NAHIBALUAN MO BALA?

Ano ang kahulugan sang termino nga “eunuco” sa Biblia?

Kon kaisa, ginagamit ini nga tinaga sa pagpatuhoy sa lalaki nga ginkapon. Sa Biblia, ang pila ginakapon sadto bilang silot sa ila ukon sa pagpakita nga bihag sila ukon ulipon. Ang mga ginasaligan nga mga lalaki nga ginkapon nagatatap sang mga kuarto sang babayi ukon kerida sa harianon nga pamilya. Halimbawa, ang mga eunuco nga sanday Hegai kag Saasgas nag-alagad subong manugbantay sang mga asawa kag mga babayi ni Hari Ahasuero sang Persia, nga mahimo amo si Xerxes I.—Ester 2:3, 14.

Pero indi tanan nga ginatawag nga eunuco sa Biblia nakapon. Ang pila ka iskolar nagsiling nga ginagamit man ini nga termino sa pagpatuhoy sa mga opisyal nga nagaalagad sa palasyo sang hari. Mahimo nga amo sini si Ebed-melec, nga kaupod ni Jeremias, kag ang wala ginhingalanan nga Etiopianhon nga ginbantalaan ni Felipe. Mataas gid ang posisyon ni Ebed-melec kay puede sia makighambal kay Hari Sedequias. (Jeremias 38:7, 8) Kag ang Etiopianhon ginalaragway nga amo ang manugdumala sang bahandi sang hari nga ‘nagkadto sa Jerusalem agod magsimba.’—Binuhatan 8:27.

Ngaa ginapain sang mga manugbantay ang mga karnero sa mga kanding sa panahon sang Biblia?

Sa paglaragway sang paghukom sa palaabuton, si Jesus nagsiling: “Kon ang Anak sang tawo mag-abot sa iya himaya, . . . painpainon niya ang katawhan, subong sang manugbantay nga nagapain sang mga karnero sa mga kanding.” (Mateo 25:​31, 32) Ngaa ginapain sang literal nga mga manugbantay ini nga mga sapat?

Ang mga karnero kag mga kanding ginatipon agod maghalab sing ululupod sa aga. Pagkagab-⁠i, ginapasulod sila sa mga toril para maamligan sila sa mabangis nga mga sapat, sa mga makawat, kag kon matugnaw ang tiempo. (Genesis 30:​32, 33; 31:​38-​40) Wala ginaupod ining duha ka sahi sang sapat sa isa ka toril agod maamligan ang mahagop nga mga karnero, ilabi na gid ang mga karnero nga babayi kag ang mga kordero, sa mas agresibo nga mga kanding. Ginapain man sang mga manugbantay ang mga karnero sa mga kanding sa tion sang “pagpanganak, pagpagatas, kag pagpang-alot,” siling sang libro nga All Things in the Bible. Ginbase ni Jesus ini nga ilustrasyon sa kahimtangan nga pamilyar ang mga manugpalamati sa pagbantay sing mga karnero subong sang sa dumaan nga Israel.