1, 2. Ano ang natalupangdan sang mga manugtatap sang sirkito sa madamo nga kongregasyon?

MANUGTAPOS na ang miting sang manugtatap sang sirkito sa hubon sang mga gulang. Samtang ginatulok niya sila, nakabatyag sia sing daku nga pagpalangga sa sining mapisan nga mga manugbantay, ang iban sa ila daw amay na niya. Pero nabalaka man sia, amo nga ginpamangkot niya sila, “Ti mga utod, ano ang ginhimo ninyo para hanason ang iban para sa responsibilidad sa kongregasyon?” Nadumduman nila ang ginpalig-on sa ila sina nga manugtatap sang sirkito sa iya nagligad nga pagduaw parte sa paghanas sa iban. Sang ulihi, ang isa ka gulang nagsiling, “Ang matuod, daw wala pa namon ina mahimo.” Nagtangotango ang tanan nga gulang.

² Kon isa ikaw ka Cristianong gulang, mahimo amo man sina ang imo sabat. Natalupangdan sang mga manugtatap sang sirkito sa bilog nga kalibutan nga madamo ang kongregasyon nga wala nagahanas sang mga utod nga lalaki, bata man ukon tigulang, para makabulig sa pag-atipan sang panong. Mahimo nga mabudlay ini. Ngaa?

3. (a) Paano ginapakita sang Kasulatan nga importante ang paghanas, kag ngaa dapat tanan kita mangin interesado sa sini? ( Tan-awa ang foot­note.) (b) Ngaa daw nabudlayan ang pila ka gulang sa paghanas sa iban?

³ Bilang manugbantay sang panong, narealisar mo nga importante ang paghanas sa iban.a Nahibaluan mo nga kinahanglan ang dugang nga mga utod nga lalaki para mangin malig-on sa espirituwal ang mga kongregasyon kag para may matukod nga bag-o nga mga kongregasyon. (Basaha ang Isaias 60:22.) Nahibaluan mo man nga ang Pulong sang Dios nagapalig-on sa imo nga ‘tudluan ang iban.’ (Basaha ang 2 Timoteo 2:2.) Pero bisan amo pa sini, nabudlayan ka gihapon nga himuon ini pareho sang mga gulang nga ginsambit bag-o lang. Daw wala ka na gid sing tion para hanason ang iban bangod sa pag-atipan sang imo pamilya, obra, mga responsibilidad sa kongregasyon, kag iban pa nga hilingagawon. Kon amo sini, binagbinagon naton kon daw ano ka importante ang paghanas sa iban.

PRIORIDAD ANG PAGHANAS

4. Ano mahimo ang rason kon ngaa ginapaiway kon kaisa ang paghanas?

⁴ Ano ayhan ang rason kon ngaa ang pila ka gulang nabudlayan sa pagpangita sing tion para hanason ang iban? Mahimo ang iban magahunahuna: ‘Importante ang paghanas, pero indi gid ini hilingagawon kon ipaanggid sa pila ka hilikuton sa kongregasyon. Kon indi ko anay paghanason ang iban, manghikot pa man ang kongregasyon.’ Bisan pa matuod nga ang pila ka butang dapat atipanon dayon, ang pagpaiway sa paghanas makahalit sa espirituwalidad sang kongregasyon.

5, 6. Ano ang matun-an naton sa halimbawa sang drayber kag sa iya pagtamod sa pagmentinar sang makina, kag paano ini maaplikar sa paghanas sa kongregasyon?

⁵ Binagbinaga ini nga halimbawa: Mahimo nahibaluan sang drayber nga para mangin maayo ang iya salakyan, dapat regular niya ini nga islan sing asayte. Pero mahimo magbatyag sia nga indi gid ini hilingagawon pareho sa pagpatughong sang gasolina. Kay indi maglakat ang salakyan kon wala gasolina. ‘Kon wala ako sing tion sa pag-ilis sing asayte,’ mahimo pangatarungan niya, ‘madalagan gihapon ang salakyan.’ Pero ano ang katalagman? Kon pirme ipaiway sang drayber ang pagmentinar sang makina, maabot ang tion nga indi na ini mag-andar. Kag kon matabo ini, daku nga kuarta kag tion ang kinahanglan agod kay-uhon ini. Ano ang leksion?

