Lub 10 Hli

Muaj qee lub sij hawm, puas nyuaj rau koj mloog lwm tus hais? Yeej nyuaj kawg li rau Vaj Ntxwv Daviv mloog lwm tus hais, nws thiaj thov Vajtswv li no tias: “Thov koj pab kom kuv txawj mloog koj lus.” (Ntawv Nkauj 51:12) Txawm Daviv hlub Yehauvas heev los muaj qee lub sij hawm yeej nyuaj rau nws ua neeg mloog lus ces peb los kuj zoo tib yam li ntawd. Vim li cas ho tsis yooj yim? Qhov ib, peb yeej saws tau txoj kev tawv ncauj tsis mloog lus. Qhov ob, Xatas kuj ua rau kom peb cov nyom Yehauvas tib yam li nws. (2 Kauleethaus 11:3) Qhov peb, nyob hauv lub qab ntuj no peb yeej nyob puag ncig cov neeg uas muaj tus cwj pwm tawv ncauj “tsis mloog Vajtswv lus.” (Efexaus 2:2) Yog li ntawd, peb yuav tau tswj txoj kev tawv ncauj tsis mloog lus, tawm tsam dab Ntxwg Nyoog, thiab lub qab ntuj no tus cwj pwm xwv peb thiaj mloog Yehauvas thiab cov uas nws tau xaiv los coj lus. w23.10 6 ¶1

Yexus qhov txuj ci no qhia tau rau peb tias peb yuav tau xyaum ua neeg txo hwj chim. Yexus tsis khav theeb txog qhov txuj ci no thiab nws yeej ib txwm tsis khav txog tej yam nws ua tau. Nws txo hwj chim thiab cia nws Txiv tib leeg tau koob meej xwb. (Yauhas 5:19, 30; 8:28) Yog peb xyaum Yexus es txo hwj chim ces peb yuav tsis khav txog tej yam peb ua tag los lawm. Cia peb tsis txhob khav txog tej peb ua tiam sis nco ntsoov qhuas Yehauvas tib leeg. (Yelemis 9:23, 24) Tos peb qhuas Yehauvas los yog tsis muaj nws, peb yeej ua tsis tau dab tsi. (1 Kauleethaus 1:26-31) Yog peb txo hwj chim ces peb tsis tas yuav hais tias peb twb ua yam ub yam no rau lwm tus. Qhov uas Yehauvas pom peb ua xwb twb txaus lawm. (Muab piv rau Mathais 6:2-4; Henplais 13:16) Peb yuav ua tau rau Yehauvas zoo siab heev yog peb xyaum txo hwj chim ib yam li Yexus.​—1 Petus 5:6. w23.04 4 ¶9; 5 ¶11-12

Vajtswv tshoov tus tub txib Povlauj siab kom txhawb cov ntseeg ua haum lwm tus siab thiab. Nqe Vajlugkub no txhawb tau peb kom nco ntsoov tias txhua tus yeej xav teb ib yam li peb thiab. Muab xav li no tias thaum koj tseem sam sim nrog koj cov phooj ywg sib txuas lus, koj puas hais tsheej zag ua rau lwm tus tsis tau hais? Koj yeej tsis ua li ntawd ib zaug li vim koj xav mloog lawv hais lus thiab. Ib yam uas yuav pab txhawb tau cov kwv tij nkauj muam yog cia lawv teb thiab. (1 Kauleethaus 10:24) Yog li, peb tsis txhob teb ntev ntev. Txawm hais tsawg tsuag xwb los tsis txhob hais ntau ntau lub ntsiab. Yog koj muab cov ntsiab lus hais tag lawm ces yuav tsis muaj dab tsi rau lwm tus hais ntxiv. w23.04 22-23 ¶11-13

Peb yuav tau nco ntsoov mus pab lwm tus xws li mus qhia txoj xov zoo. Thaum peb mus qhia txoj xov zoo, peb yuav tau txawj yoog. Peb yuav ntsib coob leej ntau tus tib neeg uas nyias muaj nyias ib tug cwj pwm, kev ntseeg, thiab nyias los nyias ib qho los. Tus tub txib Povlauj yeej txawj yoog heev, yog li ntawd peb yuav tau xyaum nws tus yam ntxwv. Yexus xaiv Povlauj ua “tus tub txib uas qhia lwm haiv neeg.” (Loos 11:13) Povlauj qhia rau cov neeg Yudais, cov neeg Kilis, cov neeg txawj ntse, tej neeg zej zog, tej nom tswv, thiab tej vaj ntxwv. Yuav kom Povlauj qhia raug sawv daws siab, nws “yoog txhua hom neeg.” (1 Kauleethaus 9:19-22) Nws ua tib zoo xav txog seb lawv los qhov twg los thiab lawv ntseeg li cas rau li cas. Thaum nws yoog li no nws thiaj pab tau tib neeg los paub Vajtswv. Zoo tib yam li ntawd, peb yuav tau txawj yoog thiab ua tib zoo xav seb txoj hau kev twg thiaj yuav pab tau tus neeg peb qhia los paub txog Yehauvas. w23.07 23 ¶11-12

