Kev Vam Kev Cia Siab​—Puas Pab Tau Peb Tiag?

THAUM DANIYEES MUAJ 10 xyoo xwb nws twb tau ntoog nws tus mob kheeb xawm tau ib lub xyoos lawm. Cov kws kho mob, nws tsev neeg, thiab cov neeg uas hlub tshua txog nws tag kev cia siab tias xyov nws puas yuav zoo tau. Tiam sis Daniyees tseem muaj kev cia siab. Nws xav tias thaum nws loj hlob tuaj nws yuav kawm mus ua ib tug kws tshawb fawb thiab nrhiav kev los kho kheeb xawm. Thaum nws hnov tias tus kws kho mob tshwj xeeb txog nws tus kheeb xawm yuav tuaj saib nws ua rau nws muaj kev cia siab thiab zoo siab kawg. Tiam sis thaum txog hnub ntawd, tus kws kho mob tuaj tsis tau vim muaj huab cua tsis zoo. Daniyees thiaj li pib nyuaj siab thiab tag kev cia siab. Zaum no ua rau nws qaug zog heev. Ces ob peb hnub tom qab xwb nws tau tag sim neej lawm.

Daniyees lub neej yog qhia los ntawm ib tug neeg ua hauj lwm hauv tsev kho mob. Tus neeg no kawm feem xyuam txog kev cia siab thiab qhov uas tsis muaj kev cia siab seb puas pab tau tib neeg noj qab nyob zoo tiag. Muab xav li no, muaj ib tug neeg laus uas tab tom ua nruj nriaj txoj sia yuav tu tsis tu vim nws pheej tos ntsoov ib tug uas nws hlub tshua los sis ib yam dab tsi uas nws lub siab khuam rawv rau. Tiam sis tom qab nws pom tus neeg ntawd los sis tau yam uas nws xav tau lawm nws txoj sia txawm tu nrho. Ua cas ho muaj tau li no? Kev vam kev ciab siab puas pab ib tug neeg txoj sia nyob ntev zog?

Cov kws tshawb fawb txog kev kho mob coob zuj zus qhia tias kev cia siab thiab qhov xav txog yam zoo yeej pab tau tib neeg lub neej kom noj qab nyob zoo. Tiam sis muaj ib txhia tsis xav li ntawd. Lawv hais tias tsis muaj pov thawj qhia tias kev vam kev cia siab pab tau kom noj qab nyob zoo tiag. Lawv xav tias tus mob zoo tsis taus los ntawm muaj kev vam kev cia siab.

Peb paub tias qhov uas tib neeg xav li no yeej ib txwm muaj puag thaum ub los lawm. Ntau txhiab xyoo dhau los, tus tshawb txuj Elixitatau (Aristotle) uas yog neeg Kili tau hais li no: “Kev vam kev cia siab tsuas yog npau suav xwb.” Tsis tas li ntawd, tom qab no Benjamin Franklin uas yog ib tug nom hauv teb chaws Amelikas tau hais tias: “Kev vam kev cia siab yeej pab tsis tau peb li.”

Yog li qhov tseeb txog kev vam kev cia siab yog li cas tiag? Puas yog lam hais kom peb zoo siab xwb? Los sis peb yeej ntseeg tau tias kev vam kev cia siab pab tau txhua tus muaj kev zoo siab thiab noj qab nyob zoo?