⁶ Ang mga gulang nagaatipan dayon sang madamo nga importante nga hilikuton; kay kon indi, malain gid ang epekto sini sa kongregasyon. Gani pareho sang drayber sa halimbawa nga dapat pirme magpatughong, ang mga gulang dapat ‘magpat-od sang mas importante nga mga butang.’ (Fil. 1:​10) Pero, ang pila ka gulang tama kasako sa ­pag-atipan sang hilingagawon nga mga butang nga malipatan na nila ang paghanas sa iban​—kon sa aton pa, ang pagmentinar sang makina. Pero kon pirme ipaiway sang mga gulang ang kinahanglanon nga paghanas, maabot ang tion nga wala na sing kalipikado nga mga utod nga lalaki nga magaatipan sa tanan nga dapat himuon sa kongregasyon.

7. Paano naton dapat tamdon ang mga gulang nga nagahatag sing tion sa paghanas sa iban?

⁷ Maathag kon amo nga dapat naton tamdon nga prioridad ang paghanas. Ang mga gulang nga nagahanda kag nagahinguyang sing tion sa paghanas sa indi eksperiensiado nga mga utod nga lalaki maalam nga mga tulugyanan kag isa ka pagpakamaayo sa bug-os nga kongregasyon. (Basaha ang 1 Pedro 4:​10.) Paano makabenepisyo ang kongregasyon?

MAAYO NGA PAGGAMIT SING TION

8. (a) Ano ang mga rason nga dapat hanason sang mga gulang ang iban? (b) Ano ang hilingagawon nga responsibilidad sang mga gulang nga nagaalagad kon diin may mas daku nga kinahanglanon? ( Tan-awa ang kahon nga “Ang Dapat Gid Himuon.”)

⁸ Dapat mapainubuson nga batunon bisan sang eksperiensiado gid nga mga gulang nga indi na sila makapanghikot sing maayo sa kongregasyon kon magtigulang na sila. (Miq. 6:8) Dapat man nila dumdumon nga “ang tion kag ang wala ginapaabot nga hitabo” mahimo gulpi lang magpabag-o sang ila ikasarang sa pag-atipan sa mga responsibilidad sa kongregasyon. (Man. 9:​11, 12; Sant. 4:​13, 14) Gani bangod sa pag-ulikid gid sa kaayuhan sang mga karnero ni Jehova, ang mga gulang nagapanikasog nga itudlo sa mas lamharon nga mga utod nga lalaki ang ila natun-an sa ila tinuig nga pag-alagad.​—Basaha ang Salmo 71:​17, 18.

9. Importante ang paghanas sa iban bangod sang ano nga hitabo sa palaabuton?

⁹ Ano pa ang rason nga pagpakamaayo sa panong ang mga gulang nga nagahanas sa iban? Ginapabakod nila ang kongregasyon. Paano? Ang panikasog sang mga gulang nga hanason ang iban magaresulta sa madamo pa nga utod nga lalaki nga handa magbulig para mangin malig-on kag nahiusa ang kongregasyon, indi lamang subong kundi ilabi na sa mabudlay nga tion sa dakung kapipit-an. (Ezeq. 38:​10-​12; Miq. 5:​5, 6) Gani, ginapangabay namon kamo pinalangga nga mga gulang nga himuon nga regular nga bahin sang inyo ministeryo ang paghanas sa iban subong gid.

10. Para may tion sa paghanas sa iban, ano ang puede nga himuon sang gulang?

¹⁰ Siempre, nahangpan namon nga nagabatyag ka nga wala ka na sing tion bangod sang imo pag-atipan sa importante nga mga hilikuton sa kongregasyon. Pero mahimo mo gamiton ang pila sina nga tion sa paghanas sa iban. (Man. 3:1) Maalamon ini nga himuon.

PAGHANDA SA TAGIPUSUON SANG GINAHANAS

11. (a) Ano ang talalupangdon sa mga panugda sang mga gulang sa nagkalainlain nga lugar parte sa paghanas? (b) Suno sa Hulubaton 15:​22, ngaa mapuslanon nga binagbinagon ining mga panugda sang iban nga gulang?

¹¹ Sining karon lang, ginpamangkot ang isa ka grupo sang mga gulang nga nagmadinalag-on sa pagbulig sa mga utod nga lalaki nga magtubo sa espirituwal kon ano ang ila ginhimo sa paghanas sa iban.b Bisan pa nagkalainlain ang mga kahimtangan sining mga utod, halos palareho ang ila sabat. Ano ang ginapakita sini? Nga ang paghanas base sa Biblia magamit sa mga ginahanas “sa tagsa ka kongregasyon bisan diin”​—pareho sang panahon ni apostol Pablo. (1 Cor. 4:​17) Gani sa sini nga artikulo kag sa masunod, binagbinagon naton ang pila nila ka panugda.—Hulu. 15:22.

