Bahin 3—Pagdumala sing Mainuswagon nga mga Pagtuon sa Biblia

Epektibo nga Paggamit sang Kasulatan

¹ Ang aton katuyuan sa pagdumala sing mga pagtuon sa Biblia amo ang ‘paghimo sing mga disipulo’ paagi sa pagbulig sa mga tawo nga mahangpan kag batunon ang mga panudlo sang Pulong sang Dios kag iaplikar nila ini. (Mat. 28:​19, 20; 1 Tes. 2:13) Gani ang pagtuon dapat isentro sa Kasulatan. Sa primero, mas maayo nga buligan ang mga estudyante sa pagpangita sang mga teksto sa ila mismo kopya sang Biblia. Apang, paano naton magamit ang Kasulatan agod mag-uswag sila sa espirituwal?

² Pilia ang mga Teksto nga Basahon: Sa tion sang imo paghanda, binagbinaga kon paano ang tagsa ka teksto sa leksion naangot sa ginahinun-anunan, kag magpili kon ano nga teksto ang basahon sa tion sang pagtuon. Sa kabug-usan, mas maayo kon basahon ang mga teksto nga nagapakita sang aton Makasulatanhon nga mga pagpati. Ang mga teksto nga nagahatag lamang sang impormasyon mahimo nga indi na kinahanglan nga basahon. Talupangda ang mga kinahanglanon kag mga sirkunstansia sang kada estudyante.

³ Maggamit sing mga Pamangkot: Ang estudyante ang magpaathag sang mga teksto sa Biblia, sa baylo nga ikaw. Mapahulag mo sia sa paghimo sini paagi sa mataktikanhon nga paggamit sang mga pamangkot. Kon ang aplikasyon sang teksto maathag, mahimo mo sia mapamangkot kon paano ini nga teksto nagasakdag sa ginsiling sa parapo. Sa iban nga mga kaso, ang mas espesipiko ukon paagisod nga mga pamangkot mahimo nga kinahanglan agod makahinakop ang estudyante sing husto. Kon kinahanglan pa ang dugang nga paathag, himua ini sa tapos makasabat ang estudyante.

⁴ Mangin Simple: Ang lantip nga manugpana nagakinahanglan lamang sing isa ka baslay sa pag-igo sa iya puntariya. Sing kaanggid, ang lantip nga manunudlo wala nagahambal sing madamo sa pagpaathag sang isa punto. Sarang niya mapaambit ang impormasyon sing simple, maathag, kag sing sibu. Kon kaisa, kinahanglan mo nga magpanalawsaw sa Cristianong mga publikasyon agod mahangpan ang isa ka teksto kag mapaathag ini sing husto. (2 Tim. 2:15) Apang likawi nga ipaathag ang tagsa ka aspekto sang kada teksto sa inyo pagtuon. Ilakip lamang ang ginakinahanglan nga punto sa ginahinun-anunan.

⁵ Maghimo sing Praktikal nga Aplikasyon: Kon nagakaigo, buligi ang estudyante kon paano niya iaplikar ang mga teksto sang Biblia sa iya kabuhi. Halimbawa, kon ginabinagbinag ang Hebreo 10:​24, 25 sa estudyante nga wala pa nagatambong sa Cristianong mga miting, mahimo mo hinun-anunan sa iya ang isa sa mga miting kag hagaron sia sa pagtambong. Apang indi sia pagpilita. Tuguti ang Pulong sang Dios nga magpahulag sa iya nga pahamut-an si Jehova.​—⁠Heb. 4:⁠12.

⁶ Samtang nagahimo kita sing mga disipulo, kabay nga ‘palig-unon naton ang pagkamasinulundon paagi sa pagtuo’ paagi sa paggamit naton sing epektibo sang Kasulatan.​​—⁠Roma 16:26.

Kon Ano ang Isiling Tuhoy sa mga Magasin

Ang Lalantawan Nob. 15

“Luyag sang kalabanan nga tawo ang maayong panglawas kag malawig nga kabuhi. Apang kon posible, luyag mo man bala mabuhi sing walay katapusan? [Tuguti sia nga makasabat. Nian basaha ang Juan 17:3.] Ginahinun-anon sini nga magasin ang saad sa Biblia nga kabuhi nga walay katapusan. Ginabinagbinag man sini kon mangin ano ang kabuhi kon matuman na ining saad.”

Magmata! Dis. 8

“Sang nagligad nga 20 ka tuig, nag-uswag sing daku ang paghangop kag pagbulong sa AIDS. Apang, madamo gihapon ang may sala nga pagpati. [Ipakita ang kahon nga “Sayop nga mga Pagpati Tuhoy sa AIDS,” kag tuguti sia nga magkomento.] Ini nga magasin nagahinun-anon kon paano maamligan sang mga ginikanan ang ila kabataan.” Basaha ang Deuteronomio 6:​6, 7.

Ang Lalantawan Dis. 1

“Ang isa ka kinaiya nga nagapatuhay sa mga tawo gikan sa mga sapat amo ang ikasarang nga mapatuhay ang husto gikan sa sayop. Sing makapasubo, madamo nga tawo ang nagahimo sing malain. Ngaa amo sini sa banta mo? [Tuguti sia nga makasabat. Nian basaha ang Jeremias 17:9 ukon ang Bugna 12:9.] Ini nga magasin nagahinun-anon kon ano ang makabulig sa aton agod mahibaluan kag mahimo ang husto.”

Dis. 8

“Walay sapayan sang pag-uswag sa teknolohiya, kinahanglanon gihapon sang mga tawo ang pagpakig-abyan. Apang natalupangdan mo bala nga bangod sang pagbag-o sa katilingban, mabudlay na karon magpalambo sang suod nga pag-abyanay? [Tuguti sia nga makasabat. Nian basaha ang Hulubaton 18:24.] Ini nga magasin nagabinagbinag kon paano makapakig-abyan kag mahuptan ang matuod nga mga abyan.”