“Magpalapit Kamo sa Dios, kag Magapalapit Sia sa Inyo”

1-3. (a) Ano ang matun-an naton parte sa kinaugali sang tawo paagi sa pagpanilag sa mga ginikanan nga nagadalodalo kag nagaulit-ulit sa ila bata? (b) Ano ang natural nga nagakatabo kon may magpakita sa aton sing gugma, kag ano ang importante nga mapamangkot naton sa aton kaugalingon?

NALIPAY ang mga ginikanan nga makita nga nagayuhum ang ila bag-o matawo nga bata. Pirme nila ginadalodalo kag ginaulit-ulit ang bata. Excited gid sila nga makita ang reaksion sang bata. Dayon, nakita nila nga naggua na ang dimple sa guya sang bata, ang iya bibig nagatulutipulon, kag makalilipay nga nagayuhum. Sa sina nga yuhum, ginabalusan sang bata ang pagpalangga sang iya mga ginikanan.

² Ang yuhum sang bata nagapahanumdom sa aton sang importante nga butang parte sa kinaugali sang tawo. Natural lang nga ginabalusan naton sang gugma ang gugma kay amo sina ang pagtuga sa aton. (Salmo 22:9) Samtang nagadaku kita, mas nakahibalo kita kon paano balusan ang gugma. Basi madumduman mo pa kon paano ka ginpalangga sang imo mga ginikanan, mga paryente, ukon mga abyan sang bata ka pa. Nabatyagan mo gid nga palangga ka nila, gani nanamian ka sa sini. Kag bangod sini nagtubo man ang imo gugma sa ila kag ginpakita mo man nga palangga mo sila. Amo man bala sini ang nagakatabo sa imo relasyon kay Jehova nga Dios?

³ Ang Biblia nagasiling: “Nagahigugma kita, bangod sia ang una nga naghigugma sa aton.” (1 Juan 4:19) Sa Seksion 1 asta 3 sini nga libro, ginpahanumdom ka nga gingamit ni Jehova nga Dios ang iya gahom, katarungan, kag kaalam sa mahigugmaon nga mga paagi para makabenepisyo ka. Kag sa Seksion 4, natun-an mo nga direkta niya nga ginpakita ang iya gugma sa mga tawo kag sa imo mismo sa dalayawon nga mga paagi. Gani may pamangkot nga posible amo ang pinakaimportante nga mapamangkot mo sa imo kaugalingon: ‘Paano ko mabalusan ang gugma ni Jehova?’

Kon Ano ang Kahulugan sang Paghigugma sa Dios

4. Ngaa indi na sigurado ang mga tawo kon ano ang kahulugan sang paghigugma sa Dios?

⁴ Si Jehova, nga Ginhalinan sang gugma, nakahibalo gid nga ang gugma may ikasarang sa pagpahulag sa mga tawo nga himuon ang pinakamaayo. Gani, bisan pa sa padayon nga pagrebelde sang indi matutom nga mga tawo, nagasalig gihapon sia nga may mga tawo nga magabalos sa iya gugma. Ang matuod, minilyon ka tawo ang naghimo sini. Pero, masubo nga bangod sa ginahimo sang mga relihion sa sining malain nga kalibutan, indi na sigurado ang mga tawo kon ano ang kahulugan sang paghigugma sa Dios. Madamo ang nagasiling nga ginahigugma nila ang Dios, pero abi nila ini nga gugma mapakita na nila paagi sa pagsiling nga ‘Palangga ko ang Dios.’ Ang gugma sa Dios mahimo nga magasugod sa sina nga paagi, pareho nga ang gugma sang bata sa iya ginikanan mahimo nga una nga ginpakita paagi sa yuhum. Pero, samtang nagadalom ang aton gugma, indi lang amo sina ang aton himuon.

