Pagsugod Sing mga Pagtuon sa Biblia sa Ganhaan kag sa Telepono

1, 2. Paano naton mapahisuno ang aton pamaagi sa pagtuon sing Biblia agod mabuligan ang masako nga mga tawo?

¹ Masako ang mga tawo karon. Apang madamo ang interesado sa espirituwal nga mga butang. Paano naton sila mabuligan agod maayawan sila sa ila espirituwal nga kinahanglanon? (Mat. 5:3) Madamo nga manugbantala ang nakasugod sing pagtuon sa Biblia sa mga tawo sa ila ganhaan ukon paagi sa telepono. Mapasangkad mo bala ang imo ministeryo sa sini nga paagi?

² Agod makasugod sing mga pagtuon, dapat handa kita sa pagtanyag sing pagtuon sa Biblia kon may kahigayunan. Paano kag sa diin ini mahimo?

3. Ngaa ipasundayag ang isa ka pagtuon sa Biblia sa una nga pagduaw, kag paano ini mahimo?

³ Sa Ganhaan: Kon makasumalang ka sing isa ka tawo nga luyag magpakigsugilanon tuhoy sa Biblia, mahimo mo masugdan ang pagtuon paagi sa pagbukas sing materyal nga imo nahandaan, subong sang una nga parapo sa leksion 1 sang Ginapatuman nga brosyur. Basaha ang parapo, binagbinaga ang pamangkot, kag hinun-anuni ang isa ukon duha ka teksto sa parapo. Sa masami mahimo ini dira lang sa ganhaan sing lima tubtob napulo ka minuto. Kon naluyagan sang tawo ang paghinun-anon, maghimo sing kahimusan nga binagbinagon ang masunod nga isa ukon duha ka parapo sa sunod nga tion.—⁠Ang dugang pa nga panugda tuhoy sa direkta nga pamaagi sa pagsugod sing mga pagtuon masapwan sa Mayo 2002 nga Ang Aton Ministeryo sa Ginaharian, p. 6.

4. Paano kita makasugod sing pagtuon sa Biblia sa ganhaan kon nagaduaw liwat?

⁴ Ang kaanggid nga pamaagi mahimo magamit sa pagsugod sing pagtuon sa Biblia kon nagaduaw liwat. Halimbawa, mahimo mo itanyag ang Ginapatuman nga brosyur kag hinun-anunan ang ngalan sang Dios, nga nagagamit sang leksion 2, parapo 1-2. Sa masunod nga pagduaw, mahimo mo hinun-anunan ang ginasugid sang Biblia tuhoy sa mga kinaiya ni Jehova nga nagagamit sang parapo 3-4. Para sa masunod nga paghinun-anon, mahimo mo mabinagbinag ang parapo 5-6 kag ang laragway sa pahina 5 sa pagpatalupangod kon paano ang pagtuon sing Biblia makabulig sa aton nga makilala pa gid si Jehova. Tanan ini mahimo samtang nagatindog sa ganhaan.

5, 6. (a) Ngaa ang iban mas gusto nga magtuon sing Biblia paagi sa telepono? (b) Ano nga pamaagi ang magamit naton kon nagatanyag sing pagtuon sa Biblia paagi sa telepono?

⁵ Sa Telepono: Ang iban nga tawo mas luyag nga magtuon sa Biblia paagi sa telepono sangsa personal. Talupangda ang masunod nga eksperiensia: Samtang nagabantala sa pamalay, isa ka utod nga babayi ang nakasugilanon sing isa ka pamatan-on nga iloy nga tuman kasako sa iya trabaho. Sang indi sia maabtan sang utod sa ila balay, nagdesisyon ang utod nga tawgan sia sa telepono. Ang babayi nagpaathag nga wala gid sia sing tion sa paghinun-anon sa Biblia. Ang utod nagsiling: “Sa sulod sang 10 ukon 15 minutos, may bag-o ka nga matun-an, bisan paagi lamang sa telepono.” “Ti, kon sa telepono, sugot ako!” sabat sang babayi. Wala magdugay, isa ka regular nga pagtuon ang ginadumalahan paagi sa telepono.

⁶ Ang pila bala nga inyo naduaw luyag nga magtuon paagi sa telepono? Mahimo mo matilawan ang pamaagi nga bag-o lang nasambit, ukon mahimo ka magsiling: “Kon luyag mo, mahimo naton mahinun-anunan ang Biblia paagi sa telepono. Sugot ka bala sini?” Paagi sa pagpahisuno sang aton pamaagi sa pagtuon sing Biblia sa kahimtangan sang iban, mabuligan naton sila nga ‘masapwan ang ihibalo gid sa Dios.’—⁠Hulu. 2:⁠5; 1 Cor. 9:⁠23.

Kon Ano ang Isiling Tuhoy sa mga Magasin

Ang Lalantawan Agos. 15

“Pagkatapos sang makahalanusbo nga kamatayon, madamo ang nagpalibog kon ano ang mga nagakatabo sa kamatayon. Sa banta mo posible ayhan nga mahangpan naton ang kamatayon? [Tuguti sia nga makasabat.] Ini nga magasin nagapaathag kon ano ang ginasiling sa Biblia tuhoy sa kahimtangan sang mga patay. Nagahinun-anon man ini sa saad sang Dios nga pagkabanhaw sa aton napatay nga mga hinigugma.” Basaha ang Juan 5:28, 29.

Awake! Sept. 8

“Nahibaluan mo bala nga ang turismo amo ang numero uno nga nagahatag sing trabaho sa kalibutan? [Tuguti sia nga makasabat.] Ang paglapnag sang turismo nagadala sing mga kaayuhan kag mga problema. Ini nga magasin nagausisa sa kaayuhan kag problema sa moderno nga industriya sang turismo. Nagahatag man ini sing praktikal nga mga panugda sa mga nagalakbay sa iban nga pungsod.”

Ang Lalantawan Sept. 1

“Sa karon, ang pagkamainunungon isa ka kinaiya nga sa masami ginadayaw lamang apang wala ginapakita. Indi bala maayo kon mas madamo nga tawo ang mangin kaangay sang abyan nga ginlaragway diri? [Basaha ang Hulubaton 17:17. Nian tuguti sia nga makasabat.] Ini nga magasin nagahinun-anon sang kaayuhan bangod sang pagkamainunungon sa aton pamilya kag mga abyan.”

Magmata! Sept. 8

“Ayhan mahayanghag ka sa kooperasyon nga nagaluntad sa kinaugali. [Hinambiti ang isa sa mga halimbawa nga ginsambit sa artikulo.] Indi bala makapasubo nga indi naton makita ang kooperasyon sa mga tawo? [Tuguti sia nga makasabat.] Ini nga magasin nagapaathag kon paano paluntaron sang Dios sa dili madugay ang paghidait kag paghiliugyon sa duta.” Basaha ang Isaias 11:9.