Malakaus Sau
3 Yexus rov mus hauv lub tsev pe hawm, kuj muaj ib tug yawg qhuav tes tuaj ntawd thiab. 2 Cov Falixais ntsia ntsoov seb Yexus puas yuav kho tus yawg ntawd rau hnub Xanpataus kom lawv thiaj tau kev nkaug nws. 3 Yexus hais rau tus yawg qhuav tes tias, “Cia li los sawv hauv plawv no.” 4 Ces Yexus nug lawv tias, “Qhov twg thiaj raws li txoj kev cai rau hnub Xanpataus, ua qhov zoo los ua qhov phem? Cawm txoj sia los txov txoj sia?” Tiam sis tsis muaj leej twg teb ib los li. 5 Yexus ntsia puag ncig cov neeg ntawd ua chim tsawv. Nws tu siab tias lawv tsis muaj siab hlub leej twg li. Nws thiaj hais rau tus yawg qhuav tes tias, “Cia li xyab hlo koj txhais npab.” Thaum nws xyab hlo, nws txhais tes cia li zoo kiag lawm. 6 Tam sim ntawd cov Falixais tawm plaws mus tuav tswv yim nrog Helauj cov neeg* seb yuav ua li cas thiaj tua tau Yexus.
7 Tiam sis Yexus thiab nws cov thwj tim tawm mus rau nram ntug hiav txwv mas muaj neeg coob coob tuaj hauv Kalilais thiab Yudias tuaj caum Yexus. 8 Txawm cov neeg nram Yeluxalees, nram Idumias, cov uas nyob sab ntug Dej Yaladees tim ub, thiab cov uas nyob puag ncig Thailab thiab Xaidoos los puav leej hnov txog tej uas Yexus tau ua, lawv thiaj tuaj caum Yexus coob heev. 9 Nws thiaj kom cov thwj tim npaj ib lub nkoj me me tos nws, kom cov neeg coob coob ntawd txhob los phoom nws. 10 Twb yog vim Yexus kho tau coob tus zoo, cov uas muaj mob loj thiaj sib txiv qev los kov Yexus. 11 Txawm cov neeg raug dab los thaum lawv pom dheev Yexus, lawv khwb nkaus hauv pem teb hawm Yexus thiab quaj qw tias, “Koj yog Vajtswv Leej Tub.” 12 Tiam sis ntau zaus nws txwv tsis pub lawv qhia rau leej twg paub txog nws li.
13 Yexus nce mus rau saum ib lub roob. Nws hu cov thwj tim ib txhia los cuag nws. 14 Nws thiaj xaiv tau 12 leeg los ua ib pab thiab muab lawv hu ua cov tub txib. Lawv yog cov uas nrog nraim nws thiab nws txib lawv mus tshaj tawm txoj xov zoo. 15 Nws pub hwj chim rau lawv ntiab tau dab thiab.
16 Lawv 12 leeg uas Yexus xaiv ntawd yog Ximoos uas Yexus muab hu ua Petus, 17 Yakaunpaus thiab nws tus kwv Yauhas, nkawd yog Xenpedis ob tug tub (Yexus muab nkawd hu ua Npaunekes uas txhais tias, “Ob tug uas heev cuag xob”), 18 Anrus, Filis, Npathaulaumais, Mathais, Thaumas, Yakaunpaus uas yog Afe-as tus tub, Thade-as, Ximoos tus uas kub siab,* 19 thiab Yudas Ikhali-aus tus uas tom qab no ntxeev siab rau Yexus.
Ces Yexus txawm mus rau hauv ib lub tsev lawm. 20 Rov muaj neeg coob heev tuaj ua rau lawv twb tsis khoom noj mov li. 21 Tiam sis thaum Yexus tsev neeg hnov txog tej no, lawv txawm mus coj Yexus vim lawv hais tias, “Nws vwm lawm.” 22 Tsis tas li ntawd, cov xib hwb* uas tuaj nram Yeluxalees tuaj hais tias, “Twb yog Npexenpus* pab nws! Dab tus thawj pub hwj chim rau nws ntiab dab ntag.” 23 Yexus thiaj hu lawv los thiab ua lus piv txwv qhia lawv. Nws hais rau lawv tias, “Xatas yeej tsis ntiab Xatas los sad? 24 Yog ib lub teb chaws twg rov sib tua ces lub teb chaws ntawd yuav tawg ua sab ua sua mus. 25 Thiab yog ib tse neeg twg rov sib tawm tsam ces tsev neeg ntawd kuj yuav tawg ua sab ua sua mus thiab. 26 Ib yam li ntawd, yog Xatas rov tawm tsam nws cov dab ces lawv yeej yuav tawg ua sab ua sua puas tsuaj mus xwb. 27 Yog tus tswv tsev muaj zog heev, tsis muaj leej twg yuav txeem tau mus rau hauv nws lub tsev mus lws nws tej cuab txhiaj cuab tam, yuav tsum muab nws khi ua ntej tso. 28 Kuv hais ncaj qha rau nej tias, Vajtswv yeej zam tau txhua yam kev txhaum uas neeg ua thiab tej lus tuam mom uas lawv hais tib si. 29 Tiam sis tus uas txhob txwm thuam lub hwj huam dawb huv, Vajtswv yuav zam tsis tau li. Tus ntawd yuav muaj txim mus ib txhis.” 30 Yexus hais li no vim lawv hais tias, “Nws raug dab lawm.”
31 Thaum ntawd Yexus niam thiab nws cov kwv tuaj sawv nraum zoov. Lawv kom neeg mus hu nws los. 32 Muaj ib pab neeg tab tom zaum puag ncig nws. Lawv hais rau nws tias, “Koj niam thiab koj cov kwv tuaj nrhiav koj txog nraum zoov.” 33 Yexus teb tias, “Leej twg yog kuv niam thiab kuv cov kwv?” 34 Nws txawm tsa muag ntsia cov uas zaum puag ncig nws thiab hais tias, “Cov no ntag yog kuv niam thiab kuv cov kwv! 35 Cov uas ua raws li Vajtswv lub siab nyiam thiaj yog kuv tus kwv tij, kuv tus muam, thiab kuv niam.”