5. Paano ginapaathag sang Biblia ang gugma sa Dios, kag ngaa dapat manamian kita sa sina nga kahulugan?

⁵ Ginapaathag ni Jehova kon ano ang kahulugan sang paghigugma naton sa iya. Ang iya Pulong nagasiling: “Amo ini ang kahulugan sang gugma sa Dios, nga tumanon naton ang iya mga sugo.” Kon amo, ang gugma sa Dios dapat ipakita sa aton ginahimo. Matuod, madamo ang wala nanamian sa ideya nga dapat sila magsunod. Pero ang amo gihapon nga bersikulo nagdugang pa: ‘Apang ang mga sugo sang Dios indi mabug-at.’ (1 Juan 5:3) Ang mga kasuguan kag mga prinsipio ni Jehova gindesinyo para sa aton kaayuhan, kag indi para pabudlayan kita. (Isaias 48:17, 18) Ang Pulong sang Dios puno sing mga prinsipio nga nagabulig sa aton para mangin mas malapit pa gid kita sa iya. Paano? Repasuhon naton ang tatlo ka aspekto sang aton relasyon sa Dios. Amo ini ang komunikasyon, pagsimba, kag pag-ilog sa iya.

Pagkomunikar kay Jehova

6-8. (a) Paano kita makapamati kay Jehova? (b) Paano naton mahimo ang Kasulatan nga buhi kon ginabasa naton ini?

⁶ Ang Kapitulo 1 nagabukas paagi sa pamangkot, “Maimadyin mo bala nga nagapakighambal ka sa Dios?” Natun-an naton nga indi lang ini imahinasyon. Naagihan gid ini ni Moises. Kamusta naman kita? Wala na subong nagapadala si Jehova sang iya mga anghel para makighambal sa mga tawo. Pero may pinakamaayo nga paagi si Jehova sa pagkomunikar sa aton subong. Paano si Jehova nagapakig-istorya sa aton kag paano kita makapamati sa iya?

⁷ Bangod ang “bug-os nga Kasulatan gintuytuyan sang Dios,” nagapamati kita kay Jehova paagi sa pagbasa sang iya Pulong, ang Biblia. (2 Timoteo 3:16) Gani, ginapalig-on sang salmista ang mga alagad ni Jehova nga basahon ini sa “adlaw kag gab-i.” (Salmo 1:1, 2) Nagakinahanglan ini sing daku nga panikasog pero daku gid ang benepisyo sini. Pareho sang natun-an naton sa Kapitulo 18, ang Biblia ginkumparar sa isa ka sulat halin sa aton Amay sa langit. Gani indi dapat nga rutina lang ang pagbasa sini. Dapat nga himuon naton ang Kasulatan nga buhi kon ginabasa naton ini. Paano naton ini mahimo?

⁸ Imadyina ang mga rekord sa Biblia samtang ginabasa mo ini. Imadyina ang mga karakter sang Biblia bilang matuod nga mga tawo. Hibalua ang ila ginhalinan, mga sitwasyon, kag mga motibo. Dayon, hunahunaa sing maayo ang imo ginabasa, kag pamangkuta ang imo kaugalingon pareho sang: ‘Ano ang ginatudlo sa akon sini nga rekord parte kay Jehova? Ano nga kinaiya niya ang matun-an ko? Ano nga prinsipio ang gusto ni Jehova nga matun-an ko, kag paano ko ini maaplikar sa akon kabuhi?’ Samtang ginabasa mo, ginapamalandungan, kag ginaaplikar ang Pulong sang Dios, mangin buhi ini sa imo.—Salmo 77:12; Santiago 1:23-25.

9. Sin-o “ang matutom kag mainandamon nga ulipon,” kag ngaa importante nga mamati kita sing maayo sa sini nga “ulipon”?

⁹ Si Jehova nagapakig-istorya man sa aton paagi sa “matutom kag mainandamon nga ulipon.” Pareho sang gintagna ni Jesus, isa ka gamay nga grupo sang hinaplas nga mga Cristiano nga lalaki ang gintangdo para mag-aman sing espirituwal nga “pagkaon sa nagakaigo nga tion” sa sining magamo nga katapusan nga mga adlaw. (Mateo 24:45-47) Ginapakaon kita sa espirituwal sining ulipon, kon ginabasa naton ang mga literatura nga ginhanda nila para mabuligan kita nga makakuha sing sibu nga ihibalo sa Biblia. Ginapakaon man kita kon nagatambong kita sa Cristianong mga miting kag sa mga kombension. Bangod ulipon ini sang Cristo, ginasunod gid naton ang ginsiling ni Jesus: “Talupangda ninyo kon paano kamo nagapamati.” (Lucas 8:18) Nagapamati kita sing maayo bangod ginakilala naton nga ang matutom nga ulipon isa sa mga ginagamit ni Jehova sa pagkomunikar sa aton.

