Pagbulig sa mga Indi Pa Handa Para sa Ginatudlo sang Biblia
1. Ginabaton bala dayon sang tanan ang libro nga Ginatudlo sang Biblia? Ipaathag.
1 Para ang isa mangin sumilimba ni Jehova, dapat niya anay tun-an ang mga ginatudlo sang Biblia. Pero ang iban nga indi mga Cristiano wala nagakabig sa Biblia nga Pulong sang Dios. Ang iban wala gid nagapati sa Dios kag wala sing pagtahod sa Biblia. Ano nga mga galamiton ang makabulig sa mga indi pa handa para sa libro nga Ginatudlo sang Biblia? Ang mga panugda sa ubos nabase sa mga komento sang mga manugbantala halin sa 20 ka pungsod.
2. Kon may magsiling sa aton nga wala sia nagapati sa Dios, ano ang dapat naton hibaluon kag ngaa?
2 Mga Wala Nagapati sa Dios: Kon may magsiling nga wala sia nagapati sa Dios, maayo nga hibaluon naton ang iya rason. Bangod bala nagapati sia sa ebolusyon? Nadulaan bala sia sing pagtuo sa Dios bangod sa inhustisya sa kalibutan ukon pagkasalimpapaw sang relihion? Halin bala sia sa lugar nga wala nagapati sa Dios? Mahimo wala man niya ginapanghiwala nga may Dios, pero para sa iya indi man gid kinahanglan nga magpati sa Dios. Naobserbahan sang madamo nga manugbantala nga kon mamangkot sila, “Amo gid bala sina ang imo pagpati halin sang una?” mapahulag ang isa nga magpaathag. Pamatii ang iya sabat kag indi magsaligbat. Kon maintiendihan naton kon ngaa wala sia nagapati sa Dios, mahibaluan naton kon paano magsabat kag kon ano nga publikasyon ang itanyag.—Hulu. 18:13.
3. Paano naton mapakita ang pagtahod sa ginapatihan sang tagbalay?
3 Kon nagasabat, likawi nga kontrahon ang pagtamod sang isa. Ini nga panugda naghalin sa Estados Unidos: “Importante gid nga tahuron ang ginapatihan sang mga tawo. Sa baylo nga balion ang argumento, maayo nga magpautwas sing pamangkot nga makapahunahuna sa ila agod sila mismo ang maghimo sing konklusion.” Sa tapos mabatian ang ginapatihan sang tagbalay, ang isa ka nagalakbay nga manugtatap masami nagapamangkot, “Nahunahuna mo na bala ini nga posibilidad?”
4. Paano naton mabuligan ang mga Budhista?
4 Ang kalabanan nga Budhista wala nagapati nga may Dios. Ang pila ka manugbantala sa Britanya nagagamit sing brosyur nga Lasting Peace and Happiness—How to Find Them kon nagapanaksi sa ila. Pagkatapos mabinagbinag ang introduksion, ginahinun-anunan nila ang seksion nga “Is There Really a Most High Creator?” kag “A Guidebook for the Blessing of All Mankind.” Dayon, mahimo na nila ipakita ang libro nga Ginatudlo sang Biblia kag silingon ang tagbalay, “Bisan wala ka nagapati sa Dios ang pagtuon sa Biblia makabulig sa imo bangod madamo ini sing praktikal nga giya.” Ang payunir sa Estados Unidos nga nagaalagad sa teritoryo nga may mga Intsik nagsiling: “Madamo sa amon teritoryo ang palabasa. Antes pa kami makaduaw liwat, sa masami nabasa na nila ang bug-os nga publikasyon. Pero wala sila sing ideya parte sa pagtuon sa Biblia. Gani ginatanyag ko ang brosyur nga Maayong Balita sa una nga paghambalanay bangod ginapalig-on sini nga binagbinagon ang brosyur.” Ang isa ka manugtatap sang sirkito sa Estados Unidos nga nagaalagad sa sirkito nga nagahambal sing Chinese nagreport nga puede itanyag ang libro nga Ginatudlo sang Biblia sa una nga paghambalanay. Pero, mas maayo nga sugdan ang pagtuon sa kapitulo 2, nga nagapakilala sa Biblia sa baylo nga sa kapitulo 1, nga nagabinagbinag parte sa Dios.