12. Ano ang dapat himuon sang nagahanas, kag ngaa?

¹² Dapat ihanda sang nagahanas ang tagipusuon sang iya ginahanas. Pareho sang paghanda sang hardinero sa duta antes niya itanom ang mga binhi, dapat man ihanda ukon palig-unon sang nagahanas ang tagipusuon sang iya ginahanas, antes tudluan sang bag-o nga mga ikasarang. Gani paano niya ini himuon? Paagi sa pag-ilog sa ginhimo sang isa ka manalagna sadto. Ano ini?

13-15. (a) Ano nga asaynment ang nabaton ni manalagna Samuel? (b) Paano ginhimo ni Samuel ang iya asaynment? (Tan-awa ang piktyur sa umpisa sini nga artikulo.) (c) Ngaa dapat mangin interesado gid ang mga gulang subong sa rekord sang Biblia parte kay Samuel?

¹³ Isa ka adlaw, kapin sa 3,000 ka tuig ang nagligad, ginsilingan ni Jehova ang tigulang nga manalagna nga si Samuel: “Mga amo man sini nga oras buas, pakadtuon ko sa imo ang isa ka lalaki halin sa duta sang Benjamin. Haplasan mo sia bilang lider sang akon katawhan nga Israel.” (1 Sam. 9:​15, 16) Nahibaluan ni Samuel nga matapos na ang iya papel subong lider kag ginsugo sia ni Jehova nga haplasan ang mabulos sa iya. ‘Ano ang himuon ko para mahanas sia?,’ mahimo palibog ni Samuel. May napensaran sia nga plano.

¹⁴ Sang masunod nga adlaw, sang nakita ni Samuel si Saul, ginsilingan ni Jehova ang manalagna: “Amo ini ang lalaki.” Ginsunod dayon ni Samuel ang iya plano. Gin-agda niya si Saul nga magkaon. Ginpapungko niya si Saul kag ang kabulig sini sa pinakamaayo nga pulungkuan kag ginhatag ang pinakamaayo nga hiniwa sang karne kag nagsiling: “Magkaon ka, bangod gintigana ini para sa imo sa sini nga okasyon.” Pagkatapos sini, nagkadto sanday Samuel kag Saul sa balay sang manalagna, nga nagahambalanay. Luyag hingalitan ni Samuel ang maayo nga kahimtangan, ang manamit nga pagkaon kag ang matawhay nga paglakat. Gani gin-agda niya si Saul nga magsaka sa iya atop. Sa mabugnaw nga huyop sang hangin sa kagab-ihon, “nagpakighambal pa si Samuel kay Saul sa atop sang balay” asta nga nagtulog sila. Sang masunod nga adlaw, ginhaplasan niya si Saul, ginhalukan ini, kag ginhatagan pa gid sing dugang nga instruksion. Pagkatapos sini, ginpapauli niya si Saul​—nga handa na sa maabot nga mga hitabo.​—1 Sam. 9:​17-​27; 10:1.

¹⁵ Siempre, ang paghaplas sa isa nga mangin lider sang isa ka pungsod indi pareho sa paghanas sa isa ka utod para mangin gulang ukon ministeryal nga alagad sa kongregasyon. Pero may pila ka mapuslanon nga leksion nga matun-an ang mga gulang sa ginhimo ni Samuel. Binagbinagon naton ang duha sini.

HANDA NGA MGA MANUGHANAS KAG MATUOD NGA MGA ABYAN

16. (a) Ano ang ginbatyag ni Samuel sang nangabay ang Israel sang hari? (b) Ano ang panimuot ni Samuel sang ginhimo niya ang iya asaynment nga haplasan si Saul?

¹⁶ Mangin handa, indi magpangalag-ag. Sang nabatian primero ni Samuel nga luyag sang mga Israelinhon ang isa ka tawhanon nga hari, nasubuan sia kag nagbatyag nga ginsikway sang iya katawhan. (1 Sam. 8:​4-8) Ang matuod, nagpaganot sia sa luyag sang mga tawo amo nga tatlo ka beses sia nga ginsilingan ni Jehova nga magpamati sa ila. (1 Sam. 8:​7, 9, 22) Pero wala niya gindumtan ang mabulos sa iya. Sang ginsugo sia ni Jehova nga haplasan si Saul, nagtuman ang manalagna, indi nga napilitan, kundi sing kinabubut-on bangod sang gugma.

