Paano Dapat Trataron sang mga Saksi ni Jehova ang Ila Anay mga Kaupod sa Ila Relihion?

Ginatinguhaan gid namon nga trataron ang tanan sing mapinalanggaon, mainayuhon, kag may respeto. Kon ang isa sa mga Saksi ni Jehova indi na aktibo ukon nag-untat na sa iya pagsimba, ginatinguhaan namon nga istoryahon sia, ginapasalig nga palangga sia namon, kag ginabuligan nga mangin suod liwat sa Dios.—Lucas 15:4-7.

May mga tion nga posible may mahimo ang isa nga mangin rason nga sikwayon sia sa kongregasyon. (1 Corinto 5:13) Pero, bangod palangga gid namon ang amon mga kauturan, ginatinguhaan anay namon nga buligan sia para indi sia kinahanglan sikwayon. Kag bisan pa nasikway na sia, palangga gihapon namon sia kag ginarespeto, pareho sang ginatudlo sang Biblia.—Marcos 12:31; 1 Pedro 2:17.

Kon ngaa ginasikway ang isa sa kongregasyon

Maathag gid nga ginasiling sang Biblia nga kon makahimo sing serioso nga sala ang isa ka Cristiano kag indi sia gusto magbag-o, dapat sia sikwayon sa kongregasyon.a (1 Corinto 5:11-13) Ginasugid sang Biblia kon ano ang serioso nga mga sala nga mangin rason nga sikwayon ang isa. Halimbawa sini amo ang pagpakighilahi, pagpahubog, pagpatay, pagpang-abuso sa miembro sang pamilya, kag pagpangawat.—1 Corinto 6:9, 10; Galacia 5:19-21; 1 Timoteo 1:9, 10.

Pero, wala namon dayon ginasikway sa kongregasyon ang isa nga nakahimo sing serioso nga sala. Ginatinguhaan anay sang mga gulangb sa kongregasyon nga buligan sia nga magbag-o. (Roma 2:4) Ginahimo nila ini nga may kaluoy, kalulo, kag kaayo. (Galacia 6:1) Posible mapahulag sini ang nakahimo sang sala nga makamarasmas sa nahimo niya nga sala kag maghinulsol. (2 Timoteo 2:24-26) Pero kon padayon niya gihapon nga ginahimo ang iya sala kag wala nagahinulsol bisan pa sulitsulit sia nga ginabuligan sang mga gulang, dapat sia sikwayon sa kongregasyon. Dayon, ipahibalo sang mga gulang sa kongregasyon nga ini nga tawo indi na isa ka Saksi ni Jehova.

Duha ka gulang sa kongregasyon nga mainayuhon nga nagabasa sang mga teksto sa Biblia sa isa ka pamatan-on nga lalaki. Ang isa sa mga gulang nagatapik sang abaga sang pamatan-on nga lalaki samtang nagaistorya sila. — Ginapanikasugan gid sang mga gulang nga mangin maluluy-on, malulo, kag mainayuhon kon ginapalig-on nila ang nakasala nga magbag-o

Ano ang maayo nga resulta kon ginasikway ang isa ka tawo nga padayon nga nagahimo sang sala? Una, masunod gid sang kongregasyon ang talaksan sang Dios sa katinlo sa moral kag proteksion ini sa malain nga impluwensia sina nga tawo. (1 Corinto 5:6; 15:33; 1 Pedro 1:16) Ikaduha, posible nga makamarasmas ang nakasala nga untatan ang sala nga ginahimo niya kag magbag-o.—Hebreo 12:11.

Kon paano ginatratar sang mga Saksi ni Jehova ang mga ginsikway sa kongregasyon

Nagasiling ang Biblia nga dapat “untatan [sang mga Cristiano] ang pagpakig-upod” sa isa nga ginsikway sa kongregasyon, “bisan sa pagkaon” upod sa iya. (1 Corinto 5:11) Gani wala kami nagapakig-upod sa isa nga ginsikway. Pero, indi buot silingon nga indi na gid sia namon pagsapakon. Ginarespeto gihapon namon sia. Puede man sia makatambong sa amon mga miting, diin puede sia tamyawon sang mga Saksi ni Jehova.c Mahimo man sia magpabulig sa mga gulang nga makabalik sa kongregasyon.

Ang mag-asawa nga Saksi nagatamyaw sa isa ka babayi nga ginsikway sa kongregasyon. — Ang mga ginsikway sa kongregasyon puede gid magtambong sa amon mga miting

Ano abi kon mga Saksi ni Jehova ang bana ukon asawa kag kabataan sang isa nga ginsikway? Bisan pa nga wala na sia nagasimba kay Jehova upod sa iya pamilya, magapabilin gihapon ang ila relasyon bilang pamilya. Bangod nagaistar sila sa isa lang ka balay, ang iya relasyon sa iya bana ukon asawa kag sa iya kabataan amo lang gihapon, kag dapat nila gihapon palanggaon ang isa kag isa.