Tus uas muaj lub siab mos siab muag qhia tias nws muaj lub siab tawv. Tus uas muaj lub siab tawv thiaj li muaj lub siab tus thiab thev taus tej uas nws raug. Nco ntsoov tias Vajtswv lub hwj huam dawb huv yuav pab tau kom peb muaj lub “siab mos siab muag.” (Kalatias 5:22, 23) Thaum cov neeg Kilis siv lo lus “siab mos siab muag” yog siv rau thaum lawv cob tau ib tug nees qus qus kom seej. Tus nees qus no txawm nws seej lawm los nws haj tseem muaj zog. Zoo tib yam li ntawd, peb yuav ua li cas thiaj muaj lub siab mos siab muag thiab ua lub siab tawv? Peb ua tsis tau tej no yog tsis muaj Vajtswv pab. Peb yuav tau thov Vajtswv kom nws muab nws lub hwj huam dawb huv los pab peb muaj lub siab mos siab muag. Muaj coob leej ntau tus yeej xyaum tau lub siab mos siab muag lawm. Cov kwv tij nkauj muam yeej muaj lub siab mos muag thaum tib neeg hais lus twm lawv. Qhov uas lawv coj li no kuj pab tau tej neeg ib ncig uas pom ntawd xav zoo txog Yehauvas Cov Tim Khawv.​—2 Timautes 2:24, 25. w23.09 15 ¶3

Tus tub txib Yauhas ua yog toog pom 24 tus txwj laus saum ntuj ceeb tsheej tab tom pe hawm Yehauvas. Lawv qhuas Vajtswv tias: ‘Koj yog tus uas muaj hwj chim, tsim nyog peb sawv daws hwm koj thiab ua rau koj tau koob meej.’ (Tshwm Sim 4:10, 11) Cov tub txib saum ntuj kuj muaj ntau tsav ntau yam uas lawv qhuas Yehauvas txog. Lawv nrog Yehauvas nyob saum ntuj thiab lawv yeej paub Yehauvas zoo li cas rau li cas. Lawv yeej pom Yehauvas tej yeeb yam qhuas lug los ntawm tej nws ua. Thaum lawv pom Yehauvas ua tau ib yam twg, lawv puav leej qhuas nws. (Yauj 38:4-7) Qhov uas peb qhuas tau Yehauvas yog thaum peb thov nws es qhia tias peb nyiam thiab ris txiaj ntsig rau tej nws tau ua. Thaum koj nyeem thiab kawm phau Vajlugkub, ua tib zoo soj ntsuas seb koj nyiam tej yeeb yam twg. (Yauj 37:23; Loos 11:33) Ntxiv ntawd, thov Yehauvas thiab qhia rau nws vim li cas koj ho nyiam cov yeeb yam ntawd. Peb kuj qhuas tau Yehauvas txog tej yam uas nws tau ua los mus pab peb thiab cov kwv tij nkauj muam.​—1 Xamuyees 2:1, 2. w23.05 3-4 ¶6-7

Nyob rau xyoo 1919, lub nroog Npanpiloos uas loj dua ntais tswj tsis tau Vajtswv cov tib neeg lawm. Xyoo ntawd, “tus qhev ncaj thiab ntse” pib ua hauj lwm xwv cov muaj lub siab mos muag thiaj los taug tau ‘Txoj Kev uas Dawb Huv.’ (Mathais 24:45-47; Yaxayas 35:8) Tes hauj lwm uas cov yav thaum ub tau ua pab tau tib neeg los paub Yehauvas, Yehauvas lub ntsiab, thiab paub ua lub neej kom raws li Yehauvas tej kev cai xwv lawv thiaj taug nraim txoj kev ntawd. (Paj Lug 4:18) Yehauvas yeej paub zoo tias nws cov tib neeg yuav hloov tsis tau nthawv nthav txhua yam. Nws thiaj li maj mam kho nws cov tib neeg ua ntu zus. Hnub uas sawv daws ua tau txhua yam haum Yehauvas siab ntshe sawv daws yuav zoo siab heev! Txhua txoj kev yeej yuav tau kho. Zoo tib yam li ntawd txij xyoo 1919, ‘Txoj Kev uas Dawb Huv’ thiaj tau muab kho ua ntu zus xwv tib neeg thiaj li tawm hauv lub nroog Npanpiloos uas loj dua ntais los mus taug txoj kev no. w23.05 17 ¶15; 19 ¶16

Pab Uas Ntaus Thawj kuj tab tom cob ib co los ua cov pab cuam hauv tej rooj saib xyuas uas lub koom haum muaj. Cov pab cuam no ua hauj lwm ntau heev rau lub koom haum. Lawv yeej ua tau hauj lwm zoo heev los saib xyuas Khetos pab yaj. Thaum txoj kev txom nyem loj kawg nkaus yuav xaus es cov xaiv tseg mus saum ntuj tag lawm, Vajtswv cov tib neeg yeej tseem yuav pe hawm nws ruaj nreeg vim muaj Yexus Khetos ua tus coj. Lub sij hawm ntawd Yehauvas cov tib neeg yeej yuav raug Nkos hauv teb chaws Mankos uas yog ib tsoom teb chaws tawm tsam. (Exekhees 38:18-20) Txawm li ntawd los Nkos hauv teb chaws Mankos yeej yuav kov tsis yeej. Yehauvas cov tib neeg yeej yuav teev tiam nws ruaj nreeg. Yehauvas yeej yuav cawm lawv! Tus tub txib Yauhas ua yog toog pom ib pab “neeg coob coob” uas yog cov uas yog lwm pab yaj. Tus uas nrog Yauhas tham hais rau Yauhas tias pab neeg coob coob ntawd yog cov uas ‘tiv dhau tej kev tsim txom uas loj heev.’ (Tshwm Sim 7:9, 14) Yog li ntawd, peb ruaj siab tias Yehauvas yeej yuav cawm nws cov tib neeg! w24.02 5-6 ¶13-14

