Xyaum Cov Uas Cev Vajtswv Lus Tus Qauv—Amau
1. Vim li cas Amau tus qauv ho txhawb tau peb lub zog?
1 Puas tau muaj ib zaug uas koj xav tias tsis tsim nyog koj ua ib tug tshaj tawm txoj xov zoo vim koj tsis paub ntaub ntawv thiab tsis muaj txiag nplua nuj? Yog koj tau xav li no, Amau tus qauv yuav txhawb tau koj lub zog heev. Amau tsuas yog neeg yug tsiaj yug txhuv thiab tu txiv cev xwb, tiamsis Yehauvas pub hwjchim rau nws mus tshaj tawm ib txoj xov uas tseem ceeb heev. (Am. 1:1; 7:14, 15) Tib yam li ntawd, niaj hnub no los, Yehauvas kuj siv cov uas siab mos siab muag thiab txo hwjchim los ua nws tes haujlwm. (1Khl. 1:27-29) Amau tus qauv pab tau peb ua Yehauvas tes num li cas ntxiv?
2. Thaum peb mus qhia Vajlugkub, peb yeej yuav ntsib kev tawm tsam. Tiamsis Yehauvas cov lus cog tseg twg pab tau peb sawv ruaj khov?
2 Sawv Ruaj Khov Thaum Ntsib Kev Tawm Tsam: Amaxiya yog ib tug pov thawj rau 10 xeem Yixayee nyob sab qaum teb uas teev tiam mlom thav nyuj. Thaum Amaxiya hnov Amau cev Vajtswv lus, nws txawm ntiab Amau tias: ‘Khiav mus tsev! Tsis txhob tuaj xeeb txob peb! Peb muaj peb ib txojkev ntseeg lawm!’ (Am. 7:12, 13) Tom qab ntawd, Amaxiya txawm mus cuag Vajntxwv Yelaunpau-as, thiab muab Amau cov lus ntxeev kom Vajntxwv txwv tsis pub Amau cev lus. (Am. 7:7-11) Txawm li ntawd los, Amau yeej tsis ntshai li. Niaj hnub no, cov Khixatia cuav ib txhia thawj coj kuj mus cuag tej nom tswv kom pab lawv tsim txom Yehauvas cov tibneeg thiab. Tiamsis, Yehauvas tau cog lus tseg tias tsis muaj ib yam cuab yeej twg uas tau tsim los yuav tawm tsam yeej peb.—Yxy. 54:17.
3. Niaj hnub no peb tshaj tawm 2 txoj xov twg?
3 Tshaj Tawm Vajtswv Txojkev Txiav Txim Thiab Tej Koob Hmoov: Phau ntawv Amau tham txog Yehauvas txojkev txiav txim rau 10 xeem Yixayee uas nyob sab qaum teb. Tsis tas li ntawd, phau ntawv kuj qhia txog Yehauvas tej lus cog tseg rau cov Yixayee tias lawv yuav tau rov qab los nyob hauv lawv tej qub teb qub chaw thiab Yehauvas yuav foom koob hmoov nplua mias rau lawv. (Am. 9:13-15) Niaj hnub no thaum peb mus tshaj tawm txoj xov zoo txog lub Nceeg Vaj, peb kuj qhia txog Yehauvas txojkev txiav txim uas yuav los sai sai no thiab. (2Pt. 3:7; Mth. 24:14) Yehauvas yuav muab cov neeg limhiam rhuav tshem rau hnub Amakedoo, ces tom qab ntawd lub ntiajteb yuav ua ib lub vaj kaj siab.—Nt.Nk. 37:34.
4. Vim li cas peb thiaj ruaj siab tias peb yuav ua tau Yehauvas tes haujlwm tiav?
4 Niaj hnub no thaum peb mus tshaj tawm txoj xov zoo txog lub Nceeg Vaj, muaj coob tus tsis nyiam. Yog li ntawd, peb yuav tsum muaj kev ntseeg rau Yehauvas peb thiaj kub siab lug ua nws tes haujlwm. (Yh. 15:19) Tsis tas li ntawd xwb, peb ruaj siab tias Yehauvas yuav pab kom peb ua tau nws tes haujlwm tiav, ib yam li nws tau pab Amau lawd.—2Khl. 3:5.