Ntaus Phoojywg Nrog Lwm Haiv Neeg

Vim Li Cas Tibneeg Xaiv Ntsej Muag?

Thaum peb cais ib haiv tibneeg twg ces twb yog peb xaiv ntsej xaiv muag lawm ntag. Yog peb tsuas ntaus phoojywg nrog cov neeg zoo xws li peb, ces peb yuav xav tias peb tej kev coj no coj ua thiaj zoo xwb.

Vajlugkub Tej Hauv Paus Ntsiab Lus

“Nej cia li qhia hlo nej lub siab rau peb.”—2 KAULEETHAUS 6:13.

Nqi no qhia tias peb lub “siab” kuj yog hais txog peb txojkev xav. Yog peb tsuas xav txog cov tibneeg zoo yam li peb xwb ces zoo li peb lub siab kaw nti lawm. Yuav kom peb tsis txhob coj li ntawd, peb yuav tau ntaus phoojywg nrog lwm haiv tibneeg.

Ntaus Phoojywg Nrog Coob Leej

Thaum peb paub ib tug twg zoo zuj zus tuaj, peb yuav nkag siab vim li cas nws thiaj coj li ntawd ces peb yuav tsis pom hais tias nws yog lwm haiv neeg lawm. Ntxiv ntawd, peb yuav saib taus nws thiab thaum nws nyuaj siab los peb yuav nrog nws nyuaj siab hos thaum nws zoo siab los peb yuav nrog nws zoo siab.

Muaj ib tug pojniam hu ua Naxaws (Nazaré). Nws ntxub cov tibneeg poob tebchaws heev. Tiamsis muaj ib yam pab tau nws. Nws hais tias: “Kuv lauj sijhawm nrog lawv ua ke thiab kuv ua haujlwm nrog lawv. Lawv twb tsis zoo li luag lwm tus thuam. Thaum kuv nrog lwm haiv neeg ntaus phoojywg ces kuv tsis xaiv ntsej xaiv muag lawm. Kuv txawj hlub thiab pib saib taus lawv ib tug zuj zus.”

Koj Ua Tau Li No

Lauj sijhawm nrog lwm haiv neeg sib txuas lus ua ke. Xyaum li no:

Nug txog lawv lub neej.
Caw lawv tuaj nrog koj noj ib pluag mov ua ke.
Ua tib zoo mloog thaum lawv piav txog lawv lub neej thiab seb lawv nyiam dabtsi tshaj.

Thaum koj paub tej uas lawv raug hauv lawv lub neej, ces koj yuav paub vim li cas lawv thiaj coj li lawv coj. Qhov no yuav pab tau koj pib nyiam lawv haiv tibneeg.

Ib Tug Piav Txog Nws Lub Neej: Khadaxamis (Kandasamy) thiab Xookhamas (Sookamma) (Tebchaws Kanada)

“Wb ob niam txiv loj hlob nyob rau Afika Qab Teb thaum muaj txojcai sib cais. Lawv muab nyias haiv tibneeg faib nyob nyias ib thaj chaw. Qhov no ua rau sawvdaws sib ntxub heev. Wb tsis yog cov neeg tawv dawb ces thaum lawv saib tsis taus wb, wb thiaj ntxub lawv kawg nkaus li. Txawm li ntawd los, wb tsis xav hais tias wb yog neeg xaiv ntsej xaiv muag, tiamsis tsuas yog cov uas raug luag ntxub xwb.

“Yam uas hloov tau wb txojkev xav yog thaum wb pib ntaus phoojywg nrog lwm haiv tibneeg. Thaum wb nrog cov neeg tawv dawb ua ke, wb pom tias lawv thiab peb tsis txawv deb tiamsis zoo tib yam. Tej yam lawv raug kuj zoo tib yam li tej uas peb raug thiab.

“Wb txawm cia ob niam txiv tawv dawb los nrog wb nyob ua ke tau ib nyuag ntu. Ces peb txawm sib ncawg zoo kawg nkaus Ii thiab peb ib leeg saib taus ib leeg. Thaum kawg, kuj pab tau wb tsis xav phem txog cov neeg tawv dawb lawm.”