Vajtswv Cog Lus Tias Lub Ntiaj Teb Yuav Nyob Mus Li

Cov neeg txawj ntse tshawb pom tias lub ntiaj teb yeej khov heev tiag. Yog koj ntseeg tias muaj tus Tswv Tsim uas hlub tshua txog tib neeg ces qhov uas cov neeg txawj ntse hais no yuav pab koj nco ntsoov tias Vajtswv yeej tsim kom lub ntiaj teb txawj rov zoo.

Txawm li los, vim tib neeg ua rau lub ntiaj teb puas tsus ces nyuaj rau lub ntiaj teb rov kho nws. Tiam sis peb yeej tso siab tau tias Vajtswv yuav tsis cia lub ntiaj teb puas tsuaj mus.

Cov nqe Vajlugkub no pab kom peb tso siab tias lub ntiaj teb yuav nyob ruaj khov mus li.

• Vajtswv yog tus tsim lub ntiaj teb. ‘Thaum chiv keeb Vajtswv tsim lub ntuj thiab lub ntiaj teb.’​—Chivkeeb 1:1

• Vajtswv yog tus tswv rau lub ntiaj teb. ‘Lub ntiaj teb thiab txhua tsav yam uas nyob hauv lub qab ntuj no puav leej yog Yehauvasa li.’​—Phau Ntawv Nkauj 24:1

• Vajtswv tsim lub ntiaj teb kom nyob mus li. ‘Koj muab lub ntiaj teb txawb khov rau ntawm tej ncej uas txheem, lub ntiaj teb yuav nyob qhov ntawd tsis txav chaw li.’​—Phau Ntawv Nkauj 104:5

• Vajtswv cog lus tias txhua yam muaj sia yeej yuav nyob huam vam mus li, yuav tsis txawj ploj mus. ‘Vajtswv yog tus uas tsim lub ntiaj teb, nws tsis tau tsim lub ntiaj teb los nyob do cuas tsis muaj dab tsi, tiam sis nws tsim los rau neeg nyob.’​—Yaxayas 45:18

• Vajtswv cog lus tias tib neeg yuav nyob mus ib txhis hauv ntiaj teb. ‘Cov ncaj ncees yuav tau lub ntiaj teb ua lawv teej lawv tug, thiab tau nyob rau hauv mus ib txhis.’​—Phau Ntawv Nkauj 37:29

Vajtswv tsim lub ntiaj teb zoo heev. Txawm tib neeg yuav ua li cas los lub ntiaj teb yeej nyob ruaj khov kho. Phau Vajlugkub hais tias thaum txog lub sij hawm uas Vajtswv teem tseg, nws yuav rhuav tshem cov uas ua rau lub ntiaj teb puas tsuaj.​—Tshwmsim 11:18.

Phau Vajlugkub cog lus ntxiv tias Vajtswv yuav muab lub ntiaj teb no kho kom rov zoo nkauj dua thiab nws yuav ua kom txhua tus “txaus siab rau tej uas lawv muaj.”​—Phau Ntawv Nkauj 145:16.