10-12. (a) Ngaa ang pangamuyo isa ka dalayawon nga regalo halin kay Jehova? (b) Paano makapalipay kay Jehova ang aton pangamuyo, kag ngaa makasalig kita nga ginapabaloran niya ini?

¹⁰ Pero kamusta naman ang pagkomunikar sa Dios? Makapakig-istorya bala kita kay Jehova? Daw makahaladlok gid ini kon pamensaran naton. Kon tinguhaan mo nga magpalapit sa pinakamataas nga manuggahom sa inyo pungsod para makighambal sa iya parte sa imo personal nga mga problema, may tsansa bala nga maistorya mo sia? Sa pila ka sitwasyon, mahimo nga delikado ini! Sang panahon ni Ester kag ni Mardoqueo, ang isa ka tawo mahimo ipapatay kon magpalapit sia sa hari sang Persia nga wala ginpatawag sang hari. (Ester 4:10, 11) Imadyina nga nagpalapit ka sa Soberanong Ginuo sang uniberso. Kon ikumparar sa Iya, bisan ang pinakagamhanan nga mga tawo daw “mga tibakla” lang. (Isaias 40:22) Mahadlok man bala kita magpalapit sa iya? Indi gid!

¹¹ Ginaagda kita ni Jehova nga makig-istorya sa iya, kag naghatag sia sing simple nga paagi para mahimo naton ini. Amo ina ang pagpangamuyo. Bisan gani ang gamay nga bata puede makapangamuyo kay Jehova nga may pagtuo, nga ginahimo ini paagi sa ngalan ni Jesus. (Juan 14:6; Hebreo 11:6) Kon nagapangamuyo kita masugid naton kay Jehova bisan ang daw indi naton mahangpan nga mga panghunahuna kag mga balatyagon, pati man ang masakit nga balatyagon nga daw indi naton mapabutyag. (Roma 8:26) Wala gid sang pulos kon maggamit kita sang indi kinaandan, mabinalaybayon, ukon bulakbulak nga mga tinaga kon nagapangamuyo kita kay indi ina gusto ni Jehova. (Mateo 6:7, 8) Pero, wala ginalimitehan ni Jehova kon kada san-o ukon kon daw ano kalawig kita makig-istorya sa iya. Ginaagda pa gani kita sang Iya Pulong nga ‘padayon nga magpangamuyo.’—1 Tesalonica 5:17.

¹² Dumduma nga si Jehova lang ang ginatawag nga “Manugpamati sang pangamuyo,” kag nagapamati sia nga may empatiya. (Salmo 65:2) Kabug-atan bala sa iya nga pamatian ang mga pangamuyo sang iya matutom nga mga alagad? Indi. Ang matuod, nalipay gid sia sa sini. Sa iya Pulong, ini nga mga pangamuyo ginakumparar sa incienso, nga nagapatub-ok sing mahumot kag makapasulhay nga aso. (Salmo 141:2; Bugna 5:8; 8:4) Makapaumpaw gid hunahunaon nga ang aton sinsero nga mga pangamuyo nagapaibabaw kag nagapalipay sa Soberanong Ginuo. Gani kon gusto mo mangin malapit kay Jehova, mapainubuson nga mangamuyo sa iya sing madamo nga beses, kada adlaw. Ibubo ang imo tagipusuon sa iya kag indi magduhaduha nga isugid sa iya ang imo ginabatyag. (Salmo 62:8) Isugid ang imo mga kabalaka, kalipay, pasalamat, kag pagdayaw sa imo Amay sa langit. Kon himuon mo ini, mas magabakod ang inyo relasyon.