Yehauvas yuav muab nws lub hwj huam dawb huv rau peb yog hais tias peb thov nws, rau siab ntso kawm nws Txoj Lus, thiab nyob nrog nraim nws lub koom haum. Thaum peb ua li ntawd ces peb yuav muaj tus cwj pwm zoo uas tsuas yog Vajtswv lub hwj huam dawb huv xwb thiaj li muab tau rau peb. (Kalatias 5:22, 23) Vajtswv tsuas muab nws lub hwj huam dawb huv rau cov uas lawv txoj kev xav dawb huv thiab coj lub neej dawb huv xwb. Yog hais tias peb pheej xav thiab pheej ua tej uas tsis dawb huv ces Vajtswv yuav tsis pub nws lub hwj huam dawb huv los pab peb ntxiv lawm. (1 Thexalaunikas 4:7, 8) Tsis tas li ntawd xwb, peb yuav tsum tsis txhob thuam Vajtswv cov lus faj lem. (1 Thexalaunikas 5:20) Cov lus faj lem yog cov lus uas Vajtswv siv nws lub hwj huam dawb huv tshoov cov cev Vajtswv lus hais tseg rau peb txog yav tom hauv ntej. Xws li cov lus faj lem txog Yehauvas hnub thiab tej uas qhia rau peb tias Yehauvas hnub twb los ze lawm. Peb tsis txhob xav tias Yehauvas hnub los sis Amankedoos yuav tsis los rau peb tiam kiag li. Tiam sis peb yuav tsum zov rawv tos hnub ntawd thiab rau siab ntso ua Vajtswv tes hauj lwm, muaj siab npuab rawv nws, thiab ua neeg dawb huv txhua lub sij hawm.​—2 Petus 3:11, 12. w23.06 12 ¶13-14

Peb yuav ua li cas yog hais tias cia li muaj duab liab qab tshwm plaws los hauv peb lub koos pis tawj los sis peb lub twj ntawm tes? Peb yuav tsum muab tua kiag, tsis txhob saib. Yuav tsis nyuaj rau peb ua li ntawd yog peb nco ntsoov tias peb txoj kev sib raug zoo nrog Yehauvas yog qhov uas muaj nqis tshaj plaws hauv peb lub neej. Txawm ib co tsis yog duab liab qab los yeej ua rau peb xav tsis huv ces peb tsis txhob saib cov ntawd vim peb tsis xav ua txhaum hauv peb lub siab. (Mathais 5:28, 29) Ib tug txwj laus nyob Thaib Teb hu ua Devem (David) hais tias: “Kuv nug kuv li no: ‘Txawm tsis yog duab liab qab los yog kuv pheej saib tas zog, Yehauvas puas yuav txaus siab rau kuv?’ Thaum kuv ua li no thiaj pab tau kuv ua haum Yehauvas siab.” Thaum peb hwm Yehauvas ces peb thiaj yuav ‘muaj tswv yim’ thiab ua tau haum nws siab. w23.06 23 ¶12-13.

Qhov uas hais tias nej “tej tsev” yog hais txog tej koom txoos. Thaum lub sij hawm muaj kev txom nyem loj kawg nkaus ntawd, Yehauvas cog lus tias nws yuav tiv thaiv peb yog peb nrog cov kwv tij nkauj muam teev tiam nws ua ke. Yog li ntawd, peb yuav tau ua npaum li peb ua tau los hlub cov kwv tij nkauj muam, tsis yog lam ua kom tag kev tag cai xwb. Qhov uas peb yuav dim thiab tsis dim nyob ntawm seb peb puas ua los tsis ua! ‘Hnub tseem ceeb uas yog Yehauvas hnub’ yuav nyuaj kawg nkaus li rau noob neej. (Xefaniyas 1:14, 15) Yehauvas cov tib neeg yeej yuav raug kev nyuaj siab tib yam nkaus. Tiam sis yog peb npaj ua ntej tam sim no ces peb yuav muaj lub siab tus thiab pab tau lwm leej lwm tus. Peb yuav thev taus txhua yam teeb meem uas los raug peb. Thaum cov kwv tij nkauj muam raug kev txom nyem, peb yuav ua npaum li peb ua tau los mus pab lawv vim peb hmov tshua txog lawv thiab peb yuav ntxiv kom lawv muaj txawm peem. Ntxiv ntawd, yog peb xyaum hlub cov kwv tij nkauj muam tam sim no ces yav tom ntej los peb yuav txawj sib hlub sib pab tib yam nkaus. Yehauvas yuav muab txoj sia ntev dhawv mus ib txhis rau peb nyob rau lub qab ntuj uas tsis muaj xwm txheej thiab kev txom nyem nyuaj siab ntxiv li lawm.​—Yaxayas 65:17. w23.07 7 ¶16-17

Nyob hauv Vajtswv Txoj Lus, muaj ntau zaus yeej hais txog tias cov uas teev tiam Yehauvas muaj zog heev. Tiam sis txawm tus muaj zog tshaj los yeej tsis xav tias nws muaj zog. Xws li muaj ib zaug Vaj Ntxwv Daviv xav hais tias nws zoo “yam li lub roob ruaj khov,” tiam sis muaj qee zaug nws “ntshai kawg li.” (Ntawv Nkauj 30:7) Hos Vajtswv pub nws lub hwj huam dawb huv rau Xaxoos, thiab ua rau Xaxoos muaj zog heev. Tiam sis Xaxoos paub hais tias yog tsis muaj Vajtswv lub hwj huam dawb huv ces nws “lub zog yuav ntaug thiab [nws] tsuas muaj zog ib yam li lwm tus lawm xwb.” (Cov Thawj 14:5, 6; 16:17) Yog li ntawd, tos Yehauvas cov tib neeg muaj zog los twb yog muaj Yehauvas ua tus hwj xwm lawv. Tus tub txib Povlauj xam pom tias nws yuav tsum tau Yehauvas txoj kev pab. (2 Kauleethaus 12:9, 10) Povlauj yog ib tug neeg muaj mob muaj nkeeg. (Kalatias 4:13, 14) Muaj tej thaum yeej nyuaj rau nws ua kom tau qhov zoo qhov yog. (Loos 7:18, 19) Hos muaj tej thaum nws kuj ntshai vim nws tsis paub tias yuav muaj dab tsi los raug nws yav tom ntej. (2 Kauleethaus 1:8, 9) Ua li Povlauj hais tias nws qaug zog tiam sis vim li cas nws ho muaj zog? Twb yog vim muaj Yehauvas ntxiv dag ntxiv zog rau Povlauj, nws thiaj thev taus tej uas nws raug. w23.10 12 ¶1-2