5. Ngaa dapat kita magpailob?
5 Nagakinahanglan sing tion para magtubo ang pagtuo sang isa sa Dios, gani dapat kita magpailob. Mahimo indi naton makumbinsi ang isa nga may Manunuga sa aton una nga paghambalanay. Pero ayhan sa ulihi, batunon niya nga mahimo posible ini, ukon ayhan magsiling sia nga nahangpan niya kon ngaa ang isa nagapati sa Dios.
6. Ngaa ang iban wala sing interes sa Biblia?
6 Mga Wala sing Interes ukon Pagsalig sa Biblia: May mga tawo naman nga nagapati sa Dios pero wala sing interes sa Biblia bangod wala sila nagapati nga Pulong ini sang Dios. Mahimo nagapuyo sila sa indi Cristiano nga lugar kag ginaangot nila ang Biblia sa Cristiandad. Ukon ayhan nagaistar sila sa lugar nga nagapangangkon nga mga Cristiano pero kulang sing interes sa relihion kag wala nagapati nga ang Biblia makabulig sa ila. Paano naton mapalambo ang ila interes sa Biblia kag sa ulihi batunon ang pagtuon sa libro nga Ginatudlo sang Biblia?
7. Ano sa masami ang maayo nga paagi para mapalambo ang interes sa Biblia?
7 Ang sanga talatapan sa Gresya nagsulat: “Ang pinakamaayo nga paagi para mabuligan ang mga wala sing interes sa Biblia amo ang pagbukas mismo sang Biblia kag ipakita ang kaundan sini. Nakita sang mga manugbantala nga mas may gahom ang mensahe sang Biblia sa tagipusuon sang tagbalay sangsa bisan ano nga butang nga mahimo nila ihambal. (Heb. 4:12) Madamo ang napahulag nga usisaon ang Biblia sang makita nila ang ngalan sang Dios diri.” Ang sanga talatapan sa India nagsulat: “Madamo nga Hindu ang interesado sa kamatuoran parte sa kabuhi kag kamatayon, kag subong man sa saad sang Biblia parte sa isa ka kalibutan nga wala sing diskriminasyon.” Ang paghinambit sa mga problema sa palibot nagahatag sing kahigayunan sa manugbantala nga ipakita ang ginasiling sang Biblia kon ano ang himuon sang Ginharian sang Dios para solbaron ini.
8. Ano ang ihambal naton sa mga tawo nga negatibo ang pagtamod sa Biblia bangod sa Cristiandad?
8 Kon negatibo ang pagtamod sang isa sa Biblia bangod sa Cristiandad, sugiri sia nga ginpatiko sang Cristiandad ang Biblia kag ang mga panudlo sini. Ang sanga talatapan sa India nagsulat: “Kon kaisa, dapat naton ipaathag sa mga tawo nga ang mga simbahan indi amo ang tagtipig sang Biblia.” Nagreport sila nga madamo nga Hindu ang nanamian sa bahin 4 sang brosyur nga Ano ang Katuyuan sang Kabuhi? Paano Mo Masapwan Ini?, nga nagapaathag kon paano ginpatiko kag gintinguhaan nga dulaon sang mga simbahan ang Pulong sang Dios. Ginasilingan naman sang isa ka payunir sa Brazil ang mga tawo: “Tilawi bala nga usisaon pa gid ang Biblia. Madamo ang nagahimo sini nga may bukas nga hunahuna, nga wala ginapilit nga magsulod sa bisan ano nga relihion. Manamian ka gid sa imo matun-an.”
9. Ngaa indi kita dayon mangampo kon sa primero ang isa indi interesado sa ginatudlo sang Biblia?
9 Ginatan-aw ni Jehova ang tagipusuon sang kada tawo. (1 Sam. 16:7; Hulu. 21:2) Ginabuyok niya ang mga interesado sa matuod nga pagsimba. (Juan 6:44) Madamo sa sini ang wala gid nakahibalo parte sa Dios ukon wala gani makabasa sing Biblia. Ang aton ministeryo nagahatag sa ila sing kahigayunan nga “maluwas kag makadangat sa sibu nga ihibalo tuhoy sa kamatuoran.” (1 Tim. 2:4) Gani indi ka mangampo kon sa primero ang pila indi interesado sa Biblia. Gamita ang galamiton nga matigayon sa imo lenguahe para palambuon ang ila interes. Sa ulihi, mahimo mo masaylo ang paghinun-anon sa aton panguna nga galamiton sa pagdumala sing pagtuon sa Biblia, ang libro nga Ano Gid ang Ginatudlo sang Biblia?
