Cob Koj Cov Menyuam Ua Vajtswv Tes Num
1. Ntawv Nkauj 148:12, 13 txhawb kom cov niam txiv Khixatia ua dabtsi?
1 Yehauvas yeej caw kom cov hluas los qhuas nws. (Nt.Nk. 148:12, 13) Yog li ntawd, cov niam txiv tsis yog qhia kom lawv cov menyuam paub qhov tseeb thiab paub tej kevcai hauv phau Vajlugkub xwb. Tiamsis lawv qhia kom tej menyuam txawj tshaj txoj xov zoo thiab. Lawv yuav pab tej menyuam loj hlob li cas ntawm sab kev ntseeg?
2. Yog tias leej niam leej txiv tseg tus qauv zoo, yuav pab tau tej menyuam li cas?
2 Tus Qauv Zoo: Tus Thawj Kide-oo tau hais li no rau nws 300 leej tub rog: “Nej ntsia ntsoov kuv thiab ua ib yam li kuv.” (C.Th. 7:17) Menyuam yaus saib niam txiv coj li cas ces lawv xyaum raws li ntawd. Muaj ib leej txiv ua haujlwm hmo ntuj sab kawg li. Txawm li ntawd los, Hnub Rau (Saturday) thaum nws los tsev nws yeej tsis pw li, tiamsis nws coj cov menyuam mus tshaj tawm txoj xov zoo. Vim nws coj li ntawd, nws cov menyuam pom tias lawv yuav tsum muab tes haujlwm tshaj tawm txoj xov zoo tso ua ntej hauv lawv lub neej. (Mth. 6:33) Koj cov menyuam puas pom tias koj nyiam thov Vajtswv, nyeem Vajlugkub, tsa tes teb, thiab qhia Vajlugkub? Tsis muaj leejtwg yuav ua tau zoo tag nrho. Txawm li ntawd los, yog tias neb ob niam txiv mob siab ua Vajtswv tes num, thaum neb cob cov menyuam, lawv yuav mloog dua.—Kc. 6:6, 7; Loos 2:21, 22.
3. Cov niam txiv yuav tau pab tej menyuam muaj tej hom phiaj zoo li cas?
3 Tej Hom Phiaj Uas Pab Lawv Loj Hlob: Cov niam txiv yeej nquag cob menyuam thaum yau los, kom xyaum mus kev, xyaum hais lus, thiab xyaum hnav ris tsho tibsi. Thaum tus menyuam kawm tau ib yam zuj zus lawm, leej niam leej txiv cob kom xyaum dua lwm yam thiab. Ib yam li ntawd, cov niam txiv Khixatia, yuav tsum cob kom cov menyuam nrhiav tej hom phiaj ntawm sab kev ntseeg, raws li lawv txawj ua. (1Khl. 9:26) Koj puas qhia koj cov menyuam kom lawv txawj teb, hauv nruab siab tuaj, thiab qhia kom lawv txawj npaj lus qhia thaum Kawm Kev Tshaj Tawm? (Nt.Nk. 35:18) Koj puas cob kom lawv txawj ua Vajtswv tes num rau ntau txojkev? Koj puas pab kom lawv muaj lub hom phiaj ua kevcai raus dej, thiab ua haujlwm puv ntoob rau Yehauvas? Koj puas cob kom lawv nrog cov uas kub siab tshaj tawm txoj xov zoo ntaus phoojywg, kom thiaj txhawb tau lawv zog?—P.L. 13:20.
4. Yog cov niam txiv cob qhia menyuam thaum yau los, pab tau cov menyuam li cas?
4 Tus sau nkauj hais li no: “Au Vajtswv, koj twb qhia kuv txij thaum yau los, thiab kuv tseem piav koj tej haujlwm phimhwj.” (Nt.Nk. 71:17) Thaum cov menyuam tseem yau, cia li cob kom lawv paub Yehauvas zoo thiab paub ua nws tes haujlwm. Yog koj cob lawv li no, ces yuav pab tau lawv mus txog hnub laus!—P.L. 22:6.