Bahin 7: Pagdumala sing Mainuswagon nga mga Pagtuon sa Biblia

Pagpangamuyo sa Pagtinuon

1. (a) Ngaa nagakaigo nga buksan kag takpan sing pangamuyo ang pagtinuon sa Biblia? (b) Paano naton sugdan ang pangamuyo sa pagtuon sa Biblia?

¹ Agod mag-uswag sa espirituwal ang mga estudyante sa Biblia, kinahanglan gid ang pagpakamaayo ni Jehova. (1 Cor. 3:6) Sa amo, nagakaigo lamang nga buksan kag takpan sing pangamuyo ang isa ka regular nga pagtinuon. Mahimo naton ini sa masami sa mga relihioso nga mga tawo sa una pa lang nga pagtuon. Sa iban, kinahanglan nga hantupon naton ang nagakaigo nga tion kon san-o sugdan ang pangamuyo. Puede mo gamiton ang Salmo 25:4, 5 kag 1 Juan 5:14 sa pagbulig sa estudyante nga mahangpan kon ngaa kinahanglanon ang pagpangamuyo kag mahimo man gamiton ang Juan 15:16 agod ipahangop ang kabilihanan sang pagpangamuyo kay Jehova paagi kay Jesucristo.

2. Kon gin-updan sang bawtismado nga utod nga lalaki ukon sang isa ka di-bawtismado nga manugbantala nga lalaki ang utod nga babayi sa pagtinuon sa Biblia, sin-o ang mangamuyo?

² Sin-o ang dapat nga mangamuyo sa pagtinuon sa Biblia? Kon ginaupdan sang isa ka bawtismado nga utod nga lalaki ang isa ka utod nga babayi sa pagtinuon, dapat sia ang mangamuyo, bisan pa mahimo nga ang utod nga babayi ang magadumala sang pagtinuon samtang nagatakdong. (1 Cor. 11:5, 10) Sa pihak nga bahin, kon mag-upod ang isa ka di-bawtismado nga manugbantala sa isa ka utod nga babayi sa pagtinuon, ang utod nga babayi ang mangamuyo. Sa sina nga sitwasyon, dapat magtakdong sia kon nagapangamuyo subong man kon nagadumala sing pagtinuon.

3. Ano ang nagakaigo nga mga butang ang mahimo ilakip sa pangamuyo sa pagtinuon sa Biblia?

³ Kon Ano ang Mahimo Ilakip sa Pangamuyo: Indi kinahanglan nga malawig ang pangamuyo sa pagtinuon sa Biblia, apang dapat espesipiko ini. Magluwas sa pagpangabay sing pagpakamaayo sang Dios sa pagtinuon kag mga pagpasalamat sa natun-an nga mga kamatuoran, nagakaigo lang nga dayawon si Jehova subong Tuburan sang instruksion. (Isa. 54:13) Mahimo man naton malakip ang mga ekspresyon nga nagapabanaag sang aton sinsero nga interes sa estudyante kag sang aton apresasyon sa organisasyon nga ginagamit ni Jehova. (1 Tes. 1:2, 3; 2:7, 8) Ang aton pagpangabay sing pagpakamaayo ni Jehova sa panikasog sang estudyante nga iaplikar ang iya natun-an sarang makabulig sa iya nga makit-an ang kabilihanan nga mangin “manugtuman sang pulong.”—⁠Sant. 1:⁠22.

4. Ang pagbukas kag pagtakop sing pangamuyo sa pagtinuon sa Biblia nagadala sing ano nga mga kapuslanan?

⁴ Madamo sing kapuslanan ang pangamuyo. Nagadala ini sing pagpakamaayo sang Dios. (Luc. 11:13) Nagapadaku ini sang pagkaserioso sa pagtinuon sa Pulong sang Dios. Samtang ginapamatian sang estudyante ang aton mga pangamuyo, makatuon sia kon paano mangamuyo. (Luc. 6:40) Dugang pa, ang mga pangamuyo nga tinagipusuon nga puno sing gugma sa Dios kag pagpasalamat sa iya di-matupungan nga mga kinaiya sarang makabulig sa estudyante nga mapalambo ang personal nga kaangtanan kay Jehova.

Kon ano ang Isiling Tuhoy sa mga Magasin

Ang Lalantawan Abr. 15

“Indi bala tuman kadamo sing impormasyon karon? [Tuguti sia sa pagsabat.] Apang, wala na sing mas bilidhon pa sangsa kon ano ang ginalaragway sa sining teksto. [Basaha ang Juan 17:3.] Ini nga magasin nagapaathag kon ano ang kahulugan sang ‘kabuhi nga walay katapusan’ kag kon paano naton matigayon ang ihibalo nga nagadul-ong sa sini.”

Awake! Abr. 22

“Bisan pa si Jesucristo mas kilala sangsa kay bisan sin-o nga tawo nga nagkabuhi, madamo sang mga tawo ang nagapamangkot kon sin-o gid sia. Nahibaluan mo bala nga bisan ang mga apostoles ni Jesus nagpalibog man sini? [Tuguti sia sa pagsabat. Nian basaha ang Marcos 4:⁠41.] Ini nga magasin nagausisa kon ano gid ang ginasiling sang Biblia sa pagkatawo ni Jesus.”

Ang Lalantawan Mayo 1

“Kon ang isa ka hinigugma mapatay, natural lang nga luyag naton nga makita sia liwat. Ugyon ka bala? [Tuguti sia sa pagsabat.] Madamo ang nakasapo sing lugpay sa saad sang Biblia nga pagkabanhaw. [Basaha ang Juan 5:28, 29.] Ini nga magasin nagahinun-anon sa mahanabo nga pagkabanhaw kag kon sin-o gid ang magabenepisyo sa sini.”

Magmata! Mayo 8

“Ang kalabanan sa mga ginikanan mapilion sa kon ano ang ila ginatugot nga lantawon sang ila kabataan. Mabudlay bala ang pagpili sing maayo nga mga pelikula para sa imo pamilya? [Tuguti sia sa pagsabat. Nian basaha ang Efeso 4:⁠17.] Ini nga magasin nagabinagbinag kon paano mabuligan sang mga ginikanan ang ila kabataan sa pagpili sing maayo nga kalingawan.”