[Kahon sa pahina 5]
Tilawi ini kon ang tagbalay wala nagapati sa Biblia:
• Binagbinaga ang kapitulo 17 kag 18 sang libro nga Life—How Did It Get Here? By Evolution or by Creation?
• Para sa mga Hindu, gamita ang brosyur nga Why Should We Worship God in Love and Truth?
• Para sa mga Judiyo, gamita ang brosyur nga Will There Ever Be a World Without War?, pahina 3-11.
• Binagbinaga ang mga benepisyo sang pagsunod sa mga prinsipio sa Biblia. Ang mga publikasyon nga magamit para ipakita sa isa ang kapuslanan sang Biblia:
Serye sang Magmata! “Bulig Para sa Pamilya”
Ang video nga The Bible—Its Power in Your Life
Mga brosyur nga Maayong Balita Halin sa Dios!, leksion 9 kag 11; Isa ka Libro Para sa Tanan nga Tawo, pahina 22-26; kag Isa ka Makaalayaw nga Kabuhi—Kon Paano Ini Maagom, bahin 2
Para sa mga Budhista, gamita ang brosyur nga The Pathway to Peace and Happiness, pahina 3-7.
Para sa mga Muslim, gamita ang brosyur nga Real Faith—Your Key to a Happy Life, bahin 3.
Kon nagapanaksi ka sa lugar nga ginapakanubo ang Biblia, maayo nga hinambitan lamang ang ginhalinan sang maalamon nga laygay kon makaduaw ka na sing pila ka beses.
• Ipaathag kon paano ang mga tagna sa Biblia nagakatuman. Mahimo mo gamiton ini nga mga publikasyon:
Ang video nga The Bible—Accurate History, Reliable Prophecy
Ang brosyur nga Isa ka Libro Para sa Tanan nga Tawo, pahina 27-29
• Iliton sa libro nga Ginatudlo sang Biblia sa tion nga mamangkot ang isa kon ano ang ginatudlo sang Biblia parte sa bisan ano nga topiko.
[Kahon sa pahina 6]
Kon ang tagbalay magsiling: “Wala ako nagapati sa Dios,” mahimo ka magsiling:
• “Puede ko bala ipaathag sa imo sing malip-ot kon ano ang nagkumbinsi sa akon nga may Manunuga?” Dayon ipaambit ang mga punto sa Reasoning nga libro, pahina 84-86, ukon maghimo sing kahimusan nga dalhan sia sing publikasyon nga nanamian mo.
• “Pero kon may ara gid man Dios, ano nga mga kinaiya ang gusto mo nga ara sa iya?” Ang kalabanan nga tagbalay magasiling nga manamian sila sa Dios nga mahigugmaon, may hustisya, kag maluluy-on, isa nga wala sing ginapasulabi. Ipakita sa iya sa Biblia nga ang Dios may amo sini nga mga kinaiya. (Mahimo mo gani gamiton ang kapitulo 1 sang libro nga Ginatudlo sang Biblia sa parapo 6.)
Kon ang tagbalay magsiling: “Wala ako nagapati sa Biblia,” mahimo ka magsiling:
• “Madamo gid man ang wala nagapati sa Biblia. Ang iban nagasiling nga ang Biblia indi sibu sa siensia ukon ang talaksan sini indi praktikal. Pero nakabasa ka na gid man bala sang Biblia? [Tuguti sia nga magsabat. Dayon ipakita ang introduksion sa pahina 3 sang brosyur nga Isa ka Libro Para sa Tanan nga Tawo, kag itanyag ini.] Madamo ang wala nagapati sa Biblia bangod ginpatiko sang relihion ang mga panudlo sini. Sa sunod luyag ko binagbinagon upod sa imo ang isa ka halimbawa sa pahina 4 kag 5.”
• “Amo man sina ang pagpati sang madamo nga tawo. Pero puede ko bala ipakita sa imo kon ngaa nagadayaw ako sa Biblia? [Basaha ang Job 26:7 ukon ang Isaias 40:22, nga nagapakita nga ang Biblia sibu sa siensia.] Ang Biblia may maalamon man nga laygay nga makabulig sa mga pamilya. Sa masunod ipakita ko ini sa imo.”
• “Salamat gid sa pagsugid sina sa akon. Kon ang Dios nagsulat gid man sang libro para sa katawhan, ano sa banta mo ang unod sini?” Nian ipakita sa iya ang teksto sa Biblia nga naangot sa iya sabat.