Thaum peb xav tias peb tsis muaj nuj nqis, nco ntsoov tias Yehauvas yog tus rub peb los nrog nws sib raug zoo. (Yauhas 6:44) Nws pom tej yam zoo peb muaj uas peb tsis pom, thiab nws paub peb lub siab. (2 Vaj Keeb Kwm 6:30) Yog li ntawd, thaum Yehauvas hais tias peb muaj nqis heev rau nws, cia li ntseeg nws. (1 Yauhas 3:19, 20) Ua ntej peb los paub Yehauvas, peb ib txhia tau ua tej yam uas tej zaud tseem nkaug peb lub siab. (1 Petus 4:3) Hos ib txhia twb teev tiam Yehauvas tau ntev loo lawm los lawv yuav tau tswj lawv lub siab uas ntshaw mus ua qhov phem kam tiag. Ua li koj ne, tej thaud koj puas xav tias Yehauvas tsis zam koj lub txim thiab? Yog koj xav li ntawd, nco ntsoov tias cov uas teev tiam Yehauvas txheej thaum ub los kuj xav ib yam li koj thiab. Xws li, tus tub txib Povlauj kuj ntxhov siab heev txog tej kev txhaum uas nws tau ua. (Loos 7:24) Txawm nws twb tso nws tej kev txhaum tseg thiab ua kev cai raus dej lawm los nws tseem hais tias nws yog ‘tus tub txib uas yau dua lwm tus huv si’ thiab ‘yog tus muaj txim loj dua cov neeg uas muaj txim huv tib si.’​—1 Kauleethaus 15:9; 1 Timautes 1:15. w24.03 27 ¶5-6

Qhov uas peb khaws tau los ntawm Vaj Ntxwv Yau-ases yog tsis txhob mus nrog tej phooj ywg tsis zoo tiam sis yuav tau xaiv cov phooj ywg uas hlub Yehauvas thiab xav ua rau Yehauvas zoo siab. Cov phooj ywg no thiaj yuav pab tau peb ua tej yam zoo. Peb yeej ua tau phooj ywg nrog cov laus cov hluas huv tib si. Nco ntsoov tias Yehauyadas yeej laus dua Yau-ases. Ua ntej koj yuav ua phooj ywg nrog ib tug twg, rov tshuaj koj tus kheej li no tias: ‘Lawv puas pab tsav kuv txoj kev ntseeg rau Yehauvas? Lawv puas txhawb kom kuv ua neej raws li Yehauvas tej kev cai? Lawv puas nyiam tham txog Yehauvas thiab saib qhov tseeb rau nqi? Lawv puas saib taus Vajtswv tej kev cai? Puas yog lawv hais tej yam uas kuv xav mloog rau kuv mloog xwb los sis lawv puas ntuas kuv thaum kuv ua tej yam tsis yog?’ (Paj Lug 27:5, 6, 17) Yog tias koj tej phooj ywg tsis hlub Yehauvas ces zoo rau koj tsis txhob nrog lawv. Tiam sis yog koj cov phooj ywg hlub Yehauvas ces kav tsij nrog lawv ua ke, lawv thiaj pab tau koj!​—Paj Lug 13:20. w23.09 9-10 ¶6-7

Alafas yog cov Kilis thawj tug tsiaj ntawv hos Aumenkas yog tus tsiaj ntawv xaus. Thaum Yehauvas hais tias nws yog tus “Alafas thiab yog Aumenkas,” nws xav kom peb paub tseeb tseeb tias thaum nws tau ua dab tsi lawm, nws yeej yuav ua kom tiav. Tom qab Yehauvas tsim Adas thiab Evas, nws hais rau nkawd tias: ‘Neb cia li muaj tub muaj ki kom coob, neb tej xeeb ntxwv yuav huam vam mus nyob thoob plaws txhua qhov chaw kom puv ntiaj teb thiab lawv yuav kav tag nrho lub ntiaj teb.’ (Chiv Keeb 1:28) Thaum Yehauvas nyuam qhuav pib qhia txog nws lub ntsiab ces zoo yam nkaus li nws hais tias “Alafas.” Hos thaum muab lub ntiaj teb kho ua lub vaj kaj siab thiab tib neeg los nyob puv ntiaj teb ntia lawm ces yog nws lub hom phiaj xaus, thiaj zoo yam nkaus li nws hais tias “Aumenkas.” Thaum hnub xya xaus, Yehauvas lub ntsiab rau tib neeg thiab lub ntiaj teb yuav muaj tiav tag nrho.​—Chiv Keeb 2:1-3. w23.11 5 ¶13-14