17. Paano ginailog sang mga gulang subong ang panimuot ni Samuel, kag ano ang ginabatyag nila sa sini?

¹⁷ Pareho ni Samuel, palangga man sang eksperiensiado nga mga gulang subong ang ila ginahanas. (1 Ped. 5:2) Ini nga mga gulang wala nagapangalag-ag nga hanason ang iban kay basi buslan sila sa pila ka pribilehiyo sa kongregasyon. Ginatamod sang mahigugmaon nga mga manughanas ang handa nga mga ginahanas, indi subong kompetensia, kundi subong “mga masigkamanugpangabudlay”​—subong hamili nga regalo sa kongregasyon. (2 Cor. 1:​24; Heb. 13:16) Kag nalipay gid ang mga nagahanas kon makita nila nga ginagamit sang mga ginahanas ang ila ikasarang para buligan ang kongregasyon!​—Binu. 20:35.

18, 19. Paano mahanda sang gulang ang tagipusuon sang iya ginahanas, kag ngaa importante ini?

¹⁸ Mangin isa ka abyan, kag indi lang manughanas. Sang adlaw nga nakita ni Samuel si Saul, mahimo kuntani nga ginkuha niya dayon ang tibod sang lana, ginbubo ini gilayon sa ulo ni Saul, kag ginpalakat sia subong bag-o nga hari​—nahaplasan na pero indi pa handa. Sa baylo, mainayuhon nga ginhatagan ni Samuel sing tion ang amat-amat nga paghanda sa tagipusuon ni Saul. Pagkatapos nila makakaon sing magkaupod, makalakatlakat, makaistoryahanay sing malawig, kag makapahuway sing maayo, amo pa lang kag nabatyagan sang manalagna nga nagakaigo na ang tion sa paghaplas kay Saul.

¹⁹ Sing kaanggid, mahimo sugdan sang nagahanas sa karon ang paghanas sa iban paagi sa pagpahamtang sang relaks nga palibot kag makigsuod sa ginahanas. Ang dapat himuon sang gulang para magluntad ining suod nga kaangtanan mahimo lainlain sa kada lugar, depende sa lokal nga mga kahimtangan kag kustombre. Pero bisan diin ka man nagapuyo, kon maghinguyang ka sing tion sa imo ginahanas bisan masako ka pa, daw pareho lang nga ginsilingan mo sia, “Importante ka sa akon.” (Basaha ang Roma 12:10.) Ini nga mensahe mahangpan gid kag mapabaloran sang mga ginahanas bisan diin.

20, 21. (a) Paano mo ilaragway ang madinalag-on nga manughanas? (b) Ano ang binagbinagon sa masunod nga artikulo?

²⁰ Dumduma ninyo nga mga gulang: Ang madinalag-on nga manughanas wala lamang nanamian maghanas kundi nagapalangga man sa iya ginahanas. (Ipaanggid ang Juan 5:​20.) Ining importante nga panimuot sang nagahanas mamutikan dayon sang iya ginahanas kag may daku gid nga epekto sa reaksion niya sa paghanas sa iya. Gani pinalangga nga mga gulang, samtang nagahanas kamo sa iban, indi lamang mangin manunudlo kundi mangin abyan man.​—Hulu. 17:17; Juan 15:15.

²¹ Pagkatapos mahanda ang tagipusuon sang ginahanas, luyag sang gulang nga itudlo sa iya ang kinahanglanon nga mga ikasarang. Ano nga mga pamaagi ang himuon sang gulang? Binagbinagon ini sa masunod nga artikulo.

1. (a) Ano ang madugay na nga nahangpan sang mga alagad sang Dios parte sa paghanas, kag paano ini naaplikar subong? (b) Ano ang binagbinagon naton sa sini nga artikulo?

MADUGAY na nga nahangpan sang mga alagad sang Dios nga kinahanglan ang paghanas agod magmadinalag-on. Si patriarka Abram ‘nagtipon sang iya mga tinawo nga hanas sa pagpakig-away’ para luwason si Lot, kag nagmadinalag-on sila. (Gen. 14:​14-​16) Sang panahon ni Hari David, ang mga manug-amba sa balay sang Dios “nahanas sa pag-amba kay Jehova” kag nagdayaw sa Dios. (1 Cron. 25:7) Sa karon, nagapakig-away kita sa espirituwal batok kay Satanas kag sa iya mga sumulunod. (Efe. 6:​11-​13) Subong man, nagapanikasog gid kita sa pagdayaw kay Jehova. (Heb. 13:​15, 16) Gani, pareho sang mga alagad sang Dios sadto, dapat nahanas kita agod magmadinalag-on. Sa kongregasyon, ginhatag ni Jehova sa mga gulang ang responsibilidad sa paghanas sa iban. (2 Tim. 2:2) Ano nga mga paagi ang ginagamit sang eksperiensiado nga mga gulang sa paghanas sa mga utod nga lalaki para mangin kalipikado sa pag-atipan sa panong?

