Ang Utang Naton sa Iban

¹ Nagbatyag si apostol Pablo nga salabton niya nga bantalaan ang mga tawo. Nakahibalo sia nga ginpaposible ni Jehova nga maluwas ang tanan nga sahi sang tawo paagi sa hamili nga dugo sang Iya Anak. (1 Tim. 2:3-6) Busa, si Pablo nagsiling: “May utang ako sa mga Griego kag sa mga Barbaro, sa mga maalam kag sa mga buangbuang.” Malangkagon sia kag mapisan nga nagpangabudlay agod mabayaran ang iya utang sa iya mga isigkatawo paagi sa pagbantala sang maayong balita sa ila.—⁠Roma 1:14, 15.

² Kaangay ni Pablo, ang mga Cristiano karon nagakalit sang kahigayunan agod paambitan sing maayong balita ang ila mga isigkatawo. Bangod nagahilapit na ang “dakung kapipit-an,” hilingagawon na gid ang aton pagpangita sa mga bunayag sing tagipusuon. Kabay nga ang matuod nga gugma sa mga tawo magapahulag sa aton nga mangin makugi sa sining nagaluwas sing kabuhi nga hilikuton.—⁠Mat. 24:21; Ezeq. 33:8.

³ Pagbayad sa Aton Utang: Ang panguna nga paagi sa pagpakigsugilanon sa mga tawo amo ang pamalaybalay nga pagbantala. Sa mga teritoryo nga wala pirme sing tawo nga mga balay, ang paghupot sang sibu nga mga rekord kag ang pagbalik sa iban nga higayon makabulig sa aton nga masugilanon ang madamo pa nga tawo. (1 Cor. 10:33) Masugilanon man naton ang iban paagi sa pagpanaksi sa duog sang negosyo, sa mga dalan, sa mga parke, sa mga palarkingan, kag paagi sa telepono. Mahimo naton pamangkuton ang aton kaugalingon, ‘Ginagamit ko gid bala ang tagsa ka pamaagi sang pagbantala suno sa akon labi nga masarangan agod mapaambit ko ang mensahe sang kabuhi?’—⁠Mat. 10:11.

⁴ Nagbatyag ang isa ka payunir nga salabton gid niya nga bantalaan ang tanan nga tawo sa iya teritoryo. May isa ka balay nga pirme sirado ang mga blinds sang bintana, kag wala gid pirme ini sing tawo. Apang, sang isa ka adlaw nga wala nagapakigbahin sa ministeryo ang payunir, natalupangdan niya ang isa ka salakyan sa atubangan sining wala pirme sing tawo nga balay. Bangod indi niya luyag wasihon ining kahigayunan, gintum-ok niya ang doorbell. May nag-atubang nga isa ka lalaki, kag ang una nga paghambalanay nagdul-ong sa pila ka pagbalik-duaw sining utod nga babayi kag sang iya bana. Sang ulihi, nagtuon ang lalaki sa Biblia, kag bawtismado na sia karon. Mapinasalamaton sia bangod nagbatyag ining utod nga babayi nga salabton gid niya ang pagbantala sa iban.

⁵ Bangod malapit na gid ang katapusan, karon na ang tion nga bayaran naton ang aton utang sa aton mga isigkatawo paagi sa pagpakigbahin sing makugi sa pagbantala nga hilikuton.—⁠2 Cor. 6:1, 2.

Bahin 10: Pagdumala sing Mainuswagon nga mga Pagtuon sa Biblia

Paghanas sa mga Estudyante Para sa Pamalaybalay nga Ministeryo

¹ Kon napat-od sang mga gulang nga ang isa ka estudyante sa Biblia kalipikado na nga mangin isa ka di-bawtismado nga manugbantala, mahimo na sia makigbahin sa pagbantala nga hilikuton sa publiko upod sa kongregasyon. (Tan-awa ang Organisado sa Paghimo Sang Kabubut-on ni Jehova, pahina 79-81.) Paano naton mabuligan ang estudyante nga malab-ot ang tulumuron nga makapakigbahin sa pamalaybalay nga pagbantala?

² Magkaupod nga Maghanda: Kinahanglan gid ang maayo nga paghanda. Ipakita sa estudyante ang panugda nga mga presentasyon sa Ang Aton Ministeryo sa Ginharian kag sa Reasoning nga libro, kag buligi sia sa pagpili sing isa ka simple nga introduksion nga praktikal sa inyo teritoryo. Sa umpisa pa lang, palig-una sia nga gamiton ang Biblia sa iya ministeryo.—⁠2 Tim. 4:2.

³ Ang mga sesyon sa pag-ensayo makabulig gid sa bag-uhan nga manugbantala. Samtang nagaensayo sang presentasyon ang estudyante, ipakita sa iya kon paano niya atubangon sing mataktikanhon ang kinaandan nga mga reaksion sa teritoryo. (Col. 4:6) Palig-una sia nga indi man gid kinahanglan mahibaluan sang Cristianong mga ministro ang tanan nga sabat sa mga pamangkot sang tagbalay. Masami ang maayo gid nga himuon sa pag-atubang sining mga pamangkot amo ang pagsiling nga magapanalawsaw ka anay kag magabalik ugaling agod sabton ang iya pamangkot.—Hulu. 15:28.

⁴ Magkaupod nga Nagabantala: Sa nahauna nga tion nga makigbahin sa pamalaybalay nga ministeryo ang estudyante, papanilaga sia sa imo samtang ginapresentar mo ang ginhandaan ninyo nga duha. Nian tuguti sia nga makapakigbahin. Sa iban nga higayon, labing maayo kon ang bag-uhan nga manugbantala magapakigbahin sing malip-ot lang sa presentasyon, subong sang pagbasa kag pagkomento sa isa ka teksto. Mangin mapasibusibuon man sa personalidad kag mga ikasarang sang estudyante. (Fil. 4:5) Hatagi sia pirme sing komendasyon samtang amat-amat mo sia nga ginahanas sa nanuhaytuhay nga aspekto sang pagbantala nga hilikuton.

⁵ Importante nga buligan ang bag-uhan nga manugbantala nga magpahamtang sing isa ka regular nga iskedyul sa pagpakigbahin sa ministeryo, nagahimo sini kada semana kon posible. (Fil. 3:16) Maghimo sing pat-od nga mga kahimusan nga mag-updanay kamo sa pagbantala, kag palig-una sia nga magbantala man upod sa iban pa nga makugi nga mga kauturan. Ang ila halimbawa kag pagpakig-upod magabulig sa iya nga mangin malantipon kag malipayon sa pagbantala sa pamalaybalay.