Vajtswv Lub Nceeg Vaj​—Yuav Pab Tau Koj Li Cas?

Raws li koj tau nyeem tas los no, Vajtswv lub Nceeg Vaj tseem ceeb heev rau Yehauvas Cov Timkhawv. Tej zaum koj kuj xav paub ntxiv seb Vajtswv lub Nceeg Vaj yuav foom koob hmoov li cas rau noob neej. Tiamsis tej zaum koj kuj xav tias xyov puas yuav muaj tau raws li Vajtswv cog tseg ntawd tiag.

Txhua yam uas koj hnov luag hais, yeej zoo rau koj ua tib zoo taug qab seb puas muaj tseeb tiag. (Paj Lug 14:15) Thaum ub muaj ib co neeg nyob hauv lub moos Npele-a uas tau tshawb nrhiav ib yam li ntawd.a Thaum lawv xub kawm txoj xov zoo txog lub Nceeg Vaj, tsis yog lawv lam ntseeg xwb. Tiamsis lawv “niaj hnub tshawb nrhiav Vajtswv Txojlus saib tej no muaj tseeb li uas hais los tsis muaj.” (Tubtxib Tes Haujlwm 17:11) Cov neeg Npele-a ua tib zoo muab txoj xov zoo uas lawv tau hnov los piv rau Vajtswv Txojlus. Lawv mam li pom tias txoj xov zoo yeej muaj tseeb tiag.

Yehauvas Cov Timkhawv thov caw koj los ua ib yam li cov neeg hauv lub moos Npele-a. Peb qhia Vajlugkub pub dawb xwb. Thov muab Yehauvas Cov Timkhawv txojkev ntseeg txog lub Nceeg Vaj piv rau phau Vajlugkub seb puas muaj tseeb tiag.

Thaum koj kawm txog lub Nceeg Vaj hauv phau Vajlugkub, yuav teb tau cov lus nug no:

• Peb los qhovtwg los?

• Ua li cas ho muaj tibneeg?

• Ua li cas Vajtswv cia muaj kev txom nyem?

• Tom qab ib tug neeg tuag, ua li cas rau nws lawm xwb?

• Lub ntiajteb puas yuav raug puam tsuaj?

• Tsev neeg yuav tsum ua li cas thiaj muaj kev zoo siab?

Qhov tseem ceeb tshaj, thaum koj kawm Vajlugkub yuav pab tau koj “txav los ze Vajtswv.” (Yakaunpau 4:8) Thaum koj pib txav los ze Vajtswv koj yuav pom tias Vajtswv lub Nceeg Vaj yeej pab tau koj tiag, tsis hais tamsim no xwb tiamsis yuav pab tau koj mus ib txhis. Yexus tau thov nws Leej Txiv tias: “Txojsia ib txhis tsis kawg yog li no, yog qhov uas lawv paub koj uas yog tus Vajtswv tib leeg uas yog tus tseem Tswv thiab paub Yexus Khetos uas koj txib los.”​—Yauhas 17:3.