Malapit Na ang Adlaw ni Jehova

¹ Ginapaabot gid sang mga Cristiano ang adlaw ni Jehova, diin laglagon niya ining sistema sang mga butang karon kag buslan sang isa ka bag-o nga kalibutan sang pagkamatarong. (2 Ped. 3:12, 13) Bangod wala kita makahibalo kon san-o ini maabot, dapat pirme kita magbantay kag buligan ang iban nga magbantay man. (Ezeq. 33:7-9; Mat. 24:42-44) Ang pagpamalandong sa matagnaon nga Pulong sang Dios magapabakod sang aton kombiksion nga “ang adlaw ni Jehova malapit na.”—⁠Sof. 1:⁠14.

² Ang Pagsundanay Sang mga Kagamhanan sa Kalibutan: Suno sa Bugna 17:9-11, si apostol Juan nagsambit sang “pito ka hari,” nga nagarepresentar sang pagsundanay sang pito ka kagamhanan sa kalibutan. Ginpatuhuyan man ni Juan ang “ikawalo nga hari,” nga ginarepresentar karon sang Nasyones Unidas. May paabuton pa bala kita nga iban nga kagamhanan sa kalibutan? Wala, kay ang tagna nagasiling nga ining ikawalo nga hari ‘magakadto sa kalaglagan,’ diin pagkatapos sini wala na sing ginsambit nga dutan-on nga hari. Ini bala nga tagna nagabulig sa imo nga mahangpan kon diin na kita sa lakat sang panahon?

³ Ang Daniel 2:31-45 nagabulig sa aton nga mahangpan ang nagapakari nga adlaw ni Jehova. Sa sini nga tagna, ang daku katama nga imahen nga nakita ni Nabocodonosor sa isa ka damgo nagarepresentar sa pagsundanay sang mga kagamhanan sa kalibutan. Ang kada isa sining kagamhanan nagluntad na. Diin na kita karon sa maragtas? Sa panag-on nga ginsimbuluhan sang tiil sang imahen. Maathag nga ginalaragway sang tagna kon ano ang masunod nga matabo. Laglagon sing bug-os ang tawhanon nga pagginahom, kag buslan sang “isa ka ginharian nga indi na malaglag.” Mahangpan mo bala kon paano ini nagapakita nga malapit na ang adlaw ni Jehova?

⁴ Dugang nga Pamatuod: Nasaksihan naton ang dugang nga pamatuod nga malapit na ang adlaw ni Jehova. Nakita naton ang katumanan sang gintagna ni apostol Pablo tuhoy sa mga kinaiya sang mga tawo sa “katapusan nga mga adlaw.” (2 Tim. 3:1-5) Kag nagapakigbahin kita sa bug-os kalibutan nga pagpanaksi nga dapat himuon antes mag-abot ang katapusan. (Mat. 24:14) Kabay nga ang aton ministeryo padayon nga nagapabanaag sang pagkahilingagawon sang ginabantala sang anghel: “Kahadluki ninyo ang Dios kag hatagi sia sing himaya, kay nag-abot na ang oras sang iya paghukom.”—⁠Bug. 14:6, 7.

Bahin 8: Pagdumala sing Mainuswagon nga mga Pagtuon sa Biblia

Pagtuytoy sa mga Estudyante Pasulod sa Organisasyon

¹ Ang aton tulumuron sa pagdumala sing mga pagtuon sa Biblia indi lamang ang pagtudlo tuhoy sa doktrina kundi ang pagbulig man sa mga estudyante nga mangin bahin sang Cristianong kongregasyon. (Zac. 8:23) Ang brosyur nga Mga Saksi ni Jehova—⁠Sin-o Sila? Ano ang Ila Ginapatihan? makabulig sa aton sa paghimo sini. Hatagi sing kopya ang bag-o nga mga estudyante sa Biblia, kag palig-una sila nga basahon ini. Dugang pa, samtang nagadumala sing pagtuon, maghinguyang sing isa ka minuto kada semana agod ipaambit ang pila ka punto tuhoy sa organisasyon ni Jehova.

² Mga Miting sa Kongregasyon: Ang panguna nga paagi agod maapresyar sang mga estudyante sa Biblia ang organisasyon sang Dios amo ang pagpakig-upod sa aton sa mga miting sa kongregasyon. (1 Cor. 14:24, 25) Busa, sarang mo ini mahimo paagi sa paglaragway sing isaisa sang lima ka semanal nga miting. Sambita ang tig-ulo sang masunod nga pamulongpulong publiko. Ipakita sa ila ang pagatun-an sa Pagtinuon sa Ang Lalantawan kag sa Pagtinuon Sang Kongregasyon sa Libro. Ipaathag ang Teokratikong Eskwelahan Para sa Ministeryo kag ang Miting sa Serbisyo. Kon may asaynment ka sa eskwelahan, ayhan sarang mo maensayo ini upod sa ila. Ipaambit ang talalupangdon nga mga punto nga ginpresentar sa mga miting. Agdaha sila nga magtambong bisan sa una pa lang ninyo nga pagtuon.

³ Kon nagahilapit na ang Memoryal, mga asambleya, kag ang pagduaw sang manugtatap sang sirkito, maghinguyang sang pila ka minuto sa pagpaathag kag pagpalambo sang interes sa sining mga kahimusan. Sabta sing amat-amat ang mga pamangkot subong sang: Ngaa ginatawag kita nga mga Saksi ni Jehova? Ngaa nga ginatawag naton nga Kingdom Hall ang aton mga ginatipunan? Ano ang mga responsibilidad sang mga gulang kag mga ministeryal nga alagad? Paano ginaorganisar ang pagbantala nga hilikuton kag ang teritoryo? Paano nabalhag ang aton mga literatura? Paano ginasakdag sa pinansial ang organisasyon? Ano ang papel sang sanga talatapan kag sang Nagadumala nga Hubon sa pagtatap sang hilikuton?

⁴ Makatudlo nga mga Video: Ang isa pa ka paagi nga makita sang mga estudyante sa Biblia ang tumalagsahon nga organisasyon ni Jehova amo ang aton mga video. Sarang sila madala sini sa To the Ends of the Earth, mahibaluan ang Our Whole Association of Brothers, kag makita nila nga kita United by Divine Teaching. Ang isa ka babayi nga nakabaton sang aton mga magasin kag sang iban pa nga literatura sa sulod na sang lima ka tuig ginpahibi sang video nga Jehovah’s Witnesses—⁠The Organization Behind the Name. Nagsalig sia sa mga Saksi nga nagaduaw sa iya, apang pagkatapos matan-aw ang video, nagbatyag sia nga masaligan man niya ang organisasyon. Nasugdan ang pormal nga pagtuon sa iya, kag sang masunod nga semana, nagtambong sia sa mga miting sa Kingdom Hall.

⁵ Paagi sa paghinguyang kada semana sing pila ka minuto sa aton mga estudyante, amat-amat naton nga matuytuyan ang mga estudyante sa Biblia sa organisasyon nga ginagamit karon ni Jehova.