PALIG-UNA SA ESPIRITUWAL ANG GINAHANAS

2. Antes tudluan ang ginahanas sang pila ka ikasarang, ano ang puede himuon sang gulang, kag ngaa?

² Subong gulang, mahimo ka mapaanggid sa isa ka hardinero. Antes magtanom sang mga binhi, mahimo nakita sang hardinero nga dapat abonohan ang duta agod magtambok. Sing kaanggid, antes magtudlo sa indi pa eksperiensiado nga utod nga lalaki sang pila ka ikasarang, mahimo mahantop mo nga dapat magpaambit sa iya sang makapalig-on nga mga teksto sa Biblia para batunon niya ang paghanas sa iya.​—1 Tim. 4:6.

3. (a) Paano magamit sa pagsugilanon sa ginahanas ang ginsiling ni Jesus sa Marcos 12:​29, 30? (b) Ano ang mahimo nga epekto sang pangamuyo sang gulang sa ginahanas?

³ Para mahibaluan kon asta diin ang impluwensia sang kamatuoran sa panghunahuna kag buhat sang ginahanas, mahimo pamangkuton mo sia, ‘Paano ginbag-o sang imo dedikasyon kay Jehova ang paggamit mo sang imo kabuhi?’ Mahimo ini sundan sang maayo nga paghambalanay kon paano mangin bug-os kalag sa sagrado nga pag-alagad. (Basaha ang Marcos 12:​29, 30.) Mahimo nga pagkatapos sina nga paghambalanay, magapangamuyo ka, nga nagapangabay kay Jehova nga hatagan niya ang ginahanas sing balaan nga espiritu para matapos niya ang paghanas. Makapalig-on gid ini sa utod nga mabatian ang imo hanuot nga pangamuyo para sa iya!

4. (a) Maghatag sing mga halimbawa sa Biblia nga magapauswag sang espirituwalidad sang ginahanas. (b) Ano ang tulumuron sang mga gulang sa paghanas sa iban?

⁴ Sa una nga bahin sang paghanas, binagbinaga ang pila ka rekord sa Biblia nga makabulig sa ginahanas nga dapat sia mangin handa, masaligan, kag mapainubuson. (1 Hari 19:​19-​21; Neh. 7:2; 13:13; Binu. 18:​24-​26) Ini nga mga kinaiya kinahanglanon sang ginahanas pareho sang abono sa duta. Magapadasig ini sang iya pag-uswag sa espirituwal. Si ­Jean-­Claude nga gulang sa Pransia nagsiling: “Ang una nga tulumuron ko sa paghanas sa isa ka utod amo ang pagbulig sa iya nga mangin mahunahunaon sa espirituwal. Nagapangita ako sing kahigayunan nga makabasa kami sing teksto para ‘mabuksan ang mata’ sang ginahanas sa ‘maayo gid nga mga butang’ sa Pulong sang Dios.” (Sal. 119:18) Ano pa ang pila ka paagi nga mapalig-on ang ginahanas?

MAGPANUGDA SANG MGA TULUMURON​—MAGHATAG SANG MGA RASON

5. (a) Daw ano ka importante nga hambalan upod sa ginahanas ang espirituwal nga mga tulumuron? (b) Ngaa dapat hanason sang mga gulang ang mga lamharon pa? (Tan-awa ang footnote.)

⁵ Pamangkuta ang ginahanas, ‘Ano ang imo espirituwal nga mga tulumuron?’ Kon wala, buligi sia nga maghimo sing isa nga malab-ot niya. Isugid sa iya ang imo sadto tulumuron, kag ang nabatyagan mo nga kalipay sang nalab-ot mo ini. Simple ini nga pamaagi pero epektibo. Si Vic­tor nga isa ka gulang kag payunir sa Aprika nagsiling: “Sang lamharon pa ako, ginpamangkot ako sang gulang parte sa akon mga tulumuron. Nagbulig ini sa akon nga hunahunaon sing maayo ang akon ministeryo.” Ginapadaku man sang eksperiensiado nga mga gulang nga importante ang paghanas sa mga utod nga lalaki samtang lamharon pa sila​—samtang tin-edyer pa​—paagi sa paghatag sa ila sing mga asaynment sa kongregasyon nga bagay sa ila edad. Ining temprano nga paghanas magabulig sa mga lamharon nga magpokus sa espirituwal nga mga tulumuron kon medyo maghamtong na sila kag nagaatubang sang tuman kadamo nga tublag.​—Basaha ang Salmo 71:​5, 17.a