Txoj kev uas mus ntawm lub nroog Npanpiloos mus rau teb chaws Ixayees deb li plaub lub hlis tiam sis Yehauvas cog lus tias nws yuav muab txhua yam tshem ntawm lawv hauv ntej mus. Cov Yudais uas muaj kev ntseeg xam pom tias rov qab los mus rau teb chaws Ixayees yeej zoo tshaj li tej lawv muab tso tseg cia. Qhov koob hmoov uas zoo tshaj ntawd yog lawv txoj kev teev tiam. Tsis muaj ib lub tuam tsev siv los teev tiam Yehauvas hauv Npanpiloos li. Tsis muaj thaj rau cov neeg Ixayees tua tsiaj fij raws li Mauxes Txoj Kev Cai thiab tsis muaj cov pov thawj los tua tsiaj fij. Tsis tas li ntawd, Yehauvas cov tib neeg yeej tsis coob npaum li tej pej kum neeg uas tsis ntseeg Yehauvas thiab tsis quav ntsej Yehauvas tej kev cai. Yog li ntawd, cov Yudais uas muab siab teev tiam Yehauvas thiaj li tos tsis hnyu yuav rov qab mus nyob rau lawv qub teb qub chaw xwv lawv thiaj tau teev tiam Yehauvas kaj siab lug tso siab plhuav. w23.05 14-15 ¶3-4

Yuav kom peb “nyob hauv qhov pom kev,” peb yuav tau muaj Vajtswv lub hwj huam dawb huv pab peb vim tsis yooj yim ua lub neej dawb huv hauv lub qab ntuj uas nyiam kev plees kev yi. (1 Thexalaunikas 4:3-5, 7, 8) Vajtswv lub hwj huam dawb huv pab tau kom peb tsis txhob xav li lub qab ntuj neeg, xws li neeg lub tswv yim thiab tej kev xav uas txawv Vajtswv tej kev xav. Lub hwj huam dawb huv yuav pab tau kom peb “ua tau txhua yam zoo, ua neeg ncaj ncees.” (Efexaus 5:9) Yuav kom peb muaj lub hwj huam dawb huv pab peb, ib qho peb yuav tau ua yog thov kom Yehauvas muab rau peb. Yexus hais tias Yehauvas “muab lub hwj huam dawb huv rau cov uas thov nws.” (Lukas 11:13) Tsis tas li ntawd, thaum peb mus rau tej kev sib txoos, Yehauvas kuj muab nws lub hwj huam dawb huv los pab peb. (Efexaus 5:19, 20.) Vajtswv lub hwj huam dawb huv yuav pab tau kom peb coj lub neej uas haum Vajtswv siab. w24.03 23-24 ¶13-15

Koj puas xav kom koj ua tau siab ntev zog? Yog koj xav, koj yuav tau thov Vajtswv pab kom koj ua tau siab ntev dua qub. Vajtswv lub hwj huam dawb huv yuav pab kom peb ua tau siab ntev. (Kalatias 5:22, 23) Yog li peb yuav tau thov Yehauvas kom pub nws lub hwj huam dawb huv rau peb xwv peb thiaj coj tau tej cwj pwm zoo. Yeej meem thov Yehauvas kom nws muab nws lub hwj huam pab peb thaum peb ntsib tej yam uas peb yuav tsum tau ua siab ntev. (Lukas 11:13) Peb kuj thov Yehauvas pab kom peb pom qhov teeb meem ntawd li nws pom. Thaum peb thov Yehauvas tas, nco ntsoov ua siab ntev txhua txhua hnub. Thaum peb pheej thov Yehauvas pab peb ua siab ntev tsis tseg thiab ua siab ntev li peb ua tau ces ntev mus ntev tuaj peb yuav swm tus cwj pwm ntawd. Ib yam ntxiv uas yuav pab tau peb yog, ua zoo xav txog cov neeg siab ntev hauv phau Vajlugkub. Cov neeg ua siab ntev hauv phau Vajlugkub muaj coob. Thaum peb muab lawv cov yam ntxwv coj los ua zoo xav, ua zoo kawm, ces peb yuav paub tias ua siab ntev ua li cas. w23.08 22 ¶10-11

Yexus txhawb tus tub txib Petus tias Yehauvas yeej yuav txhawb nqa nws. Tom qab Yexus sawv rov los, Yexus thiaj li ua txuj ci kom Petus thiab cov tub txib ntaus tau ntses ntau ntau. (Yauhas 21:4-6) Qhov txuj ci no qhia rau Petus tias Yehauvas yeej yuav pab kom Petus muaj txawm peem. Petus thiaj li nco txog Yexus cov lus uas nws hais tias Vajtswv yeej yuav pub kom txawm peem rau cov uas “txhawb Vajtswv txoj kev kav.” (Mathais 6:33) Yog li ntawd, Petus thiaj li tsis muab nws txoj hauj lwm ntaus ntses saib hlob dua qhov uas mus tshaj tawm txoj xov zoo. Nws thiaj muaj lub siab tawv qhawv qhia rau hnub Pheetekos 33 tom qab Yexus yug, thiab pab tau coob leej ntau tus los ntseeg. (Tes Hauj Lwm 2:14, 37-41) Tom qab ntawd, nws kuj pab cov Xamalis thiab lwm haiv neeg los paub thiab raws Yexus Khetos. (Tes Hauj Lwm 8:14-17; 10:44-48) Yehauvas yeej siv Petus coj tau ntau haiv neeg los cuag nws. w23.09 20 ¶1; 23 ¶11

