalipikado na nga mangin di-bawtismado nga manugbantala, mahimo nga nakapalista na sia sa Teokratikong Eskwelahan Para sa Ministeryo. Ang paghanas nga iya natigayon sa paghanda kag pagpresentar sang iya mga asaynment makabulig sa iya nga mapalambo ang mga ikasarang sa pagpanudlo subong isa ka “manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.”—⁠2 Tim. 2:⁠15.

³ Magtudlo Paagi sa Imo Halimbawa: Ginahanas ni Jesus ang iya mga disipulo paagi sa paghatag sing maathag nga instruksion kag pagpahamtang sing maayong halimbawa. Nagsiling sia: “Ang tagsatagsa nga natudluan sing himpit mangin subong sang iya manunudlo.” (Luc. 6:40) Importante gid ang pag-ilog kay Jesus paagi sa pagpahamtang sing maayong halimbawa sa imo ministeryo. Samtang nagapanilag ang imo estudyante sa imo pagministeryo, mahangpan niya nga ang katuyuan sang pagduaw liwat amo ang pagsugod sing pagtuon sa Biblia.

⁴ Ipaathag nga kon nagatanyag kita sing pagtuon, indi kinahanglan nga idetalye naton sa iya ang kahimusan sa pagtuon. Sa masami labing maayo kon ipasundayag ang pagtuon paagi sa paggamit sing isa ukon duha ka parapo sa pagatun-an nga publikasyon. Ang mabuligon nga mga panugda tuhoy sa sini masapwan sa pahina 4 sang Agosto 2005 nga Ang Aton Ministeryo sa Ginharian kag sa pahina 6 sang Mayo 2002 nga Ang Aton Ministeryo sa Ginharian.

⁵ Kon nagakaigo, paupda ang estudyante sa imo ukon sa isa ka eksperiensiado nga manugbantala sa iban nga ginatun-an sa Biblia. Mahimo sia makakomento sa parapo ukon sa isa ka teksto. Busa paagi sa pagpanilag, makatuon pa gid ang estudyante tuhoy sa pagdumala sing mainuswagon nga mga pagtuon sa Biblia. (Hulu. 27:17; 2 Tim. 2:2) Pasalamati sia, kag buligi sia kon paano pa gid sia mag-uswag.

⁶ Ang paghanas sa bag-uhan nga mga manugbantala nga mangin mga manunudlo sang Pulong sang Dios magasangkap sa ila para sa “maayong buhat” nga makasugod kag makadumala sing mga pagtuon sa Biblia. (2 Tim. 3:17) Makalilipay gid nga magbinuligay upod sa ila sa pagpalapnag sang mahigugmaon nga imbitasyon: “Ang bisan sin-o nga maluyag sa pagkuha sing tubig sang kabuhi nga walay bayad!”—⁠Bug. 22:17.