Sau Rau Titus
1 Kuv yog Povlauj uas yog Vajtswv ib tug tub qhe thiab yog Yexus Khetos ib tug tub txib. Kuv tes hauj lwm yeej raws li tej uas Vajtswv cov xaiv tseg ntseeg thiab raws li qhov tseeb uas peb tau kawm mas qhov tseeb ntawd qhia kom muab siab npuab Vajtswv. 2 Tej no yeej cog ruaj rau txoj kev cia siab tias Vajtswv yuav pub txoj sia ib txhis tsis kawg rau tib neeg. Nws yog tus Vajtswv uas tsis txawj dag, nws tau cog lus li no ntev los lawm. 3 Thaum txog nws lub sij hawm, nws thiaj ua rau nws txoj lus nrov ncha mus rau ib tsoom neeg. Tus Cawm Seej uas yog peb tus Vajtswv tau sam hwm kom kuv ua tes hauj lwm tshaj tawm no ntag. 4 Kuv sau tsab ntawv no rau Titus. Koj zoo ib yam li kuv tus tub ntag, thiab koj nrog kuv koom tib txoj kev ntseeg.
Thov kom Vajtswv uas yog peb Leej Txiv thiab kom peb tus Tswv Yexus Khetos* uas yog peb tus Cawm Seej foom koob hmoov nplua mias* rau koj thiab nrog koj sib raug zoo.
5 Kuv tso koj nyob hauv lub pov txwv Khetes koj thiaj kho tau tej yam uas nkhaus kom ncaj, thiab tsa ib co txwj laus rau hauv txhua lub nroog, zoo li kuv tau qhia rau koj no tias, 6 ib tug txwj laus yuav tsum tsis muaj chaw thuam, tsuas muaj ib tug poj niam xwb, nws tej me nyuam yuav tsum yog cov uas ntseeg thiab tsis muaj lus thuam tias yog neeg tsis tsim txiaj* los sis neeg tawv ncauj. 7 Rau qhov tus tub qhe uas Vajtswv tsa los saib xyuas lub koom txoos yuav tsum zoo li no, nws tsis muaj chaw thuam, tsis ua ywj siab, tsis chim sai, tsis quav dej quav cawv, tsis ua nruj ua tsiv, thiab tsis ua siab hlob huas rau nws tus kheej xwb. 8 Tiam sis nws nyiam qhua, nyiam txoj kev zoo, thoob tsib to nrog, ncaj ncees, muab siab npuab Vajtswv, tswj tau nws tus kheej, 9 nws txawj siv tswv yim qhia raws nkaus li txoj lus tseeb, nws thiaj paub muab zaj uas pab tau peb* los qhia txhawb luag thiab paub ntuas tus uas cov nyom zaj ntawd.
10 Rau qhov muaj coob tus uas ntxeev siab, hais tej lus khav ntxhias uas tsis muaj hauv paus hauv ntsis, thiab dag ntxias lwm tus, cov no feem coob yog cov uas hais kom ua kev cai txiav.* 11 Yuav tsum kaw kiag lawv lub qhov ncauj rau qhov lawv qhia tej yam uas tsis tsim nyog qhia mas twb haub ntxias tau tej yim neeg tso kev ntseeg tseg tag nrho lawm. Lawv qhia li ntawd vim lawv huas rau lawv tus kheej xwb. 12 Lawv cov ntawd, ib tug xib hwb twb hais li no tias, “Cov neeg Khetes ib txwm yeej hais lus dag, thiab nyaum li tej tsiaj qus mas xav nyob dawb xwb, noj loj haus loj heev.”
13 Yeej muaj tseeb li nws tau hais tiag. Twb yog li ntawd, koj yuav tsum ntuas lawv kom hnyav, xwv lawv thiaj muaj kev ntseeg ruaj nreeg. 14 Lawv thiaj tsis quav ntsej cov Yudais tej dab neeg cuav, thiab tsis mloog tej lus sam hwm uas cov neeg tso qhov tseeb tseg tau hais. 15 Txhua yam yeej dawb huv rau cov neeg dawb huv. Tiam sis tsis muaj ib yam yuav dawb huv rau cov neeg uas qias thiab tsis muaj kev ntseeg, vim lawv tej kev xav thiab lawv lub siab yeej qias tsis huv. 16 Lawv lees tab meeg sawv daws tias lawv paub Vajtswv, tiam sis lawv tes hauj lwm twb qhia tias lawv tsis lees yuav Vajtswv li. Rau qhov lawv yog neeg ntxim ntxub thiab tsis mloog lus. Yeej tsis tsim nyog siv lawv los ua ib txog hauj lwm zoo li.