Kwv lam li ob xyoos tom qab cov Npanpiloos ua rau Yeluxalees puas tsuaj tas, Vaj Ntxwv Nenpukajnexales ua npau suav pom ib tug mlom loj siab thiab txaus ntshai heev. Nws thiaj hawv tias yog nws cov tuav xam piav tsis tau thiab txhais tsis tau nws zaj npau suav rau nws mas nws yuav muab lawv tua kom tas. Daniyees los yuav raug tua thiab. (Daniyees 2:3-5) Ces Daniyees thiaj mus cuag vaj ntxwv tam sim ntawd thiab ‘thov vaj ntxwv kom pub sij hawm ntev me ntsis’ es ‘nws mam li qhia thiab txhais zaj npau suav ntawd rau vaj ntxwv.’ (Daniyees 2:16) Daniyees siab yuav tsum tawv thiab nws yuav tsum muaj kev ntseeg nws thiaj ua tau li no rau qhov Vajtswv Txoj Lus yeej tsis tau hais tias Daniyees twb txhais npau suav dua los lawm. Daniyees kuj hais kom nws peb tug kwv luag ‘thov Vajtswv tus uas nyob saum ntuj hlub lawv thiab qhia tej yam uas tsis muaj leej twg paub rau lawv.’ (Daniyees 2:18) Yehauvas teb lawv tej lus thov. Daniyees thiaj mus txhais tau Nenpukajnexales zaj npau suav rau nws. Daniyees thiab nws peb tug kwv luag thiaj dim kev tuag. w23.08 3 ¶4

Xav seb ua siab ntev pab tau peb li cas. Thaum peb ua siab ntev peb zoo siab dua thiab muaj lub siab tus. Twb yog li ntawd, thaum peb ua siab ntev peb thiaj noj qab nyob zoo, muaj kev sib raug zoo nrog lwm tus, thiab muaj kev sib haum xeeb hauv lub koom txoos. Thaum muaj neeg txhob txwm ua kom peb chim siab los peb tsis chim sai thiab tsis tsim teeb meem kom loj ntxiv. (Ntawv Nkauj 37:8; Paj Lug 14:29) Tiam sis qhov uas tseem ceeb tshaj plaws yog peb xyaum peb Leej Txi tus uas nyob saum ntuj thiab peb haj yam muaj kev sib raug zoo nrog nws. Qhov uas peb ua siab ntev yeej pab tau peb kawg nkaws li. Txawm muaj tej thaud tsis yooj yim los, yog peb muaj Yehauvas pab ces peb yuav ua tau siab ntev. Thiab peb tso siab plhuav tias thaum peb ua siab ntev nyob tos lub qab ntuj tshiab, Yehauvas yuav ‘saib ntsoov txhua tus uas hwm nws, thiab cov uas cia siab rau nws txoj kev hlub uas tsis hloov li.’ (Ntawv Nkauj 33:18) Yog li, thov kom peb sawv daws ua tau siab ntev mus lawm yav tom ntej. w23.08 22 ¶7; 25 ¶16-17

Yakaunpaus hais tias ib tug txiv neej hais tau tias nws muaj kev ntseeg tiam sis nws tsis ua raws li tej nws ntseeg. (Yakaunpaus 2:1-5, 9) Yakaunpaus hais ntxiv txog ib tug uas pom ‘cov kwv tij ntseeg tsis hais poj niam los sis txiv neej, lawv tsis muaj noj los sis tsis muaj hnav’ tiam sis nws ho tsis cev tes pab dab tsi. Txawm hais tias tus ntawd xav tias nws muaj kev ntseeg los nws tes hauj lwm qhia tau tias nws tsis muaj kev ntseeg. (Yakaunpaus 2:14-16) Yakaunpaus muab Lahaj coj los ua ib qho piv txwv tias tej uas nws ua qhia tias nws muaj kev ntseeg heev. (Yakaunpaus 2:25, 26) Lahaj hnov txog tej Yehauvas ua thiab xam pom tias Yehauvas yeej nrog nraim cov Ixayees. (Yausuas 2:9-11) Tej uas Lahaj ua qhia tias nws muaj kev ntseeg heev vim nws tiv thaiv ob tug Ixayees uas mus soj teb chaws. Qhov no qhia tau tias txawm Lahaj yog noob txaug neeg txhaum thiab tsis yog ib tug Ixayees los Yehauvas suav tias nws ncaj ncees vim nws muaj kev ntseeg tib yam li Anplahas. Peb khaws tau Lahaj tus yam ntxwv tias tseem ceeb uas peb yuav tau ua raws li tej uas peb ntseeg. w23.12 5-6 ¶12-13

Peb uas yog cov Khixatias, peb tsis xav kom peb to taub tej ntiav ntiav hauv phau Vajlugkub xwb. Vajtswv twb muab nws lub hwj huam dawb huv los pab peb ces peb yeej kawm tau tej yam tob tob txog Vajtswv. (1 Kauleethaus 2:9, 10) Xws li, koj kuj mus tshawb nrhiav seb Vajtswv hlub cov uas teev tiam nws yav thaum ub li cas. Yog koj kawm li no ces koj yuav pom tias Yehauvas kuj hlub koj npaum li cas thiab. Koj kuj mus kawm seb Yehauvas xav kom cov Ixayees pe hawm nws li cas. Yog koj ua li no ces koj yuav pom tias Yehauvas xav kom peb pe hawm nws li ntawd niaj hnub nim no thiab. Los sis koj kuj ua tib zoo kawm txog cov faj lem uas hais txog Yexus lub neej thiab qhov uas nws mus tshaj tawm txoj xov zoo. Phau Yehauvas Cov Tim Khawv Phau Ntawv Tshawb Nrhiav Vajlugkub yuav pab koj tshawb nrhiav ntxiv txog cov ntsiab ntawd. Yog koj kawm tej tob tob hauv phau Vajlugkub ces yuav pab tau koj txoj kev ntseeg, thiab koj yuav “paub tseeb hais tias Vajtswv yog tus zoo li cas.”​—Paj Lug 2:4, 5. w23.10 18-19 ¶3-5

