Mloog Thiaj Kawm Tau
1. Thaum peb mus tom lub rooj sib txoos loj, vim li cas peb yuav tau ua tib zoo mloog thiaj kawm tau?
1 Tsis ntev tom ntej no yuav pib muaj cov rooj sib txoos loj rau xyoo 2013. Cov kwvtij tau siv sijhawm ntau heev los npaj tej lus qhuab qhia kom pab tau tibneeg thoob ntiajteb. Koj puas tau npaj mus koom 3 hnub huvsi? Thaum mus cov rooj sib txoos loj, yuav muaj ntau yam los tab kaum peb, yog li ntawd peb yuav tsum ua tib zoo mloog thiaj hnov tej lus qhuab qhia. Cov rooj sib txoos loj ntev tshaj tej kev sib txoos tom tsev nceeg vaj, yog li peb yuav tsum ua siab ntev mloog tiag thiaj mloog tau. Tsis tas li ntawd xwb, thaum peb sawv kev mus koom kev sib txoos loj, kuj muaj ntau yam ua rau peb sab heev. Yog li ntawd, peb yuav ua li cas peb thiaj mloog thiab kawm tau?—Kc. 31:12.
2. Ua ntej peb mus koom rooj sib txoos loj, peb yuav npaj siab li cas?
2 Ua Ntej Lub Rooj Sib Txoos Loj: Peb lub Vej xaij (Web site), www.pr418.com/hmn muaj daim kom tswj rau lub rooj sib txoos loj. Daim kom tswj ntawd muaj tag nrho cov lus qhuab qhia thiab cov nqe Vajlugkub uas txhawb cov ntsiab ntawd. Yog tias peb muaj Is Taws Nej (Internet), mus saib daim kom tswj ua ntej mus koom lub rooj sib txoos loj. Yog peb ua li no yuav pab peb npaj siab mloog. (Exl. 7:10) Thaum nej tsev neeg pe hawm Vajtswv ua ke, txhob txwm siv sijhawm los tham txog daim kom tswj no, kom sawvdaws thiaj kub siab mus.
3. Peb yuav ua li cas thiaj mloog tau lus qhuab qhia?
3 Thaum Nyob Hauv Lub Rooj Sib Txoos Loj: Zoo rau koj mus tawm rooj ua ntej yuav pib kev sib txoos. Lub sijhawm mloog lus qhuab qhia, zoo rau koj muab koj lub xov tooj ntawm tes kaw, xwv thiaj tsis muaj neeg hu thiab ntaus ntawv tuaj rau koj. Yog tias muaj xwm tseem ceeb uas luag yuav hu koj, zoo muab koj lub xov tooj tso kom yau, thiaj tsis tab kaum lwm tus. Yog tias koj siv lub koos pis tawj (computer) ntawm tes, tsis txhob lam tau lam siv ua rau lwm tus tsis tau zoo mloog. Thaum pib kev sib txoos lawm, tsis txhob noj mov lossis haus dej. (L.Tsy. 3:1) Ntsia ntsoov tus uas tabtom cev lus qhuab qhia. Thaum nws nyeem ib nqes Vajlugkub twg, nthuav koj phau los saib, thiab sau tej ntsiab lus tseem ceeb cia.
4. Cov niam txiv yuav ua li cas, lawv cov menyuam thiaj ua tib zoo mloog?
4 Peb kuj xav kom peb cov menyuam mloog es thiaj kawm tau tej lus qhuab qhia tom lub rooj sib txoos loj thiab. Paj Lug 29:15 hais tias: “Tus menyuam uas muab tso ywj siab coj kev txaj muag rau leej niam.” Yog li ntawd, zoo rau tsev neeg zaum ua ke xwv leej niam leej txiv thiaj saib tau lawv cov menyuam, kom lawv zaum twjywm mloog. Li no cov menyuam thiaj tsis tham pem, lossis ntaus ntawv hauv xov tooj mus rau lwm tus, thiab lawv thiaj tsis sawv mus mus los los. Txawm cov menyuam yaus uas tsis tau nkag siab tej peb kawm los, zoo cob kom lawv tsis txhob tsaug zog es zaum twjywm xwb.
5. Peb yuav tham txog lub rooj sib txoos loj rau lub caij twg, thiab vim li cas zoo rau peb ua li ntawd?
5 Txhua Hnub Tom Qab Lub Rooj Sib Txoos Loj: Pw ntxov, tsis txhob nyob lig lig, thiaj so txaus. Txhua hmo zoo rau tsev neeg siv sijhawm los tham txog tej uas lawv tau kawm hnub ntawd, xwv sawvdaws thiaj nco tau. Yog peb nrog peb cov phoojywg mus noj hmo ua ke, kuj zoo rau peb nqa tej uas peb twb muab sau cia lawd, peb thiaj tau tham txog tej ntawd thiab. Thaum dhau lub rooj sib txoos loj, zoo rau peb muab tej uas peb tau kawm los tham rau hmo tsev neeg pe hawm Vajtswv ua ke, seb pab tau tsev neeg li cas. Ib lub lim tiam twg siv sijhawm los saib tej ntaub ntawv tshiab uas nqa tom lub rooj sib txoos loj los.
6. Yuav kom lub rooj sib txoos loj pab tau peb tiag, peb yuav tau ua dabtsi?
6 Ib tsum mov yog tsis muaj neeg noj, ces tsis muaj qab hau dabtsi. Ib yam li ntawd lub rooj sib txoos loj uas yuav los no, yog tsis ua tib zoo mloog kuj pab tsis tau dabtsi thiab. Cia peb mus koom kom tau 3 hnub tibsi, mus ua tib zoo mloog cov lus qhuab qhia thiab xyaum raws li tej uas peb kawm ntawd. Yog peb ua li no, ces yeej yuav pab tau peb tiag.