Mamati kag Magtuon
1. Ngaa kinahanglan ang dugang nga panikasog agod makapamati kag makatuon sa distrito nga kombension?
1 Nagahilapit na ang aton 2013 distrito nga kombension. Ginhandaan gid sing maayo ang programa nga nagabinagbinag sa mga kinahanglanon karon sa aton hilikuton sa bug-os nga kalibutan. May mga kahimusan ka na bala nga ginhimo agod matambungan ang tatlo ka adlaw nga kombension? Madamo sing tublag sa dalagku nga mga kombension, gani kinahanglan ang dugang nga panikasog agod makapamati sing maayo sa programa. Bangod mas malawig ang mga sesyon sangsa mga miting sa kongregasyon, ang konsentrasyon kinahanglan huptan sing mas malawig. Isa pa, ang pagbiyahe kag iban pa nga butang mahimo man bangdan sang kakapoy. Ano ang makabulig sa aton nga makapabilin nga alerto para makapamati kag makatuon?—Deut. 31:12.
2. Paano naton mahanda ang aton tagipusuon para sa programa sa kombension?
2 Antes Magsugod ang Kombension: Ang programa sa kombension makita sa aton opisyal nga Web site nga www.pr418.com. Nagalakip ini sang tig-ulo sang mga pamulongpulong nga may isa ukon duha ka teksto. Kon may Internet kita, ang pagtan-aw sini sing abanse makabulig sa aton nga mahanda ang aton tagipusuon sa mga bahin nga ipresentar. (Esd. 7:10) Mahimo ninyo binagbinagon ang programa sa inyo Pangpamilya nga Pagsimba agod tanan kamo malangkag sa nagahilapit nga kombension.
3. Ano ang makabulig sa aton nga makapamati sing maayo?
3 Sa Tion sang Programa: Kon mahimo, mangihi na nga daan antes magsugod ang sesyon. Patya ang imo cell phone agod indi ka madisturbo sa mga tawag ukon text, ukon matentar nga mag-text sa tion sang programa. Kon kinahanglan nga naka-on ang imo cell phone, ibutang ini sa setting nga indi makadisturbo sa iban engkaso nga may magtawag. Kon maggamit ka sing tablet sa tion sang programa, pat-ura nga indi ini makatublag sa iban. Likawi ang pagkaon ukon pag-inom sa tion sang programa. (Man. 3:1) Ipokus ang imo panulok sa humalambal. Kon may basahon nga teksto, sundi ini sa imo Biblia. Magkuha sing malip-ot nga nota.
4. Paano mabuligan sang mga ginikanan ang ila kabataan nga makapamati kag makatuon?
4 Luyag man naton makapamati kag makatuon ang aton kabataan. Ang Hulubaton 29:15 nagasiling: “Ang bata nga ginapabayaan sa iya kaugalingon nagapakahuya sa iya iloy.” Gani mas maayo kon magtulupad sa pulungkuan ang pamilya para mapat-od sang mga ginikanan nga nagapamati ang ila kabataan sa programa sa baylo nga mag-istoryahanay, mag-text, ukon maglagawlagaw. Bisan pa indi nila maintiendihan ang tanan nga ginabinagbinag, mahimo hanason ang kabataan nga magpahimunong kag indi magtulog.
5. Ngaa mapuslanon nga repasuhon ang programa, kag paano ini himuon?
5 Pagkatapos sang Programa Kada Adlaw: Magtulog sing temprano para makapahuway ka sing maayo. Repasuha ang imo napamatian agod indi mo ini dali malipatan. Maghinguyang sing pila ka minutos kada gab-i para hinun-anunan ang programa subong pamilya. Kon magkadto ka sa kalan-an upod sa imo mga abyan, maayo nga dal-on mo ang imo nota kag ipaambit ang pila ka punto nga nanamian mo. Pagkatapos sang kombension, maghinguyang kamo sing pila ka tion sa inyo Pangpamilya nga Pagsimba para binagbinagon kon paano ninyo iaplikar ang impormasyon nga inyo nabatian. Mahimo man ninyo binagbinagon kada semana ang pila ka bahin sang ginpagua nga publikasyon.
6. Bastante na bala nga magtambong lang kita sa kombension? Ipaathag.
6 Mangin wala sing pulos ang imo pagtambong sa sinalusalo kon indi ka magkaon. Ang pagkaon naman wala sing pulos kon indi ini matunaw. Amo man sini sa espirituwal nga sinalusalo nga ihanda sa distrito nga kombension. Kabay nga makabenepisyo kita sing bug-os paagi sa pagtambong sa tanan nga sesyon, pagpamati sing maayo, kag pag-aplikar sang aton matun-an.
Mga Pahanumdom Para sa 2013 Distrito nga Kombension
◼ Iskedyul sang Programa: Ang programa sa tatlo ka adlaw magasugod sa 8:20 sa aga. Sa sina nga tion, tanan kita dapat mapungko na agod makasugod ang programa sing mahim-ong. Ang nagatakop nga ambahanon kag pangamuyo sa Biernes kag Sabado 3:50 sa hapon kag sa Domingo 2:35 sa hapon.
◼ Pagreserba sang Pulungkuan: Mahimo lamang makareserba sing pulungkuan para sa mga kaupod ninyo sa balay ukon sa salakyan, subong man sa inyo mga ginatun-an sa Biblia.—1 Cor. 13:5.
◼ Panyaga: Palihug magbalon kamo imbes nga maggua agod magbakal sing pagkaon. Puede kamo magdala sing bulutangan sang pagkaon nga mabutang sa idalom sang inyo pulungkuan. Apang ang dalagku nga mga suludlan kag buluk-on nga mga kagamitan wala ginatugutan sa pasilidad sang kombension.
◼ Donasyon: Mapakita naton nga ginaapresyar naton ang mga kahimusan sa kombension paagi sa paghatag sing boluntaryo nga kontribusyon para sa bug-os kalibutan nga hilikuton sa duog sang kombension. Kon luyag ninyo magdonar paagi sa tseke, ipangalan ini sa “Watch Tower.”
◼ Aksidente kag Emerhensia: Kon may emerhensia sa duog sang kombension, palihug pahibalua ang pinakamalapit nga atendant, nga amo ang magapahibalo sa First Aid agod makahatag sing bulig ang kalipikado nga utod sa sini nga departamento. Kon kinahanglanon, ang aton utod sa First Aid amo ang matawag sa pinakamalapit nga ospital.
◼ Bulong: Kon nagatomar ka sing bulong nga nagakinahanglan sing reseta, palihug magdala sing bastante nga suplay kay indi ini matigayon sa duog sang kombension.
◼ Please Follow Up (S-43) nga Pormas: Dapat gamiton ang Please Follow Up nga pormas agod matatap ang bisan sin-o nga nagpakita sing interes sa di-pormal nga pagpanaksi sa tion sang kombension. Ang nasulatan nga mga pormas mahimo ihatag sa Book Room ukon sa sekretaryo sang inyo kongregasyon.
◼ Restawran: Padunggi ang ngalan ni Jehova paagi sa inyo maayo nga paggawi sa mga restawran. Magsuksok sing bayo nga nagakaigo para sa isa ka Cristiano nga ministro. Maghatag sing tip kon kinabatasan ini sa inyo lugar.
◼ Pagboluntaryo: Ang bisan sin-o nga luyag magboluntaryo dapat magreport sa Volunteer Service Department. Ang mga kabataan nga wala pa mag-16 anyos mahimo man magboluntaryo pero dapat upod ang ila ginikanan, guardian, ukon iban pa nga adulto nga ginsaligan sang ila mga ginikanan ukon guardian.