Bahin 4—Pagdumala sing Mainuswagon nga mga Pagtuon sa Biblia

Paghanas sa mga Estudyante sa Paghanda

¹ Madasig mag-uswag sa espirituwal ang isa ka estudyante kon nagabasa sia sang leksion sing abanse, nagamarka sang mga sabat, kag nagahunahuna kon paano ini ipabutyag sa iya kaugalingon nga mga tinaga. Gani, kon mangin regular na ang pagtuon, upda sia sa paghanda sang isa ka leksion kag ipakita kon paano ini himuon. Sa kalabanan nga estudyante, maayo nga ihanda ang bug-os nga kapitulo ukon leksion.

² Pagmarka kag Pagnota: Ipaathag kon paano makita ang direkta nga mga sabat sa naimprinta nga mga pamangkot. Ipakita sa estudyante ang imo kopya nga ginatun-an nga ang ginmarkahan mo amo lamang ang yabi nga mga tinaga ukon mga prase. Samtang ginabinagbinag mo ang materyal, mahimo luyag niya nga sundon ang imo halimbawa, kag markahan ang iya kopya sa mga punto nga magapahanumdom sa iya sang sabat. (Luc. 6:40) Dayon pangabaya sia sa pagsabat sa iya kaugalingon nga mga tinaga. Magatugot ini sa imo nga mahibaluan kon nahangpan gid niya ang ginatun-an.

³ Ang pag-usisa sa wala makutlo nga mga teksto importante nga bahin sa paghanda sang estudyante para sa pagtuon. (Binu. 17:11) Buligi sia sa paghangop nga ang tagsa ka nabalikwat nga teksto nagasakdag sa isa ka punto sa parapo. Ipakita sa iya kon paano himuon ang pagnota sing malip-ot sa marhin sang iya kopya nga ginatun-an. Ipadaku sa iya nga ginapasad gid sa Biblia ang iya ginatun-an. Palig-una sia sa paggamit pirme sang mga nasitar nga mga teksto sa iya mga komento sa tion sang pagtuon.

⁴ Usisaa sing Makadali kag Repasuha: Antes maghanda ang estudyante sa materyal nga pagatun-an, mas maayo nga usisaon niya anay sing makadali ang pagatun-an. Ipaathag nga mahimo niya ini paagi sa pag-usisa sing makadali sang tig-ulo sang kapitulo, mga subtitulo, kag mga ilustrasyon. Ipaathag nga antes niya tapuson ang iya paghanda, maalamon nga repasuhon gid niya ang panguna nga mga punto nga ginpakita sa mga leksion, ayhan nagagamit sang kahon para sa repaso kon may yara. Ina nga pagrepaso magabulig sa iya nga madumduman ang impormasyon.

⁵ Ang paghanas sa estudyante sa paghanda sa iya pagtuon magabulig sa iya sa pagkomento sing maayo sa mga miting sa kongregasyon. Magabulig man ini sa iya nga mapalambo ang batasan sa pagtuon nga mapuslan niya bisan matapos na kamo sa inyo pagtuon sa Biblia.

Bag-o nga Aman nga Magabulig sa Aton sa Paglihi sa Dugo

Gin-aprobahan sang Nagadumala nga Hubon ang isa ka bag-o nga dokumento nga natig-uluhan Durable Power of Attorney for Health Care (DPA) sa pagbulos sa Advance Medical Directive/Release nga kard.

Dapat mo sulatan ang DPA card, kag gamiton ini sing permanente kag mangin basehan sang imo mga kagustuhan bisan nagalakbay sa iban nga pungsod. Dapat mo islan ang imo DPA card sa ulihi kon (1) may bag-uhon ka sa imo DPA card, subong sang imo nga kagustuhan, mga health-care representative, mga direksion kag mga numero sang telepono, ukon (2) nadula ukon naguba ang imo DPA card.

Dapat binagbinagon mo sing mapinangamuyuon ang DPA card kag mahalungon nga sulatan ini sa balay. Apang, antes pirmahan ang kard, pat-ura nga nagatambong ang duha ka testigo nga imo ginpili kon himuon mo ini. Mahimo nga usisaon sa tion kag tion sang mga manugtatap sang pagtinuon sa libro ang mga wala pa nakasulat sa sini nga kard agod hibaluon kon kinahanglan nila ang bulig.

Antes pil-on ang imo DPA card, pat-ura nga may de-kalidad nga mga photocopy sini ang imo health-care representative, alternate health-care representative, kag ang imo doktor subong man para sa imo kaugalingon nga mga rekord. Mahimo nga hatagan mo man sing kopya ang mga katapo sang imo pamilya kag ang sekretaryo sang kongregasyon. Ang kada kopya dapat isa lang sa kada papel nga ordinaryo ang kadakuon (8 1/2ʺ x 11ʺ), nga ginaplastar sa tunga sang papel. Ang orihinal nga DPA card dapat amo ang imo dal-on.

Ang Identity Card para sa di-bawtismado nga kabataan sang mga Saksi wala ginbag-o. Dapat pat-uron sang mga ginikanan nga ang kard sang tagsa ka menor-de-edad nga bata nasulatan kag napirmahan kag dal-on ini sang bata sa nagakaigo nga mga tion.

Mahimo sundon sang di-bawtismado nga mga manugbantala ang ginasiling sang DPA card kag Identity Card kon nagahimo sila sing mga instruksion kon ano nga paagi sang pagbulong ang luyag nila para sa ila kag sa ila mga kabataan. Dapat hatagan sang sekretaryo sing DPA card ang tanan nga bag-ong bawtismado nga manugbantala.