Thaum tus tub txib Petus hais kom peb ib leeg hlub ib leeg tiag tiag, zoo ib yam li thaum lub rooj muaj ib qho puas los sis tsis zoo nkauj ces yuav tsum muab ib daim ntaub nthuav kom dav dav thiaj npog tau txhua yam. Ces zoo tib yam li daim ntaub uas npog lub rooj ntawd, yog peb hlub peb cov kwv tij nkauj muam tiag tiag ces peb yuav tsum nthuav peb lub siab kom dav thiab zam txim rau lawv. Tsis yog zam ib ob zaug xwb tiam sis zam txhua zaus. Peb txoj kev hlub rau peb cov kwv tij nkauj muam yuav tsum ruaj khov khwb kho xwv peb thiaj tsis saib tej uas lawv ua meem txom thiab tej yam uas lawv ua tsis raws li peb lub siab nyiam. (Kaulauxis 3:13) Yog peb ua li no yuav qhia tias peb txoj kev hlub rau lawv ruaj khov khwb kho thiab yuav ua rau Yehauvas txaus siab. w23.11 11-12 ¶13-15

Thaum Vaj Ntxwv Yauxiyas muaj 26 xyoo, nws muab lub tuam tsev txhim kho dua tshiab. Thaum sam sim kho lub tuam tsev, lawv txawm nrhiav tau ‘Phau Kev Cai uas Vajtswv muab cob rau Mauxes.’ Thaum vaj ntxwv hnov cov lus uas nyob hauv tas, nws txawm hloov tsawg tsuag thiab mloog raws li tej lus sau tseg ntawd. (2 Vaj Keeb Kwm 34:14, 19-21) Koj puas xav nyeem phau Vajlugkub tsis tu ncua? Yog koj nyeem no, ho zoo li cas lawm xwb? Koj puas cim tau tej nqe uas yuav pab tau koj? Thaum Yauxiyas muaj 39 xyoos, nws ua tau ib qho yuam kev loj heev uas txo tau nws txoj sia. Nws tsis tso siab rau Yehauvas, nws tso siab rau nws tus kheej xwb. (2 Vaj Keeb Kwm 35:20-25) Muaj ib yam peb kawm tau los ntawm zaj no tias txawm peb yuav laus yuav hluas los sis kawm Vajtswv Txoj Lus ntev npaum li cas lawm los peb yuav tau nrhiav ntshis Yehauvas pab. Xws li nco ntsoov thov Vajtswv tsis tseg tsis tu, kawm nws Txoj Lus, thiab mloog cov ntseeg uas paub tab lus. Yog peb ua li no, peb yuav tsis mus ua tej yam yuam kev uas loj heev tiam sis peb yuav ua lub neej nyob tshav ntuj nrig.​—Yakaunpaus 1:25. w23.09 12 ¶15-16

Phau Vajlugkub tham txog coob tus poj niam uas hlub thiab teev tiam Yehauvas. Lawv yog “cov uas xyuam xim” thiab “txhua yam uas lawv ua lawv ua ncaj.” (1 Timautes 3:11) Tsis tas li ntawd xwb, muaj cov muam paub tab uas hlub Yehauvas nyob hauv lub koom txoos rau cov muam uas tseem hluas xyaum. Nej cov muam uas tseem hluas, puas muaj tej tug muam uas paub tab hauv lub koom txoos uas nej xyaum tau? Ua tib zoo saib lawv tej yeeb yam es xyaum raws li lawv. Yuav kom peb ua tau ib tug Khixatias zoo, peb yuav tsum txo hwj chim. Tus poj niam uas txo hwj chim yuav muaj ib txoj kev sib raug zoo nrog Yehauvas thiab lwm tus. Xws li tus poj niam uas hlub Yehauvas yeej zoo siab hlo ua raws li 1 Kauleethaus 11:3 uas qhia seb tus twg yog tus coj hauv lub koom txoos thiab hauv lub cuab lub yig. Cia peb mus kawm seb peb yuav siv lub hauv paus ntsiab lus no li cas hauv lub koom txoos thiab hauv lub cuab lub yig. w23.12 18-19 ¶3-5

Yehauvas xav kom tus txiv hlub nws tus poj niam thiab saib xyuas kom tus poj niam muaj noj muaj haus, muaj kev kaj siab, thiab muaj kev ntseeg. Kev txawj ntse, saib taus poj niam, thiab ua ib tug luag tso siab rau, yuav pab tau koj ua ib tug txiv zoo. Tom qab koj yuav poj niam lawd, ces tej zaum koj kuj yuav ua ib leej txiv. Yehauvas tus qauv uas ua ib leej txiv zoo pab tau koj li cas? (Efexaus 6:4) Yehauvas tsis ntshai qhia rau sawv daws paub tias nws hlub nws Leej Tub Yexus. Thiab nws Leej Tub los, kuj ua haum nws siab. (Mathais 3:17) Thaum koj yog ib leej txiv lawd, nco ntsoov qhia rau koj cov me nyuam tsis tseg tias koj hlub lawv. Thaum lawv ua tau ib yam zoo, cia li qhuas lawv. Cov txiv uas xyaum Yehauvas yeej pab tau lawv cov me nyuam loj hlob los ua ib co txiv neej thiab poj niam Khixatias uas paub tab. Yog koj pab lwm tus hauv koj tsev neeg thiab hauv lub koom txoos ces yuav pab tau koj ua ib tug zoo txiv. Thiab qhia rau lawv tias koj hlub lawv thiab lawv muaj nqis rau koj.​—Yauhas 15:9. w23.12 28-29 ¶17-18