6. Ano ang importante nga paagi ni Jesus sa paghanas sa iban?

⁶ Mahimo madugangan mo pa ang handum sang ginahanas nga mag-alagad paagi sa pagpaathag sa iya indi lang kon ano ang himuon kundi subong man kon ngaa himuon ini. Kon ginahatagan mo sia sing mga rason, ginailog mo ang Daku nga Manunudlo, si Jesus. Halimbawa, antes ginsugo ni Jesus ang iya mga apostoles nga maghimo sing mga disipulo, ginhatagan niya sila sing rason kon ngaa dapat sila magtuman. Sia nagsiling: “Ginhatag sa akon ang bug-os nga awtoridad sa langit kag sa duta.” Nian nagdugang sia: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko.” (Mat. 28:​18, 19) Paano mo ­mailog ang paagi ni Jesus sa paghanas sa iban?

7, 8. (a) Paano mailog subong sang mga gulang ang paagi ni Jesus sa paghanas? (b) Daw ano ka importante nga komendahan ang ginahanas? (c) Ano nga mga panugda ang makabulig sa mga gulang sa paghanas sa iban? (Tan-awa ang kahon nga “Kon Paano Hanason ang Iban.”)

⁷ Kon may ginapahimo ka sa isa ka utod, ipaathag sa iya paagi sa Biblia kon ngaa importante ini. Paagi sa sini mabuligan mo sia nga maghunahuna pasad sa mga prinsipio sa Biblia. Halimbawa, ginpangabay mo ang utod nga lalaki nga tinluan kag hawanan ang alagyan pakadto sa Kingdom Hall. Puede mo binagbinagon sa iya ang Tito 2:​10 kag ipaathag kon paano ang iya ginahimo sa pagpatahom sang Kingdom Hall ‘nagapatahom sang panudlo sang aton Manluluwas, ang Dios.’ Subong man, pangabaya ang ginahanas nga hunahunaon niya ang mga tigulang sa kongregasyon kag kon paano sila makabenepisyo sa iya asaynment. Ini nga paghambalanay upod sa ginahanas magabulig sa iya nga magpokus sa mga tawo sangsa mga kasuguan. Malipay sia kon makita niya nga nakabenepisyo ang mga kauturan sa kongregasyon bangod sang iya ginahimo.

⁸ Dugang pa, indi pagkalimti nga komendahan ang ginahanas sa pagtinguha niya nga iaplikar ang imo mga panugda. Daw ano ini ka importante? Ang sinsero nga komendasyon sa ginahanas daw pareho sa epekto sang tubig sa tanom​—magatubo ini.​—Ipaanggid ang Mateo 3:​17.

DUGANG NGA HANGKAT

9. (a) Kon parte sa paghanas, ano nga hangkat ang naatubang sang mga gulang sa manggaranon nga mga pungsod? (b) Ngaa indi prioridad sa pila ka lamharon nga utod nga lalaki ang kamatuoran?

⁹ Ang mga gulang sa manggaranon nga mga pungsod may dugang nga hangkat: kon paano mapahulag ang bawtismado nga mga utod nga lalaki nga beintehon ukon treintahon ang edad nga manghikot sa kongregasyon. Ginpamangkot namon ang eksperiensiado nga mga gulang sa mga 20 ka pungsod sa Nakatundan kon ano sa banta nila ang rason nga ang pila ka lamharon nga mga utod nga lalaki nagapangalag-ag nga magbaton sing mga pribilehiyo sa kongregasyon. Amo ini ang sabat sang kalabanan: Samtang nagahamtong sila, wala sila ginapalig-on nga maglab-ot sing espirituwal nga mga tulumuron. Ang matuod, sa pila ka hitabo, ang mga pamatan-on nga may huyog nga magpahamtang sining mga tulumuron ang ginpalig-on sang ila mga ginikanan nga unahon ang sekular nga mga tulumuron! Indi prioridad sa sini nga mga lamharon ang kamatuoran.​—Mat. 10:24.

