Xyaum Cov Uas Cev Vajtswv Lus Tus Qauv—Hauxeya
1. Tej zaum koj yuav xav txog lo lus nug twg?
1 Thaum koj pom Yehauvas ua zoo rau koj thiab hlub koj, tej zaum koj yuav xav li no: ‘Kuv yeem muab tej yam twg tso pov tseg es thiaj muaj sijhawm teev tiam Yehauvas?’ (Nt.Nk. 103:2-4; 116:12) Hauxeya zoo siab hlo ua raws li Yehauvas tau sam hwm, txawm yuav nyuaj npaum li cas los xij. Peb yuav ua li cas thiaj xyaum tau Hauxeya?
2. Hauxeya tus qauv pab tau peb ua siab ntev mus tshaj tawm li cas?
2 Qhia Vajlugkub Rau Lub Caij Nyoog Phem: Cov lus Yehauvas hais kom Hauxeya mus cev yog xub cev rau 10 xeem Yixayee uas feem coob twb tsis pe hawm nws lawm. Tus Vajntxwv Yelaunpau-as tom qab no tau ua tej uas Yehauvas pom tias phem kawg li thiab tau hau ntsoov teev mlom thav nyuj uas thawj tug Yelaunpau-as tau puab. (2Vntx. 14:23, 24) Cov vajntxwv uas kav 10 xeem Yixayee tom qab no los kuj ua phem ib yam nkaus, thiaj ua rau cov Yixayee raug puam tsuaj rau xyoo 740 U.Nt.Y. Txawm tias txojkev pe hawm cuav nyob puv ntia rau txhua qhov los Hauxeya yeej cev Yehauvas lus tsis tseg tau tshaj li 59 xyoos. Peb puas txiav txim siab tuag nthi mus qhia txoj xov zoo xyoo tas xyoo tuaj tib yam li Hauxeya txawm tibneeg tsis kam mloog peb lossis tawm tsam peb?—2Tmt. 4:2.
3. Hauxeya lub neej ua tau ib qho piv txwv li cas txog Yehauvas txojkev khuvleej?
3 Xav Txog Yehauvas Txojkev Khuvleej: Yehauvas hais kom Hauxeya yuav “ib tug pojniam uas nyiam deev hluas nraug.” (Hxy. 1:2) Kaumaw yug tau 1 tug metub rau Hauxeya thiab tom qab no yug tau 2 tug menyuam hluas nraug. Qhov uas Hauxeya zoo siab hlo zam txim rau Kaumaw ua piv txwv txog qhov Yehauvas khuvleej cov neeg Yixayee heev uas tau tso nws tseg lawm. (Hxy. 3:1; Loos 9:22-26) Peb puas yeem tso tej uas peb nyiam tseg es mus tshaj tawm Yehauvas txojkev khuvleej rau txhua yam neeg?—1Khl. 9:19-23.
4. Tej yam twg uas peb yeem muab tso tseg es thiaj li muaj sijhawm ua Yehauvas tes haujlwm?
4 Ib txhia teev tiam Yehauvas tau tso lawv tej haujlwm zoo uas them nyiaj ntau tseg xwv thiaj muaj sijhawm ntau mus ua Yehauvas tes num. Lwm cov tsis yuav pojniam yuav txiv lossis muaj menyuam xwv thiaj tau zoo ua Vajtswv tes haujlwm. Thaum peb xav txog Hauxeya lub neej tej zaum peb yuav xav tias, ‘ntshe kuv ua tsis tau li nws.’ Tiamsis yog peb nco txiaj ntsig rau Yehauvas txojkev siab dawb siab zoo thiab tso siab rau nws lub hwj huam dawb huv pab peb, ces Yehauvas yeej yuav siv peb ua tej uas peb xav tias peb ua tsis tau ib yam li Hauxeya.—Mth. 19:26; Flp. 2:13.