Txawm peb teev tiam Yehauvas los peb yeej yuav raug tej kev nyuaj siab ntxhov plawv thiab muaj mob muaj nkeeg li tib neeg ib txwm raug. Tsis tas li ntawd, tej zaum peb tseem yuav tau thev tej kev tsim txom los sis kev tawm tsam los ntawm cov uas ntxub Yehauvas cov tib neeg. Txawm Yehauvas tsis tshem tej no tawm mus los nws cog lus tias nws yuav pab peb. (Yaxayas 41:10) Yog peb muaj Yehauvas pab, peb yuav muaj kev zoo siab, txawj txiav txim siab, thiab yuav tsis tso nws tseg tab txawm yuav raug kev nyuaj siab npaum li cas. Yehauvas cog lus tias nws yuav pub kom peb “muaj lub siab tus.” (Filipis 4:6, 7.) Tos peb muaj tau lub siab tus ntawd los twb yog vim peb muaj ib txoj kev sib raug zoo nrog nws. “Neeg yeej tsis nkag siab txog Vajtswv txoj kev siab tus no.” Puas tau muaj ib zaug uas tom qab koj thov Vajtswv tag ces koj lub siab cia li nyob tus yees lawm xwb? Qhov ntawd twb yog “Vajtswv txoj kev siab tus.” w24.01 20 ¶2; 21 ¶4

Cov uas hlub Yehauvas yeej xav qhuas nws lub npe kom kawg siab kawg ntsws. Daviv paub tias yog peb qhuas Yehauvas lub npe ces twb yog peb qhuas Yehauvas. Thaum peb hnov lub npe Yehauvas ua rau peb xav txog tej yeeb yam uas Yehauvas muaj thiab txhua yam zoo kawg nkaus uas nws tau ua. Daviv yeej hwm Yehauvas lub npe thiab qhuas nws. Daviv yeej qhuas Yehauvas ‘tag nrho [nws] lub cev’ los sis kawg siab kawg ntsws. Cov Levis los kuj qhuas Yehauvas ib yam li Daviv. Lawv lees hlo tias Yehauvas lub npe mas dawb huv kawg nkaus yeej tsis muaj leej twg qhuas txaus. (Nehemis 9:5.) Cov uas txo hwj chim es qhuas Yehauvas yeej ua rau nws zoo siab kawg nkaus. w24.02 9 ¶6

Yog koj ncav tsis cuag lub hom phiaj koj teem tseg ntawd los Yehauvas yeej yuav tsis xav li cas. (2 Kauleethaus 8:12) Kawm los ntawm tej yam cuam tshuam es ua rau koj ncav tsis cuag koj lub hom phiaj. Nco ntsoov tej yam uas koj tau ua los lawm. Nyob hauv phau Vajlugkub hais tias ‘Vajtswv yog tus ncaj ncees! Nws yeej yuav nco ntsoov tej hauj lwm uas nej tau ua los lawm.’ (Henplais 6:10) Yog li ntawd, koj yuav tau nco ntsoov tib yam nkaus. Yog koj xav txog tej uas koj twb ua tag los lawm yuav pab tau koj txoj kev sib raug zoo nrog Yehauvas kom loj zuj zus ntxiv, mus qhia lwm tus txog Yehauvas los sis ua kev cai raus dej. Zoo ib yam li yav tas los lawm koj twb ncav cuag koj tej hom phiaj ntawm sab kev ntseeg, koj yeej yuav ncav cuag koj lub hom phiaj tom ntej no tib yam nkaus. Yog muaj Yehauvas ua tus pab koj lawm ces koj yeej yuav ncav cuag koj lub hom phiaj. Thaum koj tab tom ua kom tau raws li koj lub hom phiaj ntawm sab kev ntseeg, nco ntsoov tej uas Yehauvas tau ua los pab koj thiab nws tau foom koob hmoov li cas rau koj. (2 Kauleethaus 4:7) Yog koj peem kam tiag tsis txhob tso tseg ces koj yuav tau txais koob hmoov ntau tshaj no ntxiv.​—Kalatias 6:9. w23.05 31 ¶16-18

Yehauvas yeej nrhiav kev los qhia nws cov tib neeg tias nws hlub thiab txaus siab rau lawv. Yehauvas qhia rau Yexus ob zaug tias nws hlub thiab txaus siab rau Yexus. (Mathais 3:17; 17:5) Koj puas xav kom Yehauvas qhia koj tias nws txaus siab rau koj? Yehauvas tsis hais lus saum ntuj tuaj rau peb tiam sis nws siv nws Txoj Lus los hais rau peb. Thaum peb nyeem cov lus uas Yexus hais rau nws cov thwj tim ces twb zoo cuag li Yehauvas hais lus rau peb. Yexus coj tau Yehauvas tus yam ntxwv zoo kawg li. Thaum peb nyeem Yexus cov lus uas nws hais tias nws txaus siab heev rau nws cov thwj tim ces twb zoo yam li Yehauvas hais cov lus ntawd rau peb thiab. (Yauhas 15:9, 15) Thaum peb raug kev sim siab, tsis yog Yehauvas tsis txaus siab rau peb lawm. Tiam sis lub sij hawm ntawd yog lub sij hawm los qhia tias peb hlub thiab tso siab rau peb tus Vajtswv npaum li cas.​—Yakaunpaus 1:12. w24.03 28 ¶10-11