Ang isa nga ginsikway puede makapangabay sa mga gulang nga bisitahan sia para mahatagan sia sang laygay halin sa Biblia, mapalig-on nga maghinulsol, kag magbalik sa Dios. (Zacarias 1:3) Kon untatan niya ang paghimo sing sala kag ipakita nga gusto gid niya sundon ang mga sugo sang Biblia parte sa moral, nalipay gid kami nga mangin bahin sia liwat sang kongregasyon. ‘Patawaron sia kag palig-unon’ sang kongregasyon, pareho sang ginhimo sang mga Cristiano sa Corinto sang nagbag-o ang isa nga makasasala.—2 Corinto 2:6-8.

Kon ano ang ginbatyag sang mga ginsikway nga nakabalik na

Talupangda ang ginsiling sang pila ka mga Saksi ni Jehova nga ginsikway sa kongregasyon sang una kag sang ulihi, nagdesisyon nga magbalik sa Dios.

“Sang nagdesisyon ako nga magbalik sa kongregasyon, abi ko usisaon sang mga gulang ang tanan nga ginhimo ko sa sulod sang mga tinuig nga ginsikway ako. Pero, nagsiling sila, ‘Gusto namon nga magpokus ka sa kon ano ang mahimo mo subong.’ Nagpakalma gid ini sa akon.”—Maria, United States.

“Excited gid ang mga kauturan sang nakabalik na ako. Nabatyagan ko nga importante ako. Ginbuligan gid ako sang mga kauturan nga mabatyagan nga napatawad na ako kag magpokus sa akon mahimo subong. Ginbuligan gid ako sang mga gulang nga magbakod liwat ang akon relasyon kay Jehova. Ginpaumpawan nila ako kag ginbuligan nga makita nga importante ako kay Jehova kag palangga niya ’ko.”—Malcom, Sierra Leone.

“Nalipay gid ako nga palangga ni Jehova ang iya katawhan kay ginsigurado niya nga matinlo sa moral ang iya organisasyon. Ang abi sang iban mapintas ini nga kahimusan pero ang matuod, kinahanglan gid ini kag mahigugmaon. Nagapasalamat gid ako sa aton Amay sa langit kay mapinalanggaon sia kag mapinatawaron nga Dios.”—Sandi, United States.

Ang mga ginsiling sang mga eksperto sa kasuguan nga indi mga Saksi ni Jehova

Ano ang ginsiling sang mga korte kag mga eksperto sa kasuguan parte sa pagsikway sang mga Saksi ni Jehova sa wala naghinulsol nga mga nakasala sa ila mga kongregasyon? Talupangda ang ila mga ginsiling.

“Natural lang nga ang isa ka relihioso nga grupo, nga nagatinguha nga sundon ang mga prinsipio sa Biblia, may kinamatarong nga magsikway sa isa nga nakasala. Nagakaigo ini, kag sa madamo nga sitwasyon, kinahanglan gid himuon. Kay ang isa nga indi makatuman ukon indi gusto magtuman sa mga prinsipio sa Biblia indi na kalipikado nga mangin bahin sina nga relihion. Kag kon ina nga indibiduwal indi pagsikwayon, mahimo mangin malain sia nga impluwensia sa iban nga mga miembro sang relihion.”—High Court of Justice, England kag Wales, Hunyo 7, 2019.
“Nakita sang mga korte sa Europe kag sa iban pa nga mga lugar nga ang mga desisyon parte sa pagsikway . . . nabase gid sa kasuguan kag legal nga kahimusan sang mga Saksi ni Jehova bangod kinamatarong nila ini base sa kahilwayan sa relihion . . . ukon wala man sang kinamatarong ang mga korte nga entrahan ini nga kahimusan.”—Professor Paulo Pinto de Albuquerque, judge anay sang European Court of Human Rights.

a Sang una, gin-disfellowship ang tawag namon sa mga nakasala nga wala naghinulsol. Pero subong, ginagamit na namon ang tinaga nga ginagamit sang Biblia nga ginsikway sa kongregasyon.

b Ang mga gulang amo ang hamtong nga mga Cristiano nga lalaki nga nagatudlo base sa Biblia kag nagabantay sa katawhan ni Jehova paagi sa pagbulig kag pagpalig-on sa ila. Wala sila ginabayaran para himuon ini.—1 Pedro 5:1-3.

c Sa pila ka mabug-at nga kaso, posible nga ang isa nga nagbiya sa kongregasyon padayon nga nagahimo sang iya sala ukon aktibo nga nagapasanyog sang malain nga pagginawi. Gani, ginasunod namon ang ginasugo sang Biblia nga ‘indi pagtamyawon’ ina nga tawo.—2 Juan 9-11.