Kada tuig, madamo nga pamatan-on nga nagdaku sa pamilya sang mga Saksi ni Jehova ang nagapabawtismo. Ginapamensar mo man bala nga magpabawtismo? Kon huo, dapat mo anay maintiendihan kon ano ang dedikasyon kag bawtismo.

• Ano ang bawtismo?

• Ano ang dedikasyon?

• Ngaa importante ang bawtismo?

• Ang ginasiling sang iban

• Ang sala nga pagpati kag ang matuod

Ano ang bawtismo?

Sa Biblia, ang bawtismo amo ang pagtum-oy ukon pagpasalop sang bilog nga lawas sa tubig kag indi ini pagwisik lang. Importante katama ang kahulugan sang bawtismo.

• Ang pagtum-oy ukon pagpasalop sa tubig sa tion sang bawtismo, nagakahulugan nga ginapakita mo sa iban nga indi ka na magakabuhi para lang himuon ang gusto mo.

• Ang pagbutwa sa tubig sa tion sang bawtismo, nagakahulugan nga ginapakita mo sa iban nga magakabuhi ka na para himuon ang gusto sang Dios.

Paagi sa pagpabawtismo, ginapakita mo sa tanan nga ginakilala mo nga si Jehova ang may awtoridad nga magsiling kon ano ang husto kag sala, kag nagapromisa ka nga himuon ang iya gusto sa tanan nga tion.

Pamensari ini: Ngaa gusto mo ipabalo sa iban nga nagdesisyon ka nga tumanon si Jehova sa bug-os mo nga kabuhi? Basaha ang 1 Juan 4:19 kag Bugna 4:11.

Ano ang dedikasyon?

Antes ka magpabawtismo, kinahanglan mo anay idedikar ang imo kaugalingon kay Jehova. Paano?

Sa imo personal nga pangamuyo, nagapromisa ka kay Jehova nga alagaron mo sia asta san-o. Nagapromisa ka man nga himuon mo ang iya gusto bisan ano man ang matabo, kag bisan ano man ang himuon sang iban.

Paagi sa pagpabawtismo, ginapakita mo sa tanan nga gindedikar mo na ang imo kabuhi kay Jehova. Ginapahibalo mo man sa iban nga indi na ikaw ang may kinamatarong sa imo kaugalingon kag si Jehova na ang nagapanag-iya sa imo.—Mateo 16:24.

Pamensari ini: Ngaa mangin mas maayo ang imo kabuhi kon si Jehova na ang nagapanag-iya sa imo? Basaha ang Isaias 48:17, 18 kag Hebreo 11:6.

Ngaa importante ang bawtismo?

Si Jesus nagsiling nga dapat magpabawtismo ang tanan nga gusto mangin disipulo niya. (Mateo 28:19, 20) Asta subong, ang gusto mangin Cristiano dapat man magpabawtismo. Ang matuod, ang Biblia nagasiling nga ang bawtismo kinahanglan para sa kaluwasan.—1 Pedro 3:21.

Pero, magapabawtismo ka bangod palangga mo si Jehova kag ginapabaloran mo ang imo kaangtanan sa iya. Ang imo motibo dapat pareho sa isa ka manunulat sang salmo. Nagsiling sia: “Ano bala ang ibalos ko kay Jehovasa tanan nga kaayo nga ginhimo niya sa akon? . . . Magapanawag ako sa ngalan ni Jehova. Tumanon ko ang akon mga panaad kay Jehova.”—Salmo 116:12-14.

Pamensari ini: Ano nga kaayo ang ginpakita ni Jehova sa imo, kag paano mo sia mabalusan? Basaha ang Deuteronomio 10:12, 13 kag Roma 12:1.

Posible nga ginasunod mo na ang mga kasuguan nga ara sa Biblia kag nagapakig-abyan ka na sa Dios. Gani natural lang nga pamensaron mo ang parte sa pagpabawtismo. Pero paano mo mabal-an nga handa ka na nga magpabawtismo?a

Sa sini nga artikulo

• Daw ano kadamo ang dapat ko mabal-an?

• Ano ang dapat ko nga himuon?

• Ang ginasiling sang iban

Daw ano kadamo ang dapat ko mabal-an?

Para mabawtismuhan ka, indi buot silingon nga sauluhon mo ang tanan nga kamatuoran, pareho sang ginahimo sang isa ka estudyante para makapasar sia sa eksam sa eskwelahan. Pero dapat mo gamiton ang imo “ikasarang sa pagpangatarungan” para mangin kumbinsido ka pa gid nga matuod ang mga ginatudlo sang Biblia. (Roma 12:1) Halimbawa:

• Nagapati ka gid bala nga may Dios kag dapat mo sia simbahon?

  Ang ginasiling sang Biblia: “Ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.”—Hebreo 11:6.

  Pamangkuta ang imo kaugalingon: ‘Ngaa nagapati ako nga may Dios?’ (Hebreo 3:4) ‘Ngaa dapat ko gid sia simbahon?’—Bugna 4:11.

  Dugang nga impormasyon: Tan-awa ang “Creation Ukon Evolution?—Bahin 1: Ngaa Dapat Magpati nga May Dios?”

• Nagapati ka gid bala nga ang ginasiling sang Biblia halin sa Dios?

  Ang ginasiling sang Biblia: “Ang pagsulat sa bug-os nga Kasulatan gintuytuyan sang Dios kag mapuslanon sa pagpanudlo, sa pagsabdong, sa pagtadlong, sa pagdisiplina sa pagkamatarong.”—2 Timoteo 3:16.

  Pamangkuta ang imo kaugalingon: ‘Ngaa nagapati ako nga indi ideya sang mga tawo ang mabasa ko sa Biblia?’—Isaias 46:10; 1 Tesalonica 2:13.

  Dugang nga impormasyon: Tan-awa ang “Paano ang Biblia Makabulig sa Akon?—Bahin 1: Mangin Pamilyar sa Imo Biblia”

• Nagapati ka gid bala nga ginagamit ni Jehova ang Cristianong kongregasyon para matuman ang iya kabubut-on?

  Ang ginasiling sang Biblia: “Takus [ang Dios] himayaon paagi sa kongregasyon kag paagi kay Cristo Jesus, sa tanan nga kaliwatan tubtob sa wala sing katubtuban.”—Efeso 3:21.

  Pamangkuta ang imo kaugalingon: ‘Para sa akon, ang mga natun-an ko bala sa Biblia sa mga miting sa kongregasyon pagtudlo halin sa mga tawo ukon pagtudlo halin kay Jehova?’ (Mateo 24:45) ‘Naga-attend bala ako sa mga miting bisan pa wala ang akon mga ginikanan (kon ginapasugtan ka nila nga ikaw lang)?’—Hebreo 10:24, 25.

  Dugang nga impormasyon: Tan-awa ang “Ngaa Dapat Ako Mag-attend sa Kingdom Hall?”

Ano ang dapat ko nga himuon?

Indi buot silingon nga mangin perpekto ka gid para mabawtismuhan. Pero, dapat mo ipakita nga gusto mo gid ‘likawan ang malain, kag himuon ang maayo.’ (Salmo 34:14) Halimbawa:

• Ginasunod mo bala ang mga sugo ni Jehova?

  Ang ginasiling sang Biblia: “Hupti ninyo ang maayo nga konsiensia.”—1 Pedro 3:16.

  Pamangkuta ang imo kaugalingon: ‘Paano ko mapakita nga ang akon ‘mga ikasarang sa paghangop nahanas nga makilala ang maayo kag malain?’ (Hebreo 5:14) ‘May mga sitwasyon bala nga bisan pa ginapilit ako sang iban nga maghimo sing malain, wala ko ini ginhimo? Ang akon bala mga abyan nagabulig sa akon nga himuon ang insakto?’—Hulubaton 13:20.

  Dugang nga impormasyon: Tan-awa ang “Paano Ko Hanason ang Akon Konsiensia?”

• Naintiendihan mo bala nga bisan ano man ang imo ginahimo may salabton ka kay Jehova?

  Ang ginasiling sang Biblia: “Ang kada isa sa aton manabat sa Dios.”—Roma 14:12.

  Pamangkuta ang imo kaugalingon: ‘Honest bala ako sa akon kaugalingon kag sa iban?’ (Hebreo 13:18) ‘Ginaako ko bala ang akon mga sala ukon ginatago ko ini ukon ginabasol ko ini sa iban?’—Hulubaton 28:13.

  Dugang nga impormasyon: Tan-awa ang “Paano Ko Atubangon ang Akon mga Sala?”

• Ginatinguhaan mo bala nga padayon nga mangin malapit kay Jehova?

  Ang ginasiling sang Biblia: “Magpalapit kamo sa Dios, kag magapalapit sia sa inyo.”—Santiago 4:8.

  Pamangkuta ang imo kaugalingon: ‘Ano ang ginahimo ko para mangin mas malapit ako kay Jehova?’ Halimbawa, ‘Kada san-o ko ginabasa ang Biblia?’ (Salmo 1:1, 2) ‘Pirme bala ako nagapangamuyo?’ (1 Tesalonica 5:17) ‘Ginasugid ko bala ang tanan sa akon mga pangamuyo? Ang akon bala mga abyan, abyan man ni Jehova?’—Salmo 15:1, 4.

  Dugang nga impormasyon: Tan-awa ang “Paano ang Biblia Makabulig sa Akon?—Bahin 2: Kon Paano Ma-enjoy ang Pagbasa sing Biblia” kag “Ngaa Dapat Ako Mangamuyo?”

TIP: Para mabal-an ang mga dapat mo himuon antes mabawtismuhan, basaha ang kapitulo 37 sang libro nga Questions Young People Ask—Answers That Work, Volume 2. Gamita ang worksheet sa pahina 308 kag 309.

Nakulbaan ka bala nga idedikar ang imo kaugalingon kay Jehova kag magpabawtismo? Kon huo, mabuligan ka sini nga artikulo nga madaug ang imo kahadlok.

Sa sini nga artikulo

• Ano abi kon makahimo ako sing mabug-at nga sala sa tapos ako mabawtismuhan?

• Ano ang himuon ko kon nahadlok ako sa mga responsibilidad kon mabawtismuhan na ako?

• Ano ang himuon ko kon nagabatyag ako nga indi ako takus sa pag-alagad kay Jehova?

• Ang ginasiling sang iban

Ano abi kon makahimo ako sing mabug-at nga sala sa tapos ako mabawtismuhan?

Kon ngaa mahimo ginapensar mo ini: Posible nga may kilala ka nga ginsikway sa kongregasyon kay nakahimo sia sing mabug-at nga sala. (1 Corinto 5:11-13) Nagakabalaka ka kay basi matabo man ini sa imo.

“Sang ginapamensaran ko nga magpabawtismo, nakulbaan ako kay basi makasala ako sa tapos ako mabawtismuhan. Kon matabo ina, sigurado nga mahuy-an gid ang akon mga ginikanan.”—Rebekah.

Teksto nga makabulig sa imo: “Magbiya ang malauton sa iya dalanon . . . Magbalik sia kay Jehova, nga magakaluoy sa iya, sa aton Dios nga nagapatawad sing bugana.”—Isaias 55:7.

Pamensari ini: Ginasikway sa kongregasyon ang mga nakasala nga wala naghinulsol. Pero dumduma nga kon ang isa mapainubuson nga maghinulsol kag batunon niya ang disiplina, kaluuyan sia ni Jehova.—Salmo 103:13, 14; 2 Corinto 7:11.

Dumduma man ini nga kamatuoran: Bisan pa indi ka perpekto, mabatuan mo ang pagsulay nga maghimo sing sala paagi sa bulig sang Dios. (1 Corinto 10:13) Kay man, sin-o bala ang nagadesisyon kon ano ang imo himuon? Ikaw ukon ang iban nga tawo?

“Nahadlok ako kay basi makasala ako sa tapos ako mabawtismuhan. Pero na-realize nga kon indi ako magpabawtismo, nakasala na gali ako. Na-realize ko man nga indi ko dapat pagpasugtan ang akon kahadlok sa posible matabo sa palaabuton, nga magpugong sa akon nga himuon ang dapat ko himuon subong.”—Karen.

Ang punto: Kon gustuhon mo, malikawan mo nga makahimo sang mabug-at nga sala, pareho sa ginhimo sang kalabanan nga alagad ni Jehova.—Filipos 2:12.

Dugang pa nga impormasyon: Tan-awa ang artikulo nga “Paano Ko Mabatuan ang Pagsulay?”

Ano ang himuon ko kon nahadlok ako sa mga responsibilidad kon mabawtismuhan na ako?

Kon ngaa mahimo ginapensar mo ini: Halimbawa, mahimo may kilala ka nga mga pamatan-on nga nagsaylo sa malayo nga lugar kag ginbayaan ang ila pamilya para dugangan ang ila mahimo sa pag-alagad kay Jehova. Nagakabalaka ka kay basi amo man ina ang ginapaabot sang mga tawo nga himuon mo.

“Puede dugangan sang isa ka bawtismado nga Cristiano ang iya mahimo sa pag-alagad kay Jehova. Pero ang iban nga tawo indi pa handa nga himuon ini bangod sa ila sitwasyon.”—Marie.

Teksto nga makabulig sa imo: “Dapat usisaon sang kada isa ang iya kaugalingon nga hinimuan, kag kon makita niya nga maayo ini magkalipay sia, apang indi niya dapat pag-ipaanggid ini sa hinimuan sang iban.”—Galacia 6:4.

Pamensari ini: Indi pag-ikumparar ang imo mahimo sa mahimo sang iban. Sa baylo, pamensari ang ginsiling sang Marcos 12:30: “Higugmaa si Jehova nga imo Dios sa bug-os mo nga tagipusuon.”

Talupangda nga nagsiling ini nga dapat mo higugmaon si Jehova sa bug-os mo nga tagipusuon, indi paagi sa tagipusuon sang iban. Kon palangga mo gid si Jehova, tinguhaan mo gid nga himuon ang bug-os mo nga masarangan nga alagaron sia.

“Matuod, isa gid man ka serioso nga desisyon ang pagpabawtismo, pero wala ini nagapabudlay sang imo kabuhi. Makig-upod ka sa maayo nga mga tawo kay buligan ka gid nila. Samtang amat-amat mo nga ginadugangan ang imo mahimo sa pag-alagad, mas nagadugang man ang imo kalipay. Kon indi ka magpabawtismo, ginahalitan mo lang ang imo kaugalingon.”—Julia.

Ang punto: Pasalamati si Jehova bangod sa pagpalangga niya sa imo. Magabulig ini sa imo nga himuon ang imo bug-os nga masarangan para sa iya.—1 Juan 4:19.

Dugang pa nga impormasyon: Tan-awa ang artikulo nga “Responsable Gid Bala Ako?”

Ano ang himuon ko kon nagabatyag ako nga indi ako takus sa pag-alagad kay Jehova?

Kon ngaa mahimo ginapensar mo ini: Si Jehova ang Soberano sa uniberso, gani walawala gid ang tawo kon ikumparar sa iya! Mahimo nagapalibog ka kon bala kabalo si Jehova nga nagakabuhi ka sa kalibutan.

“Mga Saksi ni Jehova ang akon mga ginikanan. Gani ginapamensar ko nga abyan lang ako ni Jehova bangod sa ila kag basi wala ’ko ’ya ginbuyok ni Jehova.”

Teksto nga makabulig sa imo: “Wala sing tawo nga makakari sa akon kon indi sia pagbuyukon sang Amay nga nagpadala sa akon.”—Juan 6:44.

Pamensari ini: Kon ginapamensaran mo nga magpabawtismo, mahimo nga ginapakita sini nga ginbuyok ka ni Jehova para mas mangin suod ka pa gid niya nga abyan. Gusto mo bala batunon ang iya imbitasyon sa imo?

Dumduma man nga si Jehova ang nagadesisyon, indi ikaw ukon ang bisan sin-o, kon sin-o ang iya buyukon. Kag ginapasalig ka sang iya Pulong nga kon ‘magpalapit ka sa Dios, magapalapit sia sa imo.’—Santiago 4:8.

“Dumduma nga kon kilala mo si Jehova kag suod ka sa iya, pamatuod ina nga palangga ka niya. Gani kon ginapensar mo nga daw indi ka takus sa pag-alagad sa iya, i-remind ang imo kaugalingon nga wala nagaugyon sa sini si Jehova. Kag dumduma nga husto pirme si Jehova.”—Selina.

Ang punto: May mga ginapatuman ang Biblia nga kinahanglan sundon sang isa nga gusto magpabawtismo. Kon ginahimo mo na ini, kalipikado ka na nga magsimba kay Jehova. Kag dumduma nga takus sia sang imo pagsimba.—Bugna 4:11.

Dugang pa nga impormasyon: Tan-awa ang artikulo nga “Ngaa Dapat Ako Mangamuyo?”