“Ginasagod sang mga Pulong sang Pagtuo”

¹ Ang pagkabuhi nga may diosnon nga debosyon nagakinahanglan sing daku nga pagpanikasog. (1 Tim. 4:7-10) Kon sa aton lamang kaugalingon nga kusog, magaluya kita sa gilayon kag masandad sa paglakat sa sining dalanon. (Isa. 40:29-31) Ang isa ka paagi nga makabaton kita sing kusog gikan kay Jehova amo ang ‘masagod kita sang mga Pulong sang pagtuo.’—⁠1 Tim. 4:6.

² Bugana nga Espirituwal nga Pagkaon: Si Jehova nagasuplay sing bugana nga espirituwal nga pagkaon paagi sa iya Pulong kag paagi sa “matutom kag mainandamon nga ulipon.” (Mat. 24:45) Ginahimo bala naton ang aton bahin agod makabenepisyo sa sini? Ginabasa bala naton ang Biblia kada adlaw? Nagapain bala kita sing mga tion para sa personal nga pagtuon kag pagpamalandong? (Sal. 1:2, 3) Ining maayo nga batasan sa pagkaon sa espirituwal magapabaskog sa aton kag magaamlig sa aton gikan sa makapaluya nga mga impluwensia sang kalibutan ni Satanas. (1 Juan 5:19) Kon pun-on naton ang aton hunahuna sing mapuslanon nga mga butang kag iaplikar ini sa aton kabuhi, mangin kaupod naton si Jehova.—⁠Fil. 4:8, 9.

³ Ginapalig-on man kita ni Jehova paagi sa mga miting sang kongregasyon. (Heb. 10:24, 25) Ang espirituwal nga instruksion kag makapalig-on nga kaupdanan nga masapwan sa sining mga pagtinipon magapabakod sa aton walay sapayan sang mga pagtilaw. (1 Ped. 5:9, 10) Ang isa ka Cristianong pamatan-on nagsiling: “Nagaeskwela ako sa bug-os nga adlaw, kag makakalapoy gid ini. Apang ang mga miting kaangay sang katamnan sa desyerto, ang duog nga nagapaumpaw sa akon agod makapadayon ako sa masunod nga adlaw sang pag-eskwela.” Ginapakamaayo gid kita sa aton panikasog sa pagtambong sa mga miting!

⁴ Pagbantala Sang Kamatuoran: Ang pagbantala sa iban kaangay sa pagkaon para kay Jesus. Nagpabaskog ini sa iya. (Juan 4:32-34) Subong man, kon nagapakighambal kita sa iban tuhoy sa dalayawon nga mga saad sang Dios, nagabatyag kita sing kapagsik. Ang pagkasako sa ministeryo nagahupot man sa aton tagipusuon kag hunahuna nga nasentro sa Ginharian kag sa mga pagpakamaayo nga magaabot sa dili madugay. Nagapaumpaw gid ini sa aton.—⁠Mat. 11:28-30.

⁵ Pribilehiyo gid naton nga makabenepisyo gikan sa bugana nga espirituwal nga pagkaon nga ginaaman ni Jehova sa iya katawhan karon! Kabay nga magpadayon kita sa pagsinggit sing malipayon sa iya kadayawan.—⁠Isa. 65:13, 14.

Bahin 5—Pagdumala sing Mainuswagon nga mga Pagtuon sa Biblia

Pagbinagbinag Kon Daw Ano Kadamo nga Materyal ang Pagatuptupan

¹ Ginhunahuna ni Jesus ang mga limitasyon sang iya mga disipulo kon ginatudluan niya sila, nagahambal sa ila ‘tubtob sa ila lamang nga masarangan pamatian.’ (Mar. 4:33; Juan 16:12) Sa amo man nga paagi, dapat banabanaon sang mga manunudlo sang Pulong sang Dios karon kon daw ano kadasig nila dapat tuptupan ang materyal sa kada pagtuon sa Biblia. Ang kadamuon sang materyal nga binagbinagon magadepende sa ikasarang kag kahimtangan sang manunudlo kag sang estudyante.

² Magpatudok Sing Mapag-on nga Pagtuo: Mahimo nagakinahanglan pa tun-an sing makaduha ukon makatlo ka sesyon sang iban nga estudyante ang amo man nga materyal nga masarangan naman sang iban tun-an sa isa lang ka sesyon. Indi naton luyag nga dasigon ang pagtuptop bisan pa wala ini mahangpan sing maayo sang estudyante. Ang tagsa ka estudyante nagakinahanglan sing mapag-on nga pundasyon sa iya nasapwan nga bag-ong pagtuluuhan sa Pulong sang Dios.—⁠Hulu. 4:⁠7; Roma 12:2.

³ Samtang nagadumala ka sing pagtuon kada semana, maghinguyang sing kinahanglanon nga tion agod mabuligan ang estudyante nga mahangpan kag maaplikar ang iya natun-an sa Pulong sang Dios. Likawi ang madasig nga pagtuptop nga mahimo magpaburon lamang sa daku nga balor sang mga kamatuoran nga ginatudlo. Maghinguyang sing supisyente nga tion sa pagpatalupangod sang panguna nga mga punto kag binagbinaga ang yabi nga mga teksto nga ginbasihan sang mga panudlo.—⁠2 Tim. 3:16, 17.

⁴ Likawi nga Mabuyo: Samtang ginalikawan naton ang padali nga pagtuon, luyag man naton likawan nga magpalayo sa tema nga ginahinun-anunan. Kon madamo sing ginahambal ang estudyante tuhoy sa personal nga mga butang, puede ninyo himuon ini pagkatapos sang pagtuon.—⁠Man. 3:1.

⁵ Sa pihak nga bahin, bangod sang aton kapagsik para sa kamatuoran mahimo mangin mabudlay sa aton ang pagpugong sa paghambal sing madamo sa tion sang pagtuon. (Sal. 145:6, 7) Ang paghinambit kon kaisa sang mga inagihan mahimo mapuslanon sa pagtuon, apang indi naton luyag magsambit sing tuman kadamo nga inagihan nga mahimo makaupang na sa estudyante sa pagtigayon sing sibu nga ihibalo sa panguna nga mga panudlo sang Biblia.

⁶ Paagi sa pagtuptop sang nagakaigo nga kadamuon sang materyal kada pagtuon, ginabuligan naton ang mga estudyante sa Biblia nga “maglakat sa kapawa ni Jehova.”—⁠Isa. 2:5.