10, 11. (a) Paano amat-amat nga mabuligan sang gulang ang utod nga lalaki nga daw wala sing gana sa paglab-ot sing pribilehiyo? (b) Ano nga mga teksto sa Biblia ang mabinagbinag sang gulang upod sa sini nga utod, kag ngaa? (Tan-awa ang footnote.)

¹⁰ Kon ang utod nga lalaki daw wala sing gana sa paglab-ot sing pribilehiyo, ang pagbag-o sang iya panghunahuna nagakinahanglan sing panikasog kag pagpailob, pero mahimo ini. Pareho sang hardinero nga amat-amat nga nagatadlong sang tanom, amat-amat mo man nga mabuligan ang pila ka utod nga bag-uhon ang ila panimuot kag batunon nila ang mga pribilehiyo. Pero paano?

¹¹ Maghinguyang sing tion nga makig-­abyan sa utod nga lalaki. Pahibalua sia nga kinahanglanon sia sa kongregasyon. Pagligad sang tion, mangatarungan upod sa iya sa pila ka teksto kag buligi sia nga maghunahuna parte sa iya dedikasyon kay Jehova. (Man. 5:4; Isa. 6:8; Mat. 6:​24, 33; Luc. 9:​57-​62; 1 Cor. 15:58; 2 Cor. 5:​15; 13:5) Mahimo pamangkuton mo sia, ‘Ano ang imo ginsaad kay Jehova sang nagdedikar ka sa iya?’ Tilawi nga pahulagon ang iya tagipusuon paagi sa pagpamangkot, ‘Ano sa banta mo ang ginbatyag ni Jehova sang ginbawtismuhan ka?’ (Hulu. 27:11) ‘Ano ang ginbatyag ni Satanas?’ (1 Ped. 5:8) Indi pagpakadiutaya ang epekto sa utod nga lalaki kon basahon mo sa iya ang pila ka ginpili sing maayo nga mga teksto sa Biblia.­—Basa­ha ang Hebreo 4:​12.b

MGA GINAHANAS, MAGMATUTOM KAMO

12, 13. (a) Ano nga panimuot ang ginpakita ni Eliseo samtang ginahanas? (b) Ano ang padya ni Jehova kay Eliseo bangod sa iya katutom?

¹² Mga lamharon nga utod nga lalaki, kinahanglan gid sang kongregasyon ang inyo bulig! Ano nga panimuot ang kinahanglan ninyo para magmadinalag-on? Para masabat ini, binagbinagon naton ang pila ka hitabo sa kabuhi sang isa nga ginhanas sang una.

¹³ Halos 3,000 ka tuig na ang nagligad, gin-agda ni manalagna Elias ang pamatan-on nga si Eliseo nga mangin iya suluguon. Ginbaton dayon ini ni Eliseo kag matutom nga nag-alagad sa tigulang paagi sa magagmay nga mga hilikuton. (2 Hari 3:​11) Pagkatapos sang anom ka tuig nga paghanas, nahibaluan ni Eliseo nga manugtapos na ang hilikuton ni Elias sa Israel. Sini nga tion, ginpalig-on ni Elias ang iya nahanas sing maayo nga kaupod nga indi na magsunod sa iya, pero tatlo ka beses nga ginsilingan ni Eliseo si Elias: “Indi ako magbulag sa imo.” Determinado sia nga mag-upod sa naghanas sa iya tubtob posible. Gani ginpadyaan ni Jehova si Eliseo sa iya katutom paagi sa pagpakita sa iya kon paano nagbiya sing makatilingala si Elias.​—2 Hari 2:​1-​12.

14. (a) Paano subong mailog sang mga ginahanas si Eliseo? (b) Ngaa importante gid nga magmatutom ang ginahanas?

¹⁴ Paano mo mailog si Eliseo subong? Batuna dayon ang mga asaynment, lakip ang magagmay nga mga hilikuton. Tamda ang nagahanas sa imo nga abyan, kag ihambal sa iya nga ginaapresyar mo ang iya ginahimo. Daw pareho lang nga nagsiling ka sa iya: “Indi ako magbulag sa imo.” Labaw sa tanan, mangin matutom sa imo asaynment. Ngaa importante ini? Kay kon mapakita mo nga matutom ka kag masaligan, amo lamang nga mapat-od sang mga gulang nga luyag ka ni Jehova tugyanan sing dugang nga mga responsibilidad sa kongregasyon.​—Sal. 101:6; basaha ang 2 Timoteo 2:2.

