Bahin 6—Pagdumala sing Mainuswagon nga mga Pagtuon sa Biblia

Kon Mamangkot ang Estudyante

¹ Kon regular na ang pagtuon sa Biblia, mas maayo nga binagbinagon ang mga panudlo sang Biblia sa organisado nga paagi sa baylo nga magsulusaylo. Mabuligan sini ang estudyante nga makapahamtang sing sadsaran sang sibu nga ihibalo kag mag-uswag sa espirituwal. (Col. 1:9, 10) Apang, masami nga nagapamangkot ang mga estudyante tuhoy sa nanuhaytuhay nga mga topiko kon tion sang pagtuon. Ano ang imo himuon?

² Mangin Mahinantupon: Ang mga pamangkot nga may kaangtanan sa ginatun-an mahimo nga sabton ora-mismo. Kon ang sabat sa pamangkot sa ulihi pa matun-an, ayhan bastante na nga sambiton nga matun-an ini sa ulihi. Apang kon ang pamangkot wala sing labot sa ginatun-an ukon nagakinahanglan ini sing pagpanalawsaw agod masabat sing maayo, mas maayo nga binagbinagon ini pagkatapos sang pagtuon ukon sa iban nga tion. Nasapwan sang pila ka manugbantala nga ang pagsulat sang pamangkot nagapasalig sa estudyante nga ginapabaloran gid ang iya pamangkot kag nagapugong nga indi masamulak ang pagtuon.

³ Madamo nga mga panudlo sa Biblia ang ginabinagbinag sing malip-ot sa panguna nga mga publikasyon nga ginatun-an naton. Apang ano abi kon nabudlayan ang estudyante sa pagbaton sang isa ka panudlo ukon nagapakatig-a gid sa iya sayop nga pagpati? Basi mas mapuslanon kon binagbinagon ang dugang nga materyal nga nagapaathag pa sing maayo sa ginasiling sang Biblia tuhoy sa sini. Kon indi gihapon kumbinsido ang estudyante, pabay-i anay ini kag magpadayon sa inyo regular nga pagtuon. (Juan 16:12) Samtang nagauswag ang iya ihibalo kag espirituwalidad, mahimo nga mahangpan na niya ining panudlo sa Biblia.

⁴ Mangin Mapainubuson: Kon indi mo mapat-od ang sabat sa pamangkot, indi magpadasudaso sa paghatag sang imo opinyon. (2 Tim. 2:15; 1 Ped. 4:11) Ipaathag nga manalawsaw ka anay antes magsabat. Basi puede mo pa gani tudluan ang estudyante kon paano manalawsaw. Amat-amat nga ipakita sa iya kon paano gamiton ang nagkalainlain nga mga bulig sa pagpanalawsaw nga gin-aman sang organisasyon ni Jehova. Sa sining paagi sarang na niya masabat ang iya mga pamangkot sa ulihi.—⁠Binu. 17:11.

Buligi Sila nga Mapanaksihan Pa Gid

¹ Samtang nagabantala kita sang maayong balita, masami naton masugata ang mga tawo nga indi sakop sang aton teritoryo ukon nagahambal sing iban nga lenguahe, lakip na ang sign language. Ang iban nga pirme naton nahinun-anunan sa Biblia mahimo nga nagbiya sa aton teritoryo. Ano ang sarang naton mahimo agod makabaton sila sing dugang nga panaksi? Amo ang paggamit sing pormas nga Please Follow Up (S-43).

² Masami nga nagapamati sing maayo ang mga tawo sa maayong balita kon ginpresentar ini sa ila mismo lenguahe. (Binu. 22:1, 2) Bangod sini, sa kalabanan nga kaso, kon may masugilanon kita nga tuhay ang lenguahe, dapat nga sulatan naton ang pormas bisan kon ang tawo wala nagapakita sing interes sa mensahe sang Ginharian. Apang, kon medyo madamo sang dumuluong sing hambal ang pirme ginapanaksihan sa ila mismo lenguahe, mahimo nga indi na kinahanglan nga sulatan ang pormas magluwas kon may interesado.

³ Pagsulat Sang Pormas: Kuhaa sing mataktikanhon ang ngalan sang tawo, ang iya direksion, kag ang iya telepono. Sambita ang kadakuon sang interes, kon san-o mapakig-angutan ang tawo, ang literatura nga napahamtang ukon ginapangabay, kag ang lenguahe nga iya gid nahangpan. Pagkatapos makompleto ang pormas, ihatag dayon ini sa sekretaryo sang kongregasyon, nga magapadala sini sa nagakaigo nga kongregasyon ukon grupo.

⁴ Pagpadala Sang Pormas: Kon indi mahibaluan sang sekretaryo ang padalhan nga kongregasyon ukon grupo ukon kon indi mahibaluan ang direksion, ipadala niya ini sa sanga talatapan agod mapadala ini sa nagakaigo nga kongregasyon ukon grupo.

⁵ Kon makabaton ang kongregasyon ukon grupo sing isa ka nasulatan nga pormas sang Please Follow Up, dapat may mga kahimusan nga pakig-angutan dayon ang tawo. Samtang ginahimo naton sing maukod ang aton bahin, makasalig kita nga buksan ni Jehova ang tagipusuon sadtong “nahuyog sa kabuhi nga walay katapusan.”—⁠Binu. 13:48.