Pagsimba kay Jehova

13, 14. Ano ang buot silingon sang pagsimba kay Jehova, kag ngaa dapat gid naton himuon ini?

¹³ Kon nagakomunikar kita kay Jehova nga Dios, indi ini pareho sang aton pagpamati kag pagpakighambal sa isa ka abyan ukon paryente. Ang matuod, ginasimba naton si Jehova kag ginahatag sa iya ang pagpadungog kag pagtahod nga nagakadapat gid sa iya. Ang matuod nga pagsimba amo ang aton bug-os nga pagkabuhi. Sa sini nga paagi, ginapabutyag naton kay Jehova ang aton bug-os kalag nga gugma kag debosyon. Ginahiusa man sini ang tanan nga matutom nga mga tinuga ni Jehova, sa langit man ukon sa duta. Sa isa ka palanan-awon, nabatian ni apostol Juan ang isa ka anghel nga nagapahibalo sini nga sugo: “Simbaha ninyo ang Isa nga naghimo sang langit, duta, dagat, kag mga tuburan sang tubig.”—Bugna 14:7.

¹⁴ Ngaa dapat naton simbahon si Jehova? Hunahunaa ang mga kinaiya nga nabinagbinag naton, pareho sang pagkabalaan, gahom, pagpugong sa kaugalingon, katarungan, kaisog, kaluoy, kaalam, pagkamapainubuson, gugma, kaawa, pagkamainunungon, kag kaayo. Natun-an naton nga ginapakita ni Jehova ang kada isa sining matahom nga mga kinaiya sa pinakamaayo nga paagi. Kon aton hangpon kon paano ginapakita ni Jehova ang tanan niya nga kinaiya sa sarisari nga paagi, maathag sa aton nga indi lang sia isa ka daku kag dalayawon nga Persona. Kundi, dalayawon gid sia kag tuman kataas kon ikumparar sa aton. (Isaias 55:9) Indi maduhaduhaan nga may kinamatarong gid si Jehova bilang aton nga Soberano, kag nagakadapat gid sia simbahon. Pero, paano naton dapat simbahon si Jehova?

15. Paano naton masimba si Jehova “sa espiritu kag kamatuoran,” kag ano nga kahigayunan ang ginahatag sa aton sang Cristianong mga miting?

¹⁵ Si Jesus nagsiling: “Ang Dios Espiritu, kag ang mga nagasimba sa iya dapat magsimba sa espiritu kag kamatuoran.” (Juan 4:24) Para masimba ang Dios “sa espiritu,” dapat ara sa aton ang iya espiritu kag ginagiyahan kita sini. Ang aton pagsimba dapat nabase man sa kamatuoran, nga amo ang sibu nga ihibalo nga makita sa Pulong sang Dios. May makalilipay kita nga kahigayunan nga simbahon si Jehova “sa espiritu kag kamatuoran” kon nagatipon kita upod sa aton mga kauturan. (Hebreo 10:24, 25) Kon nagakanta kita sing mga pagdayaw kay Jehova, updanay nga nagapangamuyo sa iya, kag nagapamati kag nagakomento kon ginabinagbinag ang iya Pulong, ginasimba naton sia sa paagi nga gusto niya.

16. Ano ang isa sang pinakaimportante nga sugo sa matuod nga mga Cristiano, kag ngaa dapat naton ini tumanon?

¹⁶ Ginasimba man naton si Jehova kon ginadayaw naton sia paagi sa pagsugid sa iban parte sa iya. (Hebreo 13:15) Ang matuod, ang isa sa pinakaimportante nga sugo sa matuod nga mga Cristiano amo ang pagbantala sing maayong balita sang Ginharian ni Jehova. (Mateo 24:14) Nalipay gid kita nga magtuman sini bangod ginahigugma naton si Jehova. Kabalo kita kon paano “ginbulag sang dios sini nga sistema sang mga butang,” nga si Satanas nga Yawa, ‘ang mga hunahuna sang mga indi tumuluo.’ Ginahimo niya ini paagi sa pagpalapta sing mga kabutigan kontra kay Jehova. Kon hunahunaon naton ini, nalipay gid kita nga mangin mga Saksi para sa aton Dios, kay may kahigayunan kita nga matadlong ini nga kabutigan. (2 Corinto 4:4; Isaias 43:10-12) Kag kon pamalandungan naton ang matahom nga mga kinaiya ni Jehova, gusto gid naton nga sugiran ang iban parte sa aton dalayawon nga Dios. Wala na sing daku pa nga pribilehiyo sangsa buligan ang iban nga makilala kag higugmaon ang aton Amay sa langit pareho sa ginahimo naton.

17. Ano ang nalakip sa aton pagsimba kay Jehova, kag ngaa dapat kita magsimba nga may integridad?

¹⁷ Pero indi lang amo sina ang nalakip sa aton pagsimba kay Jehova bangod apektado ang tanan nga bahin sang aton kabuhi. (Colosas 3:23) Kon matuod gid nga ginakilala naton si Jehova bilang aton Soberanong Ginuo, ginatinguhaan gid naton nga himuon ang iya kabubut-on sa tanan nga butang. Nalakip sa sini ang aton ginahimo kon upod naton ang aton pamilya, kon nagatrabaho kita, kon nagapakig-angot sa iban, kag kon nagaisahanon kita. Magatinguha kita nga alagdon si Jehova “sing bug-os tagipusuon,” nga may integridad. (1 Cronica 28:9) Buot silingon, ang aton tagipusuon wala natunga ukon wala kita nagakabuhi sing doble-kara. Wala kita nagapakunokuno nga nagaalagad kay Jehova kag sa amo man nga tion sekreto nga nagahimo sing mabug-at nga mga sala. Bangod ginaalagad naton si Jehova sing bug-os tagipusuon, indi gid naton ini mahimo. Kag bangod palangga naton sia, ini nga butang makangilil-ad gid para sa aton. Makabulig man ang kahadlok sa Dios. Ginasugid sang Biblia nga ang may tudok lang nga pagtahod kay Jehova ang puede niya mangin suod nga mga abyan.—Salmo 25:14.

Pag-ilog kay Jehova

18, 19. Ngaa masiling naton nga puede mailog sang indi perpekto nga mga tawo si Jehova nga Dios?

¹⁸ Ang kada seksion sini nga libro nagatapos paagi sa kapitulo nga nagabinagbinag kon paano kita ‘mangin manug-ilog sa Dios, subong mga anak nga hinigugma.’ (Efeso 5:1) Importante nga dumdumon nga bisan pa indi kita perpekto, mailog gid naton ang perpekto nga paggamit ni Jehova sing gahom, ang iya pagpakita sing katarungan, paghikot sing maalamon, kag ang pagpakita sing gugma. Paano naton nahibaluan nga posible gid nga mailog ang Labing Gamhanan? Dumduma nga ang kahulugan sang ngalan ni Jehova nagatudlo sa aton nga puede sia mangin bisan ano nga luyag niya para tumanon ang iya mga katuyuan. Nagadayaw gid kita sa sini nga ikasarang, pero imposible bala nga mailog si Jehova? Indi.

¹⁹ Ginhimo kita sa larawan sang Dios. (Genesis 1:26) Gani, lain gid ang mga tawo sa iban nga mga tinuga sa duta. Wala lang kita ginapahulag sang aton natural nga mga ikasarang, sang ginpanubli nga mga ikasarang, ukon sang mga butang sa aton palibot. Ginhatagan kita ni Jehova sing isa ka hamili nga regalo nga amo ang kahilwayan sa pagdesisyon. Bisan pa sang aton mga limitasyon kag bisan indi kita perpekto, hilway kita sa pagpili kon ano ang gusto naton. Kag dumduma nga ang ngalan sang Dios nagakahulugan man nga kon luyag niya, puede niya himuon nga mangin bisan ano ang iya mga alagad. Gani, gusto mo bala mangin isa ka mahigugmaon, maalamon, kag makatarunganon nga tawo nga nagagamit sang imo ikasarang sa husto nga paagi? Sa bulig sang espiritu ni Jehova, mahimo mo ina! Pamensara ang kaayuhan nga mabaton mo kon himuon mo ini.

20. Ano ang mahimo naton kon ginailog naton si Jehova?

²⁰ Mapahamut-an mo ang imo Amay sa langit, gani malipay ang iya tagipusuon. (Hulubaton 27:11) Puede mo pa gani ‘mapahamut-an sing bug-os’ si Jehova, kay nahangpan niya ang imo mga limitasyon. (Colosas 1:9, 10) Kag samtang padayon mo nga ginapakita ang maayo nga mga kinaiya bilang pag-ilog sa imo hinigugma nga Amay, makabaton ka sing daku nga pribilehiyo bilang pagpakamaayo. Ikaw ang magasugid sang kapawa sang kamatuoran sa mga tawo sa sining madulom nga kalibutan nga wala nakakilala sa Dios. (Mateo 5:1, 2, 14) Mapakita mo ang matahom nga mga kinaiya ni Jehova sa iban kag mabuligan sila nga makita kon ano sia ka dalayawon nga Dios. Isa gid ini ka kadungganan!

“Magpalapit Kamo sa Dios, kag Magapalapit Sia sa Inyo”

21, 22. Ano ang wala katapusan nga paglakbay ang himuon sa palaabuton sang tanan nga nagahigugma kay Jehova?

²¹ Ang simple nga laygay nga narekord sa Santiago 4:8 indi lang isa ka tulumuron. Isa ini ka paglakbay. Kon nagapabilin kita nga matutom, indi gid matapos ini nga paglakbay. Indi gid kita mag-untat sa pagpalapit kay Jehova. Ang isa ka rason amo nga indi maubos ang aton matun-an parte sa iya. Indi gid naton paghunahunaon nga gintudlo sini nga libro ang tanan parte kay Jehova. Ginsugdan pa lang naton ang pagbinagbinag sa tanan nga ginasiling sang Biblia parte sa aton Dios! Kag wala ginasugid bisan sang Biblia ang tanan nga dapat naton mahibaluan parte kay Jehova. Si apostol Juan nagsiling nga kon ginsulat ang tanan nga ginhimo ni Jesus sa tion sang iya ministeryo sa duta, “indi mag-igo sa kalibutan ang mga linukot nga ginsulat.” (Juan 21:25) Kon amo sini ang ginsiling parte sa Anak, daw ano pa gid ang parte sa Amay!

²² Bisan pa mabuhi kita sing wala katapusan, indi gihapon matapos ang aton pagtuon parte kay Jehova. (Manugwali 3:11) Gani, hunahunaa ang nagahulat sa aton sa palaabuton. Kon mabuhi na kita sing ginatos, linibo, minilyon, kag binilyon pa gani ka tuig, mas madamo pa ang matun-an naton kay Jehova nga Dios sangsa subong. Pero magabatyag kita gihapon nga madamo pa gid kita sang matun-an nga makatilingala nga mga butang parte sa iya. Malipay gid kita sa pagtuon sing dugang pa, kay may rason kita pirme sa pagbatyag pareho sang salmista nga nag-amba: “Para sa akon, maayo nga magpalapit sa Dios.” (Salmo 73:28) Indi gid naton maimadyin kon ano katahom ang kabuhi sa paraiso. Dugang pa, ang pagpalapit kay Jehova amo gid ang pinakamaayo nga bahin sini.

23. Ano ang ginapalig-on nga himuon mo?

²³ Kabay nga balusan mo ang gugma ni Jehova, paagi sa paghigugma sa iya sa bug-os mo nga tagipusuon, kalag, hunahuna, kag kusog. (Marcos 12:29, 30) Kabay nga ang imo gugma mangin mainunungon kag mabakod. Kabay nga ang mga desisyon nga ginahimo mo kada adlaw, halin sa pinakagamay asta sa pinakadaku, magapakita nga ginagiyahan ka sang imo handum nga pabakuron ang imo relasyon sa imo Amay sa langit. Labaw sa tanan, kabay nga magapalapit ka pa gid kay Jehova, kag kabay nga sia magapalapit man sa imo asta sa wala sing katapusan!