MAGPAKITA SING PAGTAHOD

15, 16. (a) Paano nagpakita sing pagtahod si Eliseo sa naghanas sa iya? (Tan-awa ang piktyur sa umpisa sini nga artikulo.) (b) Ano ang ginhimo ni Eliseo nga nagsalig sa iya ang iban nga manalagna?

¹⁵ Ang natabo kay Eliseo, nga nagbulos kay Elias, nagapakita man kon paano ang mga utod nga lalaki subong makapakita sing pagtahod sa eksperiensiado nga mga gulang. Pagkatapos maduaw nanday Elias kag Eliseo ang grupo sang mga manalagna sa Jerico, nagkadto sila sa Suba Jordan. Didto, “gin-uba ni Elias ang iya kunop. Ginlukot niya ini kag ginhampak sa tubig kag natunga ang tubig.” Pagkatapos makatabok sa mamala nga duta, padayon sila nga “nagahambalanay” samtang nagalakat. Maathag nga wala maghunahuna si Eliseo nga nahibaluan na niya ang tanan. Asta nga nagbiya si Elias, ginpamatian gid ni Eliseo ang ginhambal sang naghanas sa iya. Nian gindala sang buhawi si Elias sa kalangitan. Sang ulihi, sang nagbalik si Eliseo sa Jordan, ginhampak niya ang kunop ni Elias sa tubig, nga nagasinggit: “Diin si Jehova nga Dios ni Elias?” Natunga liwat ang tubig.​—2 Hari 2:​8-​14.

¹⁶ Natalupangdan mo bala nga ang una nga milagro ni Eliseo pareho gid sa katapusan nga milagro ni Elias? Ngaa talalupangdon ini? Maathag nga wala magbatyag si Eliseo nga bangod sia na ang nagbulos, dapat bag-uhon niya dayon ang mga pamaagi. Sa baylo, paagi sa pagpadayon sang pamaagi ni Elias, gintahod ni Eliseo ang naghanas sa iya, amo nga ginsaligan man sia sang iban nga manalagna. (2 Hari 2:​15) Pero sang ulihi, sa 60 ka tuig nga pag-alagad ni Eliseo subong manalagna, gintugutan sia ni Jehova nga maghimo sing mas madamo nga milagro sangsa kay Elias. Ano ang leksion para sa inyo nga mga ginahanas subong?

17. (a) Paano mailog sang mga ginahanas subong ang panimuot ni Eliseo? (b) Sa ulihi, paano mahimo gamiton ni Jehova ang matutom nga mga ginhanas?

¹⁷ Indi kamo dapat magbatyag nga kon makabaton na kamo sing responsibilidad sa kongregasyon, dapat bag-uhon ninyo ang pamaagi nga tuhay gid sa naandan na. Ang pagbag-o nagadepende indi sa imo handum, kundi sa mga kinahanglanon sang kongregasyon kag sa panuytoy nga mabaton naton sa organisasyon ni Jehova. Subong sang ginhimo ni Eliseo nga ginpadayon niya ang pamaagi ni Elias amo nga nagsalig sa iya ang iban nga manalagna kag ginpakita niya ang pagtahod sa ginbuslan niya, mahimo man ninyo mapasalig ang inyo mga masigkatumuluo kag mapakita ang pagtahod sa eksperiensiado nga mga gulang paagi sa pagpadayon sang ila mga pamaagi nga suno sa Biblia. (Basaha ang 1 Corinto 4:​17.) Pero samtang nagadugang ang inyo eksperiensia, mahimo ninyo ini gamiton sa pagbag-o nga makabulig agod makadungan ang kongregasyon sa nagauswag nga organisasyon ni Jehova. Ang matuod, pareho sa natabo kay Eliseo, sa ulihi si Jehova magapahulag sa inyo, kamo nga matutom nga mga ginahanas, nga manghikot sing labaw pa sa mga naghanas sa inyo.​—Juan 14:12.

18. Ngaa importante gid subong ang paghanas sa mga utod nga lalaki sa mga kongregasyon?

¹⁸ Nagalaum kami nga ang mga panugda sa sini nga artikulo kag sa nagligad magapahulag sa madamo pa nga gulang nga hatagan sing tion ang paghanas sa iban. Kabay pa nga batunon sang kalipikado nga mga utod nga lalaki ini nga paghanas kag gamiton ini sing maalamon samtang nagabulig sa pag-atipan sa mga karnero ni Jehova. Paagi sa sini, mangin malig-on ang mga kongregasyon sa bug-os nga kalibutan kag mabuligan kita tanan nga mangin matutom sa